“Agosto 3–9. Alma 43–52: ‘Magmakanunayon diha sa Hugot nga Pagtuo kang Kristo,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Agosto 3–9. Alma 43–52,” Dali, Sunod Kanako—Alang sa mga Indibidwal ug mga Pamilya: 2020
Alang sa mga Panalangin sa Kalingkawasan, ni Scott M. Snow
Agosto 3–9
Alma 43–52
“Magmakanunayon diha sa Hugot nga Pagtuo kang Kristo”
Daw ang mga hitabo nga gihulagway diha sa Alma 43–52 dili kaayo tukma para kanimo. Apan sama sa tanang kasulatan, ang Ginoo adunay mensahe alang kanimo. Pangitaa kini sa mainampoong paagi.
Irekord ang Imong mga Impresyon
Kon basahon nato ang mga pulong dapit sa sinugdanan sa Alma kapitulo 43—“Ug karon ako mobalik sa asoy sa mga gubat tali sa mga Nephite ug sa mga Lamanite”—natural lang nga mahibulong ka nganong gilakip ni Mormon kini nga mga sugilanon sa gubat nga limitado ra man ang luna diha sa mga palid (tan-awa sa Mga Pulong ni Mormon 1:5). Tinuod nga daghan kita og mga gubat sa katapusang mga adlaw, apan adunay importansya ang iyang mga pulong nga lapas sa mga paghulagway sa estratehiya ug trahedya sa gubat. Ang iyang mga pulong nag-andam usab kanato alang sa gubat diin “tanan kita apil” (Hymns, nu. 250), ang gubat nga atong gipakig-awayan matag adlaw batok sa mga pwersa sa dautan. Kini nga gubat tinuod gayud, ug ang sangputanan makaapekto sa atong kinabuhi nga mahangturon. Sama sa mga Nephite, kita “nadasig pinaagi sa usa ka maayo nga katuyoan,” nga mao ang “atong Dios, atong tinuohan ug kagawasan, ug sa atong kalinaw, sa atong [mga pamilya].” Gitawag kini ni Moroni og “ang kalihokan sa mga Kristiyanos,” ang mao gihapon nga katuyoan [kawsa] nga atong gipakig-awayan karon (Alma 43:45; 46:12, 16).
Mga Ideya alang sa Personal nga Pagtuon sa Kasulatan
Ang mga gubat diha sa Basahon ni Mormon nagtudlo kanako mahitungod sa mga gubat batok sa dautan.
Ang pagbasa mahitungod sa mga gubat tali sa mga Nephite ug mga Lamanite posibling mas makahuluganan kanimo kon pangitaon nimo ang mga pagkasusama niini sa imong personal nga mga pagpakiggubat. Samtang magbasa ka sa Alma 43–52, bantayi kon unsay gihimo sa mga Nephite nga mipalampos (o wala mopalampos) kanila. Dayon pamalandungi kon unsaon nimo sa paggamit ang unsay imong nakat-unan aron matabangan ka nga modaog sa imong espiritwal nga mga pagpakiggubat. Samtang magtuon ka sa mga bersikulo sama sa mosunod, isulat ang imong mga hunahuna kon unsaon nimo sa pagsunod ang ehemplo sa mga Nephite:
-
Alma 43:19. Ang mga Nephite andam sa mga taming. (Makapaningkamot ko nga maandam ang akong kaugalingon sa espiritwal nga taming.)
-
Alma 43:23–24. Gitinguha nila ang giya sa propeta.
Panid-i usab kon giunsa sa mga Lamanite ug sa mga masupilong Nephite sa pagpaningkamot nga mapildi ang mga Nephite. Kining mga butanga makapasidaan kanimo kon sa unsang paagi ang kaaway mosulay sa pag-atake kanimo. Samtang magtuon ka, isulat kon sa unsang paagi si Satanas moatake kanimo sa susama nga mga paagi:
-
Alma 43:8. Nagtinguha si Zerahemnah nga masuko ang mga tawo aron duna siyay gahum batok kanila. (Kon masuko ko sa ubang tawo, gihatagan nako si Satanas og gahum batok kanako.)
-
Alma 43:29. Gusto sa mga Lamanite nga himoong bihag ang mga Nephite.
Depensa sa usa ka Siyudad sa Nephite, ni Minerva K. Teichert
Samtang maningkamot ko nga magmatinud-anon sama ni Moroni, mas mahisama ako sa Manluluwas.
Nangandoy ka ba nga mas mahisama sa Manluluwas ug maminusan ang gahum sa kaaway sa imong kinabuhi? Ang usa ka paagi mao ang pagsunod sa pahimangno diha sa Alma 48:17 nga mao ang pagkahimong “sama ngadto ni Moroni.” Tan-awa og maayo ang mga kinaiya ni Moroni ug mga buhat nga gihulagway sa tibuok Alma 43–52 apan labi na diha sa 46:11–28 ug sa 48:7–17. Unsa ang nakahatag kanimo og pagdayeg mahitungod niining “gamhanan nga tawo”? Sa unsang paagi ang mga kinaiya ug mga buhat nga susama sa iyaha makapahuyang sa gahum sa panulay sa imong kinabuhi? Hunahunaa kon unsay nakadasig kanimo nga sundon ang ehemplo ni Moroni ug mas mahisama sa Manluluwas.
Anam-anamon kita sa paglingla ug pagtintal ni Satanas.
Nasayud si Satanas nga ang kadaghanan kanato dili gustong makasala og dagko o motuo sa dagkong bakak. Busa, mogamit siya og gagmayng mga bakak ug mga tintasyon aron madala kita ngadto sa daw gagmayng sala—kutob sa daghan nga gihunahuna niyang modawat. Padayon niya kining himoon hangtud nga mahisalaag kita palayo sa kasiguroan sa matarung nga panimuyo.
Makita nimo kini nga sundanan diha sa istorya bahin ni Amalickiah nga naglingla ni Lehonti, nga anaa sa Alma 47. Samtang magtuon ka, hunahunaa kon sa unsang paagi kaha si Satanas mosulay sa paglingla kanimo, sama sa gihulagway ni Elder Robert D. Hales:
“Ang mabudhion nga si Amalickiah miawhag ni Lehonti sa ‘pagkanaog’ ug makigkita niya sa walog. Apan dihang si Lehonti mibiya sa bungtod, gihiloan siya ‘sa hinay-hinay’ hangtud nga siya namatay ug ang iyang kasundalohan naadto sa mga kamot ni Amalickiah (tan-awa sa Alma 47). Pinaagi sa mga argumento ug mga akusasyon, ang ubang mga tawo molansis kanato sa pagbiya sa taas nga lugar. Sa luwas nga kahimtang anaa diha ang kahayag. … Mao kini ang luwas nga lugar” (“Kristohanong Kaisug: Ang Bugti sa Pagkadisipulo,” Liahona, Nob. 2008, 74).
Tan-awa usab sa 2 Nephi 26:22; 28:21–22.
Ang panaghiusa magdala og kasiguroan.
Diha sa mga kahimtang nga narekord sa sinugdanan sa Alma 50, ang mga Lamanite daw walay kahigayunan batok sa mga Nephite. Ang mga taming, mga gipalig-on, ug hiniusang mga paningkamot sa mga Nephite naghimo kanilang daw walay pagkabuntog (tan-awa sa Alma 49:28–30 ug sa 50:17–20). Apan sa wala madugay nailog sa mga Lamanite ang daghan sa ilang mga siyudad—lakip kadtong mga gipalig-on ni Moroni (tan-awa sa Alma 51:26–27). Giunsa kini sa pagkahitabo? Pangitaa ang mga tubag samtang magbasa ka niini nga mga kapitulo (tan-awa labi na sa Alma 51:1–12). Hunahunaa kon unsay kapuslanan sa mga pasidaan niini nga asoy diha kanimo ug sa imong pamilya.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.
Alma 45:2–8
Ang dungan nga pagbasa niini nga mga bersikulo tingali makadasig sa imong pamilya aron makahimo og tinagsa-tagsa nga pagpakigsulti sa mga sakop sa pamilya, sama sa gihimo ni Alma kang Helaman.
Alma 46:12–22
Ang bandila sa kalingkawasan midasig sa mga Nephite sa pagtuman sa mga sugo sa Dios ug pagpanalipod sa ilang pagtuo. Unsa ang nagdasig kanato sa paghimo sa samang butang? Tingali ang imong pamilya pweding maghimo og kaugalingon ninyong bandila sa kalingkawasan—usa ka bandila nga may mga pulong o mga imahe nga magpahinumdom kaninyo sa pagtuman sa mga sugo sa Dios sa matag adlaw.
Alma 48:7–9; 49:1–9; 50:1–6
Samtang ang imong pamilya magbasa mahitungod sa mga gipangpalig-on sa mga Nephite, pwede nimong hisgutan kon giunsa nimo sa pagpalig-on ang imong panimalay batok sa kaaway. Tingali malingaw ang mga bata sa pagtukod og usa ka kota gamit ang mga butang sama sa mga lingkuranan ug mga habol, o pwede nilang idrowing ang unsay ilang mahunahunaan kon unsay hitsura sa mga gipanglig-on.
Alma 51:1–12
Unsa ang gitudlo niini nga mga bersikulo mahitungod sa unsay posibling mahitabo diha sa atong pamilya kon duna kitay panagbingkil? Unsaon nato sa pagpalambo ang atong panaghiusa?
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Pangutana samtang ikaw magtuon. Samtang magtuon ka sa mga kasulatan, pangutan-a ang imong kaugalingon sa mga pangutana nga makatabang nimo sa pagpamalandong kon unsa kamaayo ang imong pagsunod sa unsay imong nabasa.
Bandila sa Kalingkawasan, ni Larry Conrad Winborg