Si Moroni ug ang Bandila sa Kalingkawasan

For the Blessings of Liberty, ni Scott M. Snow

Agosto 3–9

Alma 43–52

“Magmakanunayon diha sa Hugot nga Pagtuo kang Kristo”

Samtang ikaw magplano og mga kalihokan, mahimong makakaplag ka og mga ideya diha sa mga sugyot alang sa pagtudlo sa mas gagmay ug mas dagkong mga bata.

Irekord ang Imong mga Impresyon

pagpaambit nga icon

Dapita ang Pagpaambit

Hangyoa ang mga bata sa pagpaambit unsay ilang nahinumduman mahitungod sa ubang mga tawo ug mga istorya diha sa Alma 43–52, sama ni Kapitan Moroni o ang bandila sa kalingkawasan. Aron matabangan sila nga makahinumdom, ipakita ang mga hulagway gikan sa Mga Sugilanon sa ang Basahon ni Mormon, sa Libro sa Mga Hulagway sa Ebanghelyo, o Dali, Sunod Kanako—Alang sa mga Indibidwal ug mga Pamilya.

pagtudlo nga icon

Itudlo ang Doktrina: Mas Gagmay nga mga Bata

Alma 43:17–21; 48:7–8; 49:1–5; 50:1–6

Ako makakaplag og espiritwal nga panalipud diha sa ebanghelyo.

Aron panalipdan ang mga Nephite batok sa mga Lamanite, giandam ni Moroni ang iyang mga katawhan pinaagi sa paghimo og panagang ug mga pagpanalipod. Ang iyang mga paningkamot nagtudlo kanato unsaon nga makakaplag kita og espiritwal nga kahilwasan.

Posible nga mga Kalihokan

• Sultihi ang mga bata og gamay mahitungod sa gubat tali sa mga Nephite ug sa mga Lamanite (tan-awa sa Alma 43), ipasabut og maayo nga ang mga Nephite nagsul-ob og panagang aron sa pagprotekta sa ilang mga kaugalingon. Mahimo usab nimong gamiton ang “Kapitulo 31: Si Kapitan Moroni Mipildi ni Zerahemnah” (Mga Sugilanon sa Ang Basahon ni Mormon, 85–88, o ang katugbang nga video mahitungod diha sa ChurchofJesusChrist.org). Basaha ang Alma 43:19, ug dapita ang mga bata sa pagtudlo ngadto sa mga bahin sa ilang mga lawas samtang ila kining madungog diha sa kasulatan.

• Ipasabut nga sama nga ang mga Nephite anaa sa pisikal nga pakiggubat, kita anaa sa espiritwal nga pakiggubat ni Satanas, kinsa dili gusto nga mosunod kita sa mga sugo sa Dios. Pagdrowing og bata diha sa pisara, ug tabangi ang mga bata nga maghunahuna og mga butang nga manalipod kanato sa espirituhanong paagi sama nga ang panagang manalipod sa atong mga lawas (sama pananglit sa, pag-ampo, pagbasa sa mga kasulatan, o pagsunod sa mga sugo). Sa matag higayon nga mosulti sila og usa ka butang, pagdrowing og usa ka piraso nga panagang sa bata diha sa pisara.

Mga Nephite nakig-away sa mga Lamanite

Defense of a Nephite City, ni Minerva Teichert

Alma 46:11–16; 48:11–13, 16–17

Makahimo ko nga magmatinud-anon sama ni Kapitan Moroni.

Si Moroni usa ka maayo kaayo nga ehemplo sa hugot nga pagtuo, kaisug, ug serbisyo. Ikonsiderar kon unsaon nimo pagdasig ang mga bata sa pagsunod sa iyang ehemplo.

Posible nga mga Kalihokan

• Ipakita ang hulagway ni Moroni sa outline sa mga leksyon niini nga semana sa Dali, Sunod Kanako—Alang sa mga Indibidwal ug mga Pamilya. Sultihi ang mga bata mahitungod sa bandila sa kalingkawasan ug unsay nakasulat niini, gamit ang mga hugpong sa mga pulong gikan sa Alma 46:11–16. Mahimo nimong hisgutan ang “Kapitulo 32: Si Kapitan Moroni ug ang Bandila sa Kalingkawasan” (Mga Sugilanon sa Ang Basahon ni Mormon, 89-90, o ang katugbang nga video diha sa ChurchofJesusChrist.org). Tuguti ang mga bata nga motabang sa pag-asoy sa istorya kutob sa mahimo. Ipasabut nga si Moroni migamit sa bandila sa kalingkawasan aron sa pagtabang sa mga Nephite nga makahinumdom kon unsa ang mahinungdanon ngadto kanila.

• Tabangi ang mga bata sa paghimo og bandila sa kalingkawasan alang sa ilang kaugalingon o alang sa imong klase. Sugdi kini pinaagi sa pagtabang nila sa paghunahuna og mga butang nga ilang gituohan o mga butang nga gusto sa Langitnong Amahan nga ilang hinumduman. Padrowinga sila og mga hulagway niining mga butanga diha sa lapad nga papel, o mahimong magdala ka og mga hulagway aron ilang ipapilit diha sa papel.

• Hangyoa ang mga bata sa pagsulti kanimo mahitungod sa pipila ka mga tawo nga ganahan nilang mahisama ug nganong gusto sila nga mahisama kanila. Dayon ipakigbahin kanila ang pipila ka mga pulong gikan sa Alma 48:11–13 nga naghulagway ni Moroni, ug dapita sila sa pagtag-an kon kinsa ang gihulagway niini nga mga pulong. Ipakita ang usa ka hulagway ni Moroni, ug paghisgut og mga pamaagi nga kita mahimong mahisama kaniya.

pagtudlo nga icon

Itudlo ang Doktrina: Mas Dagko nga mga Bata

Alma 43:17–21; 48:7–8; 49:1–5; 50:1–6

Ako makakaplag og espiritwal nga panalipud diha sa ebanghelyo.

Ang kalibutan adunay daghang espiritwal nga mga kakuyaw, apan daghan kaayo ang makat-unan sa mga bata gikan sa mga Nephite kon unsaon sa pagpanalipud sa ilang mga kaugalingon.

Posible nga mga Kalihokan

• Dapita ang matag bata sa pagbasa sa hilum sa usa sa mosunod nga mga bersikulo nga naghulagway kon giunsa sa mga Nephite pagpangandam alang sa gubat batok sa mga Lamanite: Alma 43:19; 48:8; 49:1–5; ug 50:2–4. Hangyoa ang mga bata sa pagpaambit sa unsay ilang nakat-unan (tanyagi sila sa imong tabang kon gikinahanglan). Ipasabut nga ania kita sa espiritwal nga gubat batok kang Satanas, ug kinahanglang atong panalipdan ang atong mga kaugalingon sa espiritwal nga paagi, sama nga ang mga Nephite mipanalipod sa ilang mga kaugalingon sa pisikal nga paagi gikan sa mga Lamanite. Unsa nga matang sa espiritwal nga panagang o mga pagpanalipod nga mahimo natong tukuron aron mapanalipdan ang atong mga kaugalingon sa atong espiritwal nga mga gubat?

• Tabangi ang mga bata sa paghimo og taming gikan sa lapad nga papel o karton, ug hangyoa sila nga sulatan kini og mga butang nga makapanalipod kanato sa espirituhanong paagi. Hatagi ang matag bata og usa ka piraso nga papel, ug dapita ang mga bata sa pagsulat og usa ka butang nga tingali si Satanas motintal kanato sa pagbuhat (sama sa pagpamakak, pagpangawat, og pagminaldito). Hangyoa sila sa pagkumot sa ilang mga papel hangtud maporma kini og bola ug ilabay kini ngadto sa taming aron sa pagpakita kon unsaon sa ebanghelyo nga makapanalipod kanato nga luwas gikan kang Satanas (tan-awa usab sa Mga Taga-Efeso 6:16).

Alma 46:11–16; 48:11–13, 16–17

Makahimo ko nga magmatinud-anon sama ni Kapitan Moroni.

Si Moroni usa ka matinud-anon ug lig-on nga disipulo ni Jesukristo, kinsa midasig sa mga Nephite sa pagsunod sa ebanghelyo (tan-awa sa Alma 48:17). Unsa ang makat-unan sa mga bata sa imong klase gikan sa iyang ehemplo?

Posible nga mga Kalihokan

• Basaha ang Alma 46:11–16. Unsa ang gusto ni Moroni nga mahinumduman sa mga Nephite? (tan-awa sa bersikulo 12). Giunsa niya pagtabang kanila nga makahinumdom niining mga butanga? Hangyoa ang mga bata sa paglista og pipila ka mga butang nga gusto sa Langitnong Amahan nga atong hinumduman. Tugoti ang mga bata sa pagdesinyo sa ilang kaugalingong “mga bandila sa kalingkawasan” nga adunay mga hugpong sa mga pulong o mga hulagway nga makatabang kanila sa paghinumdom niining mga butanga.

• Hangyoa ang usa ka bata sa pagbasa sa Alma 48:17. Aron makatabang sa mga bata nga makasabut nganong gidapit kita nga mahisama ni Moroni, dapita sila sa pagtuon sa Alma 48:11–13, 16. Hangyoa sila sa pagpangita og mga pulong ug hugpong sa mga pulong nga makatabang kanato nga makasabut ngano nga si Moroni usa ka talagsaon nga disipulo ni Jesukristo. Samtang ilang ipaambit unsay ilang nakit-an, awhaga sila sa paghunahuna og piho nga mga butang nga ilang mahimo aron mas mahisama kang Moroni.

Alma 47:4–19

Si Satanas motintal ug molingla kanato sa hinayhinay.

Kinahanglang masayud ang mga bata nga si Satanas mosulay sa pagtintal kanato sa paghimo og ginagmay nga mga sala aron siya makadala kanato ngadto sa mas dagkong sala.

Posible nga mga Kalihokan

• Basaha og dungan ang pinili nga mga bersikulo gikan sa Alma 47:4–19, ug ipasabut ngadto sa mga bata kon giunsa ni Amalickiah pagkontrol sa kasundalohan ni Lehonti, bisan tuod ang mga sakop sa kasundalohan “napiho sa ilang mga hunahuna” nga dili sila mapugos sa pagpakig-away sa mga Nephite. Unsa man kaha unta ang mahitabo kon gisultihan pang daan ni Amalickiah si Lehonti unsay iyang giplano nga buhaton sukad pa sa sinugdanan? Unsa ang gitudlo kanato niini nga mga bersikulo mahitungod sa unsa nga paagi nga si Satanas naningkamot sa paglingla kanato?

• Ipakita ang hulagway sa usa ka balay nga maayo pagkaatiman ug usa ka balay nga dugay nang gipasagdan, o ipakita ang usa ka hulagway sa usa ka himsog nga tanaman ug sa usa ka tanaman nga puno sa mga sagbot. Ipahisgot sa mga bata mahitungod sa unsay ilang nakita sa mga hulagway ug sa unsang paagi kini nga mga kausaban posibling nanghitabo samtang nagdagan ang panahon. Unsa man unta ang gihimo sa tag-iya sa balay o tanaman aron mapugngan kini? Ipasabut nga ang mga tawo mahimong mag anam-anam nga mahimong makasasala kon dili sila makigbatok sa mga tintasyon ni Satanas sa paghimo og gagmay nga mga sala (sama sa pagkadili matinuoron o pagtan-aw og pornograpiya) ug dayon mas dagkong mga sala. Unsa ang pipila ka dili maayo nga mga butang nga kinahanglan atong hunungon sa pagbuhat sa atong mga kinabuhi?

pagkat-on nga icon

Awhaga ang Pagkat-on diha sa Panimalay

Hangyoa ang mga bata sa pagngalan og usa ka butang nga ilang nadungog o gibati karong adlawa ug gustong ipakigbahin sa usa ka sakop sa pamilya. Awhaga sila sa pagtuman sa ilang mga plano.

Pagpalambo sa Atong Pagtudlo

Tabangi ang mga bata sa pag-ugmad og pagsalig sa kaugalingon. Ang ubang mga bata tingali walay pagsalig nga makakat-on sa ebanghelyo sa ilang kaugalingon. Usa ka paagi sa pagpalig-on sa ilang pagsalig mao ang pagdayeg kanila kon sila mosalmot sa klase.

pahina sa kalihokan: ang ebanghelyo manalipud kanako sa espirituhanong paagi