Two Thousand Young Warriors, ni Arnold Friberg

Agosto 10–16

Alma 53–63

“Gipanalipdan sa Iyang Kahibulongan nga Gahum”

Samtang imong basahon ang Alma 53–63, hunahunaa kon sa unsang paagi nimo mahatagan og kinabuhi ang mga istorya niini nga mga kapitulo alang sa mga bata ug tabangi sila nga makakat-on sa mga baruganan sa ebanghelyo nga gitudlo sa mga istorya.

Irekord ang Imong mga Impresyon

Dapita ang Pagpaambit

Aron maandam ang mga bata nga makat-on gikan sa Alma 53–63, dapita sila sa pagpaambit sa unsay ilang nahinumduman mahitungod sa mga Anti-Nephi-Lehi (tan-awa sa Alma 23–24). Aron makatabang, ipakita ang usa ka hulagway nga imong gigamit sa pagtudlo sa istorya, o pahinumdumi sila sa usa ka kalihokan nga ilang gihimo sa klase.

Itudlo ang Doktrina: Mas Gagmay nga mga Bata

Alma 53:20–21; 56:27, 47–48

Makahimo ko nga magmatinud-anon sa Dios sama sa batan-ong mga manggugubat.

Ang stripling (nagpasabot nga “batan-on”) nga mga manggugubat ni Helaman mahimong usa ka talagsaon nga ehemplo alang sa mga bata sa imong klase. Awhaga ang mga bata sa pagsulay nga mahimong sama kanila.

Posible nga mga Kalihokan

• Pagdapit og usa ka bata sa pag-isa sa hulagway nga anaa sa outline niini nga semana sa Dali, Sunod Kanako—Alang sa mga Indibidwal ug mga Pamilya samtang imong iminubo sa pag-asoy ang istorya sa mga batan-ong mga manggugubat ni Helaman. Mahimo usab nimong gamiton ang “Kapitulo 34: Si Helaman ug ang 2,000 ka Batan-ong mga Manggugubat” (Mga Sugilanon sa Ang Basahon ni Mormon, 93–94, o ang katugbang nga mga video diha sa ChurchofJesusChrist.org). Ipaambit sa mga bata unsay ilang nakat-unan o nagustohan mahitungod sa istorya sa 2,000 ka batan-ong mga manggugubat.

• Pagdapit og usa ka batang babaye ug usa ka batang lalaki sa pagrepresentar sa mga inahan ug mga amahan sa mga batan-ong mga manggugubat. Samtang basahon nimo ang Alma 56:27 and 47–48, hatagi kining mga bata og mga butang nga ilang gunitan nga maghulagway kon giunsa sa mga inahan ug mga amahan pagtabang sa batan-ong mga manggugubat, sama sa usa ka sako nga bugas magrepresentar sa “mga panginahanglan” nga gipadala sa mga amahan ug mga kasulatan nga magrepresentar sa mga panudlo sa mga inahan. Hangyoa ang mga bata sa pagpaambit sa mga butang nga gisangkap sa ilang mga ginikanan alang kanila o gitudlo kanila.

• Basaha ang Alma 53:20–21, ug tabangi ang mga bata nga makasabut unsay kahulogan sa mga pulong sama sa maisugon, dili magpadala sa kahadlok, kalig-on, ug matinuoron . Ihulagway kon sa unsang paagi gipakita sa batan-ong mga manggugubat kini nga mga hiyas. Paghimo og yano nga mga name tag alang sa mga bata nga mabasa, “Kon ako , ako sama sa usa ka batan-ong manggugubat!” Tabangi ang mga bata nga sulatan ang blanko sa usa ka hiyas nga ilang gipili gikan sa Alma 53:20–21.

• Dapita ang mga bata sa pagkompleto sa pahina sa kalihokan niining semanaha. Tabangi sila sa paghunahuna og mga paagi nga mahisama sila sa kasundalohan ni Helaman. Dungan nga manganta sa “Among Dad-on sa Kalibutan ang Iyang Kamatuoran” (Songbook sa mga Bata, 92).

Alma 58:32–41

Sa panahon nga mabalaka ako, makasalig ako sa Dios.

Sa panahon nga siya ug ang iyang kasundalohan nag-atubang og mga kalisud, si Helaman misalig sa Ginoo. Unsa ang makat-unan sa mga bata nga imong gitudloan gikan sa iyang ehemplo?

Posible nga mga Kalihokan

• Pagdrowing og nabalaka nga nawong diha sa pisara, ug hisguti kon unsa ang kabalaka ni Helaman tungod kay ang iyang kasundalohan walay igong pagkaon o igong mga tawo aron makapadayon sa pagpakig-away (tan-awa sa Alma 58:32–41). Hangyoa ang mga bata sa pagpaambit og mga higayon sa dihang nabalaka sila. Basaha ang Alma 58:37 (o tabangi ang usa ka bata sa pagbasa niini), ug tabangi ang mga bata sa pag-usab sa nawong nga anaa sa pisara ngadto sa usa ka nagpahiyum nga nawong aron sa pagpakita kon unsay gibati ni Helaman tungod kay misalig siya sa Dios. Unsay mahimo natong buhaton kon mobati kita og kabalaka? Dungan nga manganta sa “Mga Pahiyum” (Songbook sa mga Bata, 128).

• Isulat diha sa mga piraso nga papel ang pipila ka mga butang nga mahimong ikabalaka sa mga bata. Papulipuliha ang mga bata sa pagpili og papel aron imong basahon, ug dapita ang mga bata sa pagpaambit kon sa unsang paagi nga ang Dios makatabang nila sa matag usa niini nga mga kabalaka. Pagpaambit og usa ka kasinatian diin ang Dios mitabang nimo sa dihang ikaw nabalaka.

Itudlo ang Doktrina: Mas Dagko nga mga Bata

Alma 56:45–48; 57:21, 25–27; 58:39–40

Makahimo ko nga magmatinud-anon sa Dios sama sa batan-ong mga manggugubat.

Unsa nga mga kamatuoran gikan sa istorya sa batan-ong mga manggugubat ang makatabang sa mga bata sa mga hagit nga ilang giatubang?

Posible nga mga Kalihokan

• Hangyoa ang mga bata sa pagpaambit sa unsay ilang nahibaloan mahitungod sa batan-ong mga manggugubat. Mahimo usab nimong gamiton ang “Kapitulo 34: Si Helaman ug ang 2,000 ka Batan-ong mga Manggugubat” (Mga Sugilanon sa Ang Basahon ni Mormon, 93–94, o ang katugbang nga mga video diha sa ChurchofJesusChrist.org). Ipaambit sa mga bata kon unsa ang ilang gidayeg bahin sa mga manggugubat.

• Dungan nga magbasa sa Alma 56:45–48; 57:21, 25–27; ug 58:39–40. Dapita ang mga bata sa pagpangita og mga pulong ug mga hugpong sa mga pulong gikan niini nga mga bersikulo nga naghulagway sa batan-ong mga manggugubat. Unsa man ang gipasabut niini nga mga pulong ug hugpong sa mga pulong? Sa unsang paagi kita mamahimong sama sa batan-ong mga manggugubat?

• Basaha ang Alma 56:46–48 ngadto sa mga bata, ug dapita sila sa pagpaminaw kon unsa ang gitudlo sa mga inahan sa batan-ong mga manggugubat sa ilang mga anak mahitungod sa hugot nga pagtuo. Giunsa pagtabang sa mga ginikanan karon ang ilang mga anak aron makabaton og hugot nga pagtuo? Nganong mahinungdanon man alang sa mga bata ang “tukma” nga pagsunod sa matarung nga mga panudlo sa ilang mga ginikanan ug sa mga lider sa Simbahan? (Alma 57:21).

Seed of Faith, ni Jay Ward

Alma 53:10–17; 56:27

Ako makatuman sa akong mga pakigsaad.

Ang batan-ong mga manggugubat ug ang ilang mga ginikanan mihimo og mga pakigsaad nga ilang gituman sa matinud-anong paagi. Mahimo nimong gamiton kini nga istorya aron sa pagtudlo sa mga bata mahitungod sa kamahinungdanon sa mga pakigsaad.

Posible nga mga Kalihokan

• Bahina ang mga bata sa tulo ka grupo: adunay usa nga morepresentar ni Helaman, adunay lain nga morepresentar sa mga katawhan ni Ammon, ug ang ikatulo morepresentar sa mga anak nga lalaki sa mga katawhan ni Ammon. Basaha ang Alma 53:10–17 og dungan, ug tugoti ang mga grupo nga mopaambit kon giunsa sa mga tawo nga ilang girepresentaran sa paghimo ug pagtuman sa ilang mga pakigsaad. Ipaambit ang imong pagpamatuod nga ang Langitnong Amahan manalangin kanato kon kita motuman sa atong mga pakigsaad.

• Isulat sa pisara ang mga hugpong sa mga pulong gikan sa Mosiah 18:8–10 o sa Doktrina ug mga Pakigsaad 20:37 nga naglatid sa mga butang nga atong gipakigsaad nga buhaton sa dihang gibunyagan kita. Usab pagsulat og ubang hugpong sa mga pulong nga walay kalabutan sa mga pakigsaad. Hangyoa ang mga bata nga linginan nila ang mga butang nga atong gipakigsaad nga buhaton (pagamita sila sa mga kasulatan kon gikinahanglan). Sa unsang paagi kita mapanalanginan kon kita motuman sa atong mga pakigsaad? Awhaga ang mga bata sa pagsulat kon unsay ilang gipakigsaad sa Dios nga buhaton ug ibutang ang ilang lista sa dapit diin kanunay kini nila nga makita.

• Dapita ang usa ka bata sa pagbasa sa Alma 56:27. Giunsa pagtabang sa mga amahan ang ilang mga anak nga lalaki nga wala makalapas sa ilang pakigsaad nga dili na makig-away? Kinsa ang mosuporta kanato sa pagtuman sa atong mga pakigsaad?

Alma 61:3–14

Mahimong pilion nako nga dili masuko.

Si Moroni sayop nga mipasangil ngadto ni Pahoran, apan imbis masuko, si Pahoran miingon, “Ako … nagmaya diha sa pagkamapasayloon sa imong kasingkasing” (Alma 61:9).

Posible nga mga Kalihokan

• Dapita ang mga bata sa paghunahuna mahitungod sa usa ka panahon nga giakusahan sila nga nagbuhat sa usa ka butang nga wala nila buhata. Sultihi sila sa unsang paagi kini nahitabo ni Pahoran (tan-awa sa Alma 60–61). Mahimo nimong gamiton ang “Kapitulo 35: Si Kapitan Moroni ug si Pahoran” (Mga Sugilanon sa Ang Basahon ni Mormon, 95–97, o ang katugbang nga video diha sa ChurchofJesusChrist.org). Aron masayud kon unsa ang reaksyon ni Pahoran, pagpulipuli kamo og basa sa mga bersikulo gikan sa Alma 61:3–14. Unsa ang gibuhat ni Pahoran sa dihang giakusahan siya ni Moroni? Unsay atong makat-unan mahitungod sa pagpasaylo gikan sa ehemplo ni Pahoran? Sa unsang paagi kita mahimong sama kaniya?

• Isulat diha sa pisara Unsay angay nakong buhaton kon adunay usa ka tawo nga masuko kanako? Dapita ang mga bata nga magpulipuli sa pagsulat og pipila ka mga tubag sa pisara. Unsaon kaha unta pagtubag ni Pahoran kini nga pangutana? Hangyoa ang mga bata sa pagsulat niini nga mga tubag sa usa ka sulat ngadto sa ilang kaugalingon nga ilang mabasa kon adunay tawo nga masuko nila.

Awhaga ang Pagkat-on diha sa Panimalay

Awhaga ang mga bata sa pagpaambit sa ilang mga pamilya sa usa ka paagi nga gusto nilang mahisama sa batan-ong mga manggugubat. Mahimo usab nga pasalamatan nila ang ilang mga ginikanan sa pagtudlo kanila sama sa gibuhat sa mga inahan sa batan-ong mga manggugubat.

Pagpalambo sa Atong Pagtudlo

Paapila ang mga bata sa mga diskusyon sa ebanghelyo. Ang pag-usab sa pagkahan-ay sa lawak saringan [classroom] usahay makatabang sa mga bata nga mas ganahan silang moapil sa mga diskusyon sa ebanghelyo. Sama pananglit, mahimo nimong dapiton panagsa ang mga bata sa paglingkod nga mag-alirong sa salog kaysa ilang mga lingkuranan.