Agosto 17–23

Helaman 1–6

“Ang Lig-on nga Sukaranan sa Atong Manunubos”

Ang mga kalihokan dinhi niini nga outline gituyo aron sa pag-aghat og mga ideya ug lamdag sa imong kasingkasing ug hunahuna. Ang pinakamaayo nga mga ideya kasagaran moabut samtang ikaw mainampoong mamalandong sa mga kasulatan ug sa mga panginahanglan sa mga bata nga imong gitudloan.

Irekord ang Imong mga Impresyon

Dapita ang Pagpaambit

Aron sa pagsuporta sa mga bata sa ilang pagkat-on sa ebanghelyo sa panimalay, dapita ang pipila kanila sa pagpaambit og usa ka butang nga ilang nakat-onan karong semanaha. Ihulagway kon unsaon ninyo pagtuon sa ebanghelyo diha sa panimalay, ug paghisgut mahitungod sa mga pamaagi nga ang mga bata makatabang sa ilang mga pamilya nga makat-on gikan sa Basahon ni Mormon.

Itudlo ang Doktrina: Mas Gagmay nga mga Bata

Helaman 5:12

Akong matukod ang akong pundasyon diha kang Jesukristo.

Si Helaman nagtudlo sa iyang mga anak nga lalaki nga si Nephi ug si Lehi sa pagtukod sa ilang mga kinabuhi diha sa lig-on nga sukaranan sa atong Manunubos. Palandonga kon unsaon nimo kana paghimo alang sa mga bata nga imong gitudloan.

Posible nga mga Kalihokan

• Ipakita ang hulagway sa usa ka templo o lahi nga gambalay, ug ipasabut nga ang mga gambalay nagkinahanglan og lig-on nga mga pundasyon aron sila dili matumba sa hangin ug mga bagyo. Aron sa paghulagway niini, dapita ang mga bata sa pasulay sa paglihok sa usa ka bato pinaagi sa paghuyop niini. Basaha ang unang pipila ka mga linya sa Helaman 5:12, ug hangyoa ang mga bata sa pag-isa sa ilang mga kamot kon makadungog sila kinsa kanang “lig-on nga sukaranan” nga maoy angay nato nga pundasyon.

• Dapita ang mga bata sa paghimo og aksyon samtang magbasa ka sa Helaman 5:12. Sama pananglit, mahimo nilang iwarawara ang ilang mga kamot inig basa nimo bahin sa “makusog nga bagyo” sa yawa ug mobarug sa usa ka lugar kon mabasa nimo ang mahitungod sa “lig-on nga sukaranan sa atong Manunubos.”

• Dapita ang mga bata sa pagtabang kanimo sa pagtukod og usa ka estraktura gamit ang mga bloke [blocks] o ubang mga materyal. Sugdi pinaagi sa pagporma og usa ka “sigurado nga pundasyon,” ug pakigsulti kanila kon unsa ka mahinungdanon nga si Jesukristo ang himoon natong pundasyon sa atong mga kinabuhi. Hangyoa ang mga bata sa pagpaambit og mga butang nga mahimo nilang buhaton aron sa pagsunod ni Jesukristo, ug sugoa sila nga padugangon og usa ka bloke ngadto sa pundasyon sa estraktura alang sa matag butang nga ilang gipaambit.

• Dapita ang mga bata sa pag-kolor sa pahina sa kalihokan, ug tabangi sila sa paggunting niini. Unsay atong mabuhat aron pagtukod sa atong mga kinabuhi diha sa pundasyon ni Jesukristo? Ipaambit ang pipila ka mga paagi nga imong gitukod ang imong kinabuhi diha sa Manluluwas ug sa unsang paagi nga ang pagbuhat sa ingon nakapanalangin sa imong kinabuhi.

Helaman 5:21–52

Ang Espiritu Santo mohunghong sa usa ka hinay, hinagawhaw nga tingog.

Ang paghulagway sa Helaman 5:29–30, 45–47 sa tingog nga nadungog sa mga Lamanite susama sa paagi nga kasagaran natong gihulagway kon giunsa sa pagpamulong sa Espiritu Santo. Mahimo nimong gamiton kini nga mga bersikulo aron sa pagtabang sa mga bata nga makaila sa tingog sa Espiritu.

Posible nga mga Kalihokan

• Ipakigbahin ang istorya ni Nephi ug Lehi sa bilanggoan. Mahimo nimong gamiton ang “Kapitulo 37: Si Nephi ug si Lehi sa Bilanggoan” (Mga Sugilanon sa Ang Basahon ni Mormon, 99–102, o ang katugbang nga video diha sa ChurchofJesusChrist.org). Kon maghisgot ka bahin sa tingog nga nadungog sa mga Lamanite, pahinaya ang imong tingog. Balik-balika ang istorya sa pipila ka higayon, ug dapita ang mga bata sa paghunghong kanimo. Sultihi ang mga bata mahitungod sa mga higayon nga ang Balaang Espiritu mihunghong kanimo ug milig-on sa imong pagpamatuod.

• Basaha ang Helaman 5:30, ug kantaha dungan sa mga bata ang kanta mahitungod sa Espiritu Santo, sama sa “Ang Malinawon nga Gamay nga Tingog” (Songbook sa mga Bata, 141). Itudlo ang mga pulong sa bersikulo sa kasulatan ug ang kanta nga naghulagway kon giunsa sa Espiritu Santo sa pagpakigsulti ngari kanato (tan-awa usab sa Helaman 5:45–47). Gamita ang Helaman 5:29 ug ang imong kaugalingong mga kasinatian aron ipakigbahin sa mga bata ang pipila ka mga panig-ingnan sa maayong mga butang nga ang Espiritu Santo makadasig kanato sa pagbuhat.

Itudlo ang Doktrina: Mas Dagko nga mga Bata

Helaman 1–6

Kon ako mapaubsanon, ang Langitnong Amahan mopanalangin kanako.

Ang Basahon ni Mormon naglangkob og daghang mga ehemplo sa mga kakuyaw sa garbo ug sa mga panalangin sa pagpaubos, ug pipila niini nga mga panig-ingnan makita diha sa Helaman 1–6. Samtang imong tun-an kini nga mga kapitulo, palandunga kon unsaon nimo paggamit niining mga ehemplo aron pagtudlo sa mga bata sa imong klase.

Posible nga mga Kalihokan

• Tugoti ang mga bata nga motabang nimo sa pagdrowing diha sa pisara sa mosunod nga diagram sa “liyok sa garbo.[pride cycle].” Dungan nga magbasa sa Helaman 3:24, 33–34 ug 4:11–15, dapita ang mga bata sa pagtudlo ngadto sa mga bahin sa liyok [cycle] nga gihulagway niini nga mga bersikulo.

• Isulat ang mga pulong nga Mapaubsanon ug Mapahitas-on diha sa pisara. Pagsulat og pipila ka mga ehemplo sa mapaubsanon o mapahitas-on nga mga lihok sa mga ginunting nga papel, ug dapita ang mga bata sa pagpulipuli og pili og usa ka papel ug pagbutang niini sunod sa pulong diha sa pisara nga naghulagway niana nga lihok. Unsa ang ubang mga paagi nga makapili kita nga magmapaubsanon?

Ang “liyok sa garbo.”

Helaman 5:5–14

Akong tukuron ang akong pundasyon diha kang Jesukristo.

Ang Helaman 5:12 naglangkob sa gamhanang mga hulagway sa atong pagtukod og pundasyon diha kang Jesukristo. Unsaon nimo paggamit niini nga mga hulagway aron sa pagpasabot niini nga baruganan ngadto sa mga bata? Ang pagbuhat sa ingon makatabang sa pag-andam sa mga bata alang sa mga tintasyon ug mga pagsulay nga ilang atubangon.

Posible nga mga Kalihokan

• Pagdala ngadto sa klase og pipila ka mga matang sa mga materyales nga mahimong magrepresentar sa huyang o lig-on nga mga pundasyon (sama sa binola nga gapas o sapya nga bato o baldosa [tile]). Dapita ang mga bata sa pagtukod og tore gamit ang mga bloke o ubang mga materyales sa nagkalain-laing mga matang sa mga pundasyon. Unsay makahimo sa ubang pundasyon nga mas lig-on kay sa uban? Dungan nga magbasa sa Helaman 5:12, ug pangutan-a ang mga bata nganong naghunahuna sila nga si Jesukristo mao “ang tinuod nga tukuran” sa atong mga kinabuhi. Unsaon nato pagtukod sa atong mga kinabuhi diha Kaniya? Dapita sila sa pagsiksik diha sa Helaman 3:27–29, 35 ug Mga Artikulo sa Hugot nga Pagtuo 1:4 aron sa pagpangita og mga ideya.

• Dapita ang mga bata sa pagbasa sa daklit [scan] sa Helaman 5:5–14 ug pag-ihap kon kapila hisguti ang pulong “hinumdumi”. Unsa ang gitudlo ni Helaman sa iyang mga anak nga lalaki nga kinahanglan nilang hinumduman? Sa unsang paagi nga ang paghinumdom niining mga butanga makatabang kanato sa paghimo kang Jesukristo nga tukuran sa atong mga kinabuhi?

Helaman 5:20–52

Pinaagi sa paghinulsol ang espiritwal nga kangitngit mapulihan og kahayag.

Ang mga Lamanite kinsa miadto sa bilanggoan aron sa pagpatay ni Nephi ug ni Lehi nga gilibutan sa dayag [literal] nga kangitngit. Kon makasala kita, anaa kita sa espiritwal nga kangitngit. Helaman 5:20–52 nagtudlo kanato kon sa unsang paagi ang atong espiritwal nga “panganod nga mangitngit” mawala (bersikulo 41).

Posible nga mga Kalihokan

• Pangitngita ang lawak klasehan kutob sa mahimo; dayon basaha ug i-summarize ang istorya diha sa Helaman 5:20–40 gamit ang gamay nga flashlight. Unsa kaha ang gibati sa mga Lamanite samtang anaa sila sa kangitngit? Dapita ang mga bata sa pagpaminaw unsa ang gitudlo ni Aminadab nga buhaton sa mga tawo aron ang kangitngit mawala, ug dayon basaha ang bersikulo 41. Dayon pasigaa ang mga suga, ug dungan nga magbasa sa mga bersikulo 42–48. Unsa ang gitudlo kanato niini nga mga bersikulo mahitungod sa mga panalangin nga moabut sa atong mga kinabuhi pinaagi sa paghinulsol?

• Dapita ang mga bata sa paghunahuna nga sila nagtudlo og mas manghud nga bata mahitungod sa Espiritu Santo. Unsaon nila paggamit ang Helaman 5:29–33, 44–47 sa pagtudlo kon unsa ang pagbati nga makadungog sa tingog sa Espiritu ug sa pipila ka mga butang nga gisulti sa Espiritu ngari kanato? Sa unsang paagi ang Espiritu Santo midasig kaninyo sa paghinulsol? Dapita ang mga bata sa pagpaambit og mga kasinatian sa dihang gibati nila ang kalinaw ug kahupay sa Espiritu Santo.

Awhaga ang Pagkat-on diha sa Panimalay

Dapita ang mga bata sa pagpangutana sa mga sakop sa pamilya kon giunsa nila pagtukod ang ilang mga kinabuhi diha kang Jesukristo. O mahimong ipaambit nila sa ilang mga pamilya unsay ilang plano sa pagtukod sa ilang mga kinabuhi diha Kaniya.

Pagpalambo sa Atong Pagtudlo

Pagpamatuod mahitungod kang Jesukristo. Ikaw adunay sagrado nga kahigayunan sa pagpalig-on sa nagtubo nga mga pagpamatuod sa mga bata sa imong klase. Tabangi sila nga mabati nila ang gugma ni Jesus alang kanila, ug ipakigbahin ang imong pagpamatuod bahin Kaniya kanunay.