“Agosto 17–23. Helaman 1–6: ‘Sa Lig-on nga Sukaranan sa Atong Manunubos,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)

“Agosto 17–23. Helaman 1–6,” Dali, Sunod Kanako—Alang sa mga Indibidwal ug mga Pamilya: 2020

Imahe

napusgay nga mga balud diha sa mga bato

Agosto 17–23

Helaman 1–6

“Sa Lig-on nga Sukaranan sa Atong Manunubos”

Ang mga baruganan niini nga latid [outline] makatabang sa paggiya sa imong pagtuon sa Helaman 1–6, apan ayaw itugot nga magsalig ka na lang niini. Mogiya kanimo ang Espiritu Santo ngadto sa mga kamatuoran nga kinahanglan nimong makat-unan.

Irekord ang Imong mga Impresyon

Ang basahon ni Helaman nagrekord sa mga kadaugan ug mga trahedya tali sa mga Nephite ug sa mga Lamanite. Nagsugod kini sa “usa ka makuyaw nga kalisdanan taliwala sa mga katawhan sa mga Nephite.” (Helaman 1:1), ug ang mga kalisdanan padayong nagsingabut sa tibuok nga rekord. Dinhi atong mabasa ang mahitungod sa politikanhong intriga, pundok sa mga tulisan, pagsalikway sa mga propeta, ug garbo ug kawalay pagtuo diha sa tibuok yuta. Apan nakita usab nato ang mga ehemplo sama ni Nephi ug ni Lehi ug “sa ubay-ubay nga mapainubsanon nga bahin sa mga katawhan,” kinsa wala lamang makasugakod apan milahutay sa espiritwal nga paagi (Helaman 3:34). Giunsa nila kini sa paghimo? Giunsa man nila sa pagpabiling lig-on samtang nagsugod sa pagkunhod ug pagkabulag-bulag ang ilang sibilisasyon? Sa samang paagi si bisan kinsa kanato magpabiling lig-on diha sa “mapintas nga unos” nga ipadala sa yawa nga “mohampak [kanato]”—pinaagi sa pagpalig-on sa atong kinabuhi “diha sa lig-on nga sukaranan sa atong Manunubos, nga mao si Kristo, ang Anak sa Dios … usa ka tukuranan diin kon ang mga tawo magtukod dili sila mapukan.” (Helaman 5:12).

Imahe

icon sa personal nga pagtuon

Mga Ideya alang sa Personal nga Pagtuon sa Kasulatan

Helaman 1–6

Ang garbo mobulag kanako gikan sa Espiritu ug sa kalig-on sa Ginoo.

Samtang magbasa ka sa Helaman 1–6—ug sa tibuok Basahon ni Mormon—makabantay ka og usa ka sundanan [pattern] sa kinaiya sa mga Nephite: Dihang nagmatarung ang mga Nephite, napanalanginan sila sa Dios ug miuswag sila. Paglabay sa panahon, nahimo silang mapahitas-on ug dautan, mihimo og mga pagpili nga misangput sa pagkalaglag ug pag-antus. Dayon nagmapaubsanon sila ug nadasig sa paghinulsol, ug gipanalanginan na usab sila sa Dios. Ang maong sundanan sa kinaiya nagbalik-balik niini sa kanunay nga kini gitawag sa ubang tawo nga “liyok sa garbo.”

Pangita og mga sanglitanan niini nga liyok samtang magbasa ka. Basin ganahan kang momarka sa mga sanglitanan samtang imo kining makit-an. Aniay pipila ka mga pangutana aron matabangan ka sa pagsabut niini nga sundanan [pattern] ug makita kon sa unsang paagi kini magamit diha nimo:

Unsa nga mga ebidensya sa garbo ang imong nakita tali sa mga Nephite? (tan-awa, pananglitan sa, Helaman 3:33–34; 4:11–13). Nakita ba nimo ang susamang mga sanglitanan sa garbo diha sa imong kaugalingon?
Unsa ang mga sangputanan sa garbo ug kadautan? (tan-awa sa Helaman 4:23–26). Unsa ang mga sangputanan sa pagpaubos ug paghinulsol? (tan-awa sa Helaman 3:27–30, 35; 4:14–16).
Unsa ang gusto ni Helaman nga mahinumduman sa iyang mga anak nga lalaki? (tan-awa sa Helaman 5:4–12). Sa unsang paagi ang paghinumdom niini nga mga kamatuoran makatabang kanimo nga malikay sa pagkahimong mapahitas-on?

Tan-awa usab sa Dieter F. Uchtdorf, “Garbo ug ang Priesthood,” Liahona, Nob. 2010, 55–58.

Helaman 3:24–35

Mahimo akong putli kon akong itugyan ang akong kasingkasing ngadto sa Dios.

Sa Helaman 3, gihulagway ni Mormon ang usa ka panahon dihang ang Simbahan miuswag pag-ayo ug gipanalanginan nga gani ang mga lider nangahibulong (tan-awa sa mga bersikulo 24–32). Sa katapusan ang ubang mga tawo nahimong mga mapahitas-on, samtang ang uban nagkaanam “sa pagkalig-on ug pagkalig-on diha sa ilang pagpaubos, … ngadto sa paglimpyo ug pagbalaan sa ilang mga kasingkasing” (Helaman 3:35). Bantayi diha sa mga bersikulo 34–35 unsay gihimo sa dakong bahin sa katawhan aron mahimong limpyo. Sa unsang paagi kining mga butanga nakatabang kanimo nga mas mahimong limpyo? Posibling makatabang ang pagkahibalo nga ang Giya ngadto sa mga Kasulatan (scriptures.ChurchofJesusChrist.org) mihatag og kahulugan sa pagkalimpyo isip “paagi nga mahimong gawasnon gikan sa sala, pagkaputli, pagkalimpyo, ug pagkabalaan pinaagi sa Pag-ula ni Jesukristo.” Unsa ang imong gibati nga nakapadasig nga buhaton aron masunod ang ehemplo niini nga mga disipulo? Unsa ang imong gipanghimo aron matugyan ang imong kasingkasing ngadto sa Dios?

Helaman 5:14–52

Ang akong pagtuo nalig-on pinaagi “sa kadako sa mga kamatuoran nga [akong] nadawat.”

Si Elder Jeffrey R. Holland kausa miingon ngadto sa mga nanglimbasog sa ilang pagtuo: “Kamo adunay mas dakong pagtuo kay sa inyong gihunahuna tungod sa gitawag sa Basahon ni Mormon nga ‘dako nga mga kamatuoran’ [Helaman 5:50]. … Ang bunga sa pagsunod sa mga baruganan sa ebanghelyo makita diha sa kinabuhi sa mga Santos sa Ulahing mga Adlaw bisan asa” (“Nagatuo Ako,” Liahona, Mayo 2013, 94). Samtang magbasa ka niini nga mga bersikulo, hunahunaa ang mga kamatuoran [ebidensya] nga gihatag kanimo sa Ginoo. Sama pananglit, tingali sa tinuoray wala gyud ka makadungog sa tingog sa Ginoo, apan ikaw ba mibati “sa honghong” gikan sa Espiritu Santo nga “midulot bisan ngadto sa kinahiladman sa kalag”? (Helaman 5:30; tan-awa usab sa D&P 88:66). Tingali anaa ka sa kangitngit, mitawag sa Dios alang sa mas dako nga pagtuo, ug “napuno sa hingpit nga kalipay nga dili ikapamulong” (Helaman 5:40–47). Unsa pa ang ubang mga kasinatian nga nakalig-on sa imong pagtuo kang Kristo ug sa Iyang ebanghelyo?

Imahe

icon sa pagtuon sa pamilya

Mga Ideya alang sa Pamilya nga Pagtuon sa Kasulatan ug Family Home Evening

Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.

Helaman 3:27–30

Dihang si propeta Mormon mipamubo sa sagradong mga rekord, panagsa gamiton niya ang mga pulong nga “sa ingon kita makakita” aron sa paghatag og gibug-aton sa importanting mga kamatuoran. Unsa ang gusto niya nga atong makita diha sa Helaman 3:27–30? Sa tibuok nimong pagtuon niining semanaha, pwede kang mohunong panagsa aron makapangutana sa mga sakop sa pamilya kon unsaon nila sa pagkompleto ang mga pulong nga “ug sa ingon makakita” mahitungod sa unsay ilang nabasa. Unsa nga mga kamatuoran ang gusto nilang hatagan og gibug-aton?

Helaman 5:6–7

Ang patay nang apohan ni Presidente George Albert Smith nga si George A. Smith mipakita kaniya sa damgo ug nangutana, “gusto kong masayud kon unsa ang imong nahimo sa akong ngalan.” Si Presidente Smith mitubag, “Ako wala gayud makahimo og bisan unsa sa imong ngalan nga angay nimong ikaulaw” (sa Mga Pagtulun-an sa mga Presidente sa Simbahan: George Albert Smith [2011], xxxii). Human mabasa ang Helaman 5:6–7, tingali mahimo kang makig-istorya sa mga sakop sa imong pamilya mahitungod sa paghinumdom ug pagtahud sa mga ngalan nga atong gidala, lakip ang ngalan sa Manluluwas.

Helaman 5:12

Aron matabangan ang imong pamilya nga makahulagway kon unsay ipasabut sa “lig-on nga sukaranan” tingali mahimo kamong maghimo og usa ka estraktura ug ibutang kini sa lahi-lahi nga mga matang sa mga sukaranan [pundasyon]. Pwede kang maghimo og “pintas nga unos” pinaagi sa pagsablig og tubig ug paggamit og eletric fan o pangpauga sa buhok aron makamugna og hangin. Unsay nahitabo sa estraktura sa dihang kini diha sa lahi nga mga pundasyon? Sa unsang paagi si Jesukristo sama sa usa ka “lig-on nga sukaranan” sa atong kinabuhi?

Helaman 5:29–33

Unsa ang atong mga kasinatian mahitungod sa pag-ila sa tingog sa Dios sa atong kinabuhi?

Alang sa dugang nga mga ideya sa pagtudlo sa mga anak, tan-awa sa latid [outline] karong semanaha diha sa Dali, Sunod Kanako—Alang sa Primary.

Pagpalambo sa Personal nga Pagtuon

Pagmapailubon sa imong kaugalingon. Ang pundasyon sa pagtuo matukod sa usa ka piraso sa matag higayon. Kon makakita ka og pihong mga doktrina nga lisud sabton karon, pagmapailubon. Saligi nga ang pagsabut moabut samtang palig-unon nimo ang pundasyon diha kang Jesukristo pinaagi sa pagdawat sa pagtuo ug sa makugihon nga pagtuon.