1 Tan-awa, karon nahitabo nga dihang si Nephi nakapamulong niini nga mga pulong, dihay mga tawo taliwala kanila nga midagan ngadto sa hukmanan; oo, gani dihay lima nga miadto, ug sila miingon sa ilang mga kaugalingon, samtang naglakaw sila:

2 Tan-awa, karon atong masayran ang katinuod kon kini nga tawo usa ba ka propeta ug kon ang Dios misugo ba kaniya sa pagpanagna sa ingon nga kahibulongang mga butang ngari kanato. Tan-awa, wala kita motuo nga siya gisugo; oo, wala kita motuo nga siya usa ka propeta; bisan pa, kon kini nga butang nga iyang giingon mahitungod sa labaw nga maghuhukom tinuod, nga siya patay na, nan motuo kita nga ang ubang mga pulong nga iyang gipamulong tinuod.

3 Ug nahitabo nga midagan sila uban sa ilang tibuok kusog, ug miabot ngadto sa hukmanan; ug tan-awa, ang labawng maghuhukom naghigda sa yuta, ug naglunang sa iyang kaugalingong dugo.

4 Ug karon tan-awa, diha nga nakita nila kini natingala sila sa hilabihan, nga niana natumba sila sa yuta; kay sila wala motuo sa mga pulong nga gipamulong ni Nephi mahitungod sa labawng maghuhukom.

5 Apan karon, diha nga sila nakakita mituo na sila, ug ang kahadlok miabot kanila basin pa og ang tanan nga paghukom nga gipamulong ni Nephi moabot sa katawhan; mao nga nangurog sila, ug nangatumba sa yuta.

6 Karon, sa walay langan diha nga ang maghuhukom gipatay—kay siya gidunggab sa iyang igsoong lalaki pinaagi sa pagtakoban, ug siya milayas, ug ang mga sulugoon nanagan ug misulti sa katawhan, nga namahayag bahin sa pagpatay taliwala kanila;

7 Ug tan-awa ang katawhan nagpundok ngadto sa hukmanan—ug tan-awa, sa ilang kahibulong nakita nila kadtong lima ka tawo nga natumba sa yuta.

8 Ug karon tan-awa, ang katawhan wala masayod mahitungod sa pundok sa katawhan nga nagkatigom sa tanaman ni Nephi; mao nga nanag-ingon sila sa ilang mga kaugalingon: Kining mga tawhana sila ang mipatay sa maghuhukom, ug ang Dios mihampak kanila aron dili sila makalayas gikan kanato.

9 Ug nahitabo nga sila migunit kanila, ug migapos kanila ug mibalhog kanila sa bilanggoan. Ug dihay usa ka pahibalo nga gipasangyaw nga ang maghuhukom gipatay, ug nga ang mga mamumuno nadakpan ug gibalhog na sa bilanggoan.

10 Ug nahitabo nga pagkaugma ang katawhan nagkapundok sa pagbangotan ug sa pagpuasa, didto sa lubong sa dungganan nga labawng maghuhukom nga gipatay.

11 Ug sa ingon niana usab kadtong mga maghuhukom nga didto sa tanaman ni Nephi, ug nakadungog sa iyang mga pulong, nagkapundok usab didto sa lubong.

12 Ug nahitabo nga nangutana sila taliwala sa katawhan, nag-ingon: Hain ang lima nga gipadala aron sa pagpakisayod mahitungod sa labawng maghuhukom kon siya namatay ba? Ug sila mitubag ug miingon: Mahitungod niining lima nga inyong giingon nga inyong gipadala, kami wala masayod; apan adunay lima ka mamumuno, nga among gibalhog sa bilanggoan.

13 Ug nahitabo nga ang mga maghuhukom nagtinguha nga dad-on sila; ug sila gidala, ug tan-awa sila kadtong lima nga gipadala; ug tan-awa ang mga maghuhukom nagpakisayod gikan kanila aron masayod mahitungod sa hinungdan, ug gisultihan sila sa tanan nga ilang gibuhat, nag-ingon:

14 Nanagan kami ug miabot sa dapit sa hukmanan, ug diha nga among nakita ang tanan nga butang sama sa gipamatuod ni Nephi, kami nahibulong mao nga nangatumba kami sa yuta; ug diha nga naulian na kami sa panimuot gikan sa among kahibulong, tan-awa sila mibalhog kanamo sa bilanggoan.

15 Karon, kalabot sa pagpatay niining tawhana, kami wala masayod kon kinsa ang nagbuhat niini; ug mao lamang kini ang among nasayran, nanagan kami ug miabot sumala sa inyong gitinguha, ug tan-awa siya patay na, sumala sa mga pulong ni Nephi.

16 Ug karon nahitabo nga ang mga maghuhukom mipasabot sa panghitabo ngadto sa katawhan, ug misinggit batok kang Nephi, nag-ingon: Tan-awa, nasayod kami nga kini si Nephi nakigsabot og usa ka tawo sa pagpatay sa maghuhukom, ug unya siya mipahayag niini kanato, aron kita iyang makabig ngadto sa iyang tinuohan, nga siya makapataas sa iyang kaugalingon nga mahimo nga usa ka tawong gamhanan, pinili sa Dios, ug usa ka propeta.

17 Ug karon tan-awa, panid-an nato kining tawhana, ug siya motug-an sa iyang kasaypanan ug mopahibalo kanato sa tinuod nga mamumuno niini nga maghuhukom.

18 Ug nahitabo nga ang lima gibuhian sa adlaw sa paglubong. Bisan pa niana, gibadlong nila ang mga maghuhukom sa mga pulong nga ilang gipamulong batok ni Nephi, ug nakiglalis kanila sa tinagsa-tagsa, nga niana sila milibog kanila.

19 Bisan pa niana, sila misugo nga si Nephi kinahanglang dakpon ug gaposon ug dad-on atubangan sa pundok sa katawhan, ug misugod sila sa pagpangutana kaniya sa nagkalain-laing paagi nga siya ilang mapaangkon, aron sila makapahamtang kaniya og kamatayon—

20 Nag-ingon kaniya: Ikaw nakigkunsabo; kinsa kining tawo nga nagbuhat niini nga pagpatay? Karon isulti kanamo, ug angkona ang imong kasaypanan; nag-ingon, Tan-awa aniay salapi; ug usab kami mopatunhay sa imong kinabuhi kon ikaw motug-an kanamo, ug moangkon sa kasabotan nga imong gihimo uban kaniya.

21 Apan si Nephi miingon kanila: O kamong mga buang, kamong mga gahi og kasingkasing, kamong mga buta, ug kamong mga tikig og liog nga katawhan, nasayod ba kamo kon hangtod kanus-a motugot ang Ginoo nga inyong Dios nga kamo magpadayon niining inyong paagi sa pagpakasala?

22 O angay unta kamong magsugod sa pagdangoyngoy ug pagbangotan, tungod sa kadako sa kalaglagan nga niini nga panahon nagpaabot kaninyo, gawas kon kamo maghinulsol.

23 Tan-awa kamo miingon nga nakigsabot ko og usa ka tawo nga patyon niya si Seezoram, ang atong labawng maghuhukom. Apan tan-awa, sultihan ko kamo, nga kini tungod kay ako nagpamatuod kaninyo nga kamo unta masayod kabahin niini nga butang; oo, gani isip usa ka saksi nganha kaninyo, ako nasayod sa mga pagkadaotan ug sa mga pagkasalawayon nga anaa kaninyo.

24 Ug tungod kay ako mihimo niini, miingon mo nga nakigsabot ko og usa ka tawo nga himoon niya kini nga butang; oo, tungod kay ako mipakita kaninyo niini nga timailhan kamo nasuko kanako, ug nagtinguha sa paglaglag sa akong kinabuhi.

25 Ug karon tan-awa, pakitaon ko kamo og laing timailhan, ug tan-awon kon tungod niini nga butang kamo magtinguha pa ba sa paglaglag kanako.

26 Tan-awa sultihan ko kamo: Lakaw ngadto sa balay ni Seantum, nga igsoong lalaki ni Seezoram, ug ingna siya—

27 Si Nephi ba, nga nagpakaaron-ingnon nga propeta, kinsa nanagna sa daghan kaayong mga kadaotan niini nga katawhan, nakigsabot kanimo, sa imong pagpatay kang Seezoram, nga imong igsoon nga lalaki?

28 Ug tan-awa, siya moingon kaninyo, Wala.

29 Ug kamo mosulti kaniya: Ikaw ba ang mipatay sa imong igsoong lalaki?

30 Ug mobarog siya nga mahadlok ug dili masayod kon unsay isulti. Ug tan-awa, siya molimod kaninyo; ug magpakaaron-ingnon siya nga natingala; bisan pa niana, siya mopahayag kaninyo nga siya walay sala.

31 Apan tan-awa, kamo mohiling kaniya, ug makakita kamo og dugo sa sidsid sa iyang kupo.

32 Ug kon makita na ninyo kini, kamo moingon: Diin gikan kini nga dugo? Wala ba kami makaila nga kini ang dugo sa imong igsoong lalaki?

33 Ug unya mangurog siya, ug mangluspad, gani ingon og miabot na kaniya ang kamatayon.

34 Ug unya kamo moingon: Tungod niini nga kahadlok ug niini nga kaluspad nga makita sa imong nawong, tan-awa, kami nasayod nga sad-an ka.

35 Ug unya ang dakong kahadlok moabot kaniya; ug unya siya mokompisal kaninyo, ug dili na molimod nga siya ang naghimo niini nga pagpatay.

36 Ug unya moingon siya kaninyo, nga ako, si Nephi, walay kasayoran mahitungod sa panghitabo gawas nga kini gihatag ngari kanako pinaagi sa gahom sa Dios. Ug unya kamo masayod nga ako matarong nga tawo, ug nga ako gipadala nganha kaninyo gikan sa Dios.

37 Ug nahitabo nga miadto sila ug mihimo, gani sumala sa gisulti ni Nephi kanila. Ug tan-awa, ang mga pulong nga iyang gipanulti mga tinuod; kay sumala sa iyang mga pulong siya milimod; ug usab sumala sa mga pulong siya mikompisal.

38 Ug gidala siya aron pamatud-an nga siya mao gayod ang mamumuno, nga niana ang lima gibuhian, ug si Nephi usab.

39 Ug dihay pipila sa mga Nephita nga mituo sa mga pulong ni Nephi; ug adunay uban usab, nga mituo tungod sa pagpamatuod sa lima, kay nakabig sila samtang didto sila sa bilanggoan.

40 Ug karon dihay pipila taliwala sa katawhan, kinsa miingon nga si Nephi usa ka propeta.

41 Ug dihay uban kinsa miingon: Tan-awa, siya usa ka dios, kay kon dili siya dios dili siya masayod sa tanan nga butang. Kay tan-awa, gisulti niya kanato ang mga tinguha sa atong mga kasingkasing, ug usab misulti kanato og mga butang; ug gani siya mipahibalo kanato sa tinuod nga mamumuno sa atong labawng maghuhukom.