1 Ug nahitabo nga dihay mitumaw nga panagbahin taliwala sa katawhan, nga niana sila nagkabahin dinhi ug didto ug mipadayon sa ilang mga buluhaton, mibiya ni Nephi nga nag-inusara, samtang nagbarog siya sa taliwala kanila.

2 Ug nahitabo nga si Nephi milakaw paingon sa iyang kaugalingong balay, namalandong sa mga butang nga gipakita sa Ginoo kaniya.

3 Ug nahitabo nga samtang namalandong siya—sa hilabihan nga kasubo tungod sa pagkadaotan sa katawhan sa mga Nephita, sa ilang tinago nga mga buhat sa kangitngit, ug sa ilang mga pagpatay, ug sa ilang mga pagpanglungkab, ug sa tanan nga matang sa kadaotan—ug nahitabo samtang namalandong siya sa iyang kasingkasing, tan-awa, usa ka tingog ang miabot kaniya nga nag-ingon:

4 Bulahan ikaw, Nephi, tungod niadtong mga butang nga imong nabuhat; kay Ako nakakita giunsa nimo sa walay pagkaluya pagpahayag sa pulong, nga akong gihatag kanimo, ngadto niini nga katawhan. Ug ikaw wala mahadlok kanila, ug wala magtinguha sa imong kaugalingong kinabuhi, apan nagtinguha sa akong kabubut-on, ug sa pagsunod sa akong mga sugo.

5 Ug karon, tungod kay ikaw nagbuhat niini nga walay pagkaluya, tan-awa, ako mopanalangin kanimo sa kahangtoran; ug ako mohimo kanimo nga gamhanan sa pulong ug sa binuhatan, sa hugot nga pagtuo ug sa mga buhat; oo, bisan kanang tanan nga butang mahimo nimo sumala sa imong pulong, tungod kay ikaw dili mangayo niana nga supak sa akong kabubut-on.

6 Tan-awa, ikaw si Nephi, ug ako mao ang Dios. Tan-awa, ako mopahayag niini kanimo sa atubangan sa akong mga anghel, nga ikaw makaangkon og gahom ibabaw niini nga katawhan, ug hampakon ang yuta og kagutom, ug kamatay, ug kalaglagan, sumala sa pagkadaotan niini nga katawhan.

7 Tan-awa, akong ihatag kanimo ang gahom, nga bisan unsa ang imong bugkoson dinhi sa yuta pagabugkoson didto sa langit; ug bisan unsa ang imong badbaron dinhi sa yuta pagabadbaron didto sa langit; ug sa ingon niana makabaton ka og gahom taliwala niini nga katawhan.

8 Ug sa ingon niana, kon ikaw moingon niini nga templo nga mapikas kini ngadto sa duha, kini mahimo.

9 Ug kon ikaw moingon niini nga bukid, Magpaubos ug magmahimo nga hapsay, kini mahimo.

10 Ug tan-awa, kon ikaw moingon nga ang Dios mohampak niini nga katawhan, kini mahitabo.

11 Ug karon tan-awa, ako momando kanimo, nga ikaw molakaw ug mopahayag ngadto niini nga katawhan, nga sa ingon niini nag-ingon ang Ginoong Dios, nga Makagagahom: Gawas kon kamo maghinulsol kamo pagahampakon, gani ngadto sa kalaglagan.

12 Ug tan-awa, karon nahitabo nga sa dihang ang Ginoo nakapamulong niini nga mga pulong ngadto ni Nephi, mihunong siya ug wala moadto sa iyang kaugalingong balay, apan mibalik ngadto sa pundok sa katawhan nga nagkatibulaag sa ibabaw sa yuta ug misugod sa pagpahayag ngadto kanila sa pulong sa Ginoo nga gipamulong kaniya, mahitungod sa ilang kalaglagan kon dili sila maghinulsol.

13 Karon tan-awa, bisan pa nianang kahibulongan nga milagro nga nahimo ni Nephi sa pagsulti kanila mahitungod sa kamatayon sa labawng maghuhukom, gipatig-a nila ang ilang mga kasingkasing ug wala mopatalinghog sa mga pulong sa Ginoo.

14 Busa si Nephi mipahayag kanila sa pulong sa Ginoo, nga nag-ingon: Gawas kon kamo maghinulsol, miingon ang Ginoo, kamo pagahampakon gani ngadto sa kalaglagan.

15 Ug nahitabo nga sa dihang si Nephi nakapahayag na kanila sa pulong, tan-awa, padayon sila nga nagpatig-a sa ilang mga kasingkasing ug wala mopatalinghog sa iyang mga pulong; busa sila mibiay-biay batok kaniya, ug mitinguha sa pagdapat sa ilang mga kamot ngadto kaniya, nga sila makabalhog kaniya sa bilanggoan.

16 Apan tan-awa, ang gahom sa Dios nag-uban kaniya, ug sila dili makadakop kaniya aron ibalhog siya sa bilanggoan, kay siya gidala pinaagi sa Espiritu ug gipalayo gikan sa ilang taliwala.

17 Ug nahitabo nga sa ingon niana milakaw siya uban sa Espiritu, gikan sa usa ka pundok sa katawhan ngadto sa lain nga pundok sa katawhan, nagpahayag sa pulong sa Dios, gani hangtod nga siya nakapahayag niini ngadto nilang tanan, o mipadala niini taliwala sa tanang katawhan.

18 Ug nahitabo nga wala sila mopatalinghog sa iyang mga pulong; ug dihay nagsugod nga mga panagbingkil, nga niana sila nabahin batok sa ilang mga kaugalingon ug misugod sa pagpatay sa usag usa gamit ang espada.

19 Ug sa ingon niana natapos ang kapitoan ug usa nga tuig sa pagmando sa mga maghuhukom sa katawhan ni Nephi.