“Agosto 31–Septyembre 6. Helaman 13–16: ‘Malipayon nga mga Balita sa Hingpit nga Kalipay,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Agosto 31–Septyembre 6,” Alang sa mga Indibidwal ug mga Pamilya: 2020
Si Samuel nga Lamanite sa ibabaw sa Paril, ni Arnold Friberg
Agosto 31–Septyembre 6
Helaman 13–16
“Malipayon nga mga Balita sa Hingpit nga Kalipay”
Samtang irekord nimo ang imong mga impresyon karong semanaha, hunahunaa kon sa unsang paagi ang mga baruganan diha sa Helaman 13–16 makapalig-on ug makatabang sa ubang butang nga imong nakat-unan diha sa mga kasulatan.
Irekord ang Imong mga Impresyon
Sa unang higayon nga gisulayan ni Samuel nga Lamanite ang pagpaambit sa “malipayon nga mga balita” didto sa Zarahemla (Helaman 13:7), gisalikway siya ug gipalayas sa tig-a og kasingkasing nga mga Nephite. Posibling makaingon ka nga daw nagtukod sila og walay pagkatandog nga paril libut sa ilang mga kasingkasing nga nagpugong kanila sa pagdawat sa mensahe ni Samuel. Nasabtan ni Samuel ang kaimportante sa mensahe nga iyang gidala ug mipakita og pagtuo pinaagi sa pagsunod sa sugo sa Dios “nga kinahanglan mobalik siya pag-usab, ug managna” (Helaman 13:3). Sama sa gihimo ni Samuel, tanan kita makasugat og mga paril samtang “[mag-andam kita] sa agianan sa Ginoo” (Helaman 14:9) ug maningkamot sa pagsunod sa Iyang mga propeta. Ug sama ni Samuel, kita usab mopamatuod kang Jesukristo, “nga sa pagkatinuod moanhi gayud,” ug modapit sa tanan sa “[pagtuo] sa iyang ngalan” (Helaman 13:6; 14:13). Dili ang tanan maminaw, ug ang uban posibling abtik kaayo sa pagsupak kanato. Apan kadtong motuo niini nga mensahe inubanan sa pagtuo kang Kristo makakita nga kini tinuod gayud nga “malipayon nga mga balita sa hingpit nga kalipay” (Helaman 16:14).
Mga Ideya alang sa Personal nga Pagtuon sa Kasulatan
Ang Ginoo mohatag og mga pasidaan pinaagi sa Iyang mga propeta.
Diha sa mga kasulatan, ang mga propeta ikumpara usahay ngadto sa mga tawo nga tigbantay diha sa paril o tore nga mopasidaan sa mga kakuyaw (tan-awa sa Isaias 62:6; Ezequiel 33:1–7).
Si Presidente M. Russell Ballard mitudlo: “Sulod sa mga siglo, ang mga propeta mituman sa ilang katungdanan dihang gipahimangnoan nila ang mga tawo sa mga peligro nga naa sa unahan. Ang mga Apostoles sa Ginoo kinahanglan gayud nga magbantay, mopahimangno, ug motabang niadtong nagpangita og tubag sa mga pangutana sa kinabuhi” (“Dios ang Nagtimon,” Liahona, Nob. 2015, 25).
Samtang magtuon ug mamalandong ka sa Helaman 13, pwede nimong markahan ang daghang pasidaan nga gihatag ni Samuel. Sama pananglit, unsay iyang gitudlo mahitungod sa paghinulsol? mahitungod sa pagpaubos ug sa katigayunan? Sa unsang paagi kaha kini nga mga pasidaan magamit diha nimo? Unsa nga mga pasidaan ang gihatag bag-o lang sa modernong mga propeta, ug unsay imong gibati nga angay nimong buhaton mahitungod sa mga pasidaan?
Ang propeta magtultol kanato ngadto kang Jesukristo.
Ang Ginoo maloloy-on niadtong maghinulsol.
Sa orihinal, si Samuel gipadala ngadto sa mga Nephite aron ipaambit ang malipayong balita mahitungod sa pag-anhi sa Manluluwas (tan-awa sa Helaman 13:7). Tungod kay sila misalikway kaniya, mibalik siya dala ang higpit nga mga pasidaan mahitungod sa mga paghukom sa Dios. Apan kadto nga mga pasidaan kanunay nga naglakip og maloloy-ong pagdapit sa paghinulsol; pangitaa kini nga mga pagdapit diha sa tibuok Helaman 13–15 (tan-awa ilabi na ang Helaman 13:6, 11; 14:15–19; 15:7–8). Sa unsang paagi kini nga mga pagdapit magamit diha nimo? Unsa ang imong nakat-unan gikan niini nga mga bersikulo mahitungod sa paghinulsol? Kanus-a ka nakasinati sa kalooy sa Dios nga miabut gumikan sa paghinulsol?
Ang mga timailhan ug mga kahibulongan makalig-on sa pagtuo niadtong dili mopatig-a sa ilang kasingkasing.
Sa Helaman 14, gipasabut ni Samuel ang rason nganong mihatag ang Ginoo og mga timailhan mahitungod sa pagkatawo ug pagkamatay sa Manluluwas: “Sa tuyo nga kamo unta motuo sa iyang ngalan” (Helaman 14:12). Samtang magtuon ka sa Helaman 14, timan-i ang mga timailhan sa pagkatawo sa Manluluwas diha sa mga bersikulo 1–8 ug ang mga timailhan sa Iyang kamatayon diha sa mga bersikulo 20–28. Ngano kahang kini nga mga timailhan epektibo man nga mga paagi sa pagpahibalo sa pagkatawo ug pagkamatay ni Jesukristo?
Makahunahuna ka ba og bisan unsang mga timailhan nga gihatag sa Ginoo nga makatabang kanimo aron motuo ka Kaniya? Sama pananglit, gitagna na sa mga propeta ang mga timailhan nga makita sa dili pa moabut ang Ikaduhang Pag-anhi sa Manluluwas (tan-awa sa “Mga Timailhan sa mga Panahon,” Giya ngadto sa mga Kasulatan, scriptures.ChurchofJesusChrist.org). Duna ba sa bisan asa niini nga mga timailhan ang natuman na sa atong panahon? Ang ubang mga timailhan nga mosangput sa pagtuo kang Jesukristo posibling personal kaayo ug dili kaayo mahinuklugon. Gahini sa makadiyot ang pagpamalandong og mga paagi diin imong nasaksihan ang Iyang kamot diha sa imong kinabuhi.
Unsa nga mga pahimangno ang gihatag mahitungod sa mga timailhan diha sa Helaman 16:13–23? Sa unsang paagiha imong malikayan ang kinaiya sa mga tawo nga gihulagway niini nga mga bersikulo?
Tan-awa usab sa Alma 30:43–52; Ronald A. Rasband, “Pinaagi sa Balaan nga Plano,” Liahona, Nob. 2017, 55–57.
Ang pagsunod sa tambag sa propeta magpaduol kanako sa Ginoo.
Si Elder Neil L. Andersen mitudlo: “Akong nabantayan nga samtang mainampuon kong nagtuon sa mga pulong sa propeta sa Dios ug sa mainampingon, uban sa pagpailub, sa espiritwal nga paagi mipahiangay sa akong kabubut-on ngadto sa iyang dinasig nga mga pagtulun-an, ang akong pagtuo diha ni Ginoong Jesukristo kanunay nga milambo. Kon mopili kita sa pagbaliwala sa iyang tambag ug motino nga mas nasayud kita, ang atong pagtuo mag-antus ug ang atong mahangturong panglantaw dili na klaro” (“Ang Propeta sa Dios,” Liahona, Mayo 2018, 26–27). Sa unsang paagi ang mga pulong ug mga buhat sa mga Nephite diha sa Helaman 16 nagmatuod sa gitudlo ni Elder Andersen? Unsa ang personal nga mga pasalig ang imong gibati nga kinahanglan nimong buhaton mahitungod sa mga propeta sa Ginoo ug sa ilang mga mensahe?
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.
Helaman 13:3–4
Unsa ang nakadasig sa imong pamilya mahitungod sa pagsanong ni Samuel sa sugo sa Ginoo diha sa Helaman 13:3–4? Atol sa inyong pamilya nga pagtuon karong semanaha, mahimo nimong awhagon ang mga sakop sa imong pamilya sa pagpaambit sa mga impresyon nga “moabut sa [ilang] kasingkasing.”
Helaman 13:38
Ang ideya nga ang kalipay makita “diha sa pagbuhat og dautan” komon sa atong panahon. Sa unsang mga paagi nga ang pagsunod sa ebanghelyo magdala kanato og tinuod nga kalipay?
Helaman 15:3
Sa unsang paagi ang pagkorihir sa Dios nagpakita sa Iyang gugma kanato? Dapita ang mga sakop sa pamilya sa pagpangutana sa Ginoo sa mapainubsanong paagi kon unsay ilang himoon aron molambo.
Helaman 15:5–8
Unsay atong nakat-unan mahitungod sa pagkakabig gikan sa mga Lamanite nga gihulagway niini nga mga bersikulo? Unsaon man nato sa pagsunod sa ilang ehemplo?
Helaman 16:1–3
Malingaw kaha ang imong pamilya sa pag-aksyon sa sugilanon mahitungod ni Samuel nga Lamanite? Human mabasa ang sugilanon, tingali ang mga sakop sa pamilya pweding magpuli-puli sa pagbarug ibabaw sa usa ka lingkuranan ug mobasa og pipila ka mga panagna ni Samuel samtang ang ubang sakop sa pamilya magpakaaron-ingnong molabay og mga pana o molabay og mga bato. Makatabang kini sa imong pamilya sa pagsabut unsay gibati ni Samuel ug sa mga Nephite. Ang batan-ong mga bata tingali malingaw usab sa pagdrowing og mga litrato mahitungod sa sugilanon. Unsaon man nato sa pagkahisama kang Samuel ug mopaambit sa ebanghelyo ngadto sa uban bisan sa atong mga kahadlok?
Alang sa dugang nga mga ideya sa pagtudlo sa mga anak, tan-awa sa latid [outline] karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Pangita og mga sundanan [pattern]. Ang usa ka sundanan mao ang usa ka plano o sanglitanan nga mahimong gamiton isip giya aron matuman ang usa ka buluhaton. Diha sa mga kasulatan, makakita kita og mga sundanan nga nagpakita kon sa unsang paagi gituman sa Ginoo ang Iyang buhat, sama sa pagpadala sa Iyang mga sulugoon alang sa pagpasidaan sa katawhan.
© The Book of Mormon for Young Readers, Samuel nga Lamanite, pinaagi ni Briana Shawcroft