“Septyembre 7–13. 3 Nephi 1–7: ‘Ihangad ang Imong Ulo ug Pagmaya,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Septyembre 7–13. 3 Nephi 1–7,” Dali, Sunod Kanako—Alang sa mga Indibidwal ug mga Pamilya: 2020
Usa ka Adlaw, Usa ka Gabii, ug Usa ka Adlaw, ni Jorge Cocco
Septyembre 7–13
3 Nephi 1–7
“Ihangad ang Imong Ulo ug Pagmaya”
Ang mga Nephite nakasaksi og milagrusong mga timailhan, apan paglabay sa panahon nakalimot sila sa ilang mga nasinati (tan-awa sa 3 Nephi 2:1). Ang pag-rekord sa imong mga impresyon makatabang nimo nga makahinumdom sa imong mga espiritwal nga mga kasinatian samtang nagtuon ka sa 3 Nephi 1–7.
Irekord ang Imong mga Impresyon
Sa ubang mga paagi, usa kadto ka makahinam nga panahon nga mahimong usa ka tumutuo kang Jesukristo. Mga propesiya nangatuman—talagsaong mga timailhan ug mga milagro tali sa katawhan nagpasabut nga ang Manluluwas sa dili madugay matawo na. Sa laing bahin, usa usab kini ka makapabalaka nga panahon alang sa mga tumutuo tungod kay, bisan pa sa tanang mga milagro, ang mga dili tumutuo miinsister nga “ang panahon milabay na” para sa pagkatawo sa Manluluwas (3 Nephi 1:5). Kining mga tawhana mihimo og “dako nga kasamok sa tibuok yuta” (3 Nephi 1:7) ug gani mitakda og petsa sa pagpatay sa mga tumutuo kon ang timailhan nga gipanagna ni Samuel nga Lamanite—nga usa ka gabii nga dili mongitngit—dili mahitabo.
Niining mga kahimtang sa pagsulay, si propeta Nephi “nangamuyo pag-ayo ngadto sa iyang Dios alang sa iyang mga katawhan” (3 Nephi 1:11). Ang tubag sa Ginoo makadasig sa tanan nga nag-atubang og pagpanglutos o pagduhaduha ug gustong mahibalo nga ang kahayag mobuntog sa kangitngit: “Ihangad ang inyong ulo ug pagmaya; … Ako motuman sa tanan nako nga gipamulong pinaagi sa ba-ba sa akong mga balaan nga mga propeta” (3 Nephi 1:13).
Mga Ideya alang sa Personal nga Pagtuon sa Kasulatan
Ang Ginoo motuman sa tanan Niyang mga pulong.
Unsaon nimo sa paglarawan ang imong pagbati kon ikaw usa niadtong mga tumutuo niining gihulagway nga panahon diha sa 3 Nephi 1–7? Unsa kaha ang pagbati, sama pananglit, sa paghulat nianang gabii nga dili mongitngit nga maoy magpahibalo sa pagkatawo sa Manluluwas, nasayud nga ikaw patyon kon ugaling dili man kini mahitabo? Samtang magbasa ka sa 3 Nephi 1:4–21 ug 5:1–3, pangitaa kon unsay gibuhat ni Nephi ug sa ubang mga tumutuo aron magpadayon ang ilang pagtuo atol niining mga lisud nga panahon. Giunsa sila sa pagpanalangin sa Ginoo? Unsay imong nakat-unan nga makatabang kon anaa ka naghulat sa mga panalangin nga gisaad sa Ginoo?
Ang paghikalimot sa espiritwal nga mga kasinatian maghimo kanako nga mabantang sa mga tintasyon ni Satanas.
Posibiling magtuo ka nga ang pagsaksi og butang nga milagruso kaayo sama sa gabii nga dili mongitngit magpabilin diha nimo sulod sa taas nga panahon ug mahimong ankla sa imong pagpamatuod. Apan ang mga panumduman mahitungod sa mga timailhan ug sa mga kahibulongan nga nasaksihan sa mga Nephite ingon og ninglubad sa paglabay sa panahon. Unsay hinungdan sa ilang paghikalimot, ug unsay mga resulta sa paghikalimot? (tan-awa sa 3 Nephi 1:22; 2:1–3).
Unsay imong gihimo aron mahinumdom ug mabag-o ang imong pagsaksi sa espiritwal nga mga kamatuoran? Sama pananglit, ikonsiderar kon sa unsang paagi ang pagrekord sa imong mga espiritwal nga kasinatian makatabang kanimo. Unsaon nimo sa pagpaambit ang imong pagsaksi ngadto sa imong pinakasuod aron matabangan sila nga motuo?
Tan-awa usab sa Alma 5:6; Henry B. Eyring, “O Hinumdumi, Hinumdumi,” Liahona, Nob. 2007, 66–69; Neil L. Andersen, “Ang Pagtuo Dili pinaagi sa Sulagma, apan pinaagi sa Pagpili,” Liahona, Nob. 2015, 65–68.
3 Nephi 2:11–12; 3:1–26; 5:24–26
Ang Ginoo molig-on sa Iyang mga Santos batok sa espiritwal nga mga peligro.
Sa atong panahon, dili na kita sa kasagaran mag-atubang og mga pundok sa mga kawatan nga mopugos kanato sa pagbiya sa atong mga panimalay ug magpundok sa usa ka dapit. Apan nag-atubang kita og espiritwal nga mga kakuyaw, ug ang kasinatian sa mga Nephite posibling naglangkob og mga leksyon nga makatabang kanato. Pangitaa kini nga mga leksyon samtang magbasa ka sa 3 Nephi 2:11–12 ug sa 3:1–26.
Diha sa 3 Nephi 5:24–26 atong mabasa ang mga panagpundok sa katawhan sa Ginoo sa katapusang mga adlaw. Unsa ang gitudlo niini nga mga bersikulo kon unsaon sa Ginoo pagpundok ang Iyang katawhan karon?
Tan-awa usab sa “Tibuok Kalibutan nga Debosyonal alang sa Kabatan-onan: Mga Mensahe gikan ni Presidente Russell M. Nelson ug ni Sister Wendy W. Nelson,” Hunyo 3, 2018, ChurchofJesusChrist.org; “Israel—Ang Pagpundok sa Israel,” Giya ngadto sa mga Kasulatan, scriptures.ChurchofJesusChrist.org.
Usa ako ka disipulo ni Jesukristo.
Unsa kaha ang ipasabut sa pagkahimong disipulo ni Jesukristo? “(tan-awa sa D&P 41:5). Diha sa 3 Nephi 5:12–26, gihunong ni Mormon ang iyang pagpamubo sa mga rekord sa Nephite ug mipahayag nga siya usa ka disipulo ni Jesukristo. Dayon, diha sa 3 Nephi 7:15–26, gihulagway niya ang pagpangalagad sa lain pa nga disipulo—nga si propeta Nephi. Unsay imong nakita dinhi sa duha ka tudling nga nakatabang nimo sa pagsabut unsay buot ipasabut sa pagkahimong disipulo ni Jesukristo?
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.
3 Nephi 3:13–14, 25–26
Unsay gibuhat sa mga Nephite sa pagpanalipod sa ilang kaugalingon gikan sa kaaway nga ilang giatubang? Unsay atong gibuhat aron mahimo ang atong panimalay nga usa ka dapit sa kasiguroan ug panalipod gikan sa dautan sa kalibutan?
3 Nephi 2:1–3; 6:15–17
Aron matabangan ang imong pamilya sa pagkat-on sa unsang paagi si Satanas makalingla kanato, pagdrowing og usa ka lawas, ug samtang magbasa ang imong pamilya sa 3 Nephi 2:1–3 ug sa 6:15–17, markahi ang managlahing bahin sa lawas nga mahisgutan. Sumala niini nga mga bersikulo, unsa ang ubang mga paagi nga si Satanas motintal kanato sa paghikalimot sa Dios ug magpakasala?
3 Nephi 4:7–12, 30–33
Unsa ang gibuhat sa mga Nephite sa dihang nakita nila nga nagsingabut ang mga tulisan nga Gadianton? Unsay makat-unan sa atong pamilya gikan sa mga Nephite kon mag-atubang kita og lisud nga mga sitwasyon? Unsay atong makat-unan gikan sa mga pulong sa mga Nephite human ang Ginoo mitabang kanila sa panahon sa ilang kalisdanan?
3 Nephi 5:13; Doktrina ug mga Pakigsaad 41:5
Basaha ang 3 Nephi 5:13 ug ang Doktrina ug mga Pakigsaad 41:5, ug hisguti kon unsay ipasabut sa pagkahimong disipulo ni Kristo. Tingali ang mga sakop sa pamilya makahisgot mahitungod sa mga panahon dihang namatikdan nila ang matag usa isip mga disipulo. Kon duna kay gagmayng mga anak, pwede kang maghimo og tsapa [badge] nga mag-ingon, “Usa ko ka disipulo ni Jesukristo,” ug ipataod nila ang tsapa sa matag higayon nga namatikdan nimo nga sila nagsunod sa Manluluwas.
Alang sa dugang nga mga ideya sa pagtudlo sa mga bata, tan-awa sa latid [outline] karong semana diha sa Dali, Sunod Kanako—Alang sa Primary.
Pagpalambo sa Atong Pagtudlo
Tabangi ang imong pamilya nga ipahisama ang mga kasulatan ngadto sa ilang mga kaugalingon. Si Nephi miingon, “Kay ako mipahisama sa tanan nga mga kasulatan ngari kanato, nga kini unta mahimo alang sa atong kaayohan ug sa atong pagkat-on” (1 Nephi 19:23). Aron matabangan ang imong pamilya sa pagpahisama sa mga kasulatan diha sa ilang kaugalingon, mahimo nimo silang dapiton sa pagpamalandong kon unsay ilang nahimo kon sila kauban sa mga tumutuo nga gihulagway sa 3 Nephi 1:4–9. (Tan-awa sa Pagtudlo sumala sa Pamaagi sa Manluluwas, 21.)
Usa ka Adlaw, Usa ka Gabii, ug Usa ka Adlaw, ni Walter Rane