“Septyembre 14–20. 3 Nephi 8–11: ‘Tindog ug Duol Kamo ngari Kanako,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Septyembre 14–20. 3 Nephi 8–11,” Dali, Sunod Kanako—Alang sa mga Indibidwal ug mga Pamilya: 2020
Ako ang Kahayag sa Kalibutan, ni James Fullmer
Septyembre 14–20
3 Nephi 8–11
“Tindog ug Duol Kamo ngari Kanako”
Sa 3 Nephi 8–11, nadungog sa katawhan ang tingog sa Dios nga namulong kanila. Samtang magbasa ka niini nga mga kapitulo, paminawa og maayo unsay gilitok sa Iyang tingog para kanimo.
Irekord ang Imong mga Impresyon
“Tan-awa, Ako mao si Jesukristo, kinsa gipamatud-an sa mga propeta nga moanhi sa kalibutan” (3 Nephi 11:10). Pinaagi niini nga mga pulong, ang nabanhaw nga Manluluwas mipaila sa Iyang kaugalingon, nga mituman sa 600 ka tuig nga mga propesiya sa Basahon ni Mormon. “Kana nga pagpakita ug kana nga pamahayag,” misulat si Elder Jeffrey R. Holland, “nag-establisar sa sentro nga punto, sa labing taas nga higayon, diha sa tibuok kasaysayan sa Basahon ni Mormon. Usa kadto ka pagpakita ug lagda nga mipahibalo ug midasig sa matag propeta nga Nephite. … Ang tanan naghisgot bahin kaniya, mikanta bahin kaniya, nangandoy bahin kaniya, ug nag-ampo alang sa iyang pagpakita—apan siya dinhi gayud sa pagkatinuod. Ang adlaw sa mga adlaw! Ang Dios nga mihimo sa tanang ngitngit nga kagabhion ngadto sa mahayag nga kabuntagon miabut na” (Christ and the New Covenant: The Messianic Message of the Book of Mormon [1997], 250–51).
Mga Ideya alang sa Personal nga Pagtuon sa Kasulatan
Si Jesukristo mao ang Kahayag sa Kalibutan.
Tingali mabantayan nimo nga ang mga tema nga may kalabutan sa kangitngit ug kahayag—pisikal ug espiritwal—gibalik-balik dinhi sa 3 Nephi 8–11. Unsa ang imong nakat-unan gikan niini nga mga kapitulo mahitungod sa espiritwal nga kangitngit ug kahayag? Unsa ang nagdala og kangitngit sa imong kinabuhi? Unsa ang nagdala og kahayag? Ngano kaha nga gipili man sa Manluluwas ang pagpaila sa Iyang kaugalingon isip “ang kahayag ug ang kinabuhi sa kalibutan”? (3 Nephi 9:18; 11:11). Sa unsang paagi si Jesukristo nahimong kahayag sa imong kinabuhi?
Kon maghinulsol ko, ang Manluluwas mopundok, mopanalipud, ug moayo kanako.
Unsay imong mahunahuna nga gibati sa mga tawo human masinati ang mga kalaglagan ug kangitngit nga gihulagway sa 3 Nephi 8? Unsa kaha ang ilang gibati dihang nadungog nila ang tingog sa Manluluwas nga namulong mahitungod sa kahayag, kalooy, ug katubsanan diha sa mga kapitulo 9 ug 10?
Bisan og ang Manluluwas namahayag nga ang makalilisang nga kalaglagan maoy resulta sa mga sala sa katawhan, misaad Siya nga iyang ayuhon kadtong mobalik Kaniya ug maghinulsol (tan-awa sa 3 Nephi 9:2, 13). Si Elder Neil L. Andersen miingon: “Natingala ko sa nagliyok nga mga bukton sa kalooy ug gugma sa Manluluwas alang sa mahinulsulon, bisan unsa ka maakuhon ang gisalikway [gibiyaan] nga sala. Ako mopamatuod nga ang Manluluwas makahimo ug andam nga mopasaylo sa atong mga sala” (“Paghinulsol … Aron Ako Moayo Kaninyo,” Liahona, Nob. 2009, 41).
Siksika ang 3 Nephi 9–10 alang sa ebidensya sa kamanggiloy-on ni Kristo ug sa Iyang kamatinguhaon nga mopasaylo. Sama pananglit, unsay imong nakita diha sa 3 Nephi 9:13–22 ug sa 10:1–6 nga nakatabang kanimo nga mobati sa gugma ug kalooy sa Manluluwas? Pamalandungi ang mga kasinatian dihang gibati nimo Siya nga “mitigom” ug “miamuma” kanimo (tan-awa sa 3 Nephi 10:4). Ikonsiderar ang pagrekord niini nga mga kasinatian diha sa usa ka journal o sa pagpaambit niini kauban sa imong mga minahal.
Makakat-on ako sa pagpamati ug pagsabut sa tingog sa Dios.
Nakasulay ka bang mibati nga naglisud ka sa pagsabut sa usa ka mensahe nga gisulti kanimo sa Dios? Tingali ang kasinatian sa mga tawo diha sa 3 Nephi 11:1–8 makatabang kanimo sa pagsabut sa pipila ka baruganan mahitungod sa pagpaminaw ug pagsabut sa tingog sa Dios. Tingali matiman-an nimo ang mga kinaiyanhong tingog sa Dios nga nadungog sa katawhan ug unsay ilang gihimo aron mas masabtan kini. Sa unsang paagi kini nga sugilanon magamit sa imong mga paningkamot aron makadungog ug makaila sa tingog sa Dios diha sa imong kinabuhi pinaagi sa personal nga pagpadayag?
Si Jesukristo midapit kanako sa pag-angkon og personal nga pagpamatuod mahitungod Kaniya.
Dunay mga 2,500 ka tawo ang nagkapundok sa Bountiful dihang mipakita si Jesukristo (tan-awa sa 3 Nephi 17:25). Bisan sa ingon niini nga gidaghanon, ang Manluluwas midapit sa “tagsa-tagsa” kanila aron mohikap sa uwat sa mga nilansangan diha sa Iyang mga kamot ug mga tiil (3 Nephi 11:14–15). Unsay gisugyot niini diha kanimo mahitungod sa kaimportante sa pag-angkon og personal nga mga kasinatian nga magpalig-on sa pagtuo kang Jesukristo? Sa unsang mga paagi ang Manluluwas midapit kanimo sa “pagtindog ug pagduol ngadto” Kaniya? (3 Nephi 11:14). Unsa nga mga kasinatian ang nakatabang kanimo sa pag-angkon og usa ka saksi nga Siya ang imong Manluluwas? Pwede sab nimong hunahunaon kon sa unsang paagi ang ehemplo sa Manluluwas dinhi niini nga mga bersikulo makadasig sa imong mga paningkamot sa pagpangalagad sa uban.
Tagsa-tagsa, ni Walter Rane
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.
3 Nephi 8–9
Aron matabangan ang imong pamilya nga mobati sa mga kasinatian nga gihulagway diha sa 3 Nephi 8–9, pwede nimong iistorya og balik o ipapaminaw sa usa ka rekord ang mga porsyon niini nga mga kapitulo diha sa usa ka ngitngit nga lawak. Hisguti kon unsa kaha ang pagbati nga maanaa sa kangitngit sulod sa tulo ka adlaw. Dayon pwede nimong isulti kon sa unsang paagi si Jesukristo mao “ang kahayag … sa kalibutan” (3 Nephi 9:18).
3 Nephi 10:1–6
Ang paglarawan sa usa ka himongaan nga mipundok sa iyang mga piso posibling usa ka makaimpluwensya nga himan sa pagtudlo aron matabangan ang mga bata nga makasabut sa kinaiya ug misyon sa Manluluwas. Pwede nimong basahon kini nga mga bersikulo samtang ang imong pamilya magtan-aw sa litrato sa usa ka himongaan ug sa mga piso. Nganong gikinahanglan man nga pundukon sa usa ka himongaan ang iyang mga piso? Nganong ang Manluluwas gusto man nga mopundok kanato paduol Kaniya? Unsa kaha ang mahitabo kon ang usa ka piso mopili sa dili pagduol kon gitawag?
3 Nephi 11:1–7
Pwede nimong basahon ang pipila niini nga mga bersikulo pinaagi sa malumo, “hinay nga tingog” (3 Nephi 11:3). Unsay gikinahanglang buhaton sa mga tawo aron makasabut sa tingog gikan sa langit? Unsa ang atong makat-unan gikan niini nga kasinatian?
3 Nephi 11:21–38
Duna ba sa imong pamilya ang nangandam para sa bunyag? Ang pagbasa sa 3 Nephi 11:21–38 makatabang nila sa pag-andam. Sa unsang paagi ang pagpamalandong sa mga pagtulun-an sa Manluluwas dinhi niini nga mga bersikulo makatabang sa mga sakop sa pamilya nga nabunyagan na?
3 Nephi 11:29–30
Unsa ang gitudlo niini nga mga bersikulo kanato mahitungod sa panagbingkil? Unsaon man nato “pagwagtang” ang panagbingkil sa atong panimalay? (3 Nephi 11:30).
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Irekord ang mga impresyon. Si Elder Richard G. Scott miingon, “Ang kahibalo nga mainampingon nga girekord maoy usa ka kahibalo nga anaa sa panahon sa panginahanglan. … [Ang pagrekord sa espiritwal nga mga impresyon] malagmit nga makapalambo sa imong pagdawat og dugang nga kahayag” (“Acquiring Spiritual Knowledge,” Ensign, Nob. 1993, 88).
Usa ka Magbalantay sa Karnero, ni Howard Lyon