“Septyembre 14–20. 3 Nephi 8–11: ‘Tindog ug Duol Kamo ngari Kanako,’” Dali, Sunod Kanako—Alang sa Primary: Basahon ni Mormon 2020 (2020)
“Septyembre 14–20. 3 Nephi 8–11,” Dali, Sunod Kanako—Alang sa Primary: 2020
I am the Light of the World, ni James Fullmer
Septyembre 14–20
3 Nephi 8–11
“Tindog ug Duol Kamo ngari Kanako”
Basaha ang 3 Nephi 8–11 samtang maghunahuna sa mga bata nga imong gitudloan. Ang mga ideya niini nga outline makatabang aron magiyahan ang imong pagpangandam.
Irekord ang Imong mga Impresyon
Dapita ang Pagpaambit
Ipakita ang usa ka hulagway ni Jesukristo nga nagpakita sa America, sama sa anaa sa outline niini nga semana sa Dali, Sunod Kanako—Alang sa mga Indibidwal ug mga Pamilya. Dapita ang mga bata sa pagtudlo sa mga detalye diha sa hulagway ug pagpaambit og butang nga ilang nasayran mahitungod sa istorya nga gihulagway.
Itudlo ang Doktrina: Mas Gagmay nga mga Bata
Si Jesukristo nagdapit kanako sa pagduol ngadto Kaniya.
Tingali dili nimo mapaambit uban sa mga bata ang tanang mga detalye sa pagpakita sa Manluluwas ngadto sa mga katawhan ni Nephi, apan makatabang ka aron mabati nila ang gugma nga Iyang gipakita sa mga katawhan diha sa 3 Nephi 8–11.
Posible nga mga Kalihokan
-
Sultihi ang mga bata mahitungod sa mga unos ug kangitngit nga gihulagway diha sa 3 Nephi 8, magmainampingon nga dili makahadlok o makapasuko kanila. Mahimo nimong gamiton ang “Kapitulo 42: Mga Timailhan sa Paglansang sa Krus ni Kristo” (Mga Istorya sa Ang Basahon ni Mormon, 117–19, o ang katugbang nga video diha sa ChurchofJesusChrist.org). Pangutan-a ang mga bata kon unsa kaha ang ilang bation kon didto pa sila sa pagkahitabo niadtong mga unos ug kangitngit. Ipasabut nga ang mga unos ug kangitngit mao ang mga timailhan nga si Jesus namatay, ug ipakita ang hulagway sa Paglansang sa Krus (tan-awa sa Libro sa mga Hulagway sa Ebanghelyo, nu. 57). Dayon basaha ang 3 Nephi 9:13. Unsay gisulti ni Jesus nga Iyang buhaton alang niadtong naghinulsol? Tabangi ang mga bata nga makasabut nga ang pulong “moayo” niini nga bersikulo nagpasabut nga si Jesus mopasaylo kanila.
-
Ipakita ang hulagway diha sa outline niini nga semana sa Dali, Sunod Kanako—Alang sa mga Indibidwal ug mga Pamilya samtang imong ihulagway sa imong kaugalingong mga pulong ang pagpakita sa nabanhaw nga Manluluwas ngadto sa mga Nephite ug mga Lamanite. Basaha ang mugbo nga mga tudling gikan sa 3 Nephi 11 nga makatabang kanila aron mobati sa kasagrado niini nga panghitabo. Dapita sila sa pagpiyong sa ilang mga mata ug maghunahuna kon unsa ang ilang bation kon ilang makita si Jesus. Sultihi ang mga bata unsa ang imong gibati sa dihang imong gibasa ug gipamalandong kini nga mga hitabo. Ipamatuod nga si Jesus gusto nga kitang tanan moduol ngadto Kaniya ug mobati sa Iyang gugma. Kompletuha ang pahina sa kalihokan uban sa mga bata.
Si Jesus manalipud sa Iyang katawhan sama nga ang himongaan manalipud sa iyang mga piso.
Ang hulagway sa usa ka himongaan nga nagpundok sa iyang mga piso makatudlo sa mga bata mahitungod sa kahupay ug proteksyon nga idalit sa Manluluwas kon moduol kita ngadto Kaniya.
Posible nga mga Kalihokan
-
Ipakita ang usa ka hulagway sa usa ka himongaan nga nag-atiman sa iyang mga piso. Basaha ang 3 Nephi 10:6, ug sultihi ang mga bata unsaon pagtawag sa himongaan ang iyang mga piso ug panalipdan sila ilawom sa iyang mga pako kon adunay kakuyaw. Hisguti kon sa unsang paagi si Jesus nahisama sa himongaan ug kita sama sa mga piso. Unsaon nato pagduol ngadto Kaniya aron makakaplag og kahilwasan [safety]?
-
Pagbutang og usa ka hulagway ni Jesus diha sa bongbong. Dapita ang mga bata sa paglakawlakaw libot sa lawak klasehanan samtang imong basahon og kusog ang 3 Nephi 10:4. Sultihi sila sa pagpaduol ngadto sa hulagway ni Jesus kon ilang madungog ang mga pulong “gitigum” o “magtigum.” Balika kini nga kalihokan samtang imong basahon ang mga bersikulo 5 ug 6. Ipaambit sa mga bata giunsa nimo pagduol sa Manluluwas alang sa kahilwasan, ug ipamatuod nga Siya mopanalipud kanato gikan sa espiritwal nga mga kakuyaw samtang kita mosunod sa iyang mga sugo.
Gusto ni Jesukristo nga mabunyagan ako.
Ang mga bata nga imong gitudloan nangandam nga mabunyagan. Ang mga pagtulon-an ni Kristo niini nga mga tudling makatabang kanila nga masayud ngano nga mahinungdanon ang bunyag.
Posible nga mga Kalihokan
-
Basaha ang 3 Nephi 11:21–26, ug dapita ang mga bata sa pagtindog sa matag higayon nga madungog nila ang pulong “bunyag.” Ipasabut nga si Jesus nagtudlo kanato sa husto nga paagi sa pagpabunyag. Ipakita ang usa ka hulagway sa usa ka bata nga gibunyagan (tan-awa sa Libro sa mga Hulagway sa Ebanghelyo, nu. 104). Kon ang mga bata nakakita na og bunyag kaniadto, dapita sila sa paghulagway kon unsay ilang nakita. Kinsa ang nagbunyag, ug giunsa kini niya pagpahigayon?
-
Sa sayo pa, dapita ang usa ka amahan sa usa sa mga bata nga motambong sa imong klase ug mopaambit sa mga bata ngano nga mahinungdanon nga mabunyagan kita pinaagi sa pagpaunlod pinaagi sa usa ka tawo nga naghupot sa pagkapari. Mahimo usab niya nga ipasabut ngadto sa mga bata kon unsa ang mahitabo kon sila mabunyagan ug ang mga panalangin nga ilang madawat. Awhaga siya sa paggamit sa 3 Nephi 11:23–26 sa iyang pagpasabut.
Itudlo ang Doktrina: Mas Dagko nga mga Bata
Kon anaa ako sa kangitngit, si Jesukristo mahimo nga akong kahayag.
Usa ka kusganon nga mensahe niini nga mga kapitulo mao nga si Jesukristo mao ang kahayag sa kalibutan, ug Siya mahimo nga kahayag sa atong mga kinabuhi.
Posible nga mga Kalihokan
-
Basaha og dungan ang 3 Nephi 8:5–7, 11–23, ug 10:9–13 (kon posible, pangitngiti ang lawak samtang magbasa ka). Hunonga og panagsa nga pagbasa ug pangutan-a ang mga bata kon unsa kahay pamati kon makasulay niini nga mga panghitabo. Basaha og dungan uban sa mga bata ang pipila ka mga pulong nga gipamulong ni Jesukristo ngadto sa mga katawhan samtang anaa sila sa kangitngit (tan-awa sa 3 Nephi 9:13–14, 18). Nganong gitawag man ni Jesukristo ang Iyang Kaugalingon nga Kahayag sa Kalibutan? Unsa may gidapit ni Jesus nga buhaton sa mga tawo, ug nato, aron mahimo Siya nga atong kahayag? (tan-awa sa 3 Nephi 9:20–22).
-
Pakit-a ang mga bata og mapa sa kalibutan, ug tabangi sila sa pagpangita sa Jerusalem ug sa mga kayutaan sa Amerika. Ipasabut nga ang pagkalaglag nga gihulagway diha sa 3 Nephi 8 usa ka timailhan alang sa mga katawhan sa Amerika nga si Jesukristo gilansang na sa krus didto sa Jerusalem. Basaha og dungan ang 3 Nephi 11:1–15, ug hangyoa ang mga bata nga sultihan ka kon sila makakita og usa ka butang niini nga mga bersikulo nga makatabang nila aron mobati sa gugma sa Dios. Ipaambit ang bersikulo 37, ug ipamatuod nga ang Manluluwas naghigugma sa tanang mga bata. Ipaambit ang imong pagpamatuod mahitungod sa kamatuoran sa inyong gibasa.
Tagsa-tagsa, ni Walter Rane
Makakat-on ko sa pag-ila sa tingog sa Dios sa akong kinabuhi.
Sa sinugdanan ang mga tawo wala makasabut sa tingog nga ilang nadungog gikan sa langit. Unsa ang makat-onan sa mga bata gikan niini nga asoy mahitungod sa pagdawat og pagpadayag?
Posible nga mga Kalihokan
-
Basaha ang 3 Nephi 11:1–4 uban sa mga bata, mohunong aron sa pagpangutana og mga pangutana sama sa “Ngano kaha nga ang mga tawo dili man makasabut sa tingog?” Dayon hangyoa sila sa pagbasa sa mga bersikulo 5–7 aron masuta unsa ang gibuhat sa mga tawo nga nakatabang nila sa pagsabut sa tingog diha sa ilang mga kasingkasing. Unsaon nato pagsulay sa pagpaminaw sa Dios kon Siya makigsulti sa atong mga kasingkasing pinaagi sa Espiritu Santo?
-
Ipatukar og hinay ang usa ka himno o kanta sa mga bata aron kini lisud nga madungog. Pangutan-a ang mga bata kon makasabut ba sila sa mga pulong sa kanta. Dayon tabangi ang mga bata sa pagsiksik sa 3 Nephi 11:3 alang sa mga deskripsiyon sa tingog gikan sa langit. Nganong dili man makigsulti ang Dios kanato pinaagi sa “makusog” o “mabangis” nga tingog? Unsa ang atong mabuhat aron mas klaro nga makadungog Kaniya?
Awhaga ang Pagkat-on diha sa Panimalay
Dapita ang mga bata nga mosulti sa usa ka tawo mahitungod sa pagduaw ni Jesus sa Amerika—kon mahimo, usa ka tawo nga wala pa masayud bahin niini.
Pagpalambo sa Atong Pagtudlo
Idumala ang mga kasamok uban sa gugma. “Usahay ang usa ka bata molihok sa mga paagi nga makasamok sa pagkat-on sa uban diha sa klase. Kon mahitabo kini, pagmapailubon, mahigugmaon, ug masinabtanon kabahin sa mga hagit nga tingali giatubang sa bata. … Kon ang bata nga maoy hinungdan sa kasamok adunay espesyal nga mga panginahanglan, pakigsulti sa ward o stake disability specialist o bisitaha ang disabilities.ChurchofJesusChrist.org aron masayran kon unsaon nga mas maayong matubag kadto nga mga panginahanglan” (Pagtudlo sumala sa Pamaagi sa Manluluwas, 26).