Ikatulong Nephi: Kining Napulog Duha nga Akong Gipili, ni Gary L. Kapp

Septyembre 21–27

3 Nephi 12–16

“Ako Mao ang Balaod, ug ang Kahayag”

Dunay daghang baruganan nga makit-an diha sa 3 Nephi 12–16. Ang uban gipaklaro dinhi sa latid [outline], apan pweding makakita ka pa og lain. Tugoti nga ang Langitnong Amahan, pinaagi sa Iyang Espiritu, motudlo kanimo unsay imong gikinahanglan karon dayon.

Irekord ang Imong mga Impresyon

Sama sa mga disipulo ni Jesus nga nagpundok sa bukid sa Galilea, ang mga tawo nga nagpundok sa templo sa Bountiful nagpuyo ubos sa balaod ni Moises. Gisunod nila kini tungod kay nagpunting kini sa ilang mga kalag ngadto kang Kristo (tan-awa sa Jacob 4:5), ug karon si Kristo mibarug sa ilang atubangan, nga mipahayag og mas taas nga balaod. Apan bisan kadtong uban kanato nga wala gayud magsunod sa balaod ni Moises makamatikod nga ang sumbanan nga gitakda ni Jesus para sa Iyang mga disipulo maoy usa ka balaod nga mas taas. “Ako manghinaut nga kamo mahimo nga hingpit,” miingon Siya (3 Nephi 12:48). Kon kini naghimo kaninyo sa pagbati og kakulang, hinumdumi nga miingon usab si Jesus, “Bulahan ang mga kabus sa espiritu kinsa moduol kanako, kay ila ang gingharian sa langit” (3 Nephi 12:3). Kining mas taas nga balaod usa ka pagdapit—laing paagi sa pagsulti nga “Duol ngari kanako aron kamo maluwas” (3 Nephi 12:20). Sama sa balaod ni Moises, kini nga balaod nagtultol kanato ngadto kang Kristo—ang Usa nga maoy bugtong makaluwas ug makahingpit kanato. “Tan-awa,” miingon Siya, “Ako mao ang balaod, ug ang kahayag. Tan-aw ngari kanako, ug lahutay hangtud sa katapusan, ug ikaw mabuhi” (3 Nephi 15:9).

Mga Ideya alang sa Personal nga Pagtuon sa Kasulatan

3 Nephi 12–14

Ang mga pagtulun-an sa Manluluwas nagpakita kon unsaon nako sa pagkahimong tinuod nga disipulo.

Dunay daghang kamatuoran, mga pulong sa pagtambag, ug mga pasidaan diha sa 3 Nephi 12–14. Aniay usa ka paagi sa pagtuon ug paggamit sa unsay gitudlo sa Manluluwas dinhi niini nga mga kapitulo: Pagpili og usa ka grupo niini nga mga bersikulo, ug tan-awa kon ma-summarize ba nimo unsay gitudlo sa mga bersikulo pinaagi sa usa ka kapahayag [sentence] nga nagsugod og “Ang tinuod nga mga disipulo ni Jesukristo …” Sama pananglit, ang usa ka summary sa 3 Nephi 14:1–5 mahimo nga “Ang tinuod nga mga disipulo ni Jesukristo dili mahukmanon.” Pwede kang mopili og bersikulo gikan niini nga mga kapitulo nga makahuluganon kaayo kanimo ug memoryaha kini o kopyaha kini ug ibutang kini sa dapit diin makita nimo kini sa kanunay. Pamalandungi kon unsaon nimo sa paggamit ang unsay imong nakat-unan sa imong personal nga mga paningkamot aron mahimong mas maayo nga disipulo ni Jesukristo.

Tan-awa usab sa Mateo 5–7; Lucas 6:20–49.

3 Nephi 12:1–2; 15:23–24; 16:1–6

Bulahan kadtong mga motuo nga wala makakita.

Ikumpara sa total nga gidaghanon sa mga anak sa Dios, diyutay ra kaayo ang nakakita sa Manluluwas ug nakadungog sa Iyang tingog, kay sa mga tawo sa Bountiful. Kadaghanan kanato susama ra kaayo sa mga tawo nga gihulagway diha sa 3 Nephi 12:2; 15:23; ug sa 16:4–6. Unsa nga mga saad ang gihimo para sa ingon nianang mga tawhana dinhi niini nga mga bersikulo? Sa unsang paagi nga kini nga mga saad natuman diha sa imong kinabuhi?

Tan-awa usab sa Juan 20:26–29; 2 Nephi 26:12–13; Alma 32:16–18.

3 Nephi 12:21–30; 13:1–8, 16–18; 14:21–23

Ang matarung nga buhat dili igo; kinahanglang putli usab ang akong kasingkasing.

Usa ka tema nga posible nimong mamatikdan dinhi niini nga mga kapitulo mao ang pagdapit sa Manluluwas sa pagsunod sa mas taas nga balaod—ang pagmatarung dili lang sa mga binuhatan nga makita apan usab sulod sa atong kasingkasing. Pangitaa kini nga tema dihang ang Manluluwas namulong mahitungod sa panagbingkil (3 Nephi 12:21–26), imoralidad (3 Nephi 12:27–30), pag-ampo (3 Nephi 13:5–8), ug pagpuasa (3 Nephi 13:16–18). Unsa pang uban nga ehemplo ang imong makit-an? Unsay imong mahimo sa paglimpyo sa mga tinguha sa imong kasingkasing kay sa magtutok lamang sa mga binuhatan nga makita?

3 Nephi 14:7–11

Kon magtinguha ko sa “mga maayo nga butang” gikan sa Langitnong Amahan, ako makadawat.

Si Presidente Russell M. Nelson miingon: “Ang Dios ba buot gayud nga makigsulti kaninyo? Oo! … O, aduna pay daghang gusto sa inyong Amahan sa Langit nga inyong mahibaloan” (“Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 95). Samtang magbasa ka sa pagdapit sa Ginoo diha sa 3 Nephi 14:7–11 sa pagpangayo, pagpangita, ug pagpanuktok, pamalandungi kon unsang “mga maayo nga butang” ang gusto Niya nga inyong pangayoon. Ang mosunod nga dugang nga mga kasulatan makatabang kanimo nga makasabut unsaon sa pagpangayo, pagpangita, ug pagpanuktok. Makatabang usab kini sa pagpasabut nganong ang ubang mga pag-ampo wala matubag sa paagi nga imong gilauman: Isaias 55:8–9; Helaman 10:5; Moroni 7:26–27, 33, 37; ug Doktrina ug mga Pakigsaad 9:7–9.

Mga Ideya alang sa Pamilya nga Pagtuon sa Kasulatan ug Family Home Evening

Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.

3 Nephi 12:48

Sa unsang paagi ang mensahe ni Elder Jeffrey R. Holland nga “Kamo Kinahanglan Magmahingpit—sa Katapusan” (Liahona, Nob. 2017, 40–42) makatabang kanato nga masabtan ang mga pulong sa Manluluwas dinhi niini nga mga bersikulo? Makakita ka usab og tabang diha sa Moroni 10:32–33.

3 Nephi 12:9, 38–42; 14:3–5, 12

Sa unsa nga paagi kini nga mga bersikulo magamit sa mga pakig-inter-aksyon sa mga sakop sa pamilya? Pwede nga ang imong pamilya magtakda og mga tumong nga pagasundon pinaagi niini nga mga baruganan sa mas matinud-anong paagi.

3 Nephi 13:19–21

Kini nga mga bersikulo makapaaghat og usa ka diskusyon mahitungod sa unsay gibahandi sa imong pamilya. Duna bay ubang mga bahandi sa yuta nga nagpugong kanimo sa pagpahimutang og mga bahandi sa langit? Pwede nimong mapasabut og maayo kini nga punto pinaagi sa dula sa pamilya nga pagpangita og bahandi [treasure hunt] nga mangita sa mga butang diha sa imong panimalay nga nagpahinumdom sa mga sakop sa imong pamilya sa mga bahandi nga adunay mahangturon nga bili.

3 Nephi 14:7–11

Ang gagmayng mga bata tingali malingaw sa dula, nga dinasig diha sa 3 Nephi 14:8–9, diin mangayo sila og butang ug makadawat og lahi kaayo nga butang. Unsa man ang gusto sa Manluluwas nga atong mahibaloan mahitungod sa atong Amahan sa Langit dihang gipaambit Niya kini nga ehemplo?

3 Nephi 14:15–20

Unsang “maayo nga bunga” ang nagtabang kanato nga masayud nga si Joseph Smith, o ang kasamtangan nga Presidente sa Simbahan, tinuod nga propeta?

3 Nephi 14:24–27

Paghunahuna og mga paagi diin makatabang ka sa imong pamilya sa paghulagway sa sambingay niini nga mga bersikulo. Tingali ang mga sakop sa pamilya pweding magdrowing og mga litrato, mohimo og mga aksyon, o magtukod og mga butang diha sa bantok ug balason nga mga pundasyon.

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha diha sa Dali, Sunod Kanako—Alang sa Primary.

Pagpalambo sa Atong Pagtudlo

Mogamit og mga leksyon nga mopakita og mga butang. Ang Manluluwas mitudlo og importanting mga kamatuoran pinaagi sa paggamit og pamilyar nga mga butang. Pwede kang mohimo og butang nga susama sa unsay gibasa sa imong pamilya 3 Nephi 12–16. Sama pananglit, kon magbasa ka sa kapitulo 12, pwede kang mopakita og asin, usa ka kandila, ug kupo [coat]. Mosangput usab kini ngadto sa usa ka maayo nga kalihokan sa pagribyu. Human nimo mabasa kini nga mga kapitulo, ipakita og balik ang mga butang, ug pangutan-a ang mga sakop sa pamilya kon unsay gitudlo sa Manluluwas mahitungod sa matag usa.

Ang Pagbisita sa Manluluwas ngadto sa Katawhan sa Amerika, ni Glen S. Hopkinson