“Septyembre 28–Oktubre 11. 3 Nephi 17–19: ‘Tan-awa, Ang Akong Hingpit nga Kalipay Nabug-os,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Septyembre 28–Oktubre 11. 3 Nephi 17–19,” Dali, Sunod Kanako—Alang sa mga Indibidwal ug mga Pamilya: 2020
Ang Kahayag sa Iyang Panagway Misanag diha Kanila, ni Gary L. Kapp
Septyembre 28–Oktubre 11
3 Nephi 17–19
“Tan-awa, Ang Akong Hingpit nga Kalipay Nabug-os”
Samtang ang nangaging mga kapitulo sa 3 Nephi nagtutok gayud sa mga pulong sa Manluluwas, ang mga kapitulo 17–19 naghulagway sa Iyang pangalagad ug mga pagtulun-an sa katawhan. Samtang gibasa nimo kini nga mga kapitulo, unsay gitudlo kanimo sa Espiritu mahitungod sa Manluluwas?
Irekord ang Imong mga Impresyon
Si Jesukristo bag-o lang migahin sa iyang panahon sa pagpangalagad sa yuta sa Bountiful, sa pagtudlo sa Iyang ebanghelyo, nga naghatag sa katawhan og kahigayunang makakita ug mobati sa mga marka sa Iyang nabanhaw nga lawas, ug nagpamatuod nga Siya ang gisaad nga Manluluwas. Ug karon panahon na nga Siya mobiya. Kinahanglan na Siyang mobalik ngadto sa Iyang Amahan, ug nasayud Siya nga ang katawhan nagkinahanglan og panahon sa pagpamalandong sa unsay Iyang gitudlo. Misaad nga mobalik gayud sa sunod nga adlaw, gipapauli Niya sa ilang mga balay ang pundok sa katawhan. Apan walay bisan usa nga mibiya. Wala silay gilitok kon unsay ilang gibati, apan namatikdan kini ni Jesus: nanghinaot sila nga Siya “[m]agpabilin og diyutay pa nga panahon uban kanila” (3 Nephi 17:5). May uban pa Siyang importanting butang nga buhaton, apan ang kahigayunan sa pagpakita og kalooy sa kanunay dili moabut sa hamugaway nga panahon, mao nga nagpabilin si Jesus uban sa katawhan sa diyutay pa nga panahon. Ang misunod mao tingali ang pinakalumo nga ehemplo sa pagpangalagad nga narekord sa kasulatan. Ang mga tawo nga didto makasulti lamang nga kadto dili mahulagway (tan-awa sa 3 Nephi 17:16–17). Si Jesus mismo misumada diha-diha nga espirituhanong pagbubu pinaagi niining yano nga mga pulong: “Karon tan-awa, ang akong hingpit nga kalipay nabug-os” (3 Nephi 17:20).
Mga Ideya alang sa Personal nga Pagtuon sa Kasulatan
Ang Manluluwas maoy akong hingpit nga ehemplo sa pagpangalagad.
Nasayud kita nga dihay mga 2,500 ka tawo (tan-awa sa 3 Nephi 17:25) nga nakasinati sa unang pagbisita ni Kristo, sigun sa narekord sa 3 Nephi 11–18. Sa gihapon ang Manluluwas nakakita og paagi sa pag-alagad kanila sa tinagsa-tagsa. Unsay imong nakat-unan mahitungod sa pagpangalagad gikan sa ehemplo sa Manluluwas niini nga kapitulo? Unsa nga mga panginahanglan ang Iyang gipangalagaran? Pamalandungi kon sa unsang paagi ang Iyang ehemplo makatabang kanimo sa pag-alagad sa uban.
Tan-awa ang Inyong Gagmayng mga Bata, pinaagi ni Gary L. Kapp
3 Nephi 17:13–22; 18:15–25; 19:6–9, 15–36
Gitudloan kita sa Manluluwas kon unsaon sa pag-ampo.
Hunahunaa kon unsa kaha ang pagbati nga makadungog sa Manluluwas nga nag-ampo alang kanimo. Unsa kahay Iyang isulti para ug alang kanimo? Ang Iyang mga pagtulun-an ug mga pag-ampo niini nga mga kapitulo posibling makahatag kanimo og ideya. Samtang nagtuon ka, unsay imong nakat-unan gikan sa ehemplo ni Kristo nga makahimo sa kaugalingon nimong mga pag-ampo nga mas makahuluganon? Unsa nga mga panalangin gikan sa pag-ampo ang nakita nimo sa imong kinabuhi?
Mabusog ako sa espirituhanong paagi kon moambit ako sa sakramento.
Samtang magbasa ka sa 3 Nephi 18:1–12, pamalandungi kon sa unsang paagi ang pag-ambit sa sakramento makatabang kanimo nga “mabusog” sa espirituhanong paagi (3 Nephi 18:3–5, 9; tan-awa usab sa 3 Nephi 20:1–9). Sama pananglit, pwede kang maghimo og lista sa mga pangutana nga makaaghat og personal nga pagpamalandong kon mag-ambit ka sa sakramento, sama sa “Unsay akong gibati mahitungod sa Manluluwas ug sa Iyang sakripisyo alang kanako?” “Sa unsang paagi ang Iyang pagsakripisyo nakaimpluwensya sa inadlaw nakong kinabuhi?” o “Unsa may maayo nakong gihimo isip usa ka disipulo, ug unsa may pwede nakong palamboon?”
Kini nga mga pulong gikan ni Presidente Henry B. Eyring posibling makatabang nimo sa pagpamalandong og usa ka paagi nga ang sakramento makatabang nimo aron mabusog sa espirituhanong paagi: “Sa pagsusi ninyo sa inyong kinabuhi atol sa ordinansa sa sakramento, unta ang inyong mga hunahuna makasentro dili lamang sa mga butang nga nasayop ninyo pagbuhat apan sa mga butang usab nga nabuhat ninyo sa sakto—mga gutlo sa dihang gibati ninyo nga ang Langitnong Amahan ug ang Manluluwas nahimuot kaninyo. Mahimo pa gani kamo nga mogahin og panahon atol sa sakramento nga mohangyo sa Dios sa pagtabang kaninyo nga makakita niining mga butanga. … Sa dihang gibuhat nako kini, ang Espiritu mipasalig nako nga samtang layo pa gihapon ko sa pagkaperpekto, mas maayo ko karon kay sa unsa ko kagahapon. Nakahatag kini kanako og pagsalig nga, tungod sa Manluluwas, mahimo kong mas maayo pa gani ugma” (“Kanunay Mohinumdom Kaniya,” Liahona, Peb. 2018, 5).
Ang mga dispulo ni Jesukristo magtinguha sa gasa sa Espiritu Santo.
Paghunahuna og usa ka pag-ampo nga imong gilitok bag-o lang. Unsay gikatudlo sa imong mga pag-ampo diha kanimo mahitungod sa imong pinakadakong mga tinguha? Human makagahin og usa ka adlaw diha sa presensya sa Manluluwas, ang pundok sa katawhan “nag-ampo alang niana diin sila labing nagtinguha”—ang gasa sa Espiritu Santo (3 Nephi 19:9). Samtang magbasa ka niini nga mga tudling, pamalandungi ang kaugalingon nimong tinguha alang sa pakig-uban sa Espiritu Santo. Unsay imong nakat-unan mahitungod sa pagtinguha sa pakig-uban sa Espiritu Santo?
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.
3 Nephi 17
Samtang magbasa kamo niini nga kapitulo isip pamilya, ikonsiderar ang paghunong matag karon ug unya aron sa pagdapit sa imong pamilya sa paghunahuna nga daw sila mismo ang nakasinati niini nga mga panghitabo. Sama pananglit, pwede kang mangutana og susama sa “Unsa nga mga balatian ang imong dad-on nga ipaayo sa Manluluwas?” “Unsa ang imong gusto nga Iyang iampo tungod ug alang kanimo?” o “Unsa nga mga minahal ang gusto nimo nga Iyang panalanginan?” Ang pagbasa niini nga kapitulo makadasig usab kanimo sa pag-ampo alang sa mga sakop sa imong pamilya, sa tinagsa-tagsa, sama sa gihimo ni Jesus.
3 Nephi 18:1–12
Unsay buot ipasabut sa “nabusog” pinaagi sa pag-ambit sa sakramento, ug sa unsang paagi nato kini masinati? Unsay atong makat-unan gikan sa bersikulo 5–7 mahitungod sa kon nganong gihatagan kita ni Jesus sa ordinansa sa sakramento?
3 Nephi 18:17–21
Unsay atong nakat-unan gikan niini nga mga bersikulo mahitungod sa mga katuyoan sa pag-ampo? Unsaon man nato sa pagpalambo ang espiritwal nga gahum sa atong mga pag-ampo, isip mga indibidwal ug isip usa ka pamilya?
3 Nephi 18:25; 19:1–3
Unsay nasinati sa atong pamilya pinaagi sa ebanghelyo nga gipanghinaot natong matagamtaman usab sa tanan nga anaa sa atong palibut? Sa unsang paagi kita makasunod sa ehemplo sa mga tawo dinhi niini nga mga bersikulo ug “[m]aghago sa hilabihan” (3 Nephi 19:3) sa pagdala sa uban ngadto kang Kristo, aron sila usab “mobati ug makakita” (3 Nephi 18:25) kon unsay atong nakita diha sa ebanghelyo?
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Tuguti ang Espiritu nga mogiya sa imong pagtuon. Ang Espiritu Santo mogiya kanimo ngadto sa mga butang nga kinahanglan nimong makat-unan sa matag adlaw. Kinahanglang sensitibo ka sa Iyang mga pag-aghat, bisan og daw nagsugyot kini nga mobasa ka og lahi nga hilisgutan o pagtuon og lahing pamaagi kay sa kasagaran nimong himoon. Sama pananglit, samtang magbasa ka mahitungod sa sakrament diha sa 3 Nephi 18, tingali moaghat kanimo ang Espiritu sa paggahin og mas ubay-ubay nga panahon niana nga hilisgutan kay sa imong giplano.
Nakita Nila nga Miabli ang Kalangitan, ni Walter Rane