Si Jesus nagpakita ngadto sa mga Nephite

The Light of His Countenance Did Shine upon Them, ni Gary L. Kapp

Septyembre 28–Oktubre 11

3 Nephi 17–19

“Tan-awa, Ang Akong Hingpit nga Kalipay Napuno”

Samtang imong basahon ang 3 Nephi 17–19, hunahunaa unsa nga mga kasulatan, mga kasinatian, mga kalihokan, ug mga istorya ang makatabang sa mga bata nga makasabut sa mga kamatuoran dinhi niini nga mga kapitulo.

Irekord ang Imong mga Impresyon

pagpaambit nga icon

Dapita ang Pagpaambit

Ipakita ang usa ka hulagway sa Manluluwas, ug dapita ang mga bata sa pagpakigbahin kon unsa kaha ang ilang bation kon Siya mobisita kanila sama sa Iyang gibuhat sa mga Nephite.

pagtudlo nga icon

Itudlo ang Doktrina: Mas Gagmay nga mga Bata

3 Nephi 17:7, 20–25

Gihigugma sa Manluluwas ang matag Anak sa Langitnong Amahan.

Gipakita ni Jesus ang Iyang gugma alang sa mga bata sa dihang Siya nanalangin ug nag-ampo alang kanila. Unsaon nimo pagtabang sa mga bata nga imong gitudloan nga mobati sa Iyang gugma alang kanila?

Posible nga mga Kalihokan

• I-summarize ang asoy diha sa 3 Nephi 17 samtang magpakita og usa ka hulagway sama sa anaa diha sa outline niining semanaha diha sa Dali, Sunod Kanako—Alang sa mga Indibidual ug mga Pamilya. O mahimo nimong gamiton ang “Kapitulo 44: Si Jesukristo Nagpanalangin sa mga Bata,” (Mga Sugilanon sa Ang Basahon ni Mormon, 124–25, o ang katugbang nga video diha sa ChurchofJesusChrist.org). Basaha ang hugpong sa mga pulong o mga bersikulo gikan sa 3 Nephi 17 nga naghatag og gibug-aton sa gugma sa Manluluwas alang sa mga katawhan (sama sa mga bersikulo 7 ug 20–25). Papuli-puliha ang mga bata sa paggunit sa hulagway ug magsulti kon unsa ang gibuhat ni Jesus tungod kay gihigugma Niya ang mga katawhan.

• Gamita ang pahina sa kalihokan karong semanaha aron sa pagtabang sa mga bata sa pagdrowing og hulagway sa ilang kaugalingon uban ni Jesus. Samtang nagbuhat sila niini, tabangi sila sa paghunahuna og mga paagi nga gipakita ni Jesus ang Iyang gugma alang kanila.

  Si Jesus nagpanalangin sa mga bata nga Nephite

  Behold Your Little Ones, ni Gary L. Kapp

3 Nephi 18:1–12

Makahunahuna ko mahitungod ni Jesus kon moambit ko sa sakramento.

Adunay daghang mga butang nga makapalinga sa usa ka bata panahon sa sakramento. Unsaon nimo pagtabang ang mga bata sa imong klase nga makasabut sa kamahinungdanon sa paghunahuna mahitungod sa Manluluwas ug sa Iyang gugma alang kanila atol niining sagrado nga ordinansa?

Posible nga mga Kalihokan

• Dapita ang mga bata sa pagsulti kanimo kon unsa ang mahitabo panahon sa sakramento. Basaha ang mga bersikulo gikan sa asoy sa pagpahigayon ni Jesus sa sakramento ngadto sa mga Nephite (tan-awa sa 3 Nephi 18:1–12), ug hangyoa ang mga bata sa pagbarug kon makadungog sila og usa ka butang nga susama sa atong buhaton panahon sa sakramento. Unsa ang gusto ni Jesukristo nga atong “hinumduman” o hunahunaon panahon sa sakramento? (tan-awa sa 3 Nephi 18:7, 11).

• Laylaya, kantaha, o patukara ang usa ka himno o kanta sa Primary samtang ang mga bata magkolor og mga hulagway nga makatabang nila sa paghinumdom sa Manluluwas panahon sa sakramento (tan-awa ang pahina sa kalihokan niining semanaha). Awhaga sila sa pagtan-aw niini nga mga hulagway aron pagtabang nila sa paghinumdom ni Jesus sa panahon nga moambit sila sa sakramento.

3 Nephi 18:15, 20–21, 24; 19:16–17, 30

Si Jesus nagtudlo kanako unsaon sa pag-ampo.

Unsa ang inyong nakat-unan mahitungod sa pag-ampo samtang nagtuon kamo sa 3 Nephi 17–19? Unsaon nimo paggamit ang unsay imong nakat-unan aron sa pagtudlo sa mga bata unsaon sa pag-ampo?

Posible nga mga Kalihokan

• Ipakita ang mga hulagway sa mga tawo nga nag-ampo (sama nianang anaa sa “Kapitulo 46: Si Jesukristo Nagtudlo ug Nag-ampo uban sa mga Nephite” diha sa Mga Sugilanon sa Ang Basahon ni Mormon, 128–30). Dapita ang mga bata sa pagtumbok sa mga detalye diha sa mga hulagway nga nagpakita nga kini nga mga tawo nag-ampo. Basaha ang 3 Nephi 19:16–17 aron sa pagpasabut nga si Jesus nagtudlo kanato unsaon sa pag-ampo. Hangyoa ang mga bata sa pagsulti kanimo kon unsay ilang gibati sa dihang nag-ampo sila.

• Basaha ang 3 Nephi 18:21, ug dapita ang mga bata sa pagdrowing og hulagway sa ilang kaugalingon o sa ilang mga pamilya nga nag-ampo. Awhaga ang mga bata sa pagdapit sa ilang mag pamilya nga mag-ampo uban kanila.

• Panganta mong tanan og usa ka kanta bahin sa pag-ampo, sama sa “Ampo sa usa ka Bata” (Songbook sa mga Bata, 6). Hangyoa ang mga bata sa pagpaambit unsay ilang nakat-unan bahin sa pag-ampo gikan sa kanta. Ipakigbahin ang imong pagpamatuod mahitungod sa pag-ampo.

pagtudlo nga icon

Itudlo ang Doktrina: Mas Dagko nga mga Bata

3 Nephi 17

Gihigugma sa Manluluwas ang mga Anak sa Langitnong Amahan.

Si Presidente Ezra Taft Benson nagtudlo: “Ako mosaad kaninyo, minahal nga mga anak, nga ang mga anghel mangalagad usab kaninyo. Mahimong dili kamo makakita kanila, apan anaa sila aron sa pagtabang kaninyo, ug inyong mabati ang ilang presensya” (“To the Children of the Church,” Ensign, Mayo 1989, 83).

Posible nga mga Kalihokan

• Dungan nga magbasa sa ubang mga bersikulo gikan sa 3 Nephi 17 nga gibati nimo nga makahuluganon ngadto sa mga bata nga imong gitudloan. Samtang inyong basahon ang matag bersikulo, hangyoa ang mga bata sa pagpili og usa ka pulong o hugpong sa mga pulong nga sa ilang hunahuna mahinungdanon ug dayon ipaambit ngano nga kadto nga mga pulong makahuluganon ngadto kanila. Ipamatuod nga si Jesus naghigugma pag-ayo sa mga bata, ug kini ang hinungdan ngano nga Siya nagpanalangin kanila ug nag-ampo alang kanila.

• Dapita ang mga bata sa pagpaambit kon unsa kaha ang ilang bation kon nakauban pa sila sa mga bata nga gipanalanginan sa Manluluwas. Unsa man ang gihimo sa Manluluwas aron sa pagpakita sa Iyang gugma? Unsay atong mabuhat aron sa pag-andam sa atong mga kaugalingon nga makauban Kaniya kon Siya moanhi pag-usab?

3 Nephi 18:1–12

Sa akong pag-ambit sa sakramento, mahimong mapuno ako sa Espiritu Santo.

Makakat-on kita gikan sa 3 Nephi 18 kon unsa kamahinungdanon ang sakramento ngadto sa Manluluwas. Unsaon nimo pagtabang sa mga bata nga mobati nga kini mahinungdanon ngadto kanila?

Posible nga mga Kalihokan

• Tabangi ang mga bata sa pagbasa sa 3 Nephi 18:1–12. Unsay ilang nakat-unan mahitungod sa sakramento gikan niini nga mga bersikulo? Tabangi sila sa pagbasa sa mga pag-ampo sa sakramento diha sa Doktrina ug mga Pagkigsaad 20:77 ug 79 ug sa pagpangita og mga pulong ug hugpong sa mga pulong diha sa mga pag-ampo nga makita usab diha sa 3 Nephi 18:1–12. Unsa man ang gipasabut niini nga mga pulong ug hugpong sa mga pulong? Sa unsa nga paagi nga kita maandam sa pag-ambit sa sakrament? Unsa man ang atong gisaad, o gipakigsaad, nga buhaton kon moambit kita sa sakrament?

• Dungan nga manganta sa usa ka kanta mahitungod sa balaang pagtahud, sama sa “Nagtahud, Naghilum” (Songbook sa mga Bata, 11). Sa unsang paagi nga ang matahuron nga pag-ambit sa sakramento makatabang kanato nga mobati sa Espiritu? Sa unsang paagi kini makatabang kanato sa paghimo og matarung nga mga pagpili?

3 Nephi 18:15–24; 19:6–9, 15–36

Ang pag-ampo makatabang kanako nga mapaduol ngadto sa Langitnong Amahan.

Atong bation nga duol kanato ang Langitnong Amahan pinaagi sa pag-ampo. Unsa nga mga mensahe mahitungod sa pag-ampo diha sa 3 Nephi 18–19 ang makatabang sa mga bata nga imong gitudloan sa pagpalambo sa ilang mga pag-ampo?

Posible nga mga Kalihokan

• Isulat ang mosunod nga mga pakisayran sa kasulatan sa mga piraso nga papel, ug ihatag kini sa matag bata o ngadto sa gagmay nga mga grupo sa mga bata: 3 Nephi 18:15; 3 Nephi 18:20; 3 Nephi 18:21; 3 Nephi 19:19; ug 3 Nephi 19:24. Dapita ang mga bata sa pagbasa sa mga kasulatan, mangita sa mga butang nga gitudlo ni Jesukristo o sa Iyang mga disipulo mahitungod sa pag-ampo. Hangyoa sila sa pagtaho ngadto sa klase kon unsa ang ilang nakat-unan.

• Diha sa pisara, isulat ang Ako nagpasalamat kanimo sa . Hatagi ang mga bata og usa ka minuto sa paghunahuna og daghang mga butang kutob sa ilang mahimo aron sa pagsulat diha sa blangko. Nganong maayo man alang kanato ang pagpahayag sa atong pasalamat ngadto sa Langitnong Amahan? Dayon isulat ang Ako mangayo kanimo sa diha sa pisara, ug dungan nga magbasa sa 3 Nephi 18:18–21 ug 19:9, 23, mangita og mga ideya mahitungod sa unsay kinahanglan natong iampo.

• Ipaambit ang imong pagpamatuod o usa ka personal nga kasinatian mahitungod sa gahum sa pag-ampo, ug awhaga ang mga bata sa pagpaambit sa ilang mga pagpamatuod o mga kasinatian.

pagkat-on nga icon

Awhaga ang Pagkat-on diha sa Panimalay

Awhaga ang mga bata sa pagpakigsulti sa ilang mga ginikanan o ubang sakop sa pamilya mahitungod kon unsaon nila pag-angkon og mas makahuluganon nga kasinatian sa sakramento sa sunod Dominggo.

Pagpalambo sa Atong Pagtudlo

Tabangi ang gagmay nga mga bata nga makat-on gikan sa mga kasulatan. Aron matabangan ang gagmay nga mga bata nga makat-on gikan sa mga kasulatan, tutuki ang usa ka bersikulo sa kasulatan o bisan usa lang ka importanting hugpong sa mga pulong. Mahimo nimong dapiton ang mga bata sa pagbarug kon makadungog sila og piho nga pulong o hugpong sa mga pulong.

pahina sa kalihokan: makahinumdom ko sa Manluluwas