Christ’s Prayer, ni Derek Hegsted

Oktubre 19–25

3 Nephi 27–4 Nephi

“Wala nay mga Katawhan nga Labaw pa ka Malipayon”

Samtang imong basahon ang 3 Nephi 27–4 Nephi, ikonsiderar ang mga kasinatian, mga hunahuna, mga kasulatan, ug mga istorya nga makatabang sa mga bata nga makasabut sa mga konsepto dinhi niini nga mga kapitulo.

Irekord ang Imong mga Impresyon

Dapita ang Pagpaambit

Tabangi ang mga bata sa paghinumdom unsa ang ilang nakat-unan sa miaging pipila ka mga semana mahitungod sa gitudlo ni Jesus didto sa yuta sa Bountiful. Ipasabut nga ang Basahon ni Mormon nagsulti kanato sa unsang paagi ang mga tawo napanalanginan sa dihang misunod sila sa unsa ang gitudlo ni Jesus ngadto kanila.

Itudlo ang Doktrina: Mas Gagmay nga mga Bata

3 Nephi 27:1–22

Nahisakop ako sa Simbahan ni Jesukristo.

Sa unsa nga paagi ang mga pulong sa Manluluwas ngadto sa Iyang mga disipulo nakatabang sa mga bata nga makasabut sa kamahinungdanon sa pagkasakop sa Simbahan ni Jesukristo?

Posible nga mga Kalihokan

• Hangyoa ang matag bata sa pagsulti sa ilang ngalan. Nganong importante man ang atong mga ngalan? Sultihi sila nga ang mga disipulo ni Jesus gusto nga masayud kon unsa ang kinahanglan nilang ipangalan sa Simbahan ni Kristo. Basaha ngadto kanila ang tubag sa Manluluwas diha sa 3 Nephi 27:7. Kang kinsang ngalan ang giingon ni Jesus nga ingalan sa Iyang Simbahan?

• Paghimo og tsapa nga mag-ingon “Ako nahisakop sa Ang Simbahan ni Jesukristo sa mga Santos sa Ulahing mga Adlaw” aron isul-ob sa matag bata inig pauli nila. Pakolori sa mga bata ang ilang mga tsapa. Kantaha ang “Ang Simbahan ni Jesukristo” (Songbook sa mga Bata, 48) isip usa ka klase. Isulti nganong mapasalamaton ka nga nahisakop sa Simbahan, ug pangutan-a ang mga bata ngano nga mapasalamaton sila sa Simbahan.

• Tabangi ang mga bata sa pagpahimutang sa puzzle diha sa pahina sa kalihokan karong semanaha. Ipasabut nga gusto ni Jesus nga ang Iyang Simbahan pagatukuron sa Iyang ebanghelyo, ug gamiton kini nga kalihokan aron sa pagpakigsulti sa mga bata mahitungod sa unsay gipasabut niana.

4 Nephi 1:2–3, 15–17

Ang pagsunod sa ebanghelyo makahatag kanako og hingpit nga kalipay.

Ang kalipay sa mga katawhan nga gihulagway diha sa 4 Nephi makatabang sa mga bata nga makat-on mahitungod sa kalipay nga moabut tungod sa pagsunod sa ebanghelyo.

Posible nga mga Kalihokan

• Dapita ang mga bata sa paghisgut mahitungod sa unsa ang makahimo nila nga malipayon. Aron masultihan nimo ang mga bata mahitungod sa kalipay sa mga tawo diha sa 4 Nephi, basaha ang pinakamahinungdanon nga mga hugpong sa mga pulong gikan sa mga bersikulo 2–3 ug 15–17. Mahimo usab nimong hisgutan ang “Kapitulo 48: Kalinaw sa Amerika” (Mga Sugilanon sa Ang Basahon ni Mormon, 136–37, o ang katugbang nga video diha sa ChurchofJesusChrist.org). Ipasabut pag-ayo nga ang mga tawo malipayon tungod kay nakabig sila ngadto sa Ginoo, gisunod nila ang mga sugo, ug gihigugma nila ang usagusa.

• Pagpakita og mga hulagway sa malipayon nga mga tawo. Ipasabut nga ang mga tawo diha sa 4 Nephi adunay dul-an sa 200 ka tuig nga kalipay tungod kay silang tanan misulay sa pagsunod sa ebanghelyo kutob sa mahimo. Tabangi ang mga bata sa paghunahuna og pipila ka mga sugo nga mahimo nilang sundon. Sama pananglit, mahimo nimong basahon ngadto nila ang 4 Nephi 1:15 aron sa pagtudlo nga ang mga tawo wala na makig-away sa usag-usa. Dapita ang mga bata sa pag-aksyon sa pagsunod sa mga sugo nga ilang gihunahuna. Manganta og dungan og usa ka kanta mahitungod sa kalipay nga moabut gumikan sa pagsunod sa ebanghelyo, sama sa “Kon Kita Motabang” (Songbook sa mga Bata, 108).

• Basaha ang mga hugpong sa mga pulong gikan sa 4 Nephi 1:24–29, 34–35, ug 43 nga naghulagway kon unsa ang nahitabo sa dihang pipila sa mga Nephite mihunong sa pagsunod sa mga sugo. Samtang imo kining buhaton, dapita ang mga bata sa pagpakita og magul-anon nga nawong kon makadungog sila og usa ka butang nga dili malipayon paminawon. Ipamatuod nga ang pagsunod sa mga sugo mogiya ngadto sa kalipay.

Itudlo ang Doktrina: Mas Dagko nga mga Bata

3 Nephi 27:3–8

Nahisakop ako sa Simbahan ni Jesukristo.

Hunahunaa unsaon nimo pagtabang sa mga bata nga imong gitudloan nga makaila sa dagkong mga panalangin nga moabut gumikan sa pagkasakop sa Simbahan ni Jesukristo.

Posible nga mga Kalihokan

• Tabangi ang mga bata sa pagbasa sa 3 Nephi 27:3, mangita sa pangutana nga gipangutana Kaniya sa iyang mga disipulo. Dayon dapita sila sa pagpangita diha sa 3 Nephi 27:5–8 alang sa tubag. Sumala niini nga mga bersikulo, ngano nga importante man ang ngalan sa Simbahan?

• Hangyoa ang mga bata sa paghunahuna og lain-laing mga grupo nga nahisakop sila, sama sa usa ka pamilya o klase sa Primary. Hangyoa sila sa pagsulti nimo kon unsa ang ilang ganahan mahitungod sa pagkasakop sa matag grupo. Hangyoa ang mga bata nga motabang nimo sa pagsulat sa matag pulong sa ngalan sa Simbahan sa laing piraso sa papel. Dayon isagol ang mga papel, ug dapita ang mga bata sa pagpahimutang niining mga pulong sa hustong pagkahan-ay. Unsa nga mga panalangin ang atong nadawat tungod kay mga miyembro kita sa Ang Simbahan ni Jesukristo sa mga Santos sa Ulahing mga Adlaw?

3 Nephi 27:13–22

Ang Simbahan ni Jesukristo gitukod diha sa Iyang ebanghelyo.

Gisaysay sa Manluluwas ang Iyang ebanghelyo sa minubo nga paagi diha sa 3 Nephi 27. Sa unsa kahang paagi ang Iyang mga pulong makatabang sa mga bata nga makasabut unsa ang ebanghelyo?

Posible nga mga Kalihokan

• Ipasabut sa mga bata nga ang pulong ebanghelyo nagpasabut og “maayong balita” (tan-awa sa Giya ngadto sa mga Kasulatan, “Ebanghelyo, Mga”). Tabangi ang mga bata sa pagsiksik sa 3 Nephi 27:13–15 sa usa ka butang nga murag maayong balita ngadto kanila. Nganong mapasalamaton man kita nga nasayud sa ebanghelyo ni Jesukristo?

• Isulat diha sa pisara ang mga baruganan sa ebanghelyo sama sa hugot nga pagtuo, paghinulsol, bunyag, ang Espiritu Santo, ug paglahutay hangtud sa katapusan. Dapita ang mga bata sa pagsiksik sa hilum sa 3 Nephi 27:19–21, mangita niini nga mga pulong o susama nga mga pulong sa paghulagway ni Jesus sa Iyang ebanghelyo.

• Hangyoa ang mga bata sa paghunahuna nga duna silay higala nga nangutana unsay ilang gituohan isip sakop sa Simbahan. Tabangi sila nga mangita og mga kamatuoran diha sa 3 Nephi 27:13–21 nga ilang mapaambit pinaagi sa minubo nga saysay unsa ang atong gituohan.

• Dapita ang mga bata sa pagpili og usa sa mga kamatuoran sa ebanghelyo nga gitudlo sa Manluluwas diha sa 3 Nephi 27:13–21 nga gusto nila nga makat-on pa og dugang. Tabangi sila sa paggamit sa footnotes, o Giya ngadto sa mga kasulatan aron sa pagpangita og usa ka kasulatan o duha nga may kalabutan niana nga kamatuoran. Dapita sila sa pagpakigbahin sa ilang mga kasulatan sa usag usa ug kon unsa ang ilang nakat-unan. Nganong mapasalamaton man kita nga nasayud sa ebanghelyo ni Jesukristo?

4 Nephi

Ang pagsunod sa ebanghelyo makahatag kanako og hingpit nga kalipay.

Tungod kay nakabig sila ngadto kang Jesukristo ug sa Iyang ebanghelyo, ang mga tawo nga gihisgutan diha sa 4 Nephi nakahimo sa pagtukod og usa ka katilingban sa kalinaw ug panaghiusa. Unsa ang makat-unan sa mga bata gikan kanila?

Posible nga mga Kalihokan

• Pag-andam og mga ginunting nga papel nga may nakasulat nga mga hugpong sa mga pulong gikan sa 4 Nephi 1:2–3, 5, ug 15–17 nga naghulagway sa mga panalangin nga nadawat sa mga two (sama sa “walay panagbingkil sa yuta”). Ibutang ang mga papel sa usa ka sudlanan, pakuhaa og usa ang matag bata ug ipabasa kini. Awhaga ang mga bata sa pagpangita sa ilang hugpong sa mga pulong niini nga mga bersikulo gikan sa 4 Nephi. Unsa ang atong makat-unan gikan niini nga mga hugpong sa mga pulong? Unsa nga mga pagkasusama ang atong makita tali niini nga mga bersikulo ug sa kahulugan sa Zion diha sa Moises 7:18?

• Aron matabangan ang mga bata sa pagtuman sa gitudlo diha sa 4 Nephi 1:15–16, hatagi sila og mga sitwasyon diin ang mga tawo naglagot sa usag usa. Ipadrama nila kon unsa ang mahitabo sa sitwasyon kon sila maningkamot sa pagpuyo nga “walay panagbingkil.” Ngano nga mas sayon ang paglikay sa panagbingkil kon kita adunay “gugma sa Dios” sa atong mga kasingkasing?

• Basaha dungan sa mga bata ang mosunod nga mga bersikulo, ug hangyoa sila sa pagpangita og mga hinungdan ang mga Nephite ug mga Lamanite wala nay kalinaw ug kalipay: 4 Nephi 1:20, 24–29, 34–35, ug 43. Unsaon nato paglikay niini nga mga kakuyaw? Tabangi ang mga bata nga makakaplag og mga paagi sa paglikay sa pagkamapahitas-on pinaagi sa pagribyu sa Mga Pagtulun-an sa mga Presidente sa Simbahan: Ezra Taft Benson (2014), Kapitulo 18.

Awhaga ang Pagkat-on diha sa Panimalay

Awhaga ang mga bata sa pagdesisyon sa usa ka butang nga ilang buhaton aron sa pagdala og dugang nga kalinaw ug kalipay ngadto sa ilang panimalay ug ipaambit kini sa ilang mga pamilya.

Pagpalambo sa Atong Pagtudlo

Suportahi ang mga ginikanan sa mga bata. “Ang mga ginikanan maoy labing importanting mga magtutudlo sa ebanghelyo sa ilang mga anak—anaa kanila ang labing dako nga responsibilidad ug ang labing dako nga gahum sa pag-impluwensya sa ilang mga anak (tan-awa sa Deuteronomio 6:6–7). Samtang magtudlo ka sa mga bata sa simbahan, pagmainampuon nga motinguha og mga paagi sa pagsuporta sa ilang mga ginikanan sa ilang mahinungdanong tahas” (Pagtudlo sumala sa Pamaagi sa Manluluwas, 25).