“Oktubre 12–18. 3 Nephi 20–26: ‘Kamo mga Anak sa Pakigsaad,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Oktubre 12–18. 3 Nephi 20–26,” Dali, Sunod Kanako—Alang sa mga Indibidwal ug mga Pamilya: 2020
Paghulagway kang Kristo nga nagpakita sa mga Nephite ni Andrew Bosley
Oktubre 12–18
3 Nephi 20–26
“Kamo mga Anak sa Pakigsaad”
Kon maghisgot sa mga kasulatan, sa kasagaran mogamit si Jesus sa pulong nga siksika (tan-awa sa 3 Nephi 20:11; 23:1, 5). Kon magbasa ka sa 3 Nephi 20–26, unsay imong pangitaon?
Irekord ang Imong mga Impresyon
Kon makadungog ka og mga tawong mogamit og mga termino nga sama sa balay ni Israel, bation ba nimo nga daw naghisgot sila mahitungod kanimo? Ang mga Nephite ug ang mga Lamanite mga tinuoray nga kaliwatan sa Israel—ang ilang sugilanon nagsugod sa Jerusalem—apan alang sa pipila kanila, ang Jerusalem ingon og daw susama sa “yuta nga layo, nga usa ka yuta nga kita wala pa masayud” (Helaman 16:20). Oo, sila “usa ka sanga sa kahoy sa Israel,” apan sila usab “nawala gikan sa iyang lawas” (Alma 26:36; tan-awa usab sa 1 Nephi 15:12). Apan dihang ang Manluluwas mipakita kanila, gusto Siya nga ilang mahibaloan nga sila wala mawala Kaniya. “Kamo mga sakop sa balay ni Israel,” miingon Siya, “ug kamo anaa sa pakigsaad” (3 Nephi 20:25). Posibling mosulti Siya og butang nga susama nimo karon, kay si bisan kinsa nga nabunyagan ug mihimo og mga pakigsaad Kaniya maanaa usab sa balay ni Israel, “nga anaa sa pakigsaad,” bisan diin nga kaliwat kamo gikan o diin kamo nagpuyo. Sa laing pagkasulti, kon maghisgot na gani si Jesus mahitungod sa balay ni Israel, naghisgot usab Siya kanimo. Ang sugo sa pagpanalangin “sa tanan nga mga kaliwatan sa yuta” kini para nimo (3 Nephi 20:27). Ang pagdapit nga “pagmata pag-usab, ug isul-ob ang imong kalig-on” kini para nimo (3 Nephi 20:36). Ug ang bililhon Niyang saad nga, “Ang akong pagkamabination dili mobiya gikan kaninyo, ni ang akong pakigsaad sa kalinaw isalikway,” kini para nimo (3 Nephi 22:10).
Mga Ideya alang sa Personal nga Pagtuon sa Kasulatan
Sa ulahing mga adlaw, ang Dios mohimo og talagsaon ug kahibulongan nga buhat.
Ang Manluluwas mihatag sa panon sa katawhan og pipila ka makahuluganong mga saad ug nanagna mahitungod sa umaabut Niyang mga katawhan sa pakigsaad—ug kana naglakip kanimo. Sama sa gisulti ni Presidente Russell M. Nelson: “Apil kita sa katawhan sa pakigsaad sa Ginoo. Ang ato mao ang pribilehiyo nga personal nga makasalmot sa katumanan niini nga mga saad. Pagkanindot nga mabuhi niining panahona!” (“Ang Pagpundok sa Nagkatibulaag nga Israel,” Liahona, Nob. 2006, 79).
Pangita og mga panagna mahitungod sa katapusang mga adlaw diha sa mga pulong sa Manluluwas sa 3 Nephi 20–22. Hain niini nga mga panagna ang makahinam kaayo kanimo? Unsay imong mahimo aron makatabang nga matuman kini nga mga panagna niini nga mga kapitulo?
Timan-i nga ang 3 Nephi 21:1–7 nagpasabut nga ang pag-abut sa Basahon ni Mormon (“kini nga mga butang” nga anaa sa mga bersikulo 2 ug 3) usa ka timailhan nga ang mga saad sa Dios nagsugod na sa pagkatuman. Unsa man kana nga mga saad, ug sa unsang paagi ang Basahon ni Mormon motabang sa pagpatuman niini?
Tan-awa usab sa Russell M. Nelson, “Paglaum sa Israel” (tibuok kalibutan nga debosyonal sa kabatan-onan, Hunyo 3, 2018), broadcasts.ChurchofJesusChrist.org.
Gusto sa Manluluwas nga akong siksikon ang mga pulong sa mga propeta.
Ang mga pulong ni Jesus ug ang mga gipanghimo dinhi sa tibuok nga kapitulo nagpadayag kon unsay Iyang gibati mahitungod sa mga kasulatan. Unsay imong nakat-unan mahitungod sa mga kasulatan diha sa 3 Nephi 20:10–12; 23; ug 26:1–12? Unsay imong nakita dinhi niini nga mga bersikulo nga nagdasig kanimo nga “mosiksik niini nga mga butang nga makugihon”? (3 Nephi 23:1).
Manggiloy-on ang Dios niadtong mga mobalik Kaniya.
Diha sa 3 Nephi 22 ug sa 24, ang Manluluwas mikutlo og mga pulong gikan sa Isaias ug sa Malaquias nga puno sa tin-aw nga mga imahe ug mga pagkumpara—mabulukon nga mga pundasyong bato, mga karbon nga naa sa kalayo, linunsay nga pilak, ang mga bintana sa langit. Makadasig tingali ang paghimo og lista niini. Unsa ang gitudlo niining matag usa diha nimo mahitungod sa relasyon sa Dios ngadto sa Iyang katawhan? Sama pananglit, ang 3 Nephi 22:4–8 nagkumpara sa Dios ngadto sa usa ka bana ug ang Iyang katawhan ngadto sa usa ka asawa. Ang pagbasa niini nga mga imahe tingali modasig kanimo sa paghunahuna mahitungod sa kaugalingon nimong relasyon sa Ginoo. Sa unsang paagi ang mga saad niini nga mga kapitulo natuman sa imong kinabuhi? (tan-awa ilabi na ang 3 Nephi 22:7–8, 10–17; 24:10–12, 17–18).
Ang akong kasingkasing kinahanglang mobalik ngadto sa akong mga katigulangan.
Ang gisaad nga pagbalik ni Elijah mahinamong gipaabut sa mga Judeo sa tibuok kalibutan sulod na sa mga katuigan. Ang mga Santos sa Ulahing mga Adlaw nasayud nga mibalik na si Elijah, nga mipakita kang Joseph Smith didto sa Templo sa Kirtland niadtong 1836 (tan-awa sa D&P 110:13–16). Ang buhat sa pagpabalik sa kasingkasing ngadto sa mga amahan—buhat sa templo ug family history—maayo na kaayo ang dagan. Unsay imong mga kasinatian nga nakatabang sa pagpabalik sa imong kasingkasing ngadto sa imong mga katigulangan?
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.
3 Nephi 22:2
Human mabasa kini nga bersikulo, tingali pwede kang maghimo og inato nga tolda ug maghisgot kon sa unsang paagi ang Simbahan susama sa tolda sa kamingawan. Unsay ipasabut sa “ilugway ang mga higot [niini]” ug “lig-una ang mga istaka [stake niini]”? Unsaon nato sa pagdapit ang uban sa pagpangita og “kapasilungan” sa Simbahan? (tan-awa ang video nga “Welcome” diha sa ComeUntoChrist.org).
3 Nephi 23:6–13
Kon ang Manluluwas ang mosusi sa mga rekord nga gihimo sa atong pamilya, unsa kahang mga pangutanaha ang Iyang ipangutana kanato? Duna bay bisan unsang importanting mga hitabo o espirituhanong mga kasinatian nga angay natong irekord? Karon tingali ang maayong panahon sa paghimo o pagdugang diha sa rekord sa pamilya ug pagtinambagay kon unsay ilakip. Ang mas batan-ong mga sakop sa pamilya tingali malingaw sa pagdekorasyon sa imong rekord gamit ang mga litrato o mga drowing. Nganong importante man ang pagrekord sa atong espirituhanong mga kasinatian sa pamilya?
3 Nephi 24:7–18
Sa unsang paagi kita nakasinati sa mga panalangin sa pagbayad sa ikapulo nga gisaad dinhi sa mga bersikulo? Ang mensahe ni Elder David A. Bednar “Ang mga Tamboanan sa Langit” (Liahona, Nob. 2013, 17–20) makatabang sa mga sakop sa pamilya sa pag-ila niini nga mga panalangin.
3 Nephi 25:5–6
Unsaon nimo sa pagtabang sa mga sakop sa imong pamilya nga mopabalik sa ilang mga kasingkasing ngadto sa ilang mga amahan? Tingali pwede nimong sangunan ang mga sakop sa pamilya sa pagkat-on mahitungod sa usa sa imong mga katigulangan ug ipaambit kini diha sa tibuok pamilya unsay ilang nakat-unan (tan-awa sa FamilySearch.org). O pwede mong magtinabangay sa pagpangita og usa ka katigulangan nga nagkinahanglan og mga ordinansa sa templo ug magplano og usa ka biyahe sa templo [temple trip] aron sa pagpahigayon niana nga mga ordinansa.
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Palamboa ang imong pagpamatuod. “Ikaw ang nagtudlo kon unsa ikaw,” si Elder Neal A. Maxwell mitudlo. “Ang imong mga kinaiya mas mahinumduman … kay sa usa ka piho nga kamatuoran sa usa ka piho nga leksyon” (“But a Few Days” [pakigpulong ngadto sa Church Educational System religious educators, Sept. 10, 1982], 2). Kon gusto kang motudlo og usa ka baruganan sa ebanghelyo, buhata ang pinakamaayo sa pagsunod niana nga baruganan.
Dad-a ang Rekord, ni Gary L. Kapp