“Oktubre 19–25. 3 Nephi 27–4 Nephi: ‘Wala nay mga Katawhan nga Labaw pa Ka Malipayon,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Oktubre 19–25. 3 Nephi 27–4 Nephi,” Dali, Sunod Kanako—Alang sa mga Indibidwal ug mga Pamilya: 2020
Pag-ampo ni Kristo, ni Derek Hegsted
Oktubre 19–25
3 Nephi 27–4 Nephi
“Wala nay mga Katawhan nga Labaw pa Ka Malipayon”
Ang Ginoo misugo sa Iyang mga disipulo sa pagsulat sa mga butang nga ilang nasinati (tan-awa sa 3 Nephi 27:23–24). Samtang magtuon ka, isulat ang espiritwal nimong mga kasinatian.
Irekord ang Imong mga Impresyon
Ang mga pagtulun-an ni Jesukristo dili lang usa ka matahum nga pilosopiya nga pamalandungon. Labaw pa kini niana—gituyo kini alang sa pag-usab sa atong kinabuhi. Ang basahon sa 4 Nephi naghatag og makapahinuklog nga sanglitanan niini, nga naghulagway kon sa unsang paagi ang ebanghelyo sa Manluluwas hingpit nga makausab sa katawhan. Human sa mubo nga pagpangalagad ni Jesus, ang panagbingkil sulod sa mga siglo tali sa mga Nephite ug mga Lamanite natapos ra. Ang duha ka nasod nga nailhan sa panagbangi ug garbo “nagkahiusa, [nga] mga anak ni Kristo” (4 Nephi 1:17), ug nagsugod sila nga aduna “sa tanan nga mga butang nga alang kanilang tanan” (4 Nephi 1:3). Ang “gugma sa Dios … anaa sa mga kasingkasing sa mga katawhan,” ug “wala nay mga katawhan nga labaw pa ka malipayon tali sa tanang katawhan nga gilalang sa kamot sa Dios” (4 Nephi 1:15–16). Mao kini ang paagi nga ang mga pagtulun-an sa Manluluwas miusab sa mga Nephite ug sa mga Lamanite. Sa unsang paagi kini miusab kanimo?
Mga Ideya alang sa Personal nga Pagtuon sa Kasulatan
Ang Simbahan ni Jesukristo gitawag sa Iyang ngalan.
Samtang ang mga disipulo sa Manluluwas nagsugod sa pag-establisar sa Iyang Simbahan sa tibuok kayutaan, usa ka pangutana ang mitumaw nga, alang sa uban, daw gamay ra nga butang—unsa diay gayud ang ngalan sa Simbahan? (tan-awa sa 3 Nephi 27:1–3). Unsay imong nakat-unan mahitungod sa kaimportante niini nga ngalan gikan sa tubag sa Manluluwas diha sa 3 Nephi 27:4–12? Niadtong 1838 ang Ginoo mipadayag sa ngalan sa Iyang Simbahan karon (tan-awa sa D&P 115:4). Pamalandungi ang matag pulong niana nga ngalan. Sa unsang paagi kini nga mga pulong makatabang kanato sa pagkahibalo kon si kinsa kita, unsay atong gituohan, ug sa unsang paagi kita molihok?
Tan-awa usab sa Russell. M. Nelson, “Ang Sakto nga Ngalan sa Simbahan,” Liahona, Nob. 2018, 87–90; M. Russell Ballard, “Ang Importansya sa Pangalan,” Liahona, Nob. 2011, 79–82.
Samtang akong gilimpyohan ang akong mga tinguha, nahimo akong mas matinud-anon nga disipulo.
Unsay imong isulti kon ang Manluluwas mangutana kanimo, sama sa Iyang pagpangutana sa Iyang mga disipulo, “Unsa ang [imong] tinguha kanako?” (3 Nephi 28:1). Hunahunaa kini samtang magbasa ka mahitungod sa kasinatian sa mga disipulo sa Manluluwas diha sa 3 Nephi 28:1–11. Unsay imong nakat-unan mahitungod sa mga tinguha sa kasingkasing sa mga disipulo gikan sa ilang mga tubag sa Iyang pangutana? Si Presidente Dallin H. Oaks mitudlo: “Aron makab-ot ang atong mahangturong padulngan, kita magtinguha ug maningkamot sa pagbaton og mga kinaiya nga gikinahanglan aron mamahimong usa ka mahangturong binuhat. … Kita magtinguha nga mahimong sama [kang Jesukristo]” (“Tinguha,” Liahona, Mayo 2011, 44–45). Unsay imong himoon aron imong mahimo nga ang tinguha sa imong kasingkasing mas matarung? (Alang sa dugang nga impormasyon mahitungod sa “kausaban nga himoon diha [sa] mga lawas” sa tulo ka mga disipulo, tan-awa sa 3 Nephi 28:37 ug sa “Nabalhin sa Pagkahimaya nga mga Binuhat,” Giya ngadto sa mga Kasulatan, scriptures.ChurchofJesusChrist.org.)
Ang pagkakabig ngadto kang Jesukristo ug sa Iyang ebanghelyo mosangput sa pagkahiusa ug kalipay.
Mahunahuna ba nimo kon unsa kaha ang pagbati nga magpuyo sa katuigan human sa pagbisita sa Manluluwas? Giunsa sa mga tawo nga mapadayon kining balaan nga kalinaw sulod sa dugay kaayong panahon—hapit mga 200 ka tuig? Samtang magtuon ka sa 4 Nephi 1:1–18, ikonsiderar ang pagmarka o pagbutang og timaan sa mga pagpili nga gihimo sa katawhan aron masinati kining bulahan nga kinabuhi.
Pamalandungi kon unsay imong mahimo sa pagtabang sa imong pamilya, ward, o komunidad aron magpakabuhi nga mas magkahiusa ug kalipay, sama sa gihimo sa katawhan diha sa 4 Nephi. Unsa nga mga pagtulun-an ni Jesukristo ang pwede nimong masunod sa hingpit aron matuman kini nga tumong? Unsa ang imong mahimo sa pagtabang sa uban aron makasabut ug makasunod niini nga mga pagtulun-an?
Ang kadautan mosangput sa pagkabahin-bahin ug sa kasubo.
Subo lang, ang katilingban sa usa ka Zion nga gihulagway diha sa 4 Nephi (tan-awa usab sa Moises 7:18) nagkabulagbulag sa kadugayan. Samtang magbasa ka sa 4 Nephi 1:19–49, tan-awa ang mga batasan ug mga kinaiya nga maoy hinungdan sa pagkabungkag niini nga katilingban. May nakita ka bang bisan unsa nga timailhan niini nga mga batasan o mga kinaiya diha sa imong kaugalingon?
Tan-awa usab sa “Kapitulo 18: Maglikay sa Garbo,” Mga Pagtulun-an sa mga Presidente sa Simbahan: Ezra Taft Benson (2014), 277–89.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.
3 Nephi 27:13–21
Kini nga mga bersikulo makatabang sa mga sakop sa pamilya nga mas makasabut unsay gipasabut sa Manluluwas dihang mihisgot Siya sa “akong ebanghelyo.” Human mabasa ug mahisguti kining mga bersikulo, pwede nimong pangutan-on ang matag sakop sa pamilya sa pag-summarize sa usa ka kapahayag [sentence] kon unsa ang ebanghelyo.
3 Nephi 27:23–26
Kumusta ang atong pagrekord sa mga butang diin kita “nakakita ug nakadungog”—isip indibidwal o isip pamilya? Nganong importante ang paghimo og rekord sa espirituhanong mga butang?
3 Nephi 27:30–31
Aron matabangan ang mga sakop sa pamilya nga masabtan ang kalipay nga gihulagway sa Manluluwas dinhi sa mga bersikulo, pwede kamong magdula diin ang mga sakop sa pamilya mosulay sa pagpangita niini. Mosangput kini sa usa ka pag-istoryahanay kon nganong importatnte ang pagpangita sa matag sakop sa pamilya aron “walay usa kanila nga mawala.” Unsaon nato sa pagtabang sa mga sakop sa atong pamilya nga magpabiling lig-on sa ebanghelyo o mobalik kon ugaling mibiya man sila?
3 Nephi 28:17–18, 36–40
Unsay atong makat-unan gikan sa ehemplo ni Mormon dihang wala siya makasabut sa tanan mahitungod sa kausaban nga nahitabo sa tulo ka disipulong mga Nephite? Unsay atong mahimo kon dili kita makasabut sa tanan mahitungod sa usa ka baruganan sa ebanghelyo? Si Presidente Dieter F. Uchtdorf mitudlo: “Ang Dios nagpakabana kaninyo. Siya maminaw, ug Siya motubag sa inyong personal nga mga pangutana. Ang mga tubag sa inyong mga pag-ampo moabut sa kaugalingon Niyang paagi ug panahon, ug busa, kinahanglang makakat-on kamo sa pagpaminaw sa Iyang tingog” (“Pagdawat og usa ka Pagpmatuod sa Kahayag ug Kamatuoran,” Liahona, Nob. 2014, 21).
4 Nephi 1:15
Aron maminusan ang panagbingkil sa inyong panimalay, tingali ang mga sakop sa pamilya pweding maghimo og tumong nga mas magmahigugmaon sa usag usa karong semanaha. Pagkahuman sa semana, ribyuha ang inyong pag-uswag ug hisguti kon sa unsang paagi ang pagpakita og mas dako nga gugma nakaapekto sa inyong pamilya.
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Pagtinguha og pagpadayag matag adlaw. Ang pagpadayag sa kasagaran moabut “pagtulun-an human sa usa ka pagtulun-an” (2 Nephi 28:30). Samtang mamalandong ka sa mga bersikulo nga imong gitun-an, ang mga ideya ug mga impresyon posibling moabut kanimo sa tibuok adlaw. Ayaw hunahunaa ang pagtuon sa ebanghelyo isip usa ka butang nga “gahinan nimo og panahon” apan isip usa ka butang nga kanunay nimong gibuhat (tan-awa sa Pagtudlo sumala sa Pamaagi sa Manluluwas, 12).
Si Kristo kauban sa Tulo ka Disipulong mga Nephite, ni Gary L. Kapp