“Oktubre 26–Nobyembre 1. Mormon 1-6: ‘Ako Manghinaut Nga Madani Kamong Tanan … sa Paghinulsol,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Oktubre 26–Nobyembre 1. Mormon 1–6,” Dali, Sunod Kanako—Alang sa mga Indibidwal ug sa mga Pamilya: 2020
Si Mormon nga Nagpamubo sa mga Palid, ni Tom Lovell
Oktrubre 26–Nobyembre 1
Mormon 1–6
“Ako Manghinaut Nga Madani Kamong Tanan … sa Paghinulsol”
Samtang magbasa ka sa Mormon 1–6, pamalandungi unsay imong nakat-unan gikan sa ehemplo ni Mormon. Irekord ang unsay gibati nimo nga angay buhaton.
Irekord ang Imong mga Impresyon
Mihimo usab siya og “hingpit nga asoy” mahitungod sa “makahahadlok nga talan-awon” sa kadautan ug pagpaagas sa dugo nga iyang nakita tali sa mga Nephite (Mormon 2:18; 5:8). Ang iyang girekord diha sa Mormon 1–6 igo na nga makapahinumdom kanato sa unsang paagi kaniadto ang mga matarung nahimong dautan. Taliwala sa ingon nianang nagpatigbabaw nga kadautan, walay bisan usa nga makabasol ni Mormon nga maluya ug mawad-an sa kadasig. Bisan pa sa tanan nga iyang nakita ug nasinati, wala gayud mawala kaniya ang pagbati sa talagsaong kalooy sa Dios ug sa iyang kombiksyon nga ang paghinulsol maoy paagi sa pagdawat niini. Ug bisan ang kaugalingong katawhan ni Mormon misalikway sa iyang mapangaliyupoon nga mga pagdapit aron maghinulsol, nasayud siya nga aduna pay mas daghang katawhan nga angay agnihon. “Tan-awa,” mipahayag siya, “ako mosulat ngadto sa tanan nga mga lumulupyo sa yuta.” Sa laing pagkasulti, misulat siya kanimo (tan-awa sa Mormon 3:17–20). Ug ang iyang mensahe para kanimo, karon, susama ra nga mensahe nga makaluwas sa mga Nephite sa ilang kapanahunan: “Motuo sa ebanghelyo ni Jesukristo. … Paghinulsol ug pag-andam aron mobarug sa atubangan sa hukmanan ni Kristo” (Mormon 3:21–22).
Mga Ideya alang sa Personal nga Pagtuon sa Kasulatan
Makapuyo ako nga matarung bisan sa kadautan sa akong palibut.
Sa sinugdanan sa unang kapitulo sa Mormon, mabantayan nimo ang dagkong kalainan tali ni Mormon ug sa mga tawo sa iyang palibut. Samtang magbasa ka sa Mormon 1, ikonsiderar ang pagkumpara sa mga kalidad ug tinguha ni Mormon ngadto sa iyang katawhan. Timan-i ang mga sangputanan nga miabut kaniya ug kanila (makita nimo ang usa ka ehemplo diha sa mga bersikulo 14–15). Unsay imong nakat-unan nga nagdasig kanimo sa pagpuyong matarung sa dautan nga kalibutan?
Samtang magbasa ka sa Mormon 2–6, ipadayon ang pagpangita kon giunsa ni Mormon sa pagpakita sa iyang pagtuo sa Langitnong Amahan ug ni Jesukristo bisan sa dautang mga impluwensya sa iyang palibut.
Panag-away, ni Jorge Cocco
Ang diosnong kasubo mosangput sa tinuod ug mohangtud nga kausaban.
Dihang nakita ni Mormon ang pagkasubo sa iyang katawhan, nanghinaot siya nga sila maghinulsol. Apan ang “ilang kasubo dili ngadto sa paghinulsol” (Mormon 2:13)—dili kini ang matang sa diosnong kasubo nga mosangpot ngadto sa tinuod nga kausaban (tan-awa sa 2 Mga Taga-Corinto 7:8–11). Apan hinoon, gibati sa mga Nephite ang kalibutanong kasubo (tan-awa sa Mormon 2:10–11). Aron masabtan ang kalainan tali sa diosnong kasubo ug kalibutanong kasubo, ikonsiderar ang paghimo og tsart diin imong irekord ang unsay imong nakat-unan gikan sa Mormon 2:10–15 mahitungod niining duha ka mga matang sa kasubo. Ang imong tsart posibling ingon niini nga tan-awon:
|
Diosnon nga kasubo |
Kalibutanon nga kasubo |
|---|---|
Diosnon nga kasubo Moduol ngadto ni Jesus (bersikulo 14) | Kalibutanon nga kasubo Mitunglo sa Dios (bersikulo 14) |
Diosnon nga kasubo | Kalibutanon nga kasubo |
Diosnon nga kasubo | Kalibutanon nga kasubo |
Samtang mamalandong ka sa unsay imong nakat-unan, ikonsiderar kon sa unsang paagi kini makaimpluwensya sa imong mga paningkamot sa pagbuntog sa sala ug pagkahimong mas mahisama sa Langitnong Amahan ug sa Manluluwas.
Tan-awa usab sa Dieter F. Uchtdorf, “Makahimo Kamo Niini Karon!” Liahona, Nob. 2013, 55–57.
Ilhon gayud nako sa kanunay ang kamot sa Dios sa akong kinabuhi.
Si Mormon mirekord sa usa ka kahuyang nga iyang nakita diha sa mga Nephite: napakyas sila sa pag-ila sa mga paagi sa pagpanalangin kanila sa Ginoo. Si Presidente Henry B. Eyring miawhag kanato sa “pagpangita og mga paagi sa pag-ila ug paghinumdom sa kaayo sa Dios. … Mag-ampo ug mamalandong, mangutana: Ang Dios mipadala ba og mensahe nga alang lamang kanako? Nakita ba nako ang Iyang kamot sa akong kinabuhi o sa kinabuhi sa akong mga anak? … Ako mopamatuod nga Siya nahigugma kanato ug nagpanalangin kanato, labaw kaysa atong nahibaloan sa kadaghanan nato” (“O Hinumdumi, Hinumdumi,” Liahona, Nob. 2007, 67, 69).
Samtang magbasa ka sa Mormon 3:3, 9, posibling maghunahuna ka kon sa unsang paagi ikaw miila sa impluwensya sa Dios sa imong kinabuhi. Unsang mga panalangin ang moabut kon imong ilhon ang Iyang impluwensya? Unsa ang mga sangputanan sa dili pag-ila Kaniya? (tan-awa sa Mormon 2:26).
Si Jesukristo nagbarug nga bukas ang mga bukton sa pagdawat kanako.
Ang mga Nephite misalikway sa mga pagtulun-an ni Mormon, apan duna siyay paglaum nga ang iyang rekord moimpluwensya kanimo. Samtang nagbasa ka sa Mormon 5:8–24 ug sa 6:16–22, unsay imong nakat-unan mahitungod sa mga sangputanan sa sala? Unsay imong nakat-unan gikan niini nga mga tudling mahitungod sa mga pagbati sa Langitnong Amahan ug ni Jesukristo diha nimo, bisan ikaw nakasala? Sa unsang paagi nga gibati nimo si Jesukristo nga nagtabang kanimo uban ang bukas nga mga bukton? Unsay gibati nimong angayng buhaton isip resulta?
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.
Mormon 1:2
Unsay ipasabut sa “dali sa pagpaniid”? Makakita ka og mga pagtulun-an diha sa artikulo ni Elder David A. Bednar “Quick to Observe” (Ensign, Dis. 2006, 30–36). Sa unsang paagi ang gasa sa pagkadali sa pagpaniid usa ka panalangin ni Mormon? Sa unsang paagi kini usa ka panalangin kanato?
Mormon 1:1–6, 15; 2:1–2
Ang mga bata ba diha sa imong pamilya nakasabut nga pwede silang makapalambo og talagsaong mga espirituhanong kalidad ug gahum bisan gagmay pa sila? Ang ehemplo ni Mormon makatabang kanila. Ikonsiderar ang paghimo og usa ka listahan sa dagan sa panghitabo [timeline] sa pagkabata ug pagkabatan-on ni Mormon, gamit ang mga kapanahonan ug mga panghitabo diha sa Mormon 1:1–6, 15 ug 2:1–2. Samtang maghisgot ka sa mga kalidad ug mga kasinatian ni Mormon, hisguti ang mga kalidad nga nabatunan sa imong mga anak nga nagdasig kanimo ug sa uban diha sa ilang palibut.
Mormon 2:18–19
Unsang mga pulong ang gigamit ni Mormon sa paghulagway sa kalibutan nga iyang gipuy-an? Giunsa niya sa pagbaton og paglaum bisan sa kadautan sa iyang palibut? Sa unsang paagi ang atong pamilya makahimo og susama niini?
Mormon 3:12
Unsay gibati ni Mormon mahitungod sa mga tawo sa iyang palibut, bisan og mga dautan sila? Unsay atong mahimo aron makapalambo og matang sa gugma nga anaa kaniya?
Mormon 5:2
Nganong magpanuko man kita sa pagtawag sa Langitnong Amahan kon naglisud kita? Unsay atong mahimo aron mas makasalig sa Langitnong Amahan?
Mormon 5:16–18
Aron matabangan ang imong pamilya nga makalarawan unsay ipasabut sa “gipadpad ingon og tahup tungod sa ka kusog sa hangin” (bersikulo 16), gisi-gisia og gagmay ang usa ka papel ug ipahuyop kini sa mga sakop sa pamilya diha sa ilang palibut. Ipasabut kanila nga ang tahup mao ang panit sa liso, ug gaan ra kining molupad kon huyupon. Sa unsang paagi nga ang pagka-“walay Kristo ug Dios niini nga kalibutan” (bersikulo 16) susama sa usa ka tahup nga gihuyop sa hangin?
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Itudlo ang klaro ug yanong doktrina. Ang ebanghelyo sa Ginoo matahum sa kayano niini (tan-awa sa D&P 133:57). Imbis mosulay sa paglingaw sa pamilya gamit ang nindot kaayong mga leksyon, siguroa nga unsay imong itudlo makasentro sa lunsay ug yanong doktrina.
Ang Milagrusong Basahon ni Mormon, ni Joseph Brickey