“Nobyembre 23–29. Ether 12–15: ‘Pinaagi sa Hugot nga Pagtuo ang Tanan nga mga Butang Matuman,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Nobyembre 23–29. Ether 12–15,” Dali, Sunod Kanako—Alang sa mga Indibidwal ug mga Pamilya: 2020
Si Ether nga Mitago sa Lungag sa Dako nga Bato, ni Gary Ernest Smith
Nobyembre 23–29
Ether 12–15
“Pinaagi sa Hugot nga Pagtuo ang Tanan nga mga Butang Matuman”
Ang pagrekord sa mga impresyon makadapit og dugang nga pagpadayag ug makapalig-on sa imong pagpamatuod. Makatabang usab kini kanimo sa paghinumdom sa imong mga impresyon ug mapaambit kini ngadto sa uban sa umaabut.
Irekord ang Imong mga Impresyon
Ang mga panagna ni Ether ngadto sa mga Jaredite mga “mahinungdanon ug kahibulongan” (Ether 12:5). Siya “misulti kanila sa tanan nga mga butang, gikan sa sinugdanan sa tawo” (Ether 13:2). Siya nakakita “sa mga adlaw ni Kristo” ug sa ulahing adlaw nga Bag-ong Jerusalem (Ether 13:4). Ug namulong siya mahitungod sa “[pag]laum alang sa maayo nga kalibutan, oo, gani usa ka dapit diha sa tuo nga kamot sa Dios” (Ether 12:4). Apan gisalikway sa mga Jaredite ang iyang mga pulong, sa mao gihapong kasagaran nga pagsalikway sa katawhan sa mga panagna sa mga sulugoon sa Dios karon—“tungod kay “sila wala [makakita niini]” (Ether 12:5). Nagkinahanglan og pagtuo ang pagtuo sa mga saad o mga pasidaan mahitungod sa mga butang nga dili nato makita, sama usab nga si Ether nagkinahanglan og pagtuo sa pagpanagna sa “mahinungdanon ug kahibulongan nga mga butang” ngadto sa dili matuohon nga katawhan. Nagkinahanglan og pagtuo para kang Moroni ang pagsalig nga ang Ginoo motangtang sa iyang “kahuyang diha sa pagsulat” ug himoon kini nga kalig-on (tan-awa sa Ether 12:23–27). Mao kini ang matang sa pagtuo nga maghimo kanatong “lig-on ug makanunayon, sa kanunay puno sa maayo nga mga buhat, gitultulan ngadto sa paghimaya sa Dios” (Ether 12:4). Ug mao kini ang matang sa pagtuo diin “ang tanan nga mga butang matuman” (Ether 12:3).
Mga Ideya alang sa Personal nga Pagtuon sa Kasulatan
Ang pagtuo kang Jesukristo modala kanato ngadto sa dagkong mga milagro.
Daghang mga tawo karon, sama sa mga Jaredite sa kapanahonan ni Ether, gustong makakita og ebidensya sa dili pa sila motuo sa Dios ug sa Iyang gahum. Bisan pa niana, gitudlo ni Moroni nga “ang hugot nga pagtuo mao ang mga butang nga gilauman ug dili makita” ug nga kamo “dili makadawat og saksi hangtud human sa pagsulay sa inyong hugot nga pagtuo” (Ether 12:6).
Timan-i ang matag higayon nga makita nimo ang pulong nga “pagtuo” diha sa Ether 12, ug irekord unsay imong nakat-unan mahitungod sa pagtuo. Pangita og mga tubag sa mga pangutana nga sama niini: Unsa ang pagtuo? Unsay mga bunga sa kinabuhi nga puno sa pagtuo? Pwede sab nimong irekord ang imong mga hunahuna mahitungod sa mga saksi nga imong naangkon “human sa pagsulay sa inyong hugot nga pagtuo” (Ether 12:6).
Tan-awa usab sa Mga Hebreohanon 11; Alma 32.
Si Jesukristo mihatag kanato og “labaw nga maayo nga paglaum.”
Agig dugang sa mas halawom nga mga pagtulun-an mahitungod sa pagtuo, ang Ether 12 may daghan usab nga ikasulti mahitungod sa paglaum—tingali pwede nimong timan-an ang matag higayon nga makita ang pulong nga “paglaum”. Unsay ipasabut sa paglaum diha kanimo? Unsay mga rason nganong si Ether kinahanglang “molaum alang sa maayo nga kalibutan”? (tan-awa sa Ether 12:2–5). Sa unsang paagi ang ebanghelyo ni Jesukristo mihatag kanimo og “labaw nga maayo nga paglaum”? (Ether 12:32).
Bisitaha ang Pagpasalamat.SimbahanniJesukristo.org aron sa pagpaminaw og mensahe gikan ni Presidente Russell M. Nelson bahin sa paagi aron sa pagkaplag og kalinaw ug pagkaayo—bisan unsa pa ang inyong mga kahimtang.
Tan-awa usab sa Moroni 7:40–41; Dieter F. Uchtdorf, “Ang Walay Kinutoban nga Gahum sa Paglaum,” Liahona, Nob. 2008, 21–24; Isangyaw ang Akong Ebanghelyo, 117.
Si Jesukristo makahimong lig-on sa huyang nga mga butang.
Kon basahon nato ang makaimpluwensya nga mga sinulat ni Moroni, sayon ang pagkalimot nga nabalaka siya mahitungod sa iyang “kahuyang diha sa pagsulat” ug sa kahadlok nga basin biay-biayon sa katawhan ang iyang mga pulong (tan-awa sa Ether 12:23–25). Apan misaad ang Dios nga Siya “mohimo sa mahuyang nga mga butang nga mahimo nga malig-on” alang sa mapaubsanon (bersikulo 27), ug ang espirituhanong gahum diha sa mga sinulat ni Moroni mao ang makakumbinser nga ebidensya nga ang Ginoo motuman niini nga saad.
Human mabasa ang Ether 12:23–29, paghunahuna og mga panahon dihang ang Dios mitabang nimo sa pag-ila sa imong mga kahuyang ug naghimo kanimong lig-on bisan pa niini. Tingali maayo usab kini nga panahon sa paghunahuna mahitungod sa mga kahuyang nga sa kasamtangan imong gipanglimbasugan. Unsa ang imong gibati nga angay nimong buhaton aron mapaubos ang imong kaugalingon sa atubangan sa Ginoo ug mopakita og pagtuo Kaniya aron madawat ang Iyang saad nga “mohimo sa mahuyang nga mga butang nga mahimo nga lig-on”? (Ether 12:27).
Samtang pamalandungan nimo kini nga mga bersikulo, ang mosunod nga mga pagtulun-an gikan ni Elder Neal A. Maxwell tingali makatabang: “Kon makabasa kita diha sa mga kasulatan kabahin sa ‘kahuyang’ sa tawo, kini nga pulong naglakip sa … kahuyang nga anaa na sa kinatibuk-ang tawhanong kahimtang diin ang pisikal nga lawas adunay grabe ka walay hunong [o kanunay] nga epekto diha sa espiritu (tan-awa sa Ether 12:28–29). Ang kahuyang naglakip usab, bisan pa, sa atong piho, tagsa-tagsa nga mga kahuyang, diin kita gilauman nga mobuntog (tan-awa sa Doktrina ug mga Pakigsaad 66:3; Jacob 4:7)” (Lord, Increase Our Faith [1994], 84).
Tan-awa usab sa “Grasya,” Mga Hilisgutan sa Ebanghelyo [Gospel Topics], topics.ChurchofJesusChrist.org.
Ang pagsalikway sa mga propeta magdala og espirituhanong peligro.
Ang pagkahimong hari sa mga Jaredite, sa kasaysayan, usa ka peligro nga katungdanan. Tinuod gayud kini alang kang Coriantumr, kay daghang “gamhanan nga mga tawo … nagtinguha sa paglaglag kaniya” (Ether 13:15–16). Diha sa Ether 13:15–22, tan-awa kon unsa ang gihimo ni Coriantumr sa pagpanalipud sa iyang kaugalingon ug kon unsay gitambag ni Ether nga iyang buhaton. Samtang magbasa ka sa uban pa sa basahon ni Ether, pamalandungi ang mga sangputanan sa pagsalikway sa mga propeta. Unsay mahitabo sa katawhan kon “ang Espiritu sa Ginoo [mohunong] sa pagdasig kanila”? (Ether 15:19).
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.
Ether 12:7–22
Samtang dungan kamong magbasa niini nga mga bersikulo, pwede ninyong ribyuhon ang pipila ka makadasig nga mga ehemplo kabahin sa pagtuo nga imong nabasa mahitungod sa Basahon ni Mormon. Mosangput kini sa usa ka diskusyon mahitungod sa mga ehemplo sa pagtuo diha sa inyong family history o sa kaugalingon ninyong kinabuhi—ikonsiderar ang pagrekord niini nga mga kasinatian kon wala pa nimo kini mabuhat.
Ether 12:27
Nganong gihatagan man kita sa Ginoo og kahuyang? Unsa man ang atong bahin sa paghimo sa “huyang nga mga butang nga mahimong lig-on”? Unsa ang bahin sa Manluluwas?
Ether 12:41
Duna bay makalingaw nga paagi nga imong matudloan ang imong mga anak sa “pagpangita … ni Jesus”? Ang usa ka paagi tingali mao ang pagtago sa litrato ni Jesus ug pagdapit sa mga sakop sa imong pamilya sa “pagpangita” ug sa pagkaplag sa litrato. Unsaon nato sa pagpangita kang Jesus, ug sa unsang paagi kita mapanalanginan kon Siya atong makaplagan?
Ether 13:13–14; 15:19, 33–34
Tingali makalingaw sa mga sakop sa imong pamilya ang pagkumpara sa kasinatian ni Ether ngadto sa mga kasinatian ni Mormon ug ni Moroni (tan-awa sa Mormon 6; 8:1–10). Sa unsang paagi kini magkapareha? Sa unsang paagiha ang dalan sa kalaglagan sa mga Nephite susama sa dalan sa kalaglagan sa mga Jaredite? (ikumpara ang Ether 15:19 sa Moroni 8:28). Unsa nga mga kamatuoran ang atong makat-unan nga makatabang kanato nga makalikay sa unsay nahitabo kanila?
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Iawhag ang mga pagpangutana. Ang mga bata natural lang nga kuryuso. Usahay tingali imong makita ang ilang mga pangutana nga babag sa unsay gipaningkamutan nimong itudlo. Imbis niana, tan-awa ang mga pangutana isip mga oportunidad. Sila usa ka indikasyon nga ang mga bata andam nga magkat-on—makahatag kini kanimo og panglantaw sa mga kabalaka sa imong mga anak ug unsay ilang gibati mahitungod sa unsay ilang gikat-unan (tan-awa sa Pagtudlo Sumala sa Pamaagi sa Manluluwas, 25–26).
Pagkahibulongan sa mga Panagna ni Ether, ni Walter Rane