Si Alma nga namunyag sa mga tawo sa Katubigan sa Mormon

Minerva Teichert (1888–1976), Si Alma Namunyag sa Katubigan sa Mormon, 1949–1951, lana nga naa sa masonite, 35⅞ x 48 ka pulgadas. Museo sa Art sa Unibersidad sa Brigham Young, 1969

Nobyembre 30–Disyembre 6

Moroni 1–6

“Aron Pag-agak Kanila sa Matarung nga Agianan”

Girekord ni Moroni ang iyang gipanghinaot nga “mahimo nga bililhon … [sa] umaabut nga adlaw” (Moroni 1:4). Unsay imong nakita sa Moroni 1–6 nga bililhon kanimo? Irekord unsay imong nadiskobrihan, ug ikonsiderar ang pagpaambit niini ngadto sa tawo nga makakita usab niini nga bililhon.

Irekord ang Imong mga Impresyon

Human gitapos ang rekord sa iyang amahan mahitungod sa mga Nephite ug sa pagpamubo sa rekord sa mga Jaredite, sa sinugdanan nagtuo si Moroni nga nahuman na ang iyang paghimo sa rekord (tan-awa sa Moroni 1:1). Unsa pay ikasulti mahitungod sa duha ka nasud nga hingpit ang pagkaguba? Apan nakita ni Moroni ang atong mga kapanahonan (tan-awa sa Mormon 8:35), ug nadasig siya sa “[pag]sulat og dugang nga pipila ka mga butang, nga tingali [kini] mahimo nga bililhon … [sa] umaabut nga adlaw” (Moroni 1:4). Nasayud siya nga ang pagkatap sa apostasiya nagsingabut, nga nagdala og kalibug mahitungod sa mga ordinansa sa pagkapari ug sa relihiyon sa kinatibuk-an. Mao tingali nga mihatag siya og mga detalye nga maghatag og katin-awan mahitungod sa sakrament, bunyag, pagtugyan sa gasa sa Espiritu Santo, ug sa mga panalangin sa pagpundok kauban sa isigka-tumutuo aron sa “pag-agak [sa usag usa] sa matarung nga agianan, … mosalig lamang diha sa mga maayo nga buhat ni Kristo, kinsa mao ang tigpasiugda ug ang tighingpit sa [atong] hugot nga pagtuo” (Moroni 6:4). Ang bililhong mga panabut nga sama niini naghatag kanato og rason nga magmapasalamaton diin gipreserba sa Ginoo ang kinabuhi ni Moroni aron iyang masulat “ang dugang nga pipila ka mga butang” (Moroni 1:4).

icon sa personal nga pagtuon

Mga Ideya alang sa Personal nga Pagtuon sa Kasulatan

Moroni 1

Ang mga disipulo ni Jesukristo magpabiling matinud-anon bisan sa oposisyon.

Alang sa ubang mga tawo, mas sayon ang pagmatinud-anon kon naa sa mga panahon sa kaharuhay ug kahupayan. Apan isip mga disipulo ni Jesukristo, kinahanglang magpabilin kitang matinud-anon bisan kon mag-atubang kita og mga pagsulay ug oposisyon. Samtang gibasa nimo ang Moroni 1, unsa ang nakadasig kanimo mahitungod sa kamatinud-anon ni Moroni ngadto sa Ginoo ug sa iyang tawag [calling]? Sa unsang paagi nimo masunod ang iyang ehemplo?

Moroni 2–6

Ang mga ordinansa sa pagkapari kinahanglang ipangalagad sigon sa sugo sa Ginoo.

Atol sa Iyang mortal nga pangalagad, ang Manluluwas nakadawat ug nangalagad sa sagradong mga ordinansa, sama sa bunyag (tan-awa sa Mateo 3:13–17; Hubad ni Joseph Smith, Juan 4:1–3 [diha sa Giya ngadto sa mga Kasulatan]), pag-orden sa pagkapari (tan-awa sa Marcos 3:13–19), ug sa sakramento (tan-awa sa Mateo 26:26–28). Apan, tungod sa Dakong Apostasiya, daghan sa katawhan karon naglibug kon unsaon sa pagpahigayon ang mga ordinansa—ug gani kon gikinahanglan pa ba kaha kini. Sa Moroni 2–6, si Moroni mihatag og importanting mga detalye mahitungod sa pihong mga ordinansa sa pagkapari nga makatabang sa paghatag og katin-awan sa pipila niana nga kalibug. Unsa nga mga impresyon ang moabut samtang nagkat-on ka mahitungod sa mga ordinansa dinhi niini nga mga kapitulo? Ang mosunod mao ang pipila ka mga pangutana nga pwede nimong ipangutana sa pagtabang kanimo nga makakat-on:

Pagkumpirma (Moroni 2; 6:4).Unsa nga mga instruksyon diha sa Moroni 2:2 ang gitudlo kanimo sa Manluluwas mahitungod sa ordinansa sa pagkumpirma? Unsa kaha ang ipasabut sa “nabag-o ug nahugasan pinaagi sa gahum sa Espiritu Santo”? (Moroni 6:4).

Pag-orden sa Pagkapari (Moroni 3).Unsay nakita nimo dinhi sa kapitulo nga makatabang og usa ka tawo nga maandam sa pagka-orden ngadto sa pagkapari? Unsay imong nakita nga makatabang sa usa ka tawo nga mopahigayon og usa ka ordinasyon?

Ang sakramento (Moroni 4–5; 6:6).Timan-i ang mga saad diha sa mga pag-ampo sa sakramento (tan-awa sa Moroni 4:3; 5:2), ug pamalandungi unsay imong mga gibuhat aron matuman ang imong mga gipangsaad. Unsay imong mahimo aron madapit ang mas gamhanang impluwensya sa Espiritu samtang mosalmot ka sa sakramento?

Bunyag (Moroni 6:1–3).Unsay imong mahimo aron mapadayon ang pagtuman sa mga kwalipikasyon alang sa bunyag nga gihatag dinhi sa mga bersikulo, bisan human ka mabunyagan? Unsay gisugyot niini nga mga bersikulo diha kanimo mahitungod sa buot ipasabut sa pagkahimong miyembro sa Simbahan ni Jesukristo?

Base sa unsay imong nakat-unan, unsaon nimo nga mausab ang imong panghunahuna mahitungod niana, pagsalmot, o pag-andam sa uban alang niini nga mga ordinansa? Nganong importante nga kini nga mga ordinansa “[ipangalagad] … sumala sa mga sugo ni Kristo”? (Moroni 4:1).

batan-on nga babaye nga nagdawat og panalangin

Mitudlo si Jesus kon sa unsang paagi ipahigayon ang mga ordinansa.

Moroni 6:4–9

Ang mga disipulo ni Jesukristo naglantaw sa kaayohan sa usag usa nga mga kalag.

Samtang tinuod nga kitang tanan ang “[molihok sa atong] kaugalingon nga kaluwasan” (Mormon 9:27), mitudlo usab si Moroni nga ang “[pag]tigum kanunay” kauban sa mga isigka-tumutuo makatabang nga kita makapadayon “sa matarung nga agianan” (Moroni 6:4–5). Samtang magbasa ka sa Moroni 6:4–9, pamalandungi ang mga panalangin nga moabut gumikan sa “[pagka-ihap] uban sa mga katawhan sa simbahan ni Kristo” (Moroni 6:4). Unsaon nimo sa pagtabang nga ang imong mga kasinatian ug sa uban diha sa simbahan mas masusama sa usa nga gihulagway ni Moroni, lider ka man o usa ka partisipante?

icon sa pagtuon sa pamilya

Mga Ideya alang sa Pamilya nga Pagtuon sa Kasulatan ug Family Home Evening

Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.

Moroni 1; Moroni 6:3

Unsay buot ipasabut sa “molimud kang Kristo”? (Moroni 1:2–3). Unsaon nato sa pagpakita ang atong “tinguha sa pag-alagad kaniya hangtud sa katapusan”? (Moroni 6:3). Pagpaambit og mga ehemplo sa mga tawo nga imong nailhan kinsa aduna niini nga determinasyon sa pagserbisyo Kaniya.

Moroni 4:3; Moroni 5:2

Ang pagbasa sa mga pag-ampo sa sakramento isip pamilya mosangput sa panaghisgot mahitungod sa pagtagad sa sakrament uban sa mas balaang pagtahud. Tingali ang mga sakop sa pamilya makahisgot sa mga pulong gikan niini nga mga pag-ampo nga makahuluganon kaayo kanila. Pwede usab nilang irekord ang ilang mga hunahuna mahitungod niini nga mga pulong o magdrowing og litrato nga makatabang nila sa paghunahuna mahitungod sa Manluluwas. Pwede nilang dad-on unsay ilang gisulat o gidrowing ngadto sa sakramento miting aron matabangan sila nga makatutok ang ilang mga hunahuna Kaniya. Sultihi ang imong pamilya unsay imong gibati mahitungod sa sakramento ug sa sakripisyo sa Manluluwas.

Moroni 6:1–4

Unsay ipasabut sa pagbaton og “masulub-on nga kasingkasing ug mahinulsulon nga espiritu”? (Moroni 6:2). Sa unsang paagi kini makatabang kanato nga maandam alang sa bunyag? Sa unsang paagi kaha kini makatabang nato human kita mabunyagan?

Moroni 6:4–9

Sumala niini nga mga bersikulo, unsa ang ubang panalangin nga moabut gikan sa “[pagka]ihap tali sa mga katawhan sa simbahan ni Kristo”? (Moroni 6:4). Nganong gikinahanglan man nato ang Simbahan?

Moroni 6:8

Unsay gitudlo niini nga bersikulo mahitungod sa paghinulsol? Unsay buot ipasabut sa pagpangita og kapasayloan uban ang “tinuod nga katuyoan”? (Moroni 6:8). Ikonsiderar ang pagpanganta og mahitungod sa pagpasaylo, sama sa “Tabangi ko, Mahal nga Amahan” (Songbook sa mga Bata, 52).

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha diha sa Dali, Sunod Kanako—Alang sa Primary.

Pagpalambo sa Personal nga Pagtuon

Mangita og ebidensya sa gugma sa Dios. Si Elder M.Russell Ballard mitudlo, “[Ang] ebanghelyo mao ang ebanghelyo sa gugma—gugma alang sa Dios ug alang sa usag usa” (“God’s Love for His Children,” Ensign, Mayo 1988, 59). Samtang magbasa ka sa mga kasulatan, ikonsiderar ang pagtimaan o pagmarka sa mga ebidensya sa gugma sa Dios alang kanimo ug sa Iyang tanan nga anak.

Si Moroni nga mitago sa usa ka langub

Si Moroni diha sa Langub, ni Jorge Cocco