Ang Basahon ni Moroni

1 Karon ako, si Moroni, human mitapos sa pagpamubo sa asoy sa katawhan ni Jared, abi nako og dili na ko makasulat og dugang pa, apan karon wala pa ako mamatay; ug ako wala magpakita sa akong kaugalingon ngadto sa mga Lamanita basin og ila kong patyon.

2 Kay tan-awa, ang ilang mga gubat hilabihan ang kapintas taliwala sa ilang mga kaugalingon; ug tungod sa ilang pagdumot gipahamtangan nila og kamatayon ang matag Nephita nga dili molimod kang Kristo.

3 Ug ako, si Moroni dili molimod kang Kristo; mao nga, ako naglatagaw bisan asa nga akong mahimo alang sa kaluwasan sa akong kaugalingong kinabuhi.

4 Mao nga, ako mosulat og dugang pa nga mga butang, sukwahi nianang akong gituohan; kay ako nagtuo nga dili na makasulat og dugang pa; apan ako mosulat og dugang pa nga pipila ka butang, nga tingali mahimo kini nga bililhon ngadto sa akong kaigsoonan nga mga Lamanita, sa umaabot nga adlaw, sumala sa kabubut-on sa Ginoo.