Minerva Teichert (1888–1976), Alma Baptizes in the Waters of Mormon, 1949–1951, lana diha sa masonite, 35⅞ x 48 ka pulgada. Brigham Young University Museum of Art, 1969

Nobyembre 30–Disyembre 6

Moroni 1–6

“Aron Pag-agak Kanila sa Matarung nga Agianan”

Sa dili pa nimo sugdan ang pagplano sa mga kalihokan alang sa mga bata, tun-i sa mainampoong paagi ang Moroni 1–6, mangita sa mga baruganan ug mga bersikulo nga gibati nimo nga kinahanglan nilang masabtan.

Irekord ang Imong mga Impresyon

Dapita ang Pagpaambit

Dapita ang mga bata sa pagpaambit unsay ilang nakat-unan mahitungod ni Moroni. Mahimo nimong gamiton ang “Kapitulo 53: Si Moroni ug ang Iyang mga Pagtulun-an” (Mga Sugilanon sa Ang Basahon ni Mormon, 154-55, o ang katugbang nga video diha sa ChurchofJesusChrist.org) aron sa pagtabang kanila nga makahinumdom.

Itudlo ang Doktrina: Mas Gagmay nga mga Bata

Moroni 4–5

Moambit ko sa sakramento aron ipakita nga kanunay nakong hinumduman si Jesukristo.

Ang sakramento mahimong usa ka sagrado nga espiritwal nga kasinatian—bisan sa gagmay nga mga bata. Unsaon nimo pagtabang ang mga bata nga imong gitudloan nga mogamit sa oras sa panahon sa sakramento sa paghunahuna ni Jesus?

Posible nga mga Kalihokan

• Ipakita ang usa ka hulagway sa mga tawo nga nag-ambit sa sakramento (tan-awa sa Libro sa mga Hulagway sa Ebanghelyo, nu. 108). Hangyoa ang mga bata sa pagsulti kanimo kon unsa ang mahitabo panahon sa sakrament. Unsa man ang kinahanglan natong buhaton panahon sa sakrament?

• Pagdapit og duha ka mga sakop sa ward sa pagtambong sa klase aron basahon ang Moroni 4:3 ug 5:2 ngadto sa mga bata ug ipaambit ngano nga moambit sila sa sakramento kada semana. Hangyoa sila sa pagsugyot og mga butang nga mahimong buhaton sa mga bata nga makatabang nila sa paghunahuna mahitungod ni Jesus panahon sa sakramento ug sa paghinumdom Kaniya sa kanunay.

• Kantaha ang usa ka kanta nga motabang sa mga bata sa paghunahuna mahitungod ni Jesus, sama sa “Nagtahud, Naghilum” (Songbook sa mga Bata, 11). Hangyoa ang mga bata nga mag-anad sa paglingkod nga matinahuron sama sa ilang buhaton sa panahon sa sakrament.

Moroni 6:1–3

Makapangandam ko aron mabunyagan.

Ang paghulagway ni Moroni sa mga tawo kinsa nabunyagan sa iyang panahon makatabang sa mga bata nga maandam sa pagdawat niining mahinungdanon nga ordinansa karon.

Posible nga mga Kalihokan

• Basaha ang mga hugpong sa mga pulong gikan sa Moroni 6:1–3 nga nagtudlo kinsa ang mahimong bunyagan. Ipasabut ang mga pulong nga mahimong dili masabtan sa mga bata. Sama pananglit, ang usa ka kahulugan sa “usa ka masulub-on nga kasingkasing ug usa ka mahinulsulon nga espiritu” mao ang pagbati sa kasubo alang sa atong mga sala (Moroni 6:2). Isulti kon giunsa nimo sa pagpangandam aron mabunyagan, o hangyoa ang usa ka tawo kinsa bag-o pa lang nabunyagan sa pagpasabut giunsa niya sa pagpangandam. Tabangi ang mga bata sa paghunahuna og mga paagi nga sila makapangandam aron mabunyagan sa umaabot nga panahon.

• Ipakita ang mga hulagway sa mga tawo nga gibunyagan (tan-awa sa Libro sa mga Hulagway sa Ebanghelyo, nu. 103, 104), ug tugoti ang mga bata sa paghisgut mahitungod sa ilang nakita diha sa mga hulagway. Tabangi sila nga makita ang mga detalye, sama sa tubig ug sa puti nga sinina. Pangutan-a ang mga bata ngano nga magpabunyag kita, ug ipasabut ngano nga gipili nimo nga magpabunyag.

Moroni 6:4–6, 9

Mapanalanginan ko kon mosimba ko.

Nakasabut ba ang mga bata nga imong gitudloan nganong mosimba kita kada semana? Ang Moroni 6 naghatag og pipila ka mahinungdanon nga mga rason.

Posible nga mga Kalihokan

• Pangutan-a ang mga bata nganong ganahan sila nga mosimba, ug tabangi sila sa paghingalan sa pipila ka mga butang nga atong gibuhat sa simbahan. Basaha ngadto nila ang pipila niini nga mga butang gikan sa Moroni 6:4–6, 9, ug dapita sila sa pag-aksyon o sa pagdrowing sa ilang mga kaugalingon nga naghimo sa pipila niining mga butanga (sama sa pag-ampo, pagsangyaw, pagkanta, ug pag-ambit sa sakrament).

• Tabangi ang mga bata sa pagkanta og usa ka kanta mahitungod sa pagsimba. Sultihi ang mga bata ngano nga ganahan ka nga mosimba ug sa unsang paagi kini nakapanalangin kanimo.

Itudlo ang Doktrina: Mas Dagko nga mga Bata

Moroni 2–6

Ang Espiritu Santo usa ka sagrado nga gasa.

Ang Espiritu Santo gihisgutan sa pipila ka higayon diha sa Moroni 2–6. Unsaon nimo paggamit kini nga mga kapitulo sa pagtabang sa mga bata nga makasabut kon sa unsang paagi ang Espiritu Santo makatabang kanila?

Posible nga mga Kalihokan

• Hangyoa ang mga bata sa pagpangita sa matag bersikulo diha sa Moroni 2–6 nga naghisgut sa Espiritu Santo o sa Espiritu. Basaha ang matag usa niini nga mga bersikulo nga magdungan, ug hangyoa ang mga bata nga isulat diha sa pisara ang mga butang nga ilang nakat-unan mahitungod sa Espiritu Santo. Sa unsang paagi makatabang ang Espiritu Santo kanato?

• Sultihi ang mga bata mahitungod sa usa ka panahon nga imong gibati ang Espiritu Santo, sa simbahan man o sa laing dapit. Ipasabut kon giunsa nimo pagkahibalo nga ang Espiritu Santo kadto ug kon giunsa Niya pagtabang kanimo. Dapita ang mga bata sa pagpaambit sa bisan unsa nila nga mga kasinatian kalabut sa Espiritu Santo, ug awhaga sila sa pagpangita sa Iyang impluwensya.

  

  Ang gasa sa Espiritu Santo ihatag pinaagi sa pagpatong sa mga kamot.

Moroni 4–5

Moambit ko sa sakramento aron ipakita nga kanunay nakong hinumduman si Jesukristo.

Kon ang mga bata makasabut sa kasagrado sa sakrament, mas ganahan sila nga magmatinahuron niini ug mobati nga duol sa Dios sa panahon niini nga ordinansa.

Posible nga mga Kalihokan

• Isulat ang mga hugpong sa mga pulong gikan sa Moroni 4:3 ug 5:2 sa lain-laing ginunting nga papel, ug hangyoa ang mga bata sa pagpahimutang sa mga hugpong sa mga pulong sa husto nga pagkahan-ay. Sumala niini nga mga bersikulo, nganong importante man ang sakrament?

• Dapita ang mga bata sa paghanduraw nga ang usa ka higala motambong sa sakramento sa unang higayon. Unsaon nila pagpasabut sa ilang higala kon unsa ang sakramento ug kon ngano nga moambit kita niini? Awhaga sila sa paggamit sa Moroni 4:3 ug 5:2 sa ilang pagpasabut.

• Dapita ang mga bata sa pagpaambit sa mga butang nga gihimo sa ilang mga pamilya panahon sa sakramento aron magmatinahuron ug maghunahuna mahitungod ni Jesukristo. Unsa pay uban nilang mga ideya? Dapita sila sa pagpili sa usa niini nga mga ideya ug sa paghimo og tumong nga mogahin og dugang nga panahon sa paghunahuna sa Manluluwas panahon sa sakrament.

Moroni 6:4–6, 9

Mosimba kita aron sa pag-ambit sa sakramento ug pagsuporta sa usag usa.

Ang mga pulong ni Moroni makatabang sa mga bata nga imong gitudloan nga makakita og mas dakong katuyoan sa pagsimba matag semana.

Posible nga mga Kalihokan

• Isulat ang Nganong mosimba man kita? diha sa pisara, ug hangyoa ang mga bata sa pagsulat og posible nga mga tubag. Dapita sila sa pagpangita og dugang nga mga tubag diha sa Moroni 6:4–6, 9 ug idugang kini sa ilang lista diha sa pisara. Dapita ang mga bata sa pagpaambit sa unsang paagi sila napanalanginan tungod sa ilang pagtambong sa simbahan. Ipa-role play nila ang pagpasabut ngadto sa usa ka higala sa laing tinuohan nganong mapasalamaton sila nga nahisakop sa Simbahan.

• Pagpakita og mga hulagway o mga ehemplo sa mga makapahimsog nga mga pagkaon. Nganong mahinungdanon man ang pag-amuma sa atong mga lawas? Basaha og dungan ang Moroni 6:4, ug pangutan-a ang mga bata kon unsa sa ilang hunahuna ang kahulugan sa hugpong sa mga pulong nga “maamumahan pinaagi sa maayo nga pulong sa Dios”. Sa unsang paagi ang pulong sa Dios makaamuma kanato?

• Dapita ang usa sa mga bata sa pagbasa sa mosunod nga kutlo gikan ni Elder Jeffrey R. Holland ug hisguti kon unsa ang gitudlo niini mahitungod sa paagi nga atong maamumahan ang usag usa: “Kadaghanan sa mga tawo dili moanhi sa simbahan aron lang mangita og pipila ka mga kapamatud-an sa ebanghelyo o sa pagpakighimamat sa karaang mga higala, bisan tuod kanang tanan mahinungdanon. Moanhi sila nga magtinguha og usa ka espiritwal nga kasinatian. Gusto sila og kalinaw. Gusto sila nga ang ilang pagtuo malig-on ug ang ilang paglaum mabag-o. Sa laktud, gusto nila nga, maamumahan sa maayong pulong sa Dios, nga malig-on pinaagi sa mga gahum sa langit” (A Teacher Come from God,” Ensign, Mayo 1998, 26). Unsaon nato nga makatabang sa pag-amuma sa usag usa sa espirituhanon nga paagi?

Awhaga ang Pagkat-on diha sa Panimalay

Awhaga ang mga bata sa pagsulti sa ilang pamilya mahitungod sa mga rason nga ganahan silang mosimba matag semana.

Pagpalambo sa Atong Pagtudlo

Suportahi ang mga ginikanan. Pagmainampoon sa pagpangita og paagi nga makasuporta sa mga ginikanan sa mga bata nga imong gitudloan. Unsaon nimo pagsuporta sa ilang mga paningkamot sa pagtudlo sa ebanghelyo ngadto sa ilang mga anak? Sama pananglit, tingali makigsulti ka sa mga ginikanan mahitungod sa mga panginahanglan ug mga interes sa ilang mga anak o mopaambit kanila sa unsay nakat-onan sa ilang mga anak sulod sa klase (tan-awa sa Pagtudlo sumala sa Pamaagi sa Manluluwas, 25).