Behold the Lamb of God, ni Walter Rane

Disyembre 21–27

Pasko

“Siya Moanhi sa Kalibutan aron sa Pagtubos sa Iyang mga Katawhan”

Ang mga bata sa kasagaran mahinamon nga maghisgut kon giunsa nila pagsaulog ang Pasko. Pamalandong kon unsa ang imong mahimo aron sa pagtabang kanila sa pag-focus diha kang Jesukristo ug sa ilang pagpasalamat sa Iyang pagkatawo.

Irekord ang Imong mga Impresyon

Dapita ang Pagpaambit

Dapita ang mga bata sa pagsulti o pagdrowing og usa ka hulagway usa ka butang nga gihimo sa ilang pamilya panahon sa Pasko aron pagtabang nila sa paghinumdom ni Jesukristo.

Itudlo ang Doktrina: Mas Gagmay nga mga Bata

1 Nephi 11:13–22; Mosiah 3:5–8; Alma 7:9–13; Helaman 14:1–6; 3 Nephi 1:15, 19–21

Si Jesukristo natawo aron mahimong akong Manluluwas.

Nasayud ba ang mga bata nga imong gitudloan ngano nga magsaulog kita sa Pasko? Unsaon nimo pagtabang nila nga makasabut ngano nga ang pagkatawo ni Jesukristo mao ang hinungdan sa pagsaulog?

Posible nga mga Kalihokan

• Paghisgut mahitungod sa pagkatawo ni Jesus, magpakita og mga hulagway samtang imong buhaton (sama sa Libro sa mga Hulagway sa Ebanghelyo, nu. 28, 29, 30, 31). Ipaambit sa mga bata unsa ang ilang nahibaloan. Gamita ang pahina sa kalihokan karong semanaha aron sa pagtudlo sa mga bata nga ang mga tawo nga nagpuyo sa mga panahon sa Basahon ni Mormon nasayud mahitungod sa pagkatawo ni Jesus.

• Basaha ang mahinungdanong mga hugpong sa mga pulong gikan sa Alma 7:11–12 aron sa pagtudlo sa mga bata kon unsa ang gihimo ni Jesukristo alang kanato. Ipaambit ngano nga mapasalamaton ka nga si Jesukristo natawo, ug ipadayag ang imong mga pagbati mahitungod sa Iyang maulaong sakripisyo.

• Pagpakita og mga hulagway nga nagpakita sa maulaong sakripisyo sa Manluluwas—sama sa Iyang pag-antos sa Getsemani, kamatayon diha sa krus, ug Pagkabanhaw (tan-awa sa Libro sa mga Hulagway sa Ebanghelyo, nu. 56, 57, 58, 59). Hangyoa ang mga bata sa pagsulti kanimo unsa ang ilang nakita diha sa mga hulagway. Tabangi sila nga makasabut nga ang Langitnong Amahan mipadala ni Jesukristo dinhi sa kalibutan aron mag-antos alang sa atong mga sala, magpakamatay alang kanato, ug mabanhaw aron kita makabalik sa pagpuyo uban Kaniya.

• Kanta dungan sa mga bata og usa ka kanta mahitungod sa pagkatawo ni Jesus, sama sa “Mipadala sa Bugtong Anak” or “Didto sa Pasungan” (Songbook sa mga Bata, 20, 26). Ipakita sa mga bata ang hugpong sa mga pulong diha sa kanta nga naghulagway sa mga panalangin nga anaa kanato tungod sa pagkatawo ni Jesus.

2 Nephi 25:23, 26

Ang Basahon ni Mormon nagpamatuod ni Jesukristo.

Samtang inyong tapuson ang inyong pagtuon sa Basahon ni Mormon niining tuiga, pahinumdumi ang mga bata nga kini nga basahon mao ang “Lain nga Tugon ni Jesukristo,” nga gisulat aron sa pagtabang kanato nga moduol ngadto Kaniya.

Posible nga mga Kalihokan

• Ipataas ang usa ka kopya sa Basahon ni Mormon aron makita sa mga bata. Basaha ang ulohan ug ipunting ang mga pulong “Lain nga Tugon ni Jesukristo.” Papuli-puliha og gunit sa basahon ang mga bata, ug tabangi sila sa pagpangita sa ngalan sa Manluluwas diha sa hapin. Sultihi ang mga bata kon unsa ang imong gibati mahitungod sa Basahon ni Mormon ug sa unsang paagi kini nakatabang kanimo nga makat-on mahitungod ni Jesukristo.

• Hatagi ang matag bata og usa ka hulagway ni Jesus, o padrowinga sila og mga hulagway Kaniya. Dapita sila sa pag-isa sa ilang mga hulagway sa matag higayon nga makadungog sila sa ngalan ni Kristo samtang magbasa ka sa 2 Nephi 25:23, 26. Ipamatuod nga ang Basahon ni Mormon gisulat aron sa pagtabang kanato sa “pagtuo kang Kristo” (2 Nephi 25:23).

• Ipaambit sa mga bata ang usa sa imong paborito nga mga tudling o mga istorya gikan sa Basahon ni Mormon nga makatabang kanimo nga makakat-on mahitungod ni Jesukristo. Pangutan-a ang mga bata mahitungod sa ilang paborito nga mga istorya sa Basahon ni Mormon, ug tabangi sila nga makakita kon giunsa niini nga mga istorya pagtabang kanato nga makat-on mahitungod sa Manluluwas ug mopaduol ngadto Kaniya. Ang pagtan-aw sa pipila ka mga hulagway diha sa Mga Sugilanon sa Basahon ni Mormon makatabang kanila sa paghinumdom sa mga istorya.

Itudlo ang Doktrina: Mas Dagko nga mga Bata

1 Nephi 11:13–22; Mosiah 3:5–8; Alma 7:10–13; Helaman 14:1–6; 3 Nephi 1:15, 19–21

Si Jesukristo natawo aron mahimong akong Manluluwas.

Pamalandong kon sa unsang paagi nga ikaw labing makatabang sa mga bata nga makasabut sa kamahinungdanon sa pagkatawo ni Kristo ug kon unsa ang kahulugan niini alang kanila.

Posible nga mga Kalihokan

• Hatagi ang matag bata og usa sa mga pakisayran sa kasulatan nga makita diha sa pahina sa mga kalihokan niining semanaha. Dapita ang matag usa kanila sa pagbasa sa kasulatan, pag-ila sa propeta nga namulong, ug sa pagpaambit og usa ka butang nga nahibaloan niini nga propeta mahitungod ni Jesukristo. Tabangi sila o tugoti sila nga magtinabangay kon gikinahanglan.

• Isulat diha sa pisara ang pipila ka mga panghitabo nga naglibot sa pagkatawo ni Jesus, sama sa gihulagway diha sa Lucas 2:4–14; Mateo 2:1–2; ug 3 Nephi 1:15, 19–21. Tabangi ang mga bata sa pagsiksik niini nga mga kasulatan aron sa pagtino kon ang mga panghitabo nahitabo ba sa Bethlehem, sa Amerika, o sa duha. Nganong mapasalamaton man kita nga anaa ang Basahon ni Mormon isip ikaduha nga saksi sa pagkatawo ug misyon ni Jesukristo ug isip ang Manluluwas?

• Basaha ang Alma 7:10–13 uban sa mga bata. Unsa ang atong makat-unan gikan niini nga mga bersikulo mahitungod sa pagkatawo ni Jesus? mahitungod sa Iyang pagkadiosnon? mahitungod sa Iyang misyon sa kalibutan? Dapita ang mga bata sa pagpakigbahin nganong mapasalamaton sila alang ni Jesukristo, ug ipaambit ang imong pagpamatuod Kaniya.

2 Nephi 25:23, 26; 33:4, 10

Ang Basahon ni Mormon nagpamatuod ni Jesukristo.

Sa paghisgut mahitungod sa Basahon ni Mormon, si Propeta Joseph Smith miingon nga “ang tawo labi nga maduol sa Dios pinaagi sa pagsunod sa iyang mga lagda, kay sa bisan hain nga basahon” (pasiuna sa Basahon ni Mormon). Unsaon nimo pagtabang ang mga bata sa pagpasabut niini nga saad?

Posible nga mga Kalihokan

• Ihatag ang usa sa mosunod nga mga bersikulo sa matag bata: 2 Nephi 25:23, 26; 33:4, 10. Dapita ang mga bata sa pagbasa sa ilang bersikulo ug sa pag-ila kon unsa ang gusto nga ipahibalo sa propeta sa Basahon ni Mormon nga si Nephi ngari kanato. Hangyoa sila sa pagsulat diha sa pisara sa unsay ilang nakit-an. Ipasabut nga kining mga butanga naghulagway sa usa ka mahinungdanong katuyoan sa Basahon ni Mormon. Ipa role-play sa mga bata sa matag usa kanila kon unsaon nila pagpasabut ngadto sa usa ka higala ang usa ka mahinungdanon nga katuyoan sa Basahon ni Mormon.

• Ipaambit sa mga bata ang usa sa imong paborito nga mga tudling o mga istorya gikan sa Basahon ni Mormon nga makatabang kanimo nga makakat-on mahitungod ni Jesukristo. Pangutan-a ang mga bata mahitungod sa ilang paborito nga mga istorya sa Basahon ni Mormon, ug tabangi sila nga makakita kon giunsa niini nga mga istorya pagtabang kanato nga makat-on mahitungod sa Manluluwas ug mopaduol ngadto Kaniya. Ipaambit sa mga bata kon sa unsang paagi ang Basahon ni Mormon nakatabang kanimo nga masayud nga si Jesus mao ang Kristo. Awhaga ang mga bata sa paghunahuna og usa ka bersikulo o istorya gikan sa Basahon ni Mormon nga nakapalig-on sa ilang pagtuo ni Jesukristo. Hangyoa sila sa pagpaambit niini ngadto sa usa ka higala o sakop sa pamilya kinsa wala masayud mahitungod sa Basahon ni Mormon.

Awhaga ang Pagkat-on diha sa Panimalay

Dapita ang mga bata sa pagpaambit uban sa ilang pamilya kon sa unsang paagi ang Basahon ni Mormon nakatabang kanila nga makat-on pa og dugang mahitungod ni Kristo. Awhaga sila sa pagpaambit og usa ka bersikulo o istorya gikan sa Basahon ni Mormon isip kabahin sa ilang pagpamatuod.

Pagpalambo sa Atong Pagtudlo

Ang mga bata ganahan og mga istorya. Ang mga istorya maoy usa sa labing maayong mga paagi sa pagtabang sa mga bata nga makakat-on ug makahinumdom sa mga kamatuoran. Samtang mopaambit ka sa istorya sa pagkatawo ni Jesus, ikonsiderar usab ang pagpaambit og mga istorya gikan sa imong kinabuhi nga nakatabang sa pagpalig-on sa imong hugot nga pagtuo diha sa Manluluwas.