That Ye May Know, ni Gary L. Kapp

Disyembre 14–20

Moroni 10

“Duol ngadto ni Kristo, ug Paghingpit diha Kaniya”

Ang pipila ka mga bata sa imong klase mahimong adunay makahuluganon nga mga kasinatian sa pagkat-on gikan sa Basahon ni Mormon diha sa panimalay. Unsaon nimo paggamit niana nga mga kasinatian aron sa pag-awhag sa tanang mga bata nga magbasa sa mga kasulatan diha sa panimalay?

Irekord ang Imong mga Impresyon

Dapita ang Pagpaambit

Ipasa ang usa ka kopya sa Basahon ni Mormon. Kon ang matag bata maggunit sa basahon, hangyoa siya sa pagpaambit og usa ka butang nga iyang ganahan mahitungod sa Basahon ni Mormon—usa ka paborito nga istorya, usa ka pagpamatuod, o usa ka kasinatian sa pagkat-on niini sa panimalay o sa simbahan.

Itudlo ang Doktrina: Mas Gagmay nga mga Bata

Moroni 10:3–5

Masayud ko sa akong kaugalingon nga ang Basahon ni Mormon tinuod.

Pangita og mga paagi nga makatabang sa mga bata nga modawat sa pagdapit ni Moroni sa pagpangutana sa Dios kon tinuod ba ang Basahon ni Mormon.

Posible nga mga Kalihokan

• Ipakita ang usa ka hulagway ni Moroni nga naglubong sa bulawan nga mga palid (tan-awa sa outline niining semanaha diha sa Dali, Sunod Kanako—Alang sa mga Indibidwal ug mga Pamilya), ug hangyoa ang mga bata sa paghulagway kon unsa ang ilang nakita. Dapita sila sa pagtudlo ngadto sa mga palid, ug ipasabut nga dinhi niini nga mga palid gisulat ang mga pulong nga karon atong gibasa diha sa Basahon ni Mormon. Hangyoa ang mga bata sa pagpakaaron ingnon nga mao si Moroni nagsulat diha sa mga palid ug naglubong niini. Dungan nga manganta sa Ang Bulawang mga Palid” (Songbook sa mga Bata, 61).

• Ipakita ang Basahon ni Mormon, ug basaha ang Moroni 10:4. Ipasabut nga kita mahimong mangutana sa Dios kon tinuod ba ang Basahon ni Mormon, ug Siya mopadala sa Espiritu Santo aron mopamatuod niini ngari kanato. Mahimo usab nimong gamiton ang “Kapitulo 54: Ang Panaad sa Ang Basahon ni Mormon” (Mga Sugilanon sa Ang Basahon ni Mormon, 156, o ang katugbang nga video diha sa ChurchofJesusChrist.org). Ipaambit kon giunsa sa Espiritu Santo sa pagtabang kanimo nga makaangkon sa imong pagpamatuod sa Basahon ni Mormon. Tabangi ang mga bata nga makasabut kon unsa ang pagbati sa pagsaksi gikan sa Espiritu. Pagkanta og usa ka awit mahitungod sa pagpangita sa kamatuoran, sama sa “Pagsiksik, Pamalandong, ug Pag-ampo” (Songbook sa mga Bata, 66).

Moroni 10:8–20

Ang Langitnong Amahan naghatag kanato og daghang espiritwal nga mga gasa.

Si Moroni mihulagway sa mga gasa nga gihatag sa Dios ngadto sa Iyang mga anak kon sila adunay hugot nga pagtuo diha Kaniya. Makatabang ka sa mga bata nga makaangkon og hugot nga pagtuo nga ang Dios mohatag kanila og espiritwal nga mga gasa.

Posible nga mga Kalihokan

• Isulat ang mga numero 9 hangtud sa 16 sa managlahi nga mga piraso sa papel, ug pusta ang matag papel sama sa usa ka gasa. Papuli-puliha ang mga bata sa pag-abli sa mga gasa. Samtang ila kining gibuhat, pagbasa og dungan sa mga bersikulo gikan sa Moroni 10:9–16 nga natukma sa mga numero, ug tabangi ang mga bata sa pag-ila sa matag espiritwal nga gasa. Ipasabut nga mao kini ang mga gasa nga gihatag sa Langitnong Amahan sa Iyang mga anak aron kita makatabang sa usag usa ug makahimo sa Iyang buhat.

• Tugoti ang mga bata nga makasulti sa daklit mahitungod sa paborito nga mga gasa nga ilang nadawat. Sultihi ang mga bata mahitungod sa espiritwal nga mga gasa nga imong namatikdan nga gihatag sa Langitnong Amahan kanila, sama sa mga gasa sa hugot nga pagtuo, kaalam, pagpamatuod, pagkamabination, ug sa abilidad sa pagkat-on.

Moroni 10:32

Gusto ni Jesukristo nga ako moduol ngadto Kaniya.

Ikonsiderar unsaon nimo pagtabang sa mga bata nga makasabut kon unsa ang kahulugan sa “duol ngadto ni Kristo.”

Posible nga mga Kalihokan

• Pagbasa ngadto sa mga bata gikan sa Moroni 10:32, “Duol ngadto ni Kristo, ug paghingpit diha kaniya,” ug dapita ang mga bata nga balikon pagsulti kini nga hugpong sa mga pulong dungan nimo. Hangyoa sila sa pagpiyong sa ilang mga mata samtang imong ipahimutang ang usa ka hulagway ni Jesus sa usa ka dapit diha sa lawak. Dayon ipabuka ilang mga mata, pangitaon ang hulagway, ug patapoka libot niini. Hisguti uban sa mga bata ang mga paagi nga kita mahimong makaduol ngadto ni Kristo (tan-awa, sama pananglit ang, Mga Artikulo sa Hugot nga Pagtuo 1:3–4). Balika kini nga kalihokan, tugotan ang mga bata sa pagbutang sa hulagway sa usa ka dapit sa lawak sa klasehanan.

• Tabangi ang mga bata sa pagpanindot sa mga tsapa nga porma og kasingkasing nga gisulatan og “Akong gihigugma ang Dios uban sa tibuok nga gahum, hunahuna ug kusog” (tan-awa sa Moroni 10:32). Unsaon nato pagpakita sa Dios nga gihigugma nato Siya?

Itudlo ang Doktrina: Mas Dagko nga mga Bata

Moroni 10:3–5

Ako makahibalo sa kamatuoran pinaagi sa gahum sa Espiritu Santo.

Gusto sa Dios nga masayran sa matag usa kanato nga ang Basahon ni Mormon tinuod. Tabangi ang mga bata nga makasabut sa saad sa Dios nga “mopakita sa kamatuoran niini nganha kaninyo, pinaagi sa gahum sa Espiritu Santo.”

Posible nga mga Kalihokan

• Isulat diha sa pisara ang mga pulong nga Mobasa, Mohinumdom, mamalandong ug Mangutana. Dapita ang mga bata sa pagpangita niini nga mga pulong diha sa Moroni 10:3–4. Unsa ang kinahanglan natong basahon, hinumduman, palangdungon, ug ipangutana aron makaangkon o malig-on ang atong mga pagpamatuod sa Basahon ni Mormon? Hangyoa ang mga bata sa pagpangita sa pagkasama tali niining mga bersikulo ug sa kanta nga “Pagsiksik, Pamalandong, ug Pag-ampo” (Songbook sa mga Bata, 66).

• Tabangi ang mga bata sa paghinumdom sa pipila ka mga kasinatian ninyo sa pagkat-on gikan sa Basahon ni Mormon. Ipaambit ang imong mga pagbati mahitungod sa Basahon ni Mormon, lakip na kon giunsa nimo pag-angkon o pagpalig-on sa imong pagpamatuod nga kini tinuod. Dapita ang mga bata sa pagpaambit sa ilang mga pagbati ug mga pagpamatuod.

• Paghisgut mahitungod sa usa ka panahon sa dihang ang Espiritu Santo mihatag kanimo og pagsaksi mahitungod sa usa ka butang. Ihulagway kon unsa ang imong gibati ug kon giunsa nimo pagkasayud nga ang Espiritu Santo kadto. Tabangi ang mga bata sa pagkat-on gikan sa mosunod nga mga kasulatan mahitungod sa unsang paagi ang Espiritu makigsulti kanato: Juan 14:26–27; Doktrina ug mga Pakigsaad 6:15, 23; 8:2–3; 9:7–9; 11:12–14.

Moroni 10:8–19

Ang Langitnong Amahan naghatag kanato og daghang espiritwal nga mga gasa.

Daghan sa atong panahon ang “molimod … sa mga gasa sa Dios” (Moroni 10:8). Tabangi ang mga bata nga makakita nga kini nga mga gasa anaa gihapon karon.

Posible nga mga Kalihokan

• Isulat ang mga gasa nga ginganlan diha sa Moroni 10:9–16 diha sa ginunting nga mga papel, ug isulod kini sa usa ka sudlanan sa gasa nga karton [gift box]. Isulat ang mga numero 9 hangtud sa 16 diha sa pisara, ug dapita ang mga bata nga magpuli-puli sa pagkuha og usa ka papel gikan sa karton ug itukma kini ngadto sa numero sa bersikulo nga anaa diha sa pisara. Unsa ang atong makat-onan mahitungod niini nga mga gasa gikan sa mga bersikulo 8 ug 17–18?

• Ipakigbahin ang sugilanon mahitungod sa pagtungha sa Basahon ni Mormon (tan-awa sa “Kapitulo 3: Ang Anghel Moroni ug ang Bulawan nga mga Palid,” Mga Sugilanon sa Doktrina ug mga Pakigsaad, 13–17). Tabangi ang mga bata sa pag-ila sa mga gasa nga gihisgutan diha sa Moroni 10:9–16 nga gihatag sa Dios ngadto ni Joseph Smith aron iyang mapagawas ang Basahon ni Mormon. Nganong gusto man ang Langitnong Amahan nga motuo kita sa espiritwal nga mga gasa karong panahona?

Moroni 10:32–33

Gusto ni Jesukristo nga ako moduol ngadto Kaniya.

Unsaon nimo pagdapit ang mga bata aron “[mo]duol ngadto kang Kristo, ug [mag]hingpit diha kaniya”?

Posible nga mga Kalihokan

• Isulat diha sa pisara ang usa ka pangutana sama sa Unsa ang kahulugan sa pagduol ngadto kang Kristo? Tabangi ang mga bata sa pagsiksik sa Moroni 10:32–33 aron sa pagpangita og posible nga mga tubag. Pagtinabangay kamo sa paglista sa unsay gusto ni Kristo nga atong buhaton ug kon unsa ang Iyang gisaad nga buhaton alang kanato.

• Ipakigbahin ang imong paborito nga mga tudling o mga istorya gikan sa Basahon ni Mormon nga nakatabang nimo sa pagduol ngadto kang Kristo, ug dapita ang mga bata sa pagbuhat sa ingon. Ribyuha uban sa mga bata ang mga pulong sa Propeta nga si Joseph Smith gikan sa pasiuna ngadto sa Basahon ni Mormon: “Ang tawo labi pa nga maduol sa Dios pinaagi sa pagsunod sa mga lagda sa [ang Basahon ni Mormon], kay sa bisan hain nga basahon.” Ipakigbahin ang imong pagpamatuod mahitungod sa unsang paagi kini nahitabo sa imong kinabuhi.

Awhaga ang Pagkat-on diha sa Panimalay

Dapita ang mga bata sa pag-ampo alang sa mas lig-on nga pagpamatuod sa Basahon ni Mormon ug dayon ipaambit ang ilang pagpamatuod uban sa usa ka sakop sa pamilya o higala.

Pagpalambo sa Atong Pagtudlo

I-awhag ang pagpakigbahin. Kasagaran ang gagmay nga mga bata adunay makahuluganon nga mga panabut mahitungod sa ebanghelyo. Ang pagpaambit sa ilang mga hunahuna makatabang kanila sa pagpakigsulti sa ilang mga higala mahitungod sa ebanghelyo (tan-awa sa Pagtudlo sumala sa Pamaagi sa Manluluwas, 30.)