“Disyembre 14–20. Moroni 10: ‘Duol ngadto kang Kristo, ug Paghingpit diha Kaniya,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Disyembre 14–20. Moroni 10,” Dali, Sunod Kanako—Alang sa mga Indibidwal ug mga Pamilya: 2020
Aron Kamo Masayud, ni Gary L. Kapp
Disyembre 14–20
Moroni 10
“Duol ngadto kang Kristo, ug Paghingpit diha Kaniya”
Kon mahuman ka na sa pagbasa sa Basahon ni Mormon, hunahunaa ang pagtinguha og nabag-o nga pagsaksi gikan sa Espiritu Santo nga kini tinuod. Samtang magbuhat ka, irekord ang mga impresyon nga imong nadawat.
Irekord ang Imong mga Impresyon
Ang Basahon ni Mormon, gisugdan pinaagi sa saad ni Nephi aron ipakita kanato nga “ang malumo nga mga kalooy sa Ginoo anaa ibabaw sa tanan kinsa siya mipili, tungod sa ilang hugot nga pagtuo” (1 Nephi 1:20). Ang basahon gitapos pinaagi sa susama nga mensahe gikan ni Moroni samtang giandam niya ang “[pag]silyo” sa mga rekord: iya kitang gidapit sa “[pag]hinumdom unsa ka maloloy-on ang Ginoo” (Moroni 10:2–3). Bisan og maghunahuna lang kita sa daghang mga kalooy nga narekord diha sa Basahon ni Mormon, maghatag kini og daghang angay hunahunaon. Unsa nga mga pananglitan ang mosulod sa imong hunahuna? Tingali mapamalandungan nimo ang maloloy-ong pamaagi sa pagdala sa Dios sa pamilya ni Lehi latas sa kamingawan ug tabok sa dagkong lawod, sa malumong mga kalooy nga Iyang gipakita kang Enos dihang gigutom ang iyang kalag alang sa kapasayloan, o sa kalooy nga Iyang gipakita kang Alma, nga usa ka pintas nga kaaway sa Simbahan nga nahimong usa sa walay kahadlok nga tigpanalipod niini. O ang imong mga hunahuna mapaling ngadto sa kalooy nga gipakita sa nabanhawng Manluluwas ngadto sa mga tawo dihang giayo Niya ang ilang sakit ug gipanalanginan ang gagmayng mga bata. Tingali ang pinakaimportante, tanan kini magpahinumdom kanimo “kon unsa ka maloloy-on ang Ginoo” diha kanimo, kay ang usa ka pinakatuyo sa Basahon ni Mormon mao ang pagdapit sa matag usa kanato sa pagdawat sa kalooy sa Dios—usa ka pagdapit nga sa yanong paagi gipahayag diha sa mga pulong ni Moroni sa pagpanamilit, “Duol ngadto kang Kristo, ug paghingpit diha kaniya,” (Moroni 10:32).
Mga Ideya alang sa Personal nga Pagtuon sa Kasulatan
Akong masayran ang kamatuoran pinaagi sa gahum sa Espiritu Santo.
Ang saad diha sa Moroni 10:3–7 nakausab sa kinabuhi sa minilyon nga katawhan sa tibuok kalibutan. Sa unsang paagi kini miusab sa imong kinabuhi? Nagtinguha ka man sa pag-angkon o paglig-on sa imong pagpamatuod sa Basahon ni Mormon, ang pagdapit ni Moroni magamit diha nimo. Samtang magbasa ka sa Moroni 10:3–7, ikonsiderar ang pagbasa sa mainampingong paagi kay sa miagi. Pwede nimong masusi ang matag pulong, nga ipangutana sa imong kaugalingon ang sama niini: Unsay ipasabut niini? Unsaon nako nga mahimo kini nga mas maayo? Unsay akong mga kasinatian sa pag-angkon niini? Sa unsang paagi ang Espiritu Santo mipakita sa kamatuoran sa Basahon ni Mormon ngari kanako?
Paghunahuna usab og usa ka tawo nga nagkinahanglang makadungog sa imong pagpamatuod sa Basahon ni Mormon. Unsaon nimo sa pagtabang kanang tawhana sa pagpangita og kaugalingon niyang pagsaksi?
“Kamo dili molimud sa mga gasa sa Dios.”
Dunay daghang paagi nga ang usa ka tawo “makalimud … sa mga gasa sa Dios” (Moroni 10:8). Ang ubang mga tawo molimud nga anaa gihapon kini nga mga gasa. Ang uban tingali molimud nga aduna silay mga gasang espiritwal apan nakita nila kini sa ubang mga tawo. Sa gihapon ang uban molimud sa ilang mga gasa pinaagi sa pagbaliwala niini o sa kapakyas sa pagpalambo niini.
Samtang magtuon ka sa Moroni 10:8–25, pangita og mga kamatuoran nga makatabang nimo sa pagdiskobre sa imong mga gasang espiritwal ug sa paggamit niini uban ang mas dako nga gahum sa pagpanalangin sa imong kaugalingon ug sa uban. Pangita og mga pagtulun-an mahitungod sa mga gasa nga gihatag sa Dios kanimo o sa mga gasa nga gusto Niya nga imong tinguhaon. Nganong importante ang “[pag]hinumdom nga ang matag maayo nga gasa nagagikan ni Kristo”? (Moroni 10:18).
Hunahunaa usab kini nga tambag gikan ni Elder John C. Pingree Jr.: “Unsaon nga atong mahibaloan ang atong mga gasa? Mahimo natong basahon ang atong patriyarkal nga panalangin, mangutana niadtong nakaila kaayo kanato, ug personal nga moila unsay maayo ug makalingaw kanato. Ang pinakaimportante, makapangutana kita sa Dios (tan-awa sa Santiago 1:5; D&P 112:10). Nasayud Siya sa atong mga gasa, kay Siya ang mihatag niini kanato” (“Ako Adunay Buhat alang Kanimo,” Liahona, Nob. 2017, 33).
Tan-awa sa Giya ngadto sa mga Kasulatan,“Gasa sa Espiritu Santo,” scriptures.ChurchofJesusChrist.org.
Mahingpit ako pinaagi sa grasya ni Jesukristo.
Ang pahimangno ni Moroni sa “[pag]duol ngadto kang Kristo” naglakip og labaw pa kay sa pagkat-on mahitungod Kaniya o sa mas kanunay nga paghunahuna Kaniya o gani nga mas maningkamot sa pagtuman sa Iyang mga sugo, sama kaimportante niining mga butanga. Gani, usa kini ka pagdapit sa pagduol ngadto kang Kristo sa pinakahingpit nga posibling himoon—sa pagkahimong sama Kaniya. Samtang magbasa ka sa Moroni 10:30–33, bantayi ang mga pulong nga makatabang kanimo sa pagsabut kon unsay ipasabut sa hingpit nga pagduol kang Kristo, sama sa “paghupot sa matag maayo nga gasa,” “ilimud ang inyong mga kaugalingon sa tanan nga dili diosnon,” ug, siyempre, “paghingpit diha kaniya”.
Sa unsang paagi nga kini posible? Pangitaa ang mga tubag diha sa Moroni 10:30–33. Unsay gisulti sa Espiritu nga angay nimong buhaton aron mas mahingpit ang “[pagpa]duol ngadto kang Kristo, ug [m]aghingpit diha Kaniya?
Tan-awa sa Omni 1:26; Giya ngadto sa mga Kasulatan, “Hingpit,” scriptures.ChurchofJesusChrist.org.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.
Moroni 10
Basaha ninyo og dungan kini nga kapitulo, nga pangitaon ang matag higayon diin migamit si Moroni sa pulong nga moawhag. Ilista o markahi ang unsay giawhag ni Moroni—o gidasig pagmaayo—nga atong buhaton. Unsay atong mahimo aron masunod ang iyang mga pag-awhag?
Moroni 10:3
Atong nakat-unan ang mahitungod sa kalooy sa Ginoo samtang gibasa nato ang Basahon ni Mormon niining tuiga? Sa unsang paagi ang Ginoo nagmanggiloy-on sa atong pamilya?
Moroni 10:3–5
Human mabasa kini nga mga bersikulo, pweding pangutan-on nimo ang mga sakop sa pamilya kon giunsa nila sa pagkahibalo nga ang Basahon ni Mormon tinuod. Ikonsiderar ang pagpanganta mahitungod sa pagpangita sa kamatuoran, sama sa “Pagsiksik, Pamalandong, ug Pag-ampo” (Songbook sa mga Bata, 66). Pwede usab nimong dapiton ang mga sakop sa pamilya sa pagrekord sa ilang mga pagpamatuod diha sa usa ka journal sa pamilya.
Moroni 10:8–18
Ang pasko usa ka natural nga panahon sa paghunahuna mahitungod sa pagkadawat og mga gasa. Tingali ang mga sakop sa pamilya pweding magputos og mga regalo alang sa matag usa nga nagrepresentar sa “mga gasa sa Dios” nga gihisgutan sa Moroni 10:9–16. Kini nga mga gasa pwede usab nga makarepresentar og ubang maayo nga mga gasa nga maggikan kang Kristo nga ilang makita sa usag usa.
Moroni 10:27–29, 34
Ang mga sakop sa pamilya pweding mopaambit unsay gusto nilang isulti kang Moroni sa ila unyang “[pagsugat kaniya] sa atubangan sa malipayon nga hukmanan sa halangdon nga Jehova.”
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Pangitaa si Jesukristo. Ang katuyoan sa Basahon ni Mormon—ug sa tanang kasulatan—mao ang pagpamatuod kang Jesukristo. Unsay imong makat-unan mahitungod ni Jesukristo diha sa Moroni 10? Unsa ang nakadasig kanimo nga buhaton aron makaduol Kaniya?
Si Moroni nga Naglubong sa mga Palid, ni Jon McNaughton