Si Jose, si Maria, ug ang batang si Jesus sa pasungan

Tan-awa ang Kordero sa Dios, ni Walter Rane

Disyembre 21–27

Pasko

“Ug Siya Moanhi sa Kalibutan Aron sa Pagtubos sa Iyang mga Katawhan”

Ang Kapaskohan mao ang usa ka panahon aron makapamalandong ug makapahayag sa pasalamat alang sa pagkatawo sa atong Manluluwas, si Jesukristo. Samtang magbasa ka ug mamalandong niining semanaha mahitungod sa Iyang pagkatawo ug kinabuhi, hunahunaa kon sa unsang paagi ang imong pagtuon sa Basahon ni Mormon niining tuiga nakapalig-on sa imong pagpamatuod nga Siya ang Manluluwas sa kalibutan. Irekord ang mga impresyon nga moabut kanimo.

Irekord ang Imong mga Impresyon

Gikan sa Nephi ngadto sa Moroni, ang matag propeta sa Basahon ni Mormon mipahinungod sa sagradong katuyoan nga gi-summarize diha sa ulohan nga pahina sa basahon: “Sa pagpamatuod ngadto sa [tanang katawhan] nga si Jesus mao ang Kristo.” Usa ka propeta nakakita Kaniya isip usa ka premortal nga espiritu, ug ang lain usab nakakita sa Iyang pagkatawo ug pagpangalagad sa usa ka panan-awon. Ang usa mibarug sa usa ka paril aron isangyaw ang mga timailhan sa Iyang pagkatawo ug sa Iyang kamatayon, ug ang lain miluhod atubangan sa Iyang nabanhaw nga lawas, nga mihikap sa mga samad sa Iyang mga kamot, tiil, ug kilid. Tanan sila nahibalo niining mahinungdanon kaayo nga kamatuoran: “Walay lain nga paagi ni mga pamaagi diin ang tawo maluwas, lamang pinaagi sa matubsanon nga dugo ni Jesukristo, kinsa … moabut aron sa pagtubos sa kalibutan”” (Helaman 5:9).

Mao nga atol niining Kapaskohan, samtang ang mga tumutuo libut sa kalibutan nagsaulog sa kamaayo ug gugma sa Dios sa pagpadala sa Iyang Anak, pamalandungi kon sa unsang paagi ang Basahon ni Mormon milig-on sa imong pagtuo kang Kristo. Samtang maghunahuna ka sa Iyang pagkatawo, pamalundungi nganong mianhi Siya ug kon sa unsang paagi ang Iyang pag-anhi miusab sa imong kinabuhi. Niana imong masinati ang tinuod nga kalipay sa Kapaskohan—ang gasa nga gihatag ni Jesukristo kanimo.

icon sa personal nga pagtuon

Mga Ideya alang sa Personal nga Pagtuon sa Kasulatan

1 Nephi 11:13–36; Mosiah 3:5–10; Helaman 14:1–13; 3 Nephi 1:4–22

Si Jesukristo mianhi sa yuta aron mahimo nakong Manluluwas.

Naandan na ang pagbasa sa sugilanon sa pagkatawo sa Manluluwas diha sa Bag-ong Tugon atol sa Kapaskohan, apan posibling makita usab nimo ang makapahinuklog nga mga propesiya mahitungod niining sagradong hitabo diha sa Basahon ni Mormon. Sama pananglit, ang mga propesiya mahitungod sa pagkatawo sa Manluluwas ug pangalagad makita sa 1 Nephi 11:13–36; Mosiah 3:5–10; Helaman 14:1–13; ug 3 Nephi 1:4–22. Unsa nga mga impresyon mahitungod ni Jesukristo ang miabut kanimo samtang nagbasa ka niini nga mga tudling ug maghunahuna sa posibling mga kahulugan sa mga timailhan sa Iyang pagkatawo? Sa unsang paagi ang mga pagpamatuod niini nga mga propeta sa karaang Amerika mipalig-on sa imong pagpamatuod mahitungod ni Kristo ug sa Iyang misyon?

Tan-awa usab sa Mateo 1:18–25; 2; Lucas 2.

2 Nephi 2:6; Alma 7:7–13; 11:40; Helaman 5:9; 14:16–17

Si Jesukristo ang Manunubos sa tanang katawhan.

Wala kitay rason nga magsaulog sa pagkatawo ni Jesukristo kondili pa tungod sa Iyang maulaon nga sakripisyo, diin Siya miluwas kanato gikan sa sala ug kamatayon, mihupay kanato diha sa mga kasakit, ug mitabang kanato “sa paghingpit diha Kaniya” (Moroni 10:32). Unsay imong makat-unan gikan sa Basahon ni Mormon niining tuiga mahitungod sa gahum sa Manluluwas sa pagtubos kanimo? Duna bay mga sugilanon o mga pagtulun-an nga importante kanimo? Hunahunaa kon unsay gitudlo diha nimo sa mosunod nga mga ehemplo mahitungod sa matubsanong misyon sa Manluluwas: 2 Nephi 2:6; Alma 7:7–13; 11:40; ug sa Helaman 5:9; 14:16–17. Unsa ang imong gibati nga nakapadasig nga buhaton aron ipakita Kaniya ang imong pasalamat? (Ang Christmas.ComeUntoChrist.org dunay pipila ka mga ideya aron ka makasugod.)

1 Nephi 6:4; 19:18; 2 Nephi 25:23, 26; 33:4, 10

Ang Basahon ni Mormon nagpamatuod ni Jesukristo.

“Lain Pa nga Tugon ni Jesukristo” labaw pa kini kay sa usa lang ka ubos nga ulohan [subtitle] alang sa Basahon ni Mormon; usa kini ka pamahayag sa balaan niini nga katuyoan. Pamalandungi kon unsay imong makat-unan gikan sa mosunod nga mga kasulatan mahitungod sa misyon sa Basahon ni Mormon sa pagpamatuod kang Kristo: 1 Nephi 6:4; 19:18; ug 2 Nephi 25:23, 26; 33:4, 10.

Ikonsiderar ang pagrekord diha sa journal kon sa unsang paagi ang pagtuon sa Basahon ni Mormon nakapaduol kanimo ngadto kang Kristo. Ang mosunod nga mga pahinumdom tingali makatabang:

• “Ang bag-ong butang nga akong nakat-unan mahitungod sa Manluluwas niining tuiga mao …”

• “Ang pagbasa og [mga bersikulo mahitungod sa Manluluwas] miusab sa akong pamaagi sa …”

• “Ang paborito nakong tawo [o sugilanon] diha sa Basahon ni Mormom mitudlo kanako nga ang Manluluwas …”

icon sa pagtuon sa pamilya

Mga Ideya alang sa Pamilya nga Pagtuon sa Kasulatan ug Family Home Evening

Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.

1 Nephi 11:13–23; Mosiah 3:5–10; Helaman 14:1–13; 3 Nephi 1:4–22

Ang mga bata posibling malingaw sa pagdrowing og mga litrato sa unsay ilang madungog samtang magbasa ka sa mga sugilanon mahitungod sa pagkatawo ug pangalagad ni Kristo diha sa 1 Nephi 11:13–23; Mosiah 3:5–10; Helaman 14:1–13; ug sa 3 Nephi 1:4–22. Dayon ang imong mga anak pweding mosugilon og balik sa mga istorya gamit ang mga litrato nga ilang gidrowing.

“Siya ang Gasa”

Aron matabangan ang imong pamilya nga makatutok sa gasa nga gihatag sa Langitnong Amahan pinaagi sa pagpadala sa Iyang Anak, pwede kang magputos og litrato ni Jesukristo sama sa usa ka gasa sa Pasko. Ang mga sakop sa pamilya pweding maghisgot mahitungod sa paboritong mga gasa sa Pasko nga ilang nadawat o gipangandoy nilang madawat. Dayon pwede nilang ablihan ang litrato ni Kristo ug hisgutan kon sa unsang paagi Siya nahimong usa ka bililhong gasa kanato. Ang video nga “Siya ang Gasa” (ChurchofJesusChrist.org) makatabang kanimo sa paghisgot kon unsaon nimo sa pagdiskobre, paghangop, ug pagpaambit sa gasa sa Manluluwas isip usa ka pamilya niini nga Kapaskohan.

Ang imong pamilya makabenipisyo usab gikan sa paghunahuna mahitungod sa usa ka “gasa” nga gusto nilang ihatag sa Manluluwas, sama sa pagpaningkamot nga mahimong mas buotan sa uban o pagpaningkamot nga mabuntog ang bati nga kinaiya. Ikonsiderar ang pagdapit og mga sakop sa pamilya sa pagsulat sa ilang mga ideya, puston kini sama sa usa ka gasa, ug ibutang ang ilang mga gasa libut sa litrato sa Manluluwas.

Ang Espiritu sa Pasko

Tingali makalingaw ang pagplano og mga kalihokan nga pweding himoon sa imong pamilya sa mga adlaw padulong sa Pasko aron mobati sa Espiritu ni Kristo, sama sa pagserbisyo og tawo o dungan nga pagpanganta og mga himno sa Pasko. (Alang sa mga ideya, tan-awa sa christmas.ComeUntoChrist.org.)

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha diha sa Dali, Sunod Kanako—Alang sa Primary.

Pagpalambo sa Atong Pagtudlo

I-follow up ang mga pagdapit sa paglihok. “Kon imong i-follow up ang pagdapit sa paglihok, imong gipakita sa [mga sakop sa imong pamilya] nga nagpakabana ka kanila ug sa unsang paagi ang ebanghelyo nagpanalangin sa ilang mga kinabuhi. Imo usab silang gihatagan og mga oportunidad sa pagpaambit sa ilang mga kasinatian, nga naglig-on sa ilang pasalig ug nagtugot kanila sa pagsuporta sa usag usa sa pagsunod sa ebanghelyo” (Pagtudlo sumala sa Pamaagi sa Manluluwas, 35).

usa ka anghel nga nagpakita kang Nephi sa Birhen nga si Maria sa usa ka panan-awon

Ang Panan-awon ni Nephi mahitungod sa Birhen nga si Maria, ni Judith A. Mehr