“Disyembre 7–13. Moroni 7–9: ‘Hinaut Unta nga si Kristo Mobayaw Kanimo,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Disyembre 7–13. Moroni 7–9,” Dali, Sunod Kanako—Alang sa mga Indibidwal ug mga Pamilya: 2020
Minerva Teichert (1888–1976), Moroni: Ang Katapusang Nephite, 1949–1951, lana nga naa sa masonite, 34¾ x 47 ka pulgada. Museo sa Art sa Unibersidad sa Brigham Young, 1969
Disyembre 7–13
Moroni 7–9
“Hinaut Unta nga si Kristo Mobayaw Kanimo”
Samtang magtuon ka sa Moroni 7–9, paminawa ang mga pag-aghat sa Espiritu Santo, ug irekord ang iyang mga mensahe kanimo. Makatudlo siya kanimo kon unsay angay nimong mahibaloan ug angay nimong buhaton.
Irekord ang Imong mga Impresyon
Sa wala pa tapusa ni Moroni ang rekord nga nailhan nato karon nga Basahon ni Mormon pinaagi sa kaugalingon niyang katapusang mga pulong, mipaambit siya og tulo ka mga mensahe gikan sa iyang amahan, si Mormon: usa ka pamulong ngadto “sa malinawon nga mga sakop ni Kristo” (Moroni 7:3) ug sa duha ka mga sulat nga gisulat ni Mormon kang Moroni. Tingali gilakip ni Moroni kini nga mga mensahe sa Basahon ni Mormon tungod kay nakita niya ang mga pagkasusama tali sa mga peligro sa iyang panahon ug sa atoa. Dihang gisulat kining mga pulonga, ang katawhang Nephite sa kinatibuk-an dali nga nahitumpawak sa apostasiya. Daghan kanila “nawad-an sa ilang gugma sa usag usa” ug nahimuot sa “matag butang nga bisan unsa gawas niana nga maayo” (Moroni 9:5, 19). Ug si Mormon sa gihapon nakakita og hinungdan sa paglaum—mitudlo kanato nga ang paglaum wala magpasabut sa pagbaliwala o kawalay alamag mahitungod sa mga suliran sa kalibutan; nagpasabut kini sa pagbaton og pagtuo sa Langitnong Amahan ug ni Jesukristo, kansang gahum mas dako ug mas mahangturon kay sa niana nga mga problema. Nagpasabut kini sa “[pag]hupot sa matag maayo nga butang” (Moroni 7:19). Nagpasabut kini sa pagtugot nga ang Pag-ula ni Jesukristo “ug ang paglaum sa iyang himaya ug kinabuhi nga dayon, moabut sa imong salabutan” (Moroni 9:25). Ug hangtud sa mahimayaong adlaw sa Ikaduhang Pag-anhi ni Kristo, nagpasabut kini sa walay hunong nga “paghago [nga atong] buhaton … [sa] pagbuntog sa kaaway sa tanan nga pagkamatarung” (Moroni 9:6).
Mga Ideya alang sa Personal nga Pagtuon sa Kasulatan
Ang kahayag ni Kristo magtabang kanato sa paghusga tali sa maayo ug sa dautan.
Ang kalibutan karon puno sa makaimpluwensya nga mga mensahe; unsaon nato sa pag-ila kon asa ang sakto ug asa ang sayop? Ang mga pulong ni Mormon diha sa Moroni 7 naghatag kanato og daghang baruganan nga atong magamit aron makalikay sa “[pag]hukom sa sayop nga paagi” (Moroni 7:18). Samtang magtuon ka sa Moroni 7:12–20, pangita og mga kamatuoran nga makatabang nimo aron masayran unsay magdala kanimo paduol sa Dios ug unsay dili. Pwede nimong gamiton kini nga mga kamatuoran sa pagtabang nga imong matimbang-timbang ang mga mensahe nga imong masugatan ug sa mga kasinatian nga anaa kanimo karong semanaha ug sa pagtino kon kini nagdapit ba ug nagdani kanimo sa pagbuhat og maayo (tan-awa sa Moroni 7:13).
Tan-awa usab sa; Giya ngadto sa mga Kasulatan, “Kahayag ni Kristo.”
Pinaagi sa pagtuo kang Kristo, ako “[maka]hupot sa matag maayo nga butang.”
Human matudlo ang mahitungod sa unsaon sa pag-ila tali sa maayo ug sa dautan, dunay gipangutana si Mormon nga daw mahinungdanon karon: “Sa unsang paagi nga posible ang paghupot sa matag maayo nga butang?”—ilabi na kon ang mga tintasyon sa kaaway makadani kaayo (Moroni 7:20). Ang tubag ni Mormon makita hangtud sa katapusan sa kapitulo 7. Samtang magbasa ka sa mga bersikulo 20–48, pangitaa ang mga kamatuoran nga makatabang kanimo sa pag-ila sa “matag maayo nga butang” nga anaa kanimo tungod kang Jesukristo. Sa unsang paagi ang pagbaton og pagtuo Kaniya makatabang sa imong pagpangita sa mga butang nga maayo? Unsaon nimo sa “paghupot” sa daghan pang maayo nga mga butang?
Tan-awa usab sa Mga Artikulo sa Hugot nga Pagtuo 1:13.
“Ang gugma nga putli mao ang tiunay nga gugma ni Kristo.”
Si Presidente Dallin H. Oaks nakabantay nga: “Ang rason nga ang gugmang putli dili gayud mapakyas ug ang rason nganong ang gugmang putli mas labaw pa kay sa labing mahinungdanong mga buhat sa kamaayo … mao nga ang gugmang putli, ‘ang tiunay nga gugma ni Kristo’ (Moro. 7:47), dili usa ka buhat apan usa ka kondisyon o kahimtang. … Ang gugma nga putli usa ka butang nga makab-ot sa usa ka tawo” (The Challenge to Become” Ensign, Nob. 2000, 34). Samtang magbasa ka sa Moroni 7:44–48, hunahunaa ang deskripsyon ni Mormon bahin sa gugmang putli, ug paminawa ang mga impresyon gikan sa Espiritu Santo; makatabang Siya kanimo sa pagpangita og mga paagi nga ikaw molambo. Nganong nagkinahanglan man kita og pagtuo ug paglaum aron makadawat sa gasa sa gugmang putli?
Ang akong kaputli ug hiyas matangtang ba gikan kanako?
Ang deskripsyon ni Mormon mahitungod sa makalilisang nga mga sala sa mga Nephite mipahinumdom sa uban sa sayop nga konklusyon nga ang mga biktima sa pagpanglugos o abuso nakasupak sa balaod sa kaputli. Hinoon, giklaro ni Elder Richard G. Scott nga dili kini mao nga sitwasyon. Mitudlo siya, “Ligdong akong mopamatuod nga kon ang lahi nga buhat sa kabangis, paghiwi sa tarung, o pakighilawas sa kaliwat misakit kanimo sa hilabihan, batok sa imong kabubut-on, dili ka manubag ug dili ka angayang mobati nga sad-an” (“Healing the Tragic Scars of Abuse,” Ensign, Mayo 1992, 32).
Makabaton ako og paglaum kang Kristo bisan pa sa akong mga kahimtang.
Human sa paghulagway sa kadautan nga iyang nakita, gisultihan ni Mormon ang iyang anak sa dili pagbangutan. Unsay naganahan nimo bahin sa mensahe ni Mormon mahitungod sa paglaum? Unsay ipasabut niini diha nimo nga si Kristo “mobayaw [kanimo]”? Unsa nga mga kinaiya ni Kristo ug mga baruganan sa Iyang ebanghelyo ang “moabut sa imong salabutan” ug mohatag kanimo og paglaum? (Moroni 9:25).
Tan-awa usab sa Dieter F. Uchtdorf, “Ang Paglaum sa Kahayag sa Dios,” Liahona, Mayo 2013, 70, 75–77.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.
Moroni 7:5–11
Sumala sa Moroni 7:5–11, nganong importante man ang paghimo sa saktong mga butang alang sa saktong mga hinungdan? Unsaon nato sa pagkahibalo kon nag-ampo ba kita ug nagsunod sa mga sugo sa Dios uban sa “tinuod nga katuyoan”? (bersikulo 6).
Moroni 7:12–19
Sa unsang paagi nga ang tambag ni Mormon makatabang kanato sa paghimo og maayong mga pagpili kon unsaon nato sa paggahin ang atong panahon ug kon si kinsa ang atong ikauban niini? Mahimo kang modapit og mga sakop sa pamilya sa pagpangita diha sa imong balay ug “paghupot” (Moroni 7:19), o paggunit, sa mga butang nga magdapit kanila sa “pagbuhat sa maayo, ug sa paghigugma sa Dios, ug sa pag-alagad kaniya” (Moroni 7:13). Dayega sila sa maayong mga butang nga ilang nakit-an.
Moroni 7:29
Human mabasa kini nga bersikulo, ang mga sakop sa pamilya pweding maghisgot mahitungod sa mga milagro nga ilang nasaksihan o sa ubang mga paagi nga ilang nakita ang kamot sa Dios sa ilang kinabuhi.
Moroni 8:5–26
Unsay wala masabti sa mga Nephite niadtong mibunyag sa gagmayng mga bata mahitungod sa Pag-ula ni Jesukriso? Unsay atong nakat-unan mahitungod sa Pag-ula gikan sa mga pagtulun-an ni Mormon?
Moroni 8:16–17
Unsay ipasabut sa pagkabaton og “hingpit nga gugma”? Unsay ikatabang niini kanato sa pagbuntog sa kahadlok? Unsay ikatabang niini kanato sa pagtudlo sa kamatuoran dala ang kaisug? Unsaon man nato kini sa pagpalambo?
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Paggamit og musika aron madapit ang Espiritu ug pagtudlo sa doktrina. “Ang musika adunay mga gahum nga walay kinutuban sa pagdasig [kanato] padulong sa mas malamboon nga pagka-espirituhanon” (First Presidency Preface,” Hymns, x). Ang usa ka kanta mahitungod sa gugma, sama sa “Maghigugmaay” (Songbook sa mga Bata, nu. 74), makapalambo sa panaghisgot sa pamilya mahitungod sa gugmang putli diha sa Moroni 7:44–48.
Hulagway ni Kristo nga Manluluwas, ni Heinrich Hofmann