Apendiks A

Sa Unsang Paagi ang Espiritu Mosaksi ngari Kanako Nga ang Basahon ni Mormon Tinuod?

Tingali nakadungog ka na mahitungod sa saad ni Mormon ngadto sa tanang mobasa sa Basahon ni Mormon “Kon kamo mangutana sa kinasingkasing, uban sa tinuod nga katuyoan, nga may hugot nga pagtuo kang Kristo, siya mopakita sa kamatuoran sa [Basahon ni Mormon] nganha kaninyo, pinaagi sa gahum sa Espiritu Santo” (Moroni 10:4). Apan unsay ipasabut sa pagkahibalo sa kamatuoran “pinaagi sa gahum sa Espiritu Santo”? Unsaon nimo sa pagkahibalo nga ang Espiritu Santo nakigsulti kanimo?

Kini makatabang sa paghinumdom nga ang Espiritu Santo makigsulti kanato sa mga paagi nga lahi kaayo kay sa naandan natong pagpakigsulti sa usag usa. Apan ang imong Langitnong Amahan gustong motabang kanimo nga makakat-on sa pag-ila sa Espiritu. Mihatag Siya kanimo og Basahon ni Mormon, diin ang daghang matinud-anong mga sulugoon mihulagway sa ilang mga kasinatian uban sa tingog sa Ginoo.

Sama pananglit, gisultihan ni Nephi ang iyang mga igsoong lalaki nga ang Ginoo nakigsulti kanila “sa hinay hinagawhaw nga tingog,” bisan dili kinahanglan nga usa ka tingog nga ilang madungog sa ilang mga dalunggan. Gani, miingon si Nephi nga ang iyang mga igsoon “walay pagbati” ug dili “mobati sa iyang mga pulong” (1 Nephi 17:45). Gihulagway ni Enos ang tubag sa iyang mga pag-ampo isip “tingog sa Ginoo” nga midangat “sa [iyang] hunahuna” (Enos 1:10). Ug hunahunaa kini nga mga pulong nga naghulagway sa tingog nga midangat gikan sa langit dihang ang nabanhaw nga Manluluwas mipakita didto sa yuta sa Bountiful: “Dili pagaw ang mao nga tingog, ni kini usa ka makusog nga tingog; bisan pa niana, … kini midulot sa ilang kalag, ug nakapainit sa ilang mga kasingkasing” (3 Nephi 11:3).

Tingali ikaw adunay mga kasinatian nga susama niini, o tingali ang imong mga kasinatian lahi ra. Ang Espiritu Santo makigsulti sa lahi-lahi nga paagi, ug ang pagpadayag moabut sa matag usa kanato sa lahi nga paagi. Ug kon ang Espiritu maanaa sa atong kinabuhi, atong makita ang Iyang impluwensya diha kanato sa daghang paagi. Si Apostol Pablo namulong mahitungod sa “bunga sa Espiritu”—pagbati sa “gugma, kalipay, kalinaw, pailub, pagkamapuanguron, pagkamaayo, hugot nga pagtuo, kaaghup, pagpugong sa kaugalingon” og daghan pa (Mga Taga-Galacia 5:22–23).

Ania ang ubang mga pagtulun-an ug mga ehemplo gikan sa Basahon ni Mormon mahitungod sa Espiritu Santo. Samtang basahon nimo kini, makita nimo nga ang Espiritu Santo nakigsulti diay kanimo labaw kay sa imong naamgohan, nagpamatuod diha kanimo nga ang Basahon ni Mormon tinuod nga pulong sa Dios.

Pasalamat ug Kalipay

Ang Basahon ni Mormon nagsugod sa usa ka propeta nga ginganlan og Lehi nga nakakita og kahibulongan nga panan-awon. Niini nga panan-awon gihatagan siya og basahon og gidapit sa pagbasa. “Samtang nagbasa siya,” ang rekord nag-ingon, “siya napuno sa Espiritu Santo.” Kini nga kasinatian nagdala kang Lehi sa pagdayeg sa Dios tungod sa Iyang “gahum, ug kaayo, ug kalooy,” ug ang kalag ni Lehi “nagmaya, ug ang iyang tibuok nga kasingkasing napuno” (1 Nephi 1:12, 14–15).

Aduna ka bay susama nga kasinatian? Ang pagbasa ba sa basahon ni Mormon mipuno sa imong kasingkasing sa pasalamat alang sa kaayo sa Dios ug kalooy? May mga tudling ba sa Basahon ni Mormon nga mihimo sa imong kalag nga magmaya? Kini nga mga pagbati mga impluwensya sa Espiritu, nagpamatuod kanimo nga ang mga pulong nga imong gibasa naggikan sa Dios ug nagtudlo sa Iyang kamatuoran.

Usa ka Kasingkasing nga Nausab

Human makasangyaw og usa ka talagsaong sermon mahitungod sa Pag-ula ni Jesukristo (tan-awa sa Mosiah 2–4), si Haring Benjamim nagtinguha nga masayud kon ang iyang katawhan “mituo ba sa mga pulong nga iyang gikapamulong ngadto kanila.” Misanong sila nga sila mituo sa iyang mensahe. Ngano? “Tungod kay ang Espiritu sa Ginoong Makagagahum, nakahimo og dako nga kausaban dinhi kanamo, o dinhi sa among mga kasingkasing, nga kami wala nay hilig sa pagbuhat og dautan, apan sa pagbuhat og maayo sa kanunay” (Mosiah 5:1–2).

Tingali nakamatikod ikaw og susamang butang diha sa imong kasingkasing dihang nabasa nimo ang Basahon ni Mormon. Sama pananglit, tingali mibati ka og kadasig nga mahimong mas maayo nga tawo, sa pagpalayo sa sala, o sa paghimo og maayo alang sa usa ka tawo. Mao kini ang espirituhanong pagsaksi nga imong gipangita kay kana nga basahon dinasig sa Dios. Kay sama sa gitudlo ni Mormon, “Matag butang nga magdapit ug magdani sa pagbuhat sa maayo, ug sa paghigugma sa Dios, ug sa pag-alagad kaniya, dinasig sa Dios” (Moroni 7:13; tan-awa usab sa 2 Nephi 33:4, 10; Alma 19:33; Ether 4:11–12).

Usa ka Nalamdagan nga Hunahuna

Dihang gustong tabangan ni Alma ang mga Zoramite sa “pagsulay sa [iyang] mga pulong” ug mahibalo sa ilang mga kaugalingon kon tinuod ba ang iyang pagpamatuod, iyang gikumpara ang pulong sa Dios ngadto sa usa ka binhi: “Kon kamo mohatag og luna, nga ang usa ka binhi mahimo nga matanom diha sa inyong kasingkasing,” mipasabut siya nga, “kini mosugod sa pagtubo diha sulod sa inyong mga dughan; ug kon kamo makamatikod niining nagtubo nga mga tinguha, kamo magsugod pag-ingon diha sa inyong kaugalingon—Kini kinahanglan nga usa ka maayo nga binhi, o nga ang pulong maayo, kay kini misugod pagpadako sa akong kalag; oo, kini misugod sa pagdan-ag sa akong salabutan, oo, kini misugod sa pagkaanindot ngari kanako” (Alma 32:27–28).

Ikaw “mohatag og luna” sa imong kasingkasing alang sa mga pulong sa Basahon ni Mormon kon tugutan nimo kini nga moimpluwensya sa imong kinabuhi ug mogiya sa imong mga pagpili. Ug sa unsang paagi kini nga mga pulong “[mopadako sa imong] kalag” ug “modan-ag sa [imong] salabutan? Tingali imong namatikdan nga ikaw nahimong nagkalig-on sa espirituhanon. Tingali mobati ka nga mas mahigugmaon ug bukas ngadto sa uban. Posibling mamatikdan usab nimo nga mas masabtan na nimo ang mga butang, ilabi na ang espirituhanong mga butang—ingon nga ang kahayag nagdan-ag sa imong hunahuna. Ug tingali mouyon ka nga ang doktrina nga gitudlo diha sa Basahon ni Mormon “[maanindot].” Ang sama niana nga mga pagbati makatabang nga imong masabtan nga ikaw sa tinuod nakadawat og espirituhanong saksi sa kamatuoran, sama sa gipamahayag ni Alma: “O unya, dili ba kini matuod? Ako moingon nganha kaninyo, Oo, tungod kay kini mao ang kahayag; ug kon unsa ang may kahayag, kini maayo, tungod kay kini masabtan, busa kamo kinahanglan masayud nga kini maayo” (Alma 32:35).

Ikaw Dili Kinahanglang Mahibulong

Pipila lamang kini ka paagi diin makigsulti ang Espiritu. Aduna pay daghan. Ipadayon ang pagpangita og mga oportunidad sa pagpaminaw sa tingog sa Espiritu, ug madawat nimo ang Iyang padayon nga makapamatuod nga saksi sa katinuod sa Basahon ni Mormon.

Misaad si Presidente Russell M. Nelson: “Dili na kamo kinahanglang maghunahuna kon unsa ang kamatuoran. Dili na kamo maghunahuna kinsa ang inyong luwas nga masaligan. Pinaagi sa personal nga pagpadayag, makadawat kamo sa inyong kaugalingon nga pagsaksi nga ang Basahon ni Mormon mao ang pulong sa Dios, nga si Propeta Joseph Smith usa ka propeta, ug nga kini ang Simbahan sa Ginoo. Bisan kon unsa man ang isulti o buhaton sa uban, walay bisan kinsa ang makapawala sa pagsaksi nga midala ngadto sa inyong kasingkasing ug hunahuna kon unsa ang kamatuoran” (“Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 95).