Dali, Sunod Kanako
Mga Panudlo alang sa Panahon sa Pagpanganta

“Mga Panudlo alang sa Panahon sa Pagpanganta ug sa Pasundayag sa mga Bata sa Sakrament Miting,” Dali, Sunod Kanako—Alang sa Primary: Basahon ni Mormon (2020) (2018)

“Mga Panudlo alang sa Panahon sa Pagpanganta,” Dali, Sunod Kanako—Alang sa Primary: 2020

mga bata ug magtutudlo nagkanta

Mga Panudlo alang sa Panahon sa Pagpanganta ug sa Pasundayag sa mga Bata sa Sakrament Miting

Minahal nga mga Kapangulohan sa Primary ug mga Lider sa Musika,

Ang mga kanta sa primary maoy usa ka gamhanan nga himan sa pagtabang sa mga bata nga makat-on mahitungod sa plano sa Langitnong Amahan sa kalipay ug sa sukaranang mga kamatuoran sa ebanghelyo ni Jesukristo. Samtang manganta ang mga bata mahitungod sa mga baruganan sa ebanghelyo, ang Espiritu Santo mopamatuod sa katinuod niini. Ang mga pulong ug musika magpabilin diha sa hunahuna ug kasingkasing sa mga bata sa tibuok nilang kinabuhi.

Pagtinguha sa tabang sa Espiritu samtang mangandam kamo sa pagtudlo sa ebanghelyo pinaagi sa musika. Ipaambit ang inyong pagpamatuod kalabut sa mga kamatuoran nga inyong gikanta. Tabangi ang mga bata nga makakita kon sa unsang paagi ang musika adunay kalabutan sa unsay ilang nakat-unan ug nasinati diha sa panimalay ug sa mga klase sa Primary. Ang mga bata ug ang ilang pamilya mapanalanginan pinaagi sa inyong mapahinunguron nga mga paningkamot.

Gimahal namo kamo ug among ipadangat ang among pasalamat alang sa mapahinunguron nga serbisyo nga inyong gihatag sa paglig-on ug pagpanalipod sa atong bililhong mga bata.

Ang Kinatibuk-ang Kapangulohan sa Primary

Mga Giya alang sa Pasundayag sa Sakrament Miting

Ubos sa direksyon sa bishop, ang pasundayag sa mga bata sa sakrament miting kasagaran nga ipahigayon atol sa katapusang tulo ka bulan [fourth quarter] sa tuig. Isip kapangulohan sa Primary ug lider sa musika, planoha nga makigkita sayo sa tuig sa magtatambag sa bishopric kinsa nagdumala sa Primary aron masugdan sa paghisgut ang mga plano alang sa pasundayag. Kon makompleto na ninyo ang mga plano, pangayoa ang iyang pagtugot alang niini.

Ang pasundayag kinahanglang makahimo sa mga bata sa pagpresentar sa unsay nakat-unan nila ug sa ilang mga pamilya gikan sa Basahon ni Mormon diha sa panimalay ug sa Primary, lakip ang mga kanta sa Primary nga ilang gikanta sa tibuok tuig. Ikonsiderar sa mainampoong paagi kon unsa nga mga baruganan sa ebanghelyo ug mga kanta ang mosuporta sa unsay ilang nakat-unan. Sa tibuok tuig, pagtipig og mga mubo nga sulat sa mga pakigpulong ug personal nga mga kasinatian sa mga bata nga posibleng magamit sa pasundayag. Dapita ang mga bata sa pagpaambit og mga kasulatan, mga istorya, ug sa ilang mga pagpamatuod diha sa pasundayag. Samtang inyong planuhon ang pasundayag, paghunahuna og mga paagi nga makatabang kini sa kongregasyon nga motutok sa Manluluwas ug sa Iyang mga pagtulun-an.

Ang mga yunit nga diyutay ra og mga bata mahimong mokonsiderar og mga paagi diin ang mga sakop sa pamilya moapil uban sa ilang mga bata. Usa ka sakop sa bishopric mahimong motapos sa miting pinaagi sa mubo nga pakigpulong.

Samtang inyong andamon ang pasundayag, hinumdumi ang mosunod nga mga sumbanan:

  • Ang mga pagbansay kinahanglang dili mokuha og wala kaayo kinahanglana nga oras gikan sa mga klase sa Primary o sa mga pamilya.

  • Ang mga biswal, mga costume, ug mga pasundayag sa media dili angay sa sakrament miting.

Tan-awa sa Handbook 2: Administering the Church 11.5.4.

Mga Panudlo alang sa Panahon sa Pagpanganta

5 minutos (kapangulohan sa Primary): Pambukas nga pag-ampo, kasulatan o artikulo sa hugot nga pagtuo, ug usa ka pakigpulong

20 minutos (lider sa musika): Panahon sa pagpanganta

Ang kapangulohan sa Primary ug lider sa musika mopili og mga kanta alang sa matag bulan aron sa pagpalig-on sa mga baruganan nga nakat-unan sa mga bata sa ilang mga klase ug sa panimalay. Usa ka lista sa mga kanta nga naglig-on niini nga mga baruganan gilakip dinhi niini nga giya. Kini nga mga kanta gisugyot usab diha sa mga outline sa Dali, Sunod Kanako—Alang sa Primary.

Samtang motudlo kamo og mga kanta sa mga bata, dapita sila sa pagpaambit sa unsay ila nang nakat-unan mahitungod sa mga istorya ug mga baruganan sa doktrina nga gitudlo sa mga kanta. Mahimo ninyong ribyuhon ang mga outline sa Dali, Sunod Kanako—Alang sa Primary nga gitun-an sa mga bata sa ilang mga klase. Makatabang kini kaninyo nga mahibalo sa mga istorya ug mga baruganan nga ilang nakat-unan aron makonsiderar ninyo unsaon sa pagsuporta sa ilang nakat-unan pinaagi sa musika.

Atol sa panahon sa pagpanganta, mahimo usab ninyong ribyuhon ang mga kanta nga nakat-unan na kaniadto sa mga bata ug mga kanta nga ganahan nilang kantahon. Samtang magribyu kamo, dapita ang mga bata sa pagpaambit sa ilang mga hunahuna ug mga pagbati mahitungod sa mga kamatuoran nga makita diha sa mga kanta.

Ang Songbook sa mga Bata mao ang pinakauna nga kapanguhaan sa musika sa Primary. Ang mga himno gikan sa hymnbook ug mga kanta gikan sa Higala ug Liahona haum usab. Usahay ang mga bata mahimong manganta og nasudnon o pang-holiday nga mga kanta nga haum sa Dominggo ug sa edad sa mga bata. Ang paggamit sa uban pa nga mga musika diha sa Primary kinahanglang aprubahan sa bishopric (tan-awa sa Handbook 2: Administering the Church 11.2.4).

nanganta nga mga bata

Kinatibuk-ang Pagpasabut sa Katuyoan sa Primary

Matag semana, ang Primary maglakip sa:

Panahon sa pagpanganta25 minutos

Pagbalhin5 minutos

Mga Klase20 minutos

Ang mga lider sa dagko nga mga Primary mahimong mobahin sa mga bata ngadto sa duha ka grupo ug ibutang ang usa ka grupo diha sa mga klase sa Primary samtang ang laing grupo ibutang sa panahon sa pagpanganta. Dayon ang duha ka grupo magbaylo og pwesto. Sa ingon nga mga sitwasyon, ang mga lider sa Primary kinahanglan tingaling mousab sa mga oras nga gipakita sa ibabaw aron mapahaum sa ilang mga kahimtang.

Musika alang sa Panahon sa Pagpanganta

Enero

Pebrero

Marso

Abril

Mayo

  • “Magmaisugon ko,” Children’s Songbook, 85

  • “Tabangi Ako, Mahal nga Amahan,” Songbook sa mga Bata, 52

  • Pagpili og kanta nga nagsuporta sa doktrina nga gitudlo karong bulana diha sa Dali, Sunod Kanako—Alang sa mga Indibidwal ug mga Pamilya ug Dali, Sunod Kanako—Alang sa Primary

Hunyo

Hulyo

  • “Gihigugma Ako sa Langitnong Amahan,” Songbook sa mga Bata, 16–17

  • “Hugot nga Pagtuo,” Songbook sa mga Bata, 50–51

  • Pagpili og kanta nga nagsuporta sa doktrina nga gitudlo karong bulana diha sa Dali, Sunod Kanako—Alang sa mga Indibidwal ug mga Pamilya ug Dali, Sunod Kanako—Alang sa Primary

Agosto

Septyembre

Oktubre

Nobyembre

Disyembre

Ang Paggamit og Musika aron sa Pagtudlo sa Doktrina

Ang panahon sa pagpanganta gituyo aron sa pagtabang sa mga bata nga makakat-on sa mga kamatuoran sa ebanghelyo. Ang mosunod nga mga ideya makadasig kaninyo samtang magplano kamo og mga paagi sa pagtudlo sa mga baruganan sa ebanghelyo nga makita diha sa mga himno ug mga kanta sa Primary.

Basaha ang may kalabutan nga mga kasulatan. Alang sa daghan sa mga kanta diha sa Songbook sa mga Bata ug sa hymnbook, ang mga pakisayran sa may kalabutan nga mga kasulatan gilista. Tabangi ang mga bata sa pagbasa sa pipila niini nga mga tudling, ug hisguti kon sa unsang paagi ang mga kasulatan adunay kalabutan sa kanta. Mahimo usab ninyong ilista ang pipila ka mga pakisayran sa kasulatan diha sa pisara ug dapiton ang mga bata sa pagpares sa matag pakisayran ngadto sa usa ka kanta o bersikulo gikan sa kanta.

Sulati ang Blangko. Pagsulat og usa ka bersikulo sa kanta diha sa pisara nga giwala ang pipila ka importante nga mga pulong. Dayon hangyoa ang mga bata sa pag-awit sa kanta, maminaw sa mga pulong nga ihulip sa mga blangko. Samtang ilang sulatan ang matag blangko, hisguti kon unsa nga mga baruganan sa ebanghelyo ang inyong makat-unan gikan sa nawala nga mga pulong.

Mga kinutlo nga mensahe gikan sa mga lider sa Simbahan. Dapita ang mga bata sa pagpaminaw sa usa ka kinutlo gikan sa usa ka lider sa Simbahan nga nagtudlo sa samang baruganan sa ebanghelyo nga gitudlo sa kanta sa Primary. Hangyoa sila sa pag-isa sa ilang kamot kon aduna silay madunggan nga makatabang nila sa pagsabut sa kamatuoran nga ilang gikanta. Hangyoa sila sa pagpaambit sa unsay ilang nadunggan.

lider sa panahon sa pagpanganta

Pagpamatuod. Pagpaambit og mubong pagpamatuod ngadto sa mga bata mahitungod sa mga kamatuoran sa ebanghelyo nga makita diha sa kanta sa Primary. Tabangi ang mga bata nga makasabut nga ang pagkanta maoy usa ka paagi nga makahatag sila og pagpamatuod ug mobati sa Espiritu.

Barugi isip usa ka saksi. Dapita ang mga bata nga magpuli-puli sa pagbarug ug sa pagpaambit sa unsay ilang nakat-unan gikan sa kanta nga ilang giawit o unsay ilang gibati kabahin sa mga kamatuoran nga gitudlo diha sa kanta. Pangutan-a sila kon unsay ilang gibati samtang giawit nila ang kanta, ug tabangi sila sa pag-ila sa impluwensya sa Espiritu Santo.

Gamita ang mga hulagway. Hangyoa ang mga bata sa pagtabang kanimo sa pagpangita o paghimo og mga hulagway nga motakdo sa importanting mga pulong o hugpong sa mga pulong diha sa kanta. Dapita sila sa pagpaambit kon sa unsang paagi ang mga hulagway adunay kalabutan sa kanta ug unsay gitudlo sa kanta. Sama pananglit, kon ikaw nagtudlo sa kanta nga “Gunitanan nga Puthaw” (Mga Himno sa Ang Simbahan ni Jesukristo sa mga Santos sa Ulahing mga Adlaw, nu. 172), mahimong magbutang ka og mga hulagway sa tibook lawak nga magpakita sa kamahinungdanon sa mga pulong gikan sa kanta (sama sa gunitanan nga puthaw, pulong sa Dios, giya, tentasyon, ug langit). Hangyoa ang mga bata sa pagpundok sa mga hulagway ug sa pagpataas niini sa husto nga han-ay samtang dungan ninyo nga awiton ang kanta.

Ipaambit ang usa ka leksyon gamit ang usa ka butang [object lesson]. Mahimo kamong mogamit og usa ka butang aron makaawhag og diskusyon mahitungod sa usa ka kanta. Sama pananglit, ang kanta nga “Hugot nga Pagtuo” (Songbook sa mga Bata, 50–51) naghisgot og gamay nga liso. Mahimo kamong mopakita sa mga bata og usa ka liso ug maghisgut kon sa unsang paagi mipakita kita og hugot nga pagtuo sa dihang mitanom kita og liso; mahimo kining moresulta ngadto sa usa ka diskusyon mahitungod sa mga paagi nga makapakita kita og hugot nga pagtuo diha ni Jesukristo, sama sa gihulagway diha sa kanta.

Dapita ang pagpaambit og personal nga mga kasinatian. Tabangi ang mga bata nga makonektar ang mga baruganan nga gitudlo diha sa kanta ngadto sa mga kasinatian nga ilang nasinati mahitungod niadto nga mga baruganan. Sama pananglit, sa dili pa manganta sa “Gusto Ko nga Makita ang Templo” (Songbook sa mga Bata, 99), mahimo nimong hangyoon ang mga bata sa pag-isa sa ilang mga kamot kon nakakita na ba sila og templo. Dapita sila sa paghunahuna samtang manganta sila mahitungod sa unsay ilang bation kon makakita sila og templo.

Pangutana. Adunay daghang mga pangutana nga mahimo ninyong ipangutana samtang manganta kamo. Sama pananglit, mahimo ninyong pangutan-on ang mga bata kon unsay ilang nakat-unan gikan sa matag bersikulo sa kanta. Mahimo usab ninyo silang hangyoon sa paghunahuna og mga pangutana nga gitubag sa kanta. Moresulta kini ngadto sa usa ka diskusyon mahitungod sa mga kamatuoran nga gitudlo diha sa kanta.

Paminaw alang sa mga tubag. Hangyoa ang mga bata sa pagpaminaw og mga tubag sa mga pangutana nga sama sa “kinsa?” “unsa?” “asa?” “kanus-a?” o “ngano?” Sama pananglit, diha sa kanta nga “Ang Kaisug ni Nephi” (Songbook sa mga Bata, 64–65), mahimo silang maminaw kon si kinsa ang gisugo sa pagkuha sa mga palid ug diin, kanus-a, giunsa, ug ngano nga misunod siya sa Ginoo. Mahimo usab nimong hangyoon ang mga bata sa pagpaminaw alang sa importanting mga pulong o sa pag-ihap sa ilang mga tudlo kon kapila na nila nakanta ang usa ka pulong.

Pagtabang sa mga Bata nga Makat-on ug Mahinumdom sa mga Kanta sa Primary

Ang mga bata makakat-on og kanta pinaagi sa pagpaminaw ug pag-awit niini nga pabalik-balik. Kanunay kantaha ang mga pulong sa bag-ong kanta ngadto sa mga bata—ayaw lamang kini basaha o isulti. Kini nagtabang sa mga bata sa pagsumpay sa huni ngadto sa mga pulong. Human matudlo ang usa ka kanta, ribyuha kini sa lain-laing makalingaw nga mga paagi sa tibuok tuig. Sa ubos mao ang pipila ka mga ideya aron sa pagtabang sa mga bata nga makat-on ug moribyu sa mga kanta.

Paghimo og mga poster. Pagpakita og mga poster nga adunay mga pulong gikan sa matag bersikulo o mga hulagway nga nagrepresentar sa mga pulong. Samtang manganta ang mga bata, tabuni ang pipila sa mga pulong o mga hulagway hangtud nga makakanta na sila sa tibuok bersikulo nga wala ang poster. Mahimo usab ninyong dapiton ang mga bata nga motabang ninyo sa paghimo sa mga poster.

Ipakita ang gitas-on sa tono. Aron matabangan ang mga bata nga makat-on sa melodiya sa kanta, iplastar ang imong kamot sa pinahigda nga posisyon, ug samtang imong kantahon ang mga pulong, ipataas ang imong kamot aron sa pagtimaan og mas taas nga tono ug ipaubos sa pagtimaan og mas ubos nga tono.

Lanog [Echo]. Dapita ang mga bata nga mahimong inyong lanog pinaagi sa pagkanta og balik sa unsay inyong gikanta. Kantaha ngadto sa mga bata ang usa ka mubo nga hugpong sa mga pulong o usa ka linya, ug dayon ipakanta kini kanila og balik nganha kanimo.

Paggamit og lain-laing pamaagi. Awita ang mga kanta sa lain-laing mga paagi, sama sa paghagawhaw, paglaylay, pagpakpak sa kumpas [beat], pag usab-usab sa tempo, o pagkanta samtang maglingkod o magbarug. Mahimo usab kamo nga mobuhat og kubo [cube] gamit ang papel ug, sa matag kilid sa kubo, sulati og lahi nga paagi sa pagkanta. Hangyoa ang usa ka bata sa pagpaligid sa kubo aron sa paghukom kon unsaon pagkanta sa mga bata ang kanta.

Panganta nga maggrupo. Hatagi ang matag klase o indibidwal og hugpong sa mga pulong nga kantahon samtang magbarug, ug dayon magbaylo sila sa hugpong sa mga pulong hangtud ang matag klase o indibidwal makakanta na sa matag hugpong sa mga pulong.

Pag-aksyon gamit ang kamot. Dapita ang mga bata sa paghunahuna og yanong mga aksyon sa kamot nga makatabang kanila sa paghinumdom sa mga pulong ug sa mga mensahe sa kanta. Sama pananglit, kon inyong kantahon ang ikaduhang bersikulo sa “Gihigugma Ako sa Langitnong Amahan” (Songbook sa mga Bata, 16–17), mahimo nimong dapiton ang mga bata sa pagtudlo sa ilang mga mata, moaksyon sama sa alibangbang, ug ibutang ang ilang mga kamot nga pinasalod luyo sa ilang mga dalunggan. Hangyoa sila sa pagtapion sa ilang mga kamot dapit sa ilang kasingkasing samtang mokanta sila sa “Gihigugma ko sa Amahan.”

Ang mga batang babaye manganta, ang mga batang lalaki manganta. Pagdrowing og hulagway sa batang lalaki ug hulagway sa batang babaye, ug ipapilit ang mga hulagway ngadto sa managlahi nga mga tukog. Samtang magribyu sa usa ka kanta, iisa ang usa sa mga hulagway aron mapakita kon kinsa ang kinahanglang moawit niana nga bahin sa kanta.

Paglabay ngadto sa basket. Pagbutang og ginumerohan nga mga basket o ubang mga sudlanan sa atubangan sa kwarto—ang gidaghanon sa mga sudlanan sama ka daghan sa mga bersikulo sa usa ka piho nga kanta. Dapita ang usa sa mga bata sa pag-itsa og beanbag o kinumot nga pirasong papel ngadto o duol sa ginumerohan nga sudlanan. Ipakanta sa mga bata ang bersikulo nga adunay samang numero sa sudlanan.

Ipares ang usa ka hulagway ngadto sa usa ka hugpong sa mga pulong. Isulat ang matag linya sa kanta diha sa lahi nga piraso sa papel, ug pangita og hulagway nga magrepresentar sa matag linya. Ibutang ang mga hulagway sa usa ka kilid sa kwarto ug ang mga papel sa pikas kilid. Kantaha ang kanta, ug hangyoa ang mga bata sa pagpares sa mga hulagway ngadto sa mga pulong.

Pahinumdom: Ang mga pakisayran mahitungod sa mga ward ug mga bishopric magamit gihapon ngadto sa mga branch ug mga kapangulohan sa branch.