Ether Hiding in the Cavity of a Rock, ni Gary Ernest Smith

Nobyembre 23–29

Ether 12–15

“Pinaagi sa Hugot nga Pagtuo ang Tanang mga Butang Matuman”

Samtang magbasa ka sa Ether 12–15, hunahunaa ang mga bata nga imong tudloan. Ang mga ideya sa kalihokan niini nga outline mahimong makahatag kanimo og ubang mga ideya nga makatabang sa pagtubag sa mga panginahanglan sa mga bata sa imong klase.

Irekord ang Imong mga Impresyon

Dapita ang Pagpaambit

Tabangi ang mga bata sa paghunahuna og mga sugilanon sa kasulatan mahitungod sa mga tawo nga nagpakita og dako nga pagtuo. Ang ubang mga ehemplo makita diha sa Ether 12:11–22.

Itudlo ang Doktrina: Mas Gagmay nga mga Bata

Ether 12:6–22

Ang hugot nga pagtuo mao ang pagtuo sa mga butang nga dili nato makita.

Si Moroni mipaambit og pipila ka mga ehemplo sa mga tawo kinsa nakahimo og dagko nga mga butang tungod sa ilang hugot nga pagtuo. Hunahunaa unsaon nimo paggamit niini nga mga ehemplo sa pagtudlo sa mga bata kon unsa ang hugot nga pagtuo.

Posible nga mga Kalihokan

• Basaha ngadto sa mga bata nga ang “Hugot nga pagtuo mao ang mga butang nga gilauman ug dili makita” gikan sa Ether 12:6, ug hangyoa sila sa pagsulti og balik niini nga hugpong sa mga pulong uban kanimo. Sultihi ang mga bata mahitungod sa mga butang nga imong gituohan bisan og wala nimo kini makita, ug tabangi ang mga bata sa paghunahuna og dugang nga mga ehemplo. Ang Kanta nga “Hugot nga Paguto” (Songbook sa mga Bata, 50), o laing kanta mahitungod sa hugot nga pagtuo, makatabang.

• Ipakita ang mga hulagway nga naghulagway sa mga ehemplo sa hugot nga pagtuo diha sa Ether 12:13–15, 20–21 (tan-awa sa Libro sa mga Hulagway sa Ebanghelyo, nu. 78, 85, ug ang pahina sa kalihokan niining semanaha). Ipasulti sa mga bata diha nimo unsa ang ilang nakita sa mga hulagway ug unsa ang ilang nahibaloan maghitungod sa mga istorya. Pakigsulti sa mga bata bahin kon giunsa niini nga mga indibidwal pagpakita og hugot nga pagtuo ug unsa ang nahitabo tungod sa ilang hugot ng pagtuo.

• Pagdula og tag-an tag-an nga dula uban sa mga bata. Hatagi sila og mga timailhan mahitungod sa matinud-anong mga tawo nga gihulagway diha sa Ether 12:13–15, 19–20 hangtud nga ang mga bata makatag-an kinsa kining mga tawhana. Dayon padulaa og usab ang mga bata sa mao gihapon nga dula pinaagi sa pagpuli-puli og hatag og mga timailhan mahitungod sa sama nga mga tawo (o ubang matinud-anon nga mga tawo) samtang ang ubang mga sakop sa klase motag-an. Ipaambit unsa ang imong gidayeg mahitungod sa hugot nga pagtuo niini nga mga tawo.

Ether 12:23–27

Si Jesukristo makatabang kanako nga magmalig-on.

Ang mga bata usahay mag-atubang og mga sitwasyon diin sila mobati og kahuyang, sama sa nahitabo ni Moroni. Tabangi sila sa pagkat-on unsa ang nakat-unan ni Moroni—nga ang Manluluwas “mohimo sa mahuyang nga mga butang nga mahimo nga malig-on ngadto kanila” (Ether 12:27).

Posible nga mga Kalihokan

• Ihulagway sa mga bata ang usa ka buluhaton nga nagkinahanglan og tumang pisikal nga kalig-on aron matuman. Dapita sila sa pagpaambit og mga ehemplo sa mga butang nga wala silay igong kalig-on sa paghimo niini karon. Unsaon nato nga makabaton og igong kalig-on sa pagtuman niini nga mga buluhaton? Ipasabut nga aduna usab kitay espiritwal nga buluhaton, apan usahay mobati kita og espiritwal nga kahuyang. Si Moroni mibati niini mahitungod sa iyang mga sinulat sa mga palid. Basaha ang Ether 12:27 ngadto sa mga bata. Unsa ang gisaad sa Ginoo alang niadtong mibati og kahuyang?

• Ipaambit ang usa ka kasinatian diin ang Manluluwas mitabang kanimo o sa laing tawo nga imong kaila sa pagbuhat og usa ka butang nga malisud. Ipamatuod ngadto sa mga bata nga kon sila magtinguha sa Iyang tabang, si Jesus motabang kanila nga malig-on, bisan og mobati sila og kahuyang.

Itudlo ang Doktrina: Mas Dagko nga mga Bata

Ether 12:5–6

Ang hugot nga pagtuo mao ang pagtuo sa mga butang nga dili nato makita.

Ang mga bata nga imong gitudloan nagtukod sa pundasyon sa ilang mga pagpamatuod. Ang tambag ni Moroni mahitungod sa hugot nga pagtuo, makita diha sa Ether 12:6, makatabang kanila.

Posible nga mga Kalihokan

• Ipasabut nga si propeta Ether misulay sa pagtudlo sa mga Jaredite sa “mahinungdanon ug kahibulogan nga mga butang,” apan sila wala motuo sa iyang gisulti. Dapita ang mga bata sa pagbasa sa Ether 12:5 aron mahibaloan nganong wala sila motuo. Unsa ang pipila ka mga butang nga gusto sa Langitnong Amahan nga atong tuohan bisan kon wala kita makakita niini? Dungan nga magbasa sa Ether 12:6. Unsa ang gitudlo ni Moroni sa mga tawo kinsa wala motuo sa espiritwal nga mga kamatuoran tungod kay wala sila makakita niini?

• Ipakita sa usa sa mga bata ang usa ka litrato samtang dili kini ipakita sa ubang mga bata, ug hangyoa ang bata sa paghulagway sa litrato ngadto sa tanang sakop sa klase. Kon aduna pay igong panahon, papuli-puliha ang mga bata sa pagbuhat niini gamit ang lain-laing mga litrato. Dayon dapita sila sa pagbasa sa Ether 12:6 ug mangita niini nga hugpong sa mga pulong: “Ang hugot nga pagtuo mao ang mga butang nga gilauman ug dili makita.” Unsaon nato pagpakita og hugot nga pagtuo ni Jesukristo kon dili kita makakita Kaniya?

• Hangyoa ang mga bata sa pagbasa niining hugpong sa mga pulong diha sa Ether 12:6: “Kamo dili makadawat og saksi hangtud human sa pagsulay sa inyong hugot nga pagtuo.” Tabangi ang mga bata sa pagsabut nga kon kita mosunod og usa ka sugo, kita makahibalo nga kini tinuod. Hangyoa sila sa paghunahuna og mga baruganan sa ebanghelyo nga gusto sa Dios nga kita makaangkon og pagpamatuod, sama sa pagbayad sa ikapulo, pagbalaan sa adlaw nga Igpapahulay, o pagsunod sa Pulong sa Kaalam. Dayon isulat diha sa pisara ang Aron makaangkon og pagpamatuod sa , ako kinahanglan nga . Ipaambit kon giunsa nimo paggamit ang hugot nga pagtuo aron makaangkon sa imong pagpamatuod niini ug sa uban nga mga kamatuoran sa ebanghelyo.

Ether 12:4, 32

Ang paglaum nahisama sa ankla sa akong kalag.

Tabangi ang mga bata nga imong gitudloan nga makasabut nga kita “molaum alang sa maayo nga kalibutan” tungod sa atong hugot nga pagtuo kang Kristo (Ether 12:4).

Posible nga mga Kalihokan

• Ipaambit sa mga bata ang kahulugan sa paglaum nga makita diha sa “Paglaum” (Giya ngadto sa mga Kasulatan, scriptures.ChurchofJesusChrist.org). Sumala niini nga kahulugan ug sa Ether 12:4, 32, unsa ang kinahanglan natong lauman? (tan-awa usab sa Moroni 7:40–42). Tabangi ang mga bata sa paghunahuna og ubang mga pulong alang sa paglaum, uban sa mga pulong nga sukwahi ang kahulugan sa paglaum. Ipaambit kanila ang pipila ka mga kamatuoran sa ebanghelyo nga naghatag kanimo og paglaum, ug dapita sila sa pagbuhat sa ingon.

• Ipakita (o drowinga diha sa pisara) ang hulagway sa usa ka barko ug usa ka angkla. Nganong ang mga barko nagkinahanglan man og mga ankla? Unsa ang mahitabo sa usa ka barko nga walay ankla? Dungan nga magbasa sa Ether 12:4, ug pangutan-a ang mga bata kon sa unsang paagi ang paglaum nahisama sa usa ka ankla. Dapita ang mga bata sa pagdrowing sa ilang kaugalingon nga mga hulagway sa usa ka barko ug angkla aron makatudlo sila sa ilang mga pamilya mahitungod sa paglaum.

Ether 12:23–29

Si Jesukristo makatabang kanako nga magmalig-on.

Samtang magkadako ang mga bata, mas makamatikud sila sa ilang mga kahuyang. Gamita kini nga mga bersikulo sa pagtudlo kanila unsaon sa Manluluwas sa paghimo sa mga “mahuyang nga mga butang nga mahimo nga malig-on” (Ether 12:27).

Posible nga mga Kalihokan

• Dapita ang mga bata sa pagbasa sa Ether 12:23–25 aron mahibaloan kon ngano nga nabalaka si Moroni. Pangutan-a sila kon nakasulay ba sila sa susama nga mga pagbati. Dayon dapita sila sa pagbasa sa mga bersikulo 26–27 aron mahibaloan kon giunsa sa Ginoo pag-awhag ni Moroni. Unsa ang kinahanglan natong buhaton aron ang Ginoo makatabang kanato nga magmalig-on kon mobati kita og kahuyang? Pagpaambit og usa ka kasinatian diin ang Manluluwas mitabang kanimo nga igong malig-on sa pagbuhat og usa ka butang nga malisud.

• Dapita ang mga bata sa pagdrowing og hulagway sa usa ka butang nga mahuyang ug usa ka butang nga lig-on. Dayon dapita sila sa pagdugang ngadto sa ilang drowing og pipila ka mga pulong ug hugpong sa mga pulong gikan sa Ether 12:23–29 nga motudlo kanila mahitungod sa unsang paagi ang Manluluwas makatabang kanato sa paghimo sa atong kahuyang nga kalig-on. Awhaga ang mga bata sa paghunahuna mahitungod sa usa ka kahuyang nga tingali anaa kanila ug dayon magtinguha sa tabang sa Manluluwas aron mamahimong lig-on.

Awhaga ang Pagkat-on diha sa Panimalay

Dapita ang mga bata sa pagsulat og usa ka kamatuoran nga gusto nila nga makaangkon og pagpamatuod bahin niini. Tabangi sila nga maghimo og usa ka tumong sa pagpakita og hugot nga pagtuo aron sila makaangkon og usa ka saksi niana nga kamatuoran.

Pagpalambo sa Atong Pagtudlo

Tinguhaa ang pagsabut sa mga bata nga imong gitudloan. “Pangita og mga paagi nga makasabut sa mga background, mga interes, mga talento, ug mga panginahanglan sa mga [bata] nga imong gitudloan. Pangutana, paminaw og maayo, ug obserbahi unsay isulti ug buhaton sa mga nagkat-on sa lain-laing mga sitwasyon. … Pangayo og mga sugyot gikan sa ilang mga ginikanan. Labaw sa tanan, pag-ampo alang sa panabut nga ang Espiritu lamang ang makahatag” (Pagtudlo sumala sa Pamaagi sa Manluluwas, 7).