Moroni Writing on Gold Plates, ni Dale Kilborn

Nobyembre 2–8

Mormon 7–9

“Ako Namulong nganha Kaninyo Ingon og Kamo Ania”

Samtang basahon nimo ang Mormon 7–9, hunahunaa unsa ang pinakaganahan nimo nga mahibaloan sa mga bata nga imong gitudloan. Paghimo og mga plano sa pagtudlo sa mga kamatuoran nga imong gibati nga mopanalangin sa ilang mga kinabuhi.

Irekord ang Imong mga Impresyon

Dapita ang Pagpaambit

Ipasa sa klase ang usa ka kopya sa Basahon ni Mormon. Dapita ang mga bata, kon turno na nila sa paggunit sa basahon, sa pagpaambit og usa ka butang nga ilang nakat-unan gikan niini. Kon nagkinahanglan sila og panabang, pahinumdumi sila sa mga butang nga bag-o pa lang nila nga nakat-unan sa klase.

Itudlo ang Doktrina: Mas Gagmay nga mga Bata

Mormon 7:8–10

Ang Basahon ni Mormon ug ang Biblia parehong nagpamatuod kang Jesukristo.

Si Mormon nagtudlo nga ang Basahon ni Mormon gisulat aron makatabang kanato nga motuo sa Biblia ug nga kadtong kinsa nagtuo sa Biblia motuo sa Basahon ni Mormon.

Posible nga mga Kalihokan

• Ipakita sa mga bata ang ulohan nga pahina sa Basahon ni Mormon, ug ipunting ang imong tudlo ngadto sa mga pulong sa ulohan samtang basahon nimo kini, klarohon pag-ayo ang pagbasa sa pulong nga lain. Tabangi ang mga bata sa paghunahuna og uban nga mga basahon sa kasulatan nga nagtudlo kanato mahitungod ni Jesus. Ipakita kanila nga ang Biblia adunay Daang Tugon ug Bag-ong Tugon. Tabangi ang mga bata sa pagsulti og “Daang Tugon, Bag-ong Tugon” kon ipunting nimo ang imong tudlo ngadto sa Biblia ug “Lain nga Tugon” kon ipunting nimo ang imong tudlo ngadto sa Basahon ni Mormon.

• Ipakita ang usa ka mapa sa kalibutan o ang pahina sa kalihokan alang niini nga outline, apil ang Biblia ug Basahon ni Mormon. Gamita kini nga mga item sa pagtudlo sa mga bata nga ang Biblia usa ka rekord sa mga pagtulun-an ni Jesus diha ug sa palibot nga mga dapit sa Jerusalem ug ang Basahon ni Mormon usa ka rekord sa Iyang mga pagtulun-an sa Amerika.

• Pagpili og pipila ka mga hitabo ug mga kamatuoran nga parehong gipamatud-an sa Biblia ug sa Basahon ni Mormon, sama sa pagkatawo ni Jesus, pagkamatay, ug Pagkabanhaw. Pakit-a sila og mga hulagway gikan sa Libro sa mga Hulagway sa Ebanghelyo nga naghulagway niini nga mga hitabo ug mga kamatuoran. Hangyoa ang mga bata sa paghulagway kon unsa ang ilang nakita sa mga hulagway, ug sultihi sila nga ang Biblia ug ang Basahon ni Mormon parehong nagtudlo mahitungod niining mga butanga.

Mormon 8:3

Makapili ko sa matarung bisan mobati nga nag-inusara ako.

Si Moroni mao ang katapusan nga matarung nga Nephite, apan siya nagpabiling matinud-anon sa iyang pagpamatuod. Tabangi ang mga bata nga makat-on gikan sa iyang ehemplo.

Posible nga mga Kalihokan

• Basaha ang Mormon 8:3, ipasabut pag-ayo nga si Moroni nag-inusara na lang, apan nagsunod gihapon siya sa mga sugo, lakip na sa sugo sa paghuman sa Basahon ni Mormon. Paghisgut sa panahon nga ikaw nagmatinud-anon bisan kon gibati nimo nga ikaw nag-inusara.

• Human maghisgut sa ehemplo ni Moroni, pagpaambit og ubang mga sitwasyon diin ang usa ka bata kinahanglan nga modesisyon kon pilion ba niya o dili ang matarung, bisan kon walay nagtan-aw. Unsa kaha ang buhaton ni Moroni kon siya pa ang anaa niini nga sitwasyon?

• Dungani og kanta ang mga bata sa usa ka kanta mahitungod sa pagpili sa matraung “Barugan ang Kamatuoran” (Songbook sa mga Bata, 81). Nganong importante man ang pagpili sa matarung sa tanang panahon, bisan kon ikaw nag-inusara?

Mormon 9:7–21

Ang Dios mao ang “usa ka Dios sa mga milagro.”

Tabangi ang mga bata aron makasabut nga ang mga milagro mahinungdanon sa buhat sa Dios ug nga ang Dios mobuhat og mga milagro kon ang Iyang mga katawhan adunay hugot nga pagtuo.

Posible nga mga Kalihokan

• Ipasabut nga ang milagro usa ka butang nga buhaton sa Dios aron sa pagpakita sa Iyang gahum ug sa pagpanalangin sa atong mga kinabuhi (tan-awa sa Ang Giya ngadto sa mga Kasulatan, “Milagro”). Basaha ang mga pulong ug mga hugpong sa mga pulong gikan sa Mormon 9:11–13, 17 nga naghulagway sa pipila ka mga milagro sa Dios. Tabangi ang mga bata sa paghunahuna og uban pa nga mga milagro nga makita diha sa mga kasulatan (ang mga hulagway gikan sa Libro sa mga Hulagway sa Ebanghelyo, sama sa nu. 26, 40, 41, ug 83, makatabang). Ipamatuod nga ang Dios mihimo og mga milagro sa karaang mga panahon ug Siya naghimo gihapon og mga milagro karon.

• Ipakigbahin ang usa ka kasinatian dihang nakakita ka og mga milagro sa atong Simbahan karon o sa imong kaugalingong kinabuhi. Ihatag ang imong pagpamatuod nga ang Dios “usa ka Dios sa mga milagro” (Mormon 9:11).

Itudlo ang Doktrina: Mas Dagko nga mga Bata

Mormon 7:8–10

Ang Basahon ni Mormon ug ang Biblia parehong nagpamatuod kang Jesukristo.

Si Mormon nagtudlo nga ang “ebanghelyo ni Kristo … ipahibalo [kanato]” diha sa Biblia ug sa Basahon ni Mormon. Hunahunaa unsaon nimo pagtudlo sa mga bata nga kining duha ka mga sagrado nga mga basahon mahinungdanon kanato.

Posible nga mga Kalihokan

• Isulat ang Mormon 7:9 diha sa pisara, apan pulihi og mga blanko ang mga pulong kini ug kana. Isulat usab diha sa pisara nga kini = ang Basahon ni Mormon ug kana = ang Biblia. Dapita ang mga bata sa pagbasa og kusog sa Mormon 7:9 ug gamiton ang mga hugpong sa mga pulong diha sa pisara aron ibutang diha sa mga blangko. Unsa ang atong nakat-unan maghitungod sa Biblia ug sa Basahon ni Mormon gikan niini nga bersikulo?

• Pagbutang sa atubangan og usa ka Basahon ni Mormon ug usa ka Biblia. Ipaambit ang pipila ka mga istorya gikan sa matag basahon, magpakita og mga hulagway kon anaa (tan-awa sa Libro sa mga Hulagway sa Ebanghelyo). Dapita ang mga bata sa pagtudlo ngadto sa basahon diin nagagikan ang istorya. Nganong gikinahanglan man nato kining duha ka basahon?

• Isulat ang matag pulong sa ikawalo nga artikulo sa hugot nga pagtuo sa laing mga piraso sa papel. Hatagi og usa o duha ka mga pulong ang matag bata, ug dapita ang mga bata nga magtinabangay sa pagpahimutang sa mga pulong sa eksakto nga pagkahan-ay. Dayon hangyoa sila sa pagbalik-balik og sulti sa artikulo sa hugot nga pagtuo sa makadaghan. Unsa may gitudlo niini kanato?

  

  Ang Basahon ni Mormon nagpamatuod ni Jesukristo.

Mormon 8:1–7

Makapili ko sa matarung bisan mobati nga nag-inusara ako.

Ang determinasyon ni Moroni sa “[pag]tuman sa sugo sa [iyang] amahan,” bisan kon ang iyang amahan namatay na, makadasig sa mga bata sa pagsunod sa mga sugo sa Dios.

Posible nga mga Kalihokan

• Basaha ang Mormon 8:1–7 dungan sa mga bata, ug dapita sila sa pagpaambit kon unsa kaha ang ilang bation kon sila pa si Moroni. Hangyoa sila nga tan-awon pag-usab ang mga bersikulo 1, 3, ug 4 aron mahibaloan kon unsa ang gisugo ngadto kang Moroni. Giunsa ni Moroni “[pag]tuman sa sugo sa [iyang] amahan”? Sa unsang paagi kita mahimong mas mahisama kang Moroni?

• Dapita ang matag bata sa pagsulat og sitwasyon diin sila kinahanglan nga mohimo og usa ka pagpili tali sa eksakto o sayop bisan walay nagtan-aw. Ibutang ang ilang mga ideya sa usa ka sudlanan, ug papuli-puliha ang mga bata sa pagpili og usa ka sitwasyon ug pagpaambit kon unsa ang ilang buhaton aron mahisama kang Moroni.

Mormon 8:24–26; 9:7–26

Ang Dios mao ang “usa ka Dios sa mga milagro.”

Daghan ang mga tawo karon kinsa wala motuo nga ang mga milagro nanghitabo pa gihapon. Gamita ang mga pagtulun-an ni Moroni dinhi niini nga mga bersikulo sa pagtudlo sa mga bata nga kon kita adunay hugot nga pagtuo, makita nato ang Dios nga mohimo og mga milagro sa atong mga kinabuhi.

Posible nga mga Kalihokan

• Ipakita sa mga bata ang usa ka resipe. Unsay mahitabo kon dili nimo malista ang usa ka mahinungdanon kaayo nga sangkap? Dapita ang mga bata sa pagsiksik sa Mormon 8:24 ug 9:20–21 aron sa pagpangita sa mahinungdanon nga “sangkap” nga kinahanglan anaa kanato sa dili pa makahimo ang Dios og mga milagro. Ipakigbahin ang mga ehemplo sa mga milagro—dagko ug gagmay—nga imong nakita sa Simbahan o sa imong kinabuhi. Dapita ang mga bata sa pagpaambit sa ilang kaugalingon nga mga ehemplo.

• Bahina ang mga bata ngadto sa duha ka team. Dapita ang matag team sa pagpangita og mga ehemplo sa mga milagro diha sa pipila o sa tanan niini nga mga kasulatan: Mormon 8:24; 9:11–13, 16–18, 21–25. Unsay atong ikasulti ngadto sa usa ka tawo kinsa nagtuo nga ang mga milagro dili na mahitabo? (tan-awa sa Mormon 9:9, 15–21).

Awhaga ang Pagkat-on diha sa Panimalay

Dapita ang mga bata sa paghangyo og usa ka sakop sa pamilya sa paghulagway og usa ka milagro nga nakapalig-on sa iyang pagpamatuod.

Pagpalambo sa Atong Pagtudlo

Ang mga bata makaila sa impluwensya sa Espiritu. Tudloi ang mga bata nga ang mga pagbati sa kalinaw, gugma, ug kainit nga anaa kanila kon maghisgot o manganta sila mahitungod ni Jesukristo ug sa Iyang ebanghelyo nagagikan sa Espiritu Santo (tan-awa sa Pagtudlo sumala sa Pamaagi sa Manluluwas, 11).