“Nobyembre 9–15. Ether 1-5: ‘Mogisi Niana nga Tabil sa Pagkawalay Pagtuo’” Dali, Sunod Kanako—Alang sa Primary: Basahon ni Mormon 2020 (2020)
“Nobyembre 9–15. Ether 1–5,” Dali, Sunod Kanako—Alang sa Primary: 2020
The Jaredites Leaving Babel, ni Albin Veselka
Nobyembre 9–15
Ether 1–5
“Mogisi Niana nga Tabil sa Pagkawalay Pagtuo”
Samtang imong girebyu ang imong nakat-unan panahon sa imong pagtuon sa Ether 1–5, unsa nga mga kamatuoran ang gibati nimo nga kinahanglan tabangan ang mga bata nga makadiskobre? Tingali adunay mga ideya niini nga outline nga makatabang.
Irekord ang Imong mga Impresyon
Dapita ang Pagpaambit
Pagpakita og usa ka hulagway sa lalaki nga igsoon ni Jared (tan-awa sa outline niining semanaha diha sa Dali, Sunod Kanako—Alang sa mga Indibidwal ug mga Pamilya). Dapita ang mga bata sa pagpaambit sa unsay ilang nahibaloan mahitungod kaniya.
Itudlo ang Doktrina: Mas Gagmay nga mga Bata
Ang Langitnong Amahan maminaw ug motubag sa akong mga pag-ampo.
Ang istorya sa lalaki nga igsoon ni Jared nagpakita sa pipila ka mga paagi diin ang Dios makatabang kanato kon mag-ampo kita.
Posible nga mga Kalihokan
-
Pagdapit og pipila ka mga miyembro sa ward kinsa nakahibalo og lain nga pinulongan sa pagsulti og pipila ka han-ay sa mga pulong niana nga pinulongan alang sa imong klase (o pagpatukar og rekording sa laing pinulongan). Hangyoa ang mga bata sa pagpakaaron-ingnon nga nagsulti sila og laing pinulongan, ug ipaklaro kon unsa kalisud ang pagsinabtanay kon dili parehas ang atong pinulongan. Gamita kini sa paghatag og pasiuna sa asoy sa Tore sa Babel diha sa Genesis 11:1–9 ug Ether 1:33. Basaha ang Ether 3:13 ug 15, ug ipasabut kon giunsa sa lalaki nga igsoon ni Jared pag-ampo aron siya ug ang iyang mga higala ug pamilya magkasinabut (tan-awa sa Ether 1:34–37). Basaha ug tabangi ang mga bata nga makasabut sa tubag sa Ginoo sa iyang pag-ampo diha sa Ether 1:35. Mahimo usab nimong gamiton ang “Kapitulo 50: Ang mga Jaredite Mibiya sa Babel” (Mga Sugilanon sa Ang Basahon ni Mormon, 143–44, o ang katugbang nga video diha sa ChurchofJesusChrist.org).
-
Dapita ang mga bata sa pagpakaaron-ingnon nga nagpanday sila og usa ka kasko, sama sa gihulagway diha sa Ether 2:16–17. Ipasabut ang mga problema nga nakita sa mga Jaredite mahitungod sa ilang mga kasko (tan-awa sa Ether 2:19), ug pangutan-a ang mga bata kon unsa ang ilang buhaton mahitungod niini nga mga problema. Basaha ang Ether 2:18–19 aron sa pagtudlo sa mga bata kon giunsa sa lalaki nga igsoon ni Jared pagsulti sa iyang mga problema ngadto sa Ginoo pinaagi sa pag-ampo. Ipamatuod nga makaampo kita kanunay kon aduna kitay mga pangutana o mga problema.
-
I-summarize sa daklit ang Ether 2:19–3:6 aron sa pagpasabut kon giunsa sa Ginoo pagtubag ang mga pangutana sa lalaki nga igsoon ni Jared mahitungod sa mga kasko. Pagbutang og 16 ka bato libot sa lawak klasehanan, ug dapita ang mga bata sa pag-ihap niini samtang ila kining mapalgan. Ipakita ang hulagway diha sa outline niining semanaha sa Dali, Sunod Kanako—Alang sa mga Indibidwal ug mga Pamilya ug ipasulti pag-usab sa mga bata ang istorya (tan-awa usab sa pahina sa kalihokan niining semanaha).
Ako gilalang sama sa hitsura sa Dios.
Sa dihang ang lalaki nga igsoon ni Jared nakakita sa Ginoo, nakat-unan niya nga “ang tanan nga mga tawo gilalang sa sinugdanan subay sa [Iyang] kaugalingon nga hitsura” (Ether 3:15).
Posible nga mga Kalihokan
-
Ipakita ang usa ka hulagway sa Manluluwas, ug dapita ang mga bata sa pagtudlo ngadto sa lain-laing parti sa Iyang lawas. Ipasabut nga sa dihang ang lalaki nga igsoon ni Jared nakakita ni Jesukristo, nahibaloan niya nga kitang tanan susama og hitsura ni Jesus. Samtang imong ipuntarya ang imong tudlo ngadto sa usa ka parti sa lawas diha sa litrato, dapita sila sa pagpuntarya sa ilang tudlo ngadto sa sama nga parti sa ilang kaugalingong mga lawas. Ipamatuod nga kita gilalang nga susama og hitsura sa atong Langitnong Amahan sa ug ni Jesukristo.
-
Dungan nga manganta og usa ka kanta kabahin sa atong mga lawas, sama sa “Ulo, Abaga, Tuhod ug Tiil” (Songbook sa mga Bata, 129). Tabangi ang mga bata sa paghisgut ngano nga mapasalamaton sila sa lain-laing mga parti sa ilang mga lawas.
Kita gilalang sa hitsura sa Dios.
Itudlo ang Doktrina: Mas Dagko nga mga Bata
Makadawat ko og pagpadayag aron makatabang kanako.
Unsaon nimo pagtabang sa mga bata nga makat-on mahitungod sa pagpadayag gikan sa ehemplo sa lalaki nga igsoon ni Jared? Unsa nga mga kasinatian ang mapaambit nimo sa dihang ang Ginoo mitabang nimo sa pagpangita og mga solusyon sa imong mga problema o mga pangutana?
Posible nga mga Kalihokan
-
Sa dili pa ang klase, isulat ang hugpong sa mga pulong, “Barug, tuyok, ug lingkud” sa lain-laing mga pinulongan sa pipila ka mga ginunting nga papel (mahimo kang mogamit og online nga tighubad o tabang sa usa ka tawo nga kamaong mosulti og laing pinulongan). Hatagi og usa ka ginunting nga papel ang matag bata, ug dapita sila sa pagpaningkamot sa pagsunod sa mga instruksyon. Gamita kini aron makatabang sa pagpasabut kon unsa ang nakadasig sa pag-ampo sa lalaki nga igsoon ni Jared diha sa Ether 1:33–37. Dungan nga magbasa niini nga mga bersikulo, ug hangyoa ang mga bata sa paghatag og pagtagad kon unsa ang gibati sa Ginoo ngadto ni Jared ug sa iyang mga higala ug pamilya. Unsa man ang atong makat-unan gikan niini nga asoy mahitungod sa pag-ampo?
-
Tahasi ang matag bata sa pagbasa sa usa sa mosunod nga mga tudling, ug tabangi sila sa pagpangita og usa ka pangutana o problema nga gisagubang sa lalaki nga igsoon ni Jared: Ether 1:33–35; Ether 1:36–37; ug Ether 2:18–20. Unsa ang gibuhat sa lalaki nga igsoon ni Jared mahitungod niini nga mga problema o mga pangutana? Giunsa pagtabang sa Ginoo kaniya sa matag usa niini nga panghitabo? Dapita ang mga bata sa paghunahuna og mga problema diin nanginahanglan sila og tabang. Unsaon nila pagsunod sa ehemplo sa igsoon nga lalaki ni Jared aron makakita og mga solusyon sa ilang mga problema? Ipaambit ang usa ka kasinatian diin ikaw nag-ampo alang sa panabang ug ang Ginoo mitabang kanimo.
Ako gilalang sama sa hitsura sa Dios.
Ang mga bata nga imong gitudloan makasugat og daghang sayop nga mga mensahe mahitungod sa Dios, sa ilang mga kaugalingon, ug sa ilang pisikal nga mga lawas. Kini nga mga bersikulo mao ang kahigayunan sa pagtudlo og mahangturong mga kamatuoran mahitungod niini nga mga hilisgutan.
Posible nga mga Kalihokan
-
Basaha dungan sa mga bata ang Ether 3:6–16, tabangi sila sa paghimo og lista sa mga butang nga nakat-unan sa igsoon ni Jared mahitungod sa Ginoo gikan niini nga kasinatian. Nganong mahinungdanon man nga mahibalo niining mga butanga? Sama panglit, sa unsang paagi makaapekto ang atong pagtan-aw sa atong mga lawas nga masayud nga kita gilalang sa hitsura sa Ginoo?
-
Isulat ang pisikal nga lawas ug espiritual nga lawas diha sa pisara. Hangyoa ang mga bata sa pagpaambit sa ilang mga kahibalo mahitungod sa mga kinaiyahan sa usa ka pisikal nga lawas (aduna kitay panit, dugo, ug uban pa), ug isulat ang ilang mga tubag diha sa pisara. Basaha ang Ether 3:4–17 og dungan, ug dapita ang mga bata sa pagpangita kon unsa ang ilang nakat-unan mahitungod sa atong espiritwal nga mga lawas. Ipamatuod nga ang atong mga lawas ug mga espiritu “gilalang subay sa [kang Jesus] nga kaugalingon nga hitsura” (Ether 3:15).
Tulo ka mga saksi nagpamatuod sa Basahon ni Mormon.
Si Moroni nanagna nga ang Tulo ka mga Saksi motabang sa pag-istablisar sa kamatuoran sa Basahon ni Mormon. Mahimo nimong gamiton kini nga panagna aron sa pagpalig-on sa mga pagpamatuod sa mga bata ug sa pagdasig kanila nga mahimong mga saksi sa Basahon ni Mormon sa ilang kaugalingong pamaagi.
Posible nga mga Kalihokan
-
Isulat diha sa pisara ang pipila ka mahinungdanon nga mga pulong gikan sa Ether 5:2–4, sama sa mga palid, gahum, tinuod, mga saksi, ug pagpamatuod. Basaha kini nga mga bersikulo uban sa mga bata, ug dapita sila sa paghunong kon mabasahan ninyo ang usa sa mga pulong diha sa pisara ug hisguti ngano nga kini nga mga pulong mahinungdanon. Aron sa pagtudlo sa mga bata mahitungod sa Tulo ka mga Saksi, mahimo nimong hisgutan ang “Kapitulo 7: Mga Saksi Nakakita sa Bulawan nga mga Palid” (Mga Sugilanon sa Doktrina ug mga Pakigsaad, 31–33) ug “Ang Pagpamatuod sa Tulo ka mga Saksi” diha sa Basahon ni Mormon. Nganong gusto man sa Dios nga adunay tulo ka mga tawo nga makakita sa bulawan nga mga palid?
-
Isulti sa mga bata kon giunsa nimo pagkasayud nga ang Basahon ni Mormon tinuod. Dapita ang mga bata sa pagpaambit nganong nasayud sila nga kini tinuod. Tabangi sila sa paghunahuna og mga paagi nga sila mahimong mga saksi sa Basahon ni Mormon, ug dasiga sila sa pagpaambit sa ilang pagsaksi sa usa ka tawo niining semanaha.
Awhaga ang Pagkat-on diha sa Panimalay
Dapita ang mga bata sa paghunahuna og usa ka butang nga mahimo sila nga mangayo og tabang sa Langitnong Amahan alang niini, sama sa gihimo sa igsoon ni Jared. Awhaga sila sa pagtinguha sa Iyang tabang pinaagi sa pag-ampo.
Pagpalambo sa Atong Pagtudlo
Pagtudlo atol sa mga kalihokan. Samtang ang mga bata naghimo sa mga kalihokan sama sa pagdrowing o sa pagbuhat og usa ka pahina sa kalihokan, mahimo nimong gamiton ang panahon sa pagpasabut og maayo sa mga kamatuoran nga gitudlo pinaagi niana nga mga kalihokan.