“Nobyembre 9–15. Ether 1–5: ‘Mogisi Niana nga Tabil sa pagkawalay Pagtuo,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Nobyembre 9–15. Ether 1–5,” Dali, Sunod Kanako—Alang sa mga Indibidwal ug mga Pamilya: 2020
Ang mga Jaredite nga Namiya sa Babel, ni Albin Veselka
Nobyembre 9–15
Ether 1–5
“Mogisi Niana nga Tabil sa Pagkawalay Pagtuo”
Ang basahon sa Ether mao ang rekord sa mga Jaredite, nga nangabut sa gisaad nga yuta mga siglo sa wala pa ang mga Nephite. Ang Dios midasig ni Moroni sa paglakip sa rekord ni Ether diha sa Basahon ni Mormon tungod sa kamahinungdanon niini sa atong panahon. Sa unsang paagi gibati nimo nga kini makahuluganon sa imong kinabuhi?
Irekord ang Imong mga Impresyon
Samtang tinuod nga ang mga pamaagi sa Dios mas labaw kay sa atoa, ug kinahanglan kitang motugyan sa Iyang kabubut-on, Siya usab midasig kanato sa paghunahuna ug paglihok sa atong kaugalingon. Usa kana ka leksyon nga nakat-unan ni Jared ug sa iyang igsoon. Sama pananglit, ang ideya nga mobiyahe ngadto sa bag-ong yuta nga “pinili labaw sa tanan nga yuta” daw nagsugod sulod sa hunahuna ni Jared, ug ang Ginoo “nagpakita og kalooy” ug misaad nga ihatag ang gihangyo, sa pag-ingon, “Sa ingon Ako mohimo nganha kanimo tungod niining taas nga panahon nga ikaw nangamuyo ngari kanako” (tan-awa sa Ether 1:38–43). Ug dihang ang igsoon ni Jared nakamatikod kon unsa kangitngit ang sulod sa mga sakayan nga modala kanila ngadto sa gisaad nga yuta, gidapit siya sa Ginoo sa pagsugyot og usa ka solusyon, sa pagpangutana sa atong kasagaran nga ipangutana Kaniya: “Unsa ang buot nimo nga akong kinahanglan nga buhaton?” (Ether 2:23). Ang mensahe daw nag-ingon nga kita dili angayang magpaabut nga mandoan sa Dios sa tanan nga butang. Pwede natong ipaambit Kaniya ang atong kaugalingong mga hunahuna ug mga ideya, ug maminaw Siya ug mohatag sa Iyang kumpirmasyon kay og dili man, kita pagatambagan. Usahay ang bugtong butang nga nagbulag kanato gikan sa mga panalangin nga atong gipangita mao ra gyud ang kaugalingon natong “tabil sa pagkawaly pagtuo,” ug kon kita “mogisi niana nga tabil” (Ether 4:15), tingali masurprisa kita kon unsay andam nga buhaton kanato sa Ginoo.
Mga Ideya alang sa Personal nga Pagtuon sa Kasulatan
Kon motawag ako sa Ginoo, malooy Siya kanako.
Ang Ether 1:33–43 naghisgot og tulo ka pag-ampo sa igsoon ni Jared. Unsay imong nakat-unan gikan sa tubag sa Ginoo sa matag usa niining mga pag-ampo? Paghunahuna og usa ka panahon dihang nasinati nimo ang kalooy sa Ginoo samtang mitawag ka Kaniya pinaagi sa pag-ampo. Mahimo nimong irekord kini nga kasinatian ug ipaambit kini sa tawo nga tingali nagkinahanglan nga makadungog sa imong pagpamatuod.
Makadawat ako og pagpadayag alang sa akong kinabuhi.
Miingon si Presidente Russell M. Nelson: “Mohangyo ko kaninyo sa pagpalambo sa inyong espirituhanong kapasidad sa pagdawat og pagpadayag. … Pilia ang paghimo sa espiritwal nga buhat nga maoy gikinahanglan aron sa pagtagamtam sa gasa sa Espiritu Santo ug mas kanunay ug mas klaro nga pagpaminaw sa tingog sa Espiritu” (“Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 96).
Samtang magtuon ka sa Ether 2; 3:1–6; ug sa 4:7–15, unsang mga kamatuoran ang imong nakita nga nakatabang nimo sa pagsabut kon unsaon sa pagpangita og personal nga pagpadayag? Pwede nimong markahan sa usa ka kolor ang mga pangutana o mga kabalaka nga gibatunan sa igsoon ni Jared ug unsay iyang gihimo bahin niini, ug sa laing kolor pwede nimong markahan kon sa unsang paagi ang Ginoo mitabang kaniya ug mipahibalo sa Iyang kabubut-on. Unsa ang nakadasig kanimo mahitungod sa paagi sa pagpakigsulti sa igsoon ni Jared ngadto sa Ginoo, ug unsay imong nakat-unan gikan niini mahitungod sa kon unsang paagi molambo ang dagayday sa pagpadayag sa imong kinabuhi?
Ang Ginoo moandam kanako nga makatabok sa akong “dako nga lawod.”
Aron makaabut sa gisaad nga yuta, ang mga Jaredite nag-atubang og dakong babag: sa pagtabok sa “dakong lawod” (Ether 2:25). Ang mga pulong nga “dakong lawod” posibling maoy usa ka haom nga paagi sa paghulagway kon unsa ang atong mga pagsulay ug mga hagit nga sama usahay nga bation. Ug usahay, sama sa sitwasyon sa mga Jaredite, ang pagtabok sa kaugalingon natong “dakong lawod” mao lang ang paagi nga matuman ang kabubut-on sa Dios ngari kanato. Makita ba nimo ang mga pagkasusama sa imong kinabuhi diha sa Ether 2:16–25? Sa unsang paagi ka giandam sa Ginoo alang sa imong mga hagit? Unsa kaha ang Iyang gihangyo kanimo nga buhaton karon aron maandam alang sa unsay Iyang gikinahanglan kanimo nga buhaton sa umaabut?
Gilalang ako sa hitsura sa Dios.
Didto sa Bukid sa Shelem, ang igsoon ni Jared nakakat-on og daghan mahitungod sa Dios ug mahitungod sa iyang kaugalingon. Unsay imong makat-unan gikan sa Ether 3 mahitungod sa espiritwal ug pisikal nga kinaiyahan sa Dios? Sa unsang paagi kini nga mga kamatuoran nakatabang kanimo sa pagsabut sa imong balaanong pagkaikaw ug mamahimo?
Kitang tanan mga anak sa Dios.
Ang igsoong lalaki ni Jared ba ang unang tawo nga nakakita sa Ginoo?
Ang Dios mipakita sa Iyang kaugalingon ngadto sa ubang propeta sa wala pa ngadto sa igsoon ni Jared (sama pananglit, tan-awa sa Moises 7:4, 59), busa ngano man nga misulti ang Ginoo kaniya nga, “Wala pa gayud Ako makapakita sa akong kaugalingon ngadto sa tawo”? (Ether 3:15). Si Elder Jeffrey R. Holland mitanyag niining posible nga pagpasabut: “Si Kristo nagsulti sa igsoong lalaki ni Jared, ‘Wala pa gayud Ako makapakita sa akong kaugalingon ngadto sa tawo niining paagiha, nga dili akong kabubut-on, nadasig lamang sa hugot nga pagtuo sa magtatan-aw.’” (Christ and the New Covenant [1997], 23).
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.
Ether 1:34–37
Unsa ang atong nakat-unan gikan niini nga mga bersikulo mahitungod sa pag-ampo alang sa uban? Unsa pa ang uban nga kamatuoran mahitungod sa pag-ampo ang gihulagway niini nga mga bersikulo?
Ether 2:16–3:6
Unsa ang natudlo sa ehemplo sa igsoon ni Jared kanato mahitungod kon unsaon sa pagpangita og mga tubag sa atong mga problema ug mga pangutana? Tingali ang mga sakop sa pamilya makapaambit og mga kasinatian dihang nangita sila ug nakadawat og mga tubag gikan sa Ginoo.
Ether 4:11–12
Human nga mabasa kini nga mga bersikulo, pweding isulat sa mga sakop sa pamilya ang pipila ka inadlawng mga butang nga nakaimpluwensya sa imong pamilya (sama sa mga salida, mga kanta, mga dula, o mga tawo) diha sa ginagmayng papel ug ibutang kini sa usa ka panaksan. Dayon pwede ra silang magpuli-puli sa pagpunit og usa ug sa paghisgot kon kini ba “moawhag [kanila] sa pagbuhat og maayo” (Ether 4:12). Unsa nga mga kausaban ang gibati sa imong pamilya nga nakadasig nga buhaton?
Ether 5
Pwede kang magtago og usa ka butang o usa ka makaon sa usa ka kahon ug modapit og usa ka sakop sa pamilya sa pagtan-aw sa sulod ug mohatag sa ubang sakop sa pamilya og mga ilhanan aron matabangan sila nga makatag-an kon unsa kini. Samtang dungan ninyong basahon ang Ether 5 , hisguti kon nganong importante nga mogamit ang Ginoo og mga saksi sa Iyang buhat. Unsaon man nato sa pagpaambit ang atong pagsaksi sa Basahon ni Mormon ngadto sa uban?
Alang sa dugang nga mga ideya sa pagtudlo sa mga bata, tan-awa sa latid [outline] karong semana diha sa Dali, Sunod Kanako—Alang sa Primary.
Pagpalambo sa Atong Pagtudlo
Pag-andam kanunay. “Ang mga higayon sa dili pormal nga pagtudlo molabay ra dayon, mao nga importante nga mapahimuslan dayon kon kini motumaw. … Sama pananglit, ang usa ka tin-edyer nga adunay lisud nga desisyon nga pagabuhaton tingali andam nga makat-on unsaon sa pagdawat og personal nga pagpadayag” (Pagtudlo sumala sa Pamaagi sa Manluluwas, 16).
Nakakita Ba Ikaw ug Labaw pa Niini? ni Marcus Alan Vincent