“Nobyembre 2–8. Mormon 7–9: ‘Ako Namulong nganha Kaninyo ingon og Kamo Ania,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Nobyembre 2–8. Mormon 7–9,” Dali, Sunod Kanako—Alang sa mga Indibidwal ug mga Pamilya: 2020
Si Moroni Nagsulat diha sa Bulawan nga mga Palid, ni Dale Kilborn
Nobyembre 2–8
Mormon 7–9
“Ako Namulong nganha Kaninyo ingon og Kamo Ania”
Si Mormon ug si Moroni adunay pagtuo nga ang ilang rekord modasig niadtong nanagpuyo sa ulahing mga adlaw. Samtang magbasa ka sa Mormon 7–9, isulat ang mga impresyon nga moabut kanimo mahitungod kon sa unsang paagi nimo magamit ang imong nakat-unan.
Irekord ang Imong mga Impresyon
Si Mormon ug si Moroni nahibalo kon unsay pagbati nga mag-inusara sa dautan nga kalibutan. Alang kang Moroni ang pag-inusara mas labaw pa gayud kagrabe human ang iyang amahan namatay sa gubat ug ang mga Nephite nangalaglag. “Ako gani nahibilin nga nag-inusara,” misulat siya. “Ako wala nay mga higala ni dapit nga kapaingnan” (Mormon 8:3, 5). Ang mga butang daw wala nay paglaum, apan si Moroni nakakita og paglaum sa iyang pagpamatuod sa Manluluwas ug sa iyang kahibalo nga “ang walay katapusan nga mga katuyoan sa Ginoo mopadayon” (Mormon 8:22). Ug nahibalo si Moroni nga ang mahinungdanong tahas niana nga mga walay katapusang mga katuyoan pagahimoon pinaagi sa Basahon ni Mormon—ang rekord nga makugihon niyang gikompleto karon, ang rekord nga ugma damlag “mosanag gikan sa kangitngit” ug modala sa daghang katawhan “ngadto sa kasayuran ni Kristo” (Mormon 8:16; 9:36). Ang hugot nga pagtuo ni Moroni mahitungod niining mga saad naghimong posible nga siya makapamahayag sa umaabut nga mga tigbasa niini nga basahon, “ako namulong nganha kaninyo ingon og kamo ania” ug “ako nasayud nga kamo makabaton sa akong mga pulong” (Mormon 8:35; 9:30). Karon kita aduna na gayud niini nga mga pulong, ug ang mga buhat sa Ginoo nagpadayon, nga usa ka bahin tungod kay si Mormon ug si Moroni nagpabiling matinud-anon sa ilang misyon, bisan og nag-inusara sila.
Mga Ideya alang sa Personal nga Pagtuon sa Kasulatan
Kinahanglang motuo ako kang Jesukristo ug “mohupot” sa Iyang ebanghelyo.
Ang katapusang narekord nga mga pulong ni Mormon, nga makita sa Mormon 7, gitumong ngadto sa ulahing adlaw nga mga kaliwatan sa mga Lamanite, apan naglangkob kini sa mga kamatuoran nga alang kanatong tanan. Unsay gitudlo sa mensahe ni Mormon kanimo mahitungod kang Jesukristo ug sa Iyang ebanghelyo? Ngano kaha nga gipili man ni Mormon kini nga mensahe sa pagtapos sa iyang mga sinulat?
Mormon 7:8–10; 8:12–22; 9:31–37
Ang Basahon ni Mormon may dako kaayong bili.
Nangutana si Presidente Russell M. Nelson: “Kon tanyagan kamo og mga diyamante o mga ruby o ang Basahon ni Mormon, hain man ang inyong pilion? Sa tinuod lang, hain ang mas dako og bili kaninyo?” (“Ang Basahon ni Mormon: Unsa kaha ang Imong Kinabuhi Kon wala Kini?” Liahona, Nob. 2017, 61).
Si Mormon ug si Moroni nahibalo nga ang rekord nga ilang gitipigan may dakong bili sa atong panahon, mao nga mihimo sila og dagkong sakripisyo aron maandam ug mapanalipdan kini. Samtang magbasa ka sa Mormon 7:8–10; 8:12–22; ug sa 9:31–37, hunahunaa kon nganong ang rekord bililhon kaayo sa atong panahon. Pwede kang makakita og dugang nga mga pagtulun-an diha sa 1 Nephi 13:38–41; 2 Nephi 3:11–12; ug sa Doktrina ug mga Pakigsaad 33:16; 42:12–13. Unsa nga mga kasinatian ang nakatabang kanimo nga mahibalo nga ang Basahon ni Mormon dako kaayo og bili?
Ang sinulat sa mga propeta sa Basahon ni Mormon magamit nato karon.
Ang Basahon ni Mormon gisulat alang sa atong panahon.
Gipakita ni Jesukristo ngadto ni Moroni unsay manghitabo kon moabut na ang Basahon ni Mormon (tan-awa sa Mormon 8:34–35), ug ang nakita ni Moroni maoy nagdala kaniya sa paghatag og walay lipud-lipod nga mga pasidaan alang sa atong panahon. Samtang magbasa ka sa Mormon 8:26 –41 ug sa 9:1–30, pamalandungi kon duna bay bisan unsang mga timailhan niini nga mga kinaiya ug mga binuhatan sa imong kinabuhi. Unsa man kaha ang lahi nimo nga mahimo?
Sama pananglit, ang Mormon 9:1–30 naglangkob sa mensahe ni Moroni agig tubag sa nagkatap nga kakulang sa pagtuo kang Jesukristo nga iyang nakita sa atong panahon. Ikonsiderar ang pagrekord unsay imong nakat-unan gikan sa iyang mga pulong mahitungod sa mga mosunod:
-
Ang mga sangputanan sa dili pagtuo kang Kristo (mga bersikulo 1–6, 26)
-
Ang kaimportante sa pagtuo sa usa ka Dios sa pagpadayag ug mga milagro (mga bersikulo 7–20)
-
Ang tambag ni Moroni kanato (mga bersikulo 21–30)
Unsay imong nakat-unan gikan ni Moroni nga makatabang kanimo sa pagdala sa uban paduol sa Langitnong Amahan ug ni Jesukristo?
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.
Mormon 7:5–7, 10; 9:11–14
Unsay gitudlo kanato niini nga mga bersikulo mahitungod sa plano sa Langitnong Amahan ug nganong nagkinahanglan man kita og Manluluwas?
Mormon 7:8–10
Unsa man ang atong nakat-unan sa atong pagtuon sa Basahon ni Mormon karong tuiga nga nakatabang sa paglig-on sa atong pagtuo sa Biblia? Alang sa pagsugod sa diskusyon, pwede kamong magsugod pinaagi sa dungan nga pagbasa sa pipila ka mga kasulatan gikan sa Basahon ni Mormon ug sa Biblia nga nagtudlo sa susamang mga kamatuoran, sama sa Alma 7:11–13 ug Isaiah 53:3–5 o 3 Nephi 15:16–24 ug Juan 10:16.
Mormon 8:1–9
Unsa kaha ang pagbati nga mag-inusara sama sa nahitabo ni Moroni? Unsa ang nakadasig kanimo mahitungod sa buhat nga iyang natuman?
Mormon 8:12, 17–21; 9:31
Hunahunaa ang pagbasa niini nga mga bersikulo diha sa pamilya ug dayon magbasa sa mosunod nga pamahayag ni Elder Jeffrey R. Holland: “Gawas lang sa Iyang bugtong hingpit nga Anak, ang dili hingpit nga mga tawo mao ang gikatambayayong sa Dios. … Ug kon inyong makita ang pagkadili hingpit, hinumdumi nga ang limitasyon dili diha sa kabalaan niini nga buhat” (“Nagatuo Ako,” Liahona, May 2013, 94). Nganong peligro man ang pagtutok diha sa mga imperpeksyon sa uban, lakip niadtong misulat sa Basahon ni Mormon?
Mormon 8:36–38
Unsay ipasabut sa pagdala sa ngalan ni Jesukristo nganhi kanato? Ngano kaha nga ikaulaw man sa usa ka tawo ang pagdala sa ngalan ni Jesukristo diha sa iyang kaugalingon? Sa unsa nga paagi kita magmaisugon sa atong pagpamatuod sa Manluluwas?
Mormon 9:16–24
Ang pihong mga sagol gikinahanglan aron mahimo ang ekspiremento sa siyensya o resipe nga malampuson. Hunahunaa ang pag-eksperimento o paghimo og paboritong resipe diha sa pamilya sa dili pa magbasa sa Mormon 9:16–24. Samtang magbasa ka sa mga bersikulo (ilabi na sa mga bersikulo 20–21), pangitaa ang gikinahanglang “mga sagol” nga maghimong posible sa mga milagro. Unsang mga milagro ang atong makita sa kalibutan libut kanato ug sa atong pamilya?
Alang sa dugang nga mga ideya sa pagtudlo sa mga bata, tan-awa sa latid [outline] karong semana diha sa Dali, Sunod Kanako—Alang sa Primary.
Pagpalambo sa Personal nga Pagtuon
Dangup ngadto sa opisyal nga mga kapanguhaan sa Simbahan. Kon duna kay mga pangutana sa ebanghelyo, ang pinakamaayong tinubdan sa mga tubag mao ang pag-ampo, ang mga kasulatan, ang mga pulong sa buhing mga propeta, ug uban pang mga opisyal nga mga publikasyon sa Simbahan (tan-awa sa Pagtudlo sumala sa Pamaagi sa Manluluwas, 17–18, 23–24).
Si Mormon nga Nagpamubo sa mga Palid, ni Jon McNaughton