“Nobyembre 16–22. Ether 6–11: ‘Nga ang Dautan Mahunong,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Nobyembre 16–22. Ether 6–11,” Dali, Sunod Kanako—Alang sa mga Indibidwal ug mga Pamilya: 2020
Ako Modala Kaninyo sa Ibabaw Pag-usab Gikan sa mga Kahiladman, ni Jonathan Arthur Clarke
Nobyembre 16–22
Ether 6–11
“Nga ang Dautan Mahunong”
Sa paghisgot mahitungod sa rekord sa mga Jaredite, mikomentaryo si Mormon nga “kinahanglan nga ang tanan nga mga katawhan masayud sa mga butang diin nahisulat dinhi niini nga asoy” (Mosiah 28:19). Hinumdumi kini samtang magbasa ka sa Ether 6–11. Nganong importante man kining mga butanga—o makaayo—kanimo ug sa imong mga minahal?
Irekord ang Imong mga Impresyon
Mga gatusan ka tuig human sa pagkalaglag sa mga Jaredite, nadiskubrihan sa mga Nephite ang mga nangagun-ob sa ilang karaang sibilisasyon. Taliwala niining mga nangagun-ob mao ang usa ka misteryusong rekord—mga palid nga “lunsay nga mga bulawan” nga “napuno sa mga kinulit” (Mosiah 8:9). Ang Nephite nga hari, nga Nephite, nakamatikod nga importante kini nga rekord: “Sa walay pagduha-duha usa ka mahinungdanon nga misteryo ang gilangkob sulod niini nga mga palid,” miingon siya (Mosiah 8:19). Karong adlawa anaa kanimo ang usa ka minubo niini nga rekord, gihubad sa imong pinulongan, ug gitawag kini og basahon ni Ether. Naggikan kini sa sama nga rekord diin ang mga Nephite “matinguhaon sa hilabihan” nga mobasa, ug dihang gihimo nila kini, “napuno sila uban sa kasubo; bisan pa niana kini nakahatag kanila og daghan nga kahibalo, diin sila nalipay” (Mosiah 28:12, 18). Samtang magbasa ka mahitungod sa pagsaka ug sa grabing pagkahagsa sa mga Jaredite, makita nimo ang daghang masulub-on nga mga panahon. Apan ayaw taligam-i ang kalipay sa pagkat-on sa mga leksyon gikan niini nga kasaysayan. Gani, sama sa gisulat ni Moroni, “kini kaalam diha sa Dios nga kini nga mga butang kinahanglan mapakita nganha kaninyo” (Ether 8:23), kon ugaling kita makakat-on man gikan sa mga kapakyasan ug sa mga kalampusan sa mga Jaredite, “ang dautan mahunong, ug … ang panahon mahimo nga moabut nga si Satanas wala untay gahum diha sa mga kasingkasing sa anak sa mga katawhan” (Ether 8:26).
Mga Ideya alang sa Personal nga Pagtuon sa Kasulatan
Ang Ginoo mogiya kanako ngadto sa akong gisaad nga yuta.
Pwede kang makakita og espiritwal nga mga pagtulun-an kon imong ikumpara ang mga paglawig sa mga Jaredite tabok sa kadagatan diha sa imong panaw latas sa mortalidad. Sama pananglit, unsa man ang gihatag sa Ginoo nga magpahayag sa imong agianan sama sa mga bato diha sa mga sakayan sa mga Jaredite? Unsa kaha ang girepresentaran sa mga sakayan, o sa mga hangin nga “[n]aghuyop padulong sa gisaad nga yuta”? (Ether 6:8). Unsay imong nakat-unan gikan sa mga buhat sa mga Jaredite kaniadto, atol sa, ug human sa paglawig? Sa unsang paagi ikaw gigiyahan sa Ginoo padulong sa imong gisaad nga yuta?
Ang panaw sa mga Jaredite tabok sa Asya, ni Minerva Teichert
Ether 6:5–18, 30; 9:28–35; 10:1–2
Ang Ginoo mopanalangin kanako kon magmapainubsanon ko.
Bisan og ang garbo ug ang kadautan ingon og midominar sa Jaredite nga kasaysayan, may mga ehemplo usab mahitungod sa pagpaubos dinhi sa mga kapitulo—ilabi na sa Ether 6:5–18, 30; 9:28–35; ug 10:1–2. Ang pagpamalandong sa mosunod nga mga pangutana makatabang kanimo sa pagkat-on gikan niini nga mga ehemplo: Ngano nga nagpaubos sa ilang kaugalingon ang mga Jaredite dinhi niini nga mga sitwasyon? Unsay ilang gihimo aron ipakita ang ilang pagpaubos? Giunsa sila sa pagpanalangin isip resulta? Timan-i nga sa ubang mga sitwasyon, ang katawhan napugos sa pagpaubos tungod sa ilang mga kahimtang. Hunahunaa kon unsay imong mahimo sa kinabubut-on “sa paglakaw nga mapainubsanon sa atubangan sa Ginoo” (Ether 6:17) kay sa mapugos sa pagpaubos (tan-awa sa Mosiah 4:11–12; Alma 32:14–18).
Ang mga lider nga matarung mopanalangin sa katawhan nga ilang gipangulohan.
Ang mga Kapitulo 7–11 sa Ether naglangkob sa pinakaminos 28 ka mga henerasyon. Bisan og dili daghang detalye ang ikahatag sa ingon nianang gamay nga luna, usa ka sundanan ang daling motumaw: ang matarung nga pagpangulo moresulta sa mga panalangin ug paglambo, samtang ang dautang pagpangulo moresulta sa pagkaulipon ug pagkalaglag.
Sa ubos mao ang pipila lamang sa mga hari nga gihisgutan dinhi niini nga mga kapitulo. Basaha ang may kalabutang mga bersikulo, ug tan-awa unsay imong makat-unan gikan sa ilang mga ehemplo—positibo ug negatibo—mahitungod sa pagpangulo. Samtang buhaton nimo kini, paghunahuna og mga oportunidad nga posibling imong maangkon sa paggiya o pag-impluwensya sa uban diha sa imong panimalay, sa imong komunidad, sa imong calling sa Simbahan, ug uban pa.
-
Orihah—Ether 6:30–7:1
-
Shule—Ether 7:23–27
-
Jared—Ether 8:1–7, 11–15
-
Emer ug Coriantum—Ether 9:21–23
-
Heth—Ether 9:26–30
-
Shez—Ether 10:1–2
-
Riplakish—Ether 10:5–8
-
Morianton—Ether 10:10–11
-
Lib—Ether 10:19–28
-
Ethem—Ether 11:11–13
Unsa ang tinago nga kalihokan?
Kon duha o daghan pang mga tawo ang magkunsabo nga ipadayon sa pagtago ang ilang dautang mga buhat, labut sila sa tinago nga kalihokan. Sa kasagaran nadasig sila sa tinguha alang sa gahum o bahandi. Dugang sa tinago nga kalihokan nga gihulagway diha sa Ether 8:7–18, ang ubang mga ehemplo makita sa Helaman 1:9–12; 2:2–11; 6:16–30, ug sa Moises 5:29–33. Sa Ether 8:18–26, gihulagway ni Moroni ang mga sangputanan sa tinago nga mga kalihokan (tan-awa usab sa Ether 9:4–12) ug gipahimangnoan kita sa dili pagsuporta kanila.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.
Ether 6:2–12
Malingaw kaha ang imong pamilya nga i-aksyon ang paglawig sa mga Jaredite ngadto sa gisaad nga yuta? Tingali pwede kang mogamit og usa ka ngitngit nga lawak isip usa ka sakayan ug mga ispat nga magrepresentar sa nagsidlak nga mga bato. Pwede kang mosulti mahitungod sa unsang paagi ang mga Jaredite mipakita sa ilang pagtuo sa Ginoo pinaagi sa pagsulod sa mga sakayan, bisan nahibalo sila nga sila “[m]alubong sa kinahiladman sa dagat” (Ether 6:6). Human mabasa ang bersikulo 9, ang mga sakop sa pamilya mahimong mopaambit og paboritong mga himno sa pagdayeg ug kantahon nila kini. Sa unsang paagi ang atong mga panimalay makumpara ngadto sa mga sakayan sa mga Jaredite? Unsa nga yuta ang gisaad sa Ginoo nga padulngan sa atong pamilya?
Ether 6:22–23
Sulod niining tibuok nga semana, ang imong pamilya pweding motan-aw kon sa unsang paagi natuman ang propetikanhong pasidaan sa igsoon ni Jared mahitungod sa pagkaulipon. Unsa nga mga pasidaan ang gihatag sa atong mga lider sa Simbahan kanato? Sa unsang mga paagi ang pagbaliwala sa ilang tambag mosangpot sa pagkaulipon?
Ether 8:23–26
Sumala niini nga mga bersikulo, nganong gisugo man si Moroni sa pagsulat “niini nga mga butang” mahitungod sa tinago nga mga kalihokan? (Ether 8:23). Unsay atong nakat-unan gikan sa basahon ni Ether nga makatabang kanato sa pag-angkon sa mga panalangin nga gihulagway sa bersikulo 26?
Ether 9:11
Sa unsang paagi ang atong mga tinguha makaapekto sa atong mga pagpili? Unsay atong mahimo isip usa ka pamilya sa pagsiguro nga nagtinguha kita sa mga butang sa Dios?
Ether 11:8
Aron makakat-on pa og dugang mahitungod sa kalooy sa Ginoo niadtong mga maghinulsol, pwede nimong basahon ang Mosiah 26:29–30; 29:18–20; Alma 34:14–16; o Moroni 6:8. Tingali ang mga sakop sa pamilya pweding mopaambit og mga ehemplo sa kalooy sa Dios gikan sa mga kasulatan o gikan sa kaugalingon nilang kinabuhi.
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Buhata unsay imong nakat-unan. Ang pagkat-on sa ebanghelyo naglakip og mas labaw pa sa pagtuon ug sa pagpamalandong. Sa kasagaran makakat-on kita og labaw pa kadaghan pinaagi sa paglihok sa mga kamatuoran nga anaa sa mga kasulatan (tan-awa sa Juan 7:17). Unsay imong buhaton aron magamit ang unsay imong nabasa sa Ether 6–11?
Mga sakayan sa Jaredite, ni Gary Ernest Smith