Pagtudlo sa Tinuod nga Doktrina, ni Michael T. Malm

Hunyo 8–14

Alma 8–12

Si Jesukristo Moabut aron sa Pagtubos sa Iyang Katawhan

Samtang imong basahon ang gitudlo ni Alma ug Amulek sa mga tawo sa Ammonihah, unsa ang gibati nimong labing mahinungdanon sa mga bata nga imong gitudloan?

Irekord ang Imong mga Impresyon

Dapita ang Pagpaambit

Dapita ang mga bata sa paghulagway kon unsay buhaton sa mga misyonaryo ug sa pagsulti kanimo mahitungod ni bisan kinsa nga ilang kaila nga nagserbisyo og misyon. Unsa ang itudlo sa mga misyonaryo sa mga tawo? Tabangi ang mga bata nga makakita nga si Alma ug si Amulek mga misyonaryo kinsa mipaambit sa ebanghelyo ngadto sa katawhan sa Ammonihah.

Itudlo ang Doktrina: Mas Gagmay nga mga Bata

Alma 8

Ako makahimo sa pagpakigbahin sa ebanghelyo.

Si Alma mibiyahe sa tibuok yuta aron sa pagsangyaw sa ebanghelyo, ug si Amulek misangyaw sa iyang kaugalingong dakbayan ngadto sa iyang mga higala ug mga silingan. Unsaon nimo pagdasig ang mga bata nga mosunod sa ilang ehemplo ug mopaambit sa ebanghelyo ngadto sa uban?

Posible nga mga Kalihokan

• Basaha og dungan ang unang katunga sa “Kapitulo 22: Ang Misyon ni Alma ngadto sa Ammonihah” (Mga Sugilanon sa Ang Basahon ni Mormon, 58–63). Dapita ang mga bata nga magpares nga ilingkit ang ilang mga bukton ug magpakaaron-ingnon nga sila si Amulek ug Alma, kinsa magkauban nga mitudlo sa ebanghelyo, samtang manganta sila og usa ka kanta kalabut sa misyonaryo nga buhat, sama sa “Gusto Ko Karon nga Mamisyonaryo” (Songbook sa mga Bata, 90).

• Tabangi ang mga bata sa pagsulti og balik sa usa ka kamatuoran sa ebanghelyo sa pipila ka higayon, sama sa “Ang Basahon ni Mormon nagpamatuod kang Kristo” o “Ako nasayud nga si Jesus nahigugma kanako.” Dayon dapita ang matag bata nga magpraktis sa pagpaambit niini nga kamatuoran ngadto sa lain diha sa klase. Isip kabahin niini nga kalihokan, mahimo nimong tabangan ang mga bata sa pagkompleto sa pahina sa kalihokan niining semanaha.

• Hangyoa ang mga bata sa pagsulti kanimo mahitungod sa usa ka butang nga ilang gipakigbahin ngadto sa usa ka sakop sa pamilya o higala—sama sa usa ka dulaan o kendi. Tabangi sila sa paglista og pipila ka importante nga mga butang nga mahimo natong mapaambit sa uban mahitungod ni Jesukristo. Ipasabut nga tungod kay ang ebanghelyo importante kaayo, si Alma milakaw aron sa pagpaambit niini ngadto sa mga tawo sa daghan pang mga dakbayan aron makakat-on sila unsaon nga magmalipayon.

Alma 8:18–22

Mahimo akong maayong higala.

Ang pagserbisyo ni Amulek kang Alma usa ka maayong ehemplo sa mga bata kon unsaon nila sa paghigugma ug pagserbisyo sa uban.

Posible nga mga Kalihokan

• Dapita ang usa ka bata nga magpakaaron-ingnon nga si Amulek ug laing bata nga magpakaaron-ingnon nga si Alma samtang imong isaysay ang istorya diha sa Alma 8:18–22. Patabanga ang mga bata sa pagsaysay sa istorya, ug dapita ang lain-laing mga bata nga mahimong Alma ug Amulek. Sa unsang paagi si Amulek maayo nga higala kang Alma? Hangyoa ang mga bata sa paghisgot kon sa unsang paagi ang usa ka tawo nahimong maayong higala ngadto kanila. Unsa ang gibati nila niana nga kasinatian? Nganong gusto man sa Dios nga mahimo kitang maayo nga mga higala ngadto sa uban?

• Pangita o pagdrowing og usa ka hulagway nga nagrepresentar og panaghigalaay (sama sa duha ka tawo nagginaksanay o usa ka kasingkasing), ug guntinga kini aron mahimong mga piraso sa puzzle. Sa luyo sa matag piraso sa puzzle, pagsulat og usa ka butang nga gibuhat ni Alma ug Amulek aron nahimong maayo nga mga higala o mga butang nga atong mabuhat aron mahimong usa ka maayo nga higala. Dapita ang mga bata nga magpuli-puli sa pagpili og usa ka piraso ug sa pagdugang niini ngadto sa puzzle samtang imong basahon ang nasulat diha sa luyo niini. Tabangi sila sa paghunahuna og mga tawo nga mahimo nilang higalaon. Ipamatuod nga si Jesukristo mao ang labing maayong higala nga mahimo natong maangkon.

Mahimo kitang maayong mga higala ngadto sa uban.

Alma 11:43–44

Human mamatay, mabanhaw ako.

Mitudlo si Amulek sa katawhan sa Ammonihah mahitungod sa Pagkabanhaw. Unsaon nimo pagtabang ang mga bata nga imong gitudloan nga makasabut kon unsa ang gipasabut sa mahimong mabanhaw?

Posible nga mga Kalihokan

• Gamita ang imong kamot aron morepresentar sa espiritu, ug paggamit og gwantis aron morepresentar sa lawas. Ipagawas ang imong kamot gikan sa gwantis aron ipakita sa mga bata nga ang atong mga espiritu ug mga lawas magkabulag sa kamatayon. Dayon isulod og balik ang imong kamot sa gwantis aron ipakita nga ang atong mga espiritu ug mga lawas maghiusa pag-usab sa Pagkabanhaw. Papuli-puliha ang mga bata sa pagsul-ob sa gwantis ug sa paghubo niini samtang imong basahon ang Alma 11:43 ngadto kanila. Ipakita ang hulagway nga Maria ug ang Nabanhaw nga Jesukristo (Libro sa mga Hulagway sa Ebanghelyo, nu. 59), ug ipamatuod nga gihimong posible ni Jesukristo nga mabanhaw ang tanan.

• Dapita ang mga bata sa pagdrowing og mga hulagway sa ilang mga higala ug mga sakop sa pamilya, lakip sa mga paryente. Samtang ang mga bata mopaambit sa ilang mga hulagway, itudlo ang matag higala o sakop sa pamilya nga ilang gidrowing ug ipasabut nga siya mabanhaw. Ipamatuod nga gihimong posible ni Jesus nga makauban nato ang atong mga pamilya sa kahangturan.

Itudlo ang Doktrina: Mas Dagko nga mga Bata

Alma 8–10

Ako makahimo sa pagpakigbahin sa ebanghelyo.

Si Alma ug Amulek mipaambit sa ebanghelyo, bisan kon kini dili sayon. Sa unsang paagi ang ilang kaisug ug hugot na pagtuo makadasig sa mga bata nga imong gitudloan?

Posible nga mga Kalihokan

• Gamit ang imong kaugalingong mga pulong, i-summarize ang mga panghitabo diha sa Alma 8–10. Pagpili og pipila ka mga baruganan gikan niini nga mga panghitabo nga makatabang sa mga bata sa pagpaambit sa ebanghelyo, sama sa paglahutay (tan-awa sa Alma 8:8–13), pagpamatuod mahitungod ni Kristo (tan-awa sa Alma 9:26–27), ug pagkaanaay kauban (tan-awa sa Alma 10:7–11). Dapita ang mga bata sa pagbasa sa pinili nga mga bersikulo ug sa pagsulti kon unsay ilang nakat-unan mahitungod sa pagpaambit sa ebanghelyo. Nganong importante man nga sultihan ang uban mahitungod sa ebanghelyo?

• Dapita ang mga bata sa pagpaambit og mga kasinatian sa dihang gipaambit nila ang ebanghelyo ngadto sa usa ka tawo, o ipaambit ang imong kaugalingong kasinatian. Dapita ang mga bata sa pagpaminaw og mga paagi nga makapangandam sila sa pagpaambit sa ebanghelyo samtang mokanta sila og awit kalabut sa misyonaryo nga buhat, sama sa “Among Dad-on sa Kalibutan ang Iyang Kamatuoran” (Songbook sa mga Bata, 92–93). Nganong gusto man sa Langitnong Amahan nga atong ipaambit ang ebanghelyo? Tabangi ang mga bata sa pagplano og mga paagi sa pagpaambit sa ebanghelyo ngadto sa ilang mga higala, sama sa paghatag kanila og kopya sa Ang Basahon ni Mormon o sa pagdapit kanila ngadto sa usa ka kalihokan sa Simbahan. Hatagi sila og panahon sa pag-role play kon unsay ilang isulti o buhaton niini nga mga sitwasyon.

Alma 11–12

Ang plano sa Dios mao ang usa ka plano sa katubsanan.

Unsaon nimo paggamit ang Alma 11–12 aron “[ma]pahibalo ngadto [sa mga bata] ang laraw sa katubsanan”? (Alma 12:30).

Posible nga Kalihokan

• Isulat diha sa pisara ang pipila ka mga baruganan kalabut sa plano sa katubsanan nga makita diha sa Alma 11–12, sama sa Pagkapukan ni Adan ug Eva, ang Pag-ula ni Jesukristo, paghinulsol, kamatayon, pagkabanhaw, ug paghukom. Pagbasa og pipila ka mga bersikulo gikan sa Alma 11 o 12 nga nagtudlo mahitungod sa mga baruganan, ug hatagi ang mga bata og panahon sa pagdrowing og usa ka hulagway nga nagrepresentar sa matag baruganan. Unsa man ang tahas sa Manluluwas niini nga plano? Dayon dapita ang mga bata sa paggamit sa ilang mga hulagway aron sa pag-role-play nga magtudlo og higala mahitungod sa plano sa Dios.

Alma 12:10

Kon dili ko magpatig-a sa akong kasingkasing, mas daghan ko og madawat nga pulong sa Dios.

Kon kalabut na sa pagkat-on og espiritwal nga mga kamatuoran, ang kondisyon sa atong mga kasingkasing sama ka importante sa mga abilidad sa atong mga hunahuna.

Posible nga mga Kalihokan

• Basaha og dungan ang Alma 12:10, ug hisguti unsay gipasabut sa “mopatig-a” sa atong mga kasingkasing. Nganong mas gipalisud man sa tig-a nga kasingkasing ang pagkat-on gikan sa Dios?

• Aron sa paghulagway niini nga baruganan, pakit-a ang mga bata og usa ka espongha ug usa ka bato ug pangutan-a sila kon hain niini ang mas makasuyop og tubig. Sa unsang paagi nato mapakita sa Ginoo nga gusto nato nga ang atong mga kasingkasing nga mamahimong sama ka humok sa espongha?

Awhaga ang Pagkat-on diha sa Panimalay

Dapita ang mga bata sa pagpangita og mga oportunidad sa pagpaambit sa ebanghelyo o sa pagtabang og laing tawo niining semanaha.

Pagpalambo sa Atong Pagtudlo

Pagpamatuod diha sa imong klase. Ang usa ka pagpamatuod mahimong sama ka yano sa “Nasayud ko nga ang Langitnong Amahan nahigugma sa matag usa kaninyo” o “Maayo ang akong bation samtang magkat-on ko mahitungod ni Jesukristo.” (Tan-awa usab sa Pagtudlo sumala sa Pamaagi sa Manluluwas, 11.)