Hulagway nila ni Alma ug Amulek nga giluwas gikan sa bilanggoan, ni Andrew Bosley

Hunyo 15–21

Alma 13–16

“Makasulod ngadto sa Kapahulayan sa Ginoo”

Ang inspirasyon nga imong nadawat samtang mamalandong ka sa mga kasulatan bililhon. Ikaw makapakita nga kini imong gihatagan og bili pinaagi sa pagrekord ug pagbuhat niini.

Irekord ang Imong mga Impresyon

Sa daghang mga paagi, ang kinabuhi sa Ammonihah maayo ra alang nila ni Amulek ug Zeezrom. Si Amulek “usa ka tawo nga dili yano og dungog,” uban sa “daghan og kaliwatan ug mga kahigalaan” ug “daghan nga mga katigayunan” (Alma 10:4). Si Zeezrom mao ang “usa sa labing batid” sa mga abogado ug nakaangkon og “daghan nga mga patigayon” (Alma 10:31). Dayon si Alma miabut sa Ammonihah nga dunay balaan nga imbitasyon sa paghinulsol ug “mosulod ngadto sa kapahulayan sa Ginoo” (Alma 13:16). Alang nila ni Amulek, Zeezrom, ug sa uban, ang pagdawat niini nga imbitasyon nagkinahanglan og sakripisyo ug gani mosangpot sa hapit dili maantus nga kalisdanan.

Apan dayag nga kini nga istorya wala mahuman dinhi. Sa Alma 13–16, nahibaloan nato unsay mahitabo sa katapusan niadtong kinsa nagtuo “sa gahum ni Kristo ngadto sa kaluwasan” (Alma 15:6). Usahay adunay kaluwasan, usahay pagkaayo—ug usahay ang mga butang dili sayon niini nga kinabuhi. Apan sa kanunay, “ang Ginoo midawat sa [Iyang katawhan] ngadto sa iyang kaugalingon, diha sa himaya” (Alma 14:11). Sa kanunay, ang Ginoo mihatag sa “gahum, sumala sa [atong] hugot nga pagtuo nga [anaa] diha ni Kristo” (Alma 14:28). Ug sa kanunay, nga ang “hugot nga pagtuo diha sa Ginoo” naghatag nato og “paglaum nga [kita] makadawat og kinabuhi nga dayon” (Alma 13:29). Samtang ikaw magbasa niini nga mga kapitulo, mahimong mahupay ka niini nga mga saad, ug ikaw makasabut og mas maayo unsay gipasabut ni Alma sa dihang namulong siya mahitungod sa “kapahulayan sa Ginoo.”

Mga Ideya alang sa Personal nga Pagtuon sa Kasulatan

Alma 13:1–19

Ang mga ordinansa sa pagkapari nagtabang nako sa pagdawat og katubsanan pinaagi ni Jesukristo.

Tingali mahinumduman nimo sa Alma 12, nagtudlo si Alma mahitungod sa plano sa Dios sa katubsanan (tan-awa sa Alma 12:24–27). Sa kapitulo 13, naghisgot siya mahitungod sa mga pari nga giordinahan sa Dios “sa pagtudlo niini nga mga butang ngadto sa mga katawhan” (Alma 13:1). Ang mga pulong ni Alma nagpadayag og daghang gamhanang mga kamatuoran mahitungod sa pagkapari. Tingali mahimo nimong sulayan nga mailhan ang bisan usa sa kamatuoran matag bersikulo sa Alma 13:1–9. Aniay pipila ka ideya aron ikaw makasugod:

Bersikulo 1:Ang pagkapari gitawag usab og “ang kapunongan sa Anak sa [Dios]” (tan-awa usab sa D&P 107:1–4).

Bersikulo 2:Ang Dios miorden og mga pari aron tabangan ang mga tawo nga motan-aw ngadto sa Iyang Anak alang sa katubsanan.

Bersikulo 3:Ang mga tighupot sa pagkapari giandam alang sa ilang mga responsibilidad “gikan sa pundasyon sa kalibutan.”

Unsa pay lain nga imong nakit-an? Unsay imong gibati mahitungod sa pagkapari samtang ikaw namalandong niini nga mga kamatuoran? Sa unsa nga paagi nga ang mga ordinansa sa pagkapari nakatabang kanimo nga motan-aw ngadto ni Kristo alang sa katubsanan?

Makapaikag nga mahibaloan nga daghan sa mga katawhan sa Ammonihah mga sumusunod ni Nehor (tan-awa sa Alma 14:18; 15:15). Sa unsa nga paagi nga ang mga pari sa kapunongan ni Nehor (tan-awa sa Alma 1:3–6) lahi gikan sa mga pari nga naordinahan “sunod sa Kapunongan sa Anak sa Dios” (D&P 107:3), nga gihulagway ni Alma? (tan-awa sa Alma 13:1–19).

Tan-awa usab sa Dale G. Renlund, “Ang Priesthood ug ang Matubsanong Gahum sa Manluluwas,” Liahona, Nob. 2017, 64–67.

Ang mga ordinansa sa pagkapari makatabang nato sa pagtan-aw ngadto ni Jesukristo alang sa katubsanan.

Alma 13:3

Ang mga tighupot sa pagkapari lang ba ang mga tawo nga “gitawag ug giandam gikan sa katukuran sa kalibutan”?

Ang mga pagtulun-an sa Alma 13:3 nagpasabut gayud sa mga tighupot sa pagkapari. Hinoon, ang baruganan nga iyang gitudlo—nga ang mga indibidwal nakadawat og mga buluhaton ug naandam sa pagtuman niini “gikan sa katukuran sa kalibutan”—alang natong tanan. Si Presidente Spencer W. Kimball miingon “Sa kalibutan sa wala pa kita moabut dinhi, ang matinud-anong mga babaye gihatagan og piho nga mga buluhaton samtang ang matinud-anong mga lalaki giorden nang daan sa pihong mga tahas sa priesthood. Samtang kita dili na mahinumdom karon sa mga detalye, kini wala makapausab sa mahimayaong katinuoran nga atong gikasabutan kanhi” (Mga Pagtulun-an sa mga Presidente sa Simbahan: Spencer W. Kimball [2006], 271; tan-awa usab sa D&P 138:55–56).

Alma 14

Usahay ang Dios motugot nga ang matarung mag-antus.

Ang Alma 14 naghisgot sa matarung nga mga tawo kinsa nag-antus ug gani namatay tungod sa ilang mga pagtuo. Tingali matingala ka, sama sa uban, ngano nga terible nga mga butang mahitabo ngadto sa mga tawo kinsa naningkamot sa pagpuyo nga matarung. Mahimong dili nimo makita ang tanan nga mga tubag niining malisud nga pangutana sa Alma 14, apan adunay daghan nga makat-unan gikan sa paagi sa pagtubag nila ni Alma ug Amulek sa mga sitwasyon nga ilang giatubang. Unsa ang natudlo diha kaninyo sa ilang mga pulong ug mga aksyon mahitungod kon ngano nga ang Ginoo usahay motugot nga mag-antus ang matarung nga mga tawo? Unsa ang imong nakat-unan gikan kanila mahitungod sa pag-atubang og pagpanggukod?

Tan-awa usab sa Mateo 5:43–44; Marcos 14:55–65; Mga Taga-Roma 8:35–39; 1 Pedro 4:12–14; Doktrina ug mga Pakigsaad 122:5–9.

Alma 15:16, 18

Ang pagkadisipulo nagkinahanglan og sakripisyo.

Makapaikag tingali ang paghimo og lista sa mga butang nga gibiyaan ni Amulek aron dawaton ang ebanghelyo (tan-awa sa Alma 10:4–5; 15:16) ug itandi kini ngadto sa lista sa unsay iyang naangkon (tan-awa sa Alma 15:18; 16:13–15; 34:8). Unsay andam nimo nga isakripisyo aron mas mahimong matinud-anon nga disipulo?

Mga Ideya alang sa Pamilya nga Pagtuon sa Kasulatan ug Family Home Evening

Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka ideya.

Alma 13

Ang imong pamilya tingali makabenepisyo sa pagtimaan sa matag higayon nga ang pulong “kapahulayan” makita sa Alma 13. Unsa ang ubang mga pulong ug mga ideya ang makita uban niini? Sa unsa nga paagi kini makatabang kanato nga makasabut unsa ang gipasabut “sa kapahulayan sa Ginoo”? Sa unsa nga paagi nga kini lahi gikan sa pisikal nga kapahulayan?

Alma 13:10–12

Aron matabangan ang imong pamilya sa paghanduraw unsa ang gitudlo niini nga mga bersikulo, tingali magdungan kamo sa paglaba og butang—sama sa puti nga sinina. Unsay atong bation kon kita hugaw? Unsay atong bation kon malimpyo na kita pag-usab? Sa unsa nga paagi nga kini nga mga pagbati susama sa unsay atong gibati kon kita makasala ug dayon maghinulsol ug malimpyo pinaagi sa Pag-ula sa Manluluwas?

Alma 15:1–12

Unsay atong makat-unan gikan sa kasinatian ni Zeezrom mahitungod sa gahum sa Ginoo sa paglig-on ug pag-ayo kanato, bisan kon kita makahimo og mga sayop? Unsa nga tahas ang mahimo sa pagkapari sa atong pagdawat sa Iyang kalig-on ug pagkaayo?

Alma 16:1–10

Human mabasa kini nga mga bersikulo, mahimo nimong basahon ang Alma 9:4. Unsay atong makat-unan pinaagi sa pagtandi sa gibati ni Zoram mahitungod sa mga pulong sa propeta sa paagi nga gibati sa mga katawhan sa Ammonihah? Unsay atong gibuhat aron magmatinud-anon ngadto sa mga pulong sa atong buhi nga propeta?

Alang sa dugang nga mga ideya sa pagtudlo sa mga bata, tan-awa kini nga latid [outline] karong semanaha diha sa Dali, Sunod Kanako—Alang sa Primary.

Pagpalambo sa Atong Pagtudlo

Pag-andam kanunay. Ang mga higayon sa pagtudlo molabay ra dayon, mao nga pahimusli kini kon moabut. Usa ka trahedya sa kalibutan, pananglitan, tingali usa ka kahigayunan sa pagpakigbahin sa mga baruganan gikan sa Alma 14 mahitungod ngano nga ang Ginoo usahay motugot nga mag-antus ang inosente. (Tan-awa sa Pagtudlo sumala sa Pamaagi sa Manluluwas, 16.)

Alma ug Amulek sa Bilanggoan, ni Gary L. Kapp