1 Karon sa dihang nabuhat na kini ni Mosiah gipaadto niya ang tibuok yuta, taliwala sa tanan nga katawhan, nagtinguha nga masayod sa ilang kabubut-on kon kinsa ang mahimo nilang hari.

2 Ug nahitabo nga ang tingog sa katawhan miabot, nga nag-ingon: Gusto namo nga si Aaron nga imong anak nga lalaki maoy mahimong among hari ug among magmamando.

3 Karon si Aaron mitungas na ngadto sa yuta sa Nephi, busa ang hari dili makatugyan sa gingharian ngadto kaniya; si Aaron dili usab modawat sa gingharian; walay bisan kinsa sa mga anak nga lalaki ni Mosiah ang andam nga modawat sa gingharian.

4 Busa si hari Mosiah mipadala na usab taliwala sa katawhan; oo, gani usa ka sinulat nga pulong ang iyang gipadala taliwala sa katawhan. Ug kini ang mga pulong nga gisulat, nga nag-ingon:

5 Tan-awa, O kamo nga akong katawhan, o akong kaigsoonan, kay ingon niana ang akong pagtamod kaninyo, mohangyo ko nga inyong hunahunaon ang hinungdan nga kamo gipatawag alang sa paghunahuna—kay kamo mga matinguhaon nga makabaton og usa ka hari.

6 Karon akong ipahibalo kaninyo nga siya kang kinsa ang gingharian angay gayod nga itugyan, mibalibad, ug dili modawat sa gingharian.

7 Ug karon kon adunay lain nga itudlo puli kaniya, tan-awa nahadlok ko nga adunay mahitabo nga mga panagbingkil taliwala kaninyo. Ug kinsa ang nasayod basin ang akong anak nga lalaki, kinsa maoy tag-iya sa gingharian, masuko ug moagni og usa ka bahin niini nga katawhan ngadto kaniya, nga mao unya ang hinungdan sa mga gubat ug mga panagbingkil taliwala kaninyo, nga mao unya ang hinungdan sa pag-agas sa daghan nga dugo ug pagtuis sa pamaagi sa Ginoo, oo, ug paglaglag sa mga kalag sa daghan nga katawhan.

8 Karon sultihan ko kamo nga magmaalamon kita ug maghunahuna niini nga mga butang, kay wala kitay katungod sa paglaglag sa akong anak nga lalaki, ni kita adunay katungod sa paglaglag sa laing tawo kon siya itudlo na unya nga ipuli kaniya.

9 Ug kon ang akong anak nga lalaki mobalik na usab ngadto sa iyang garbo ug sa kawang nga mga butang basin bakwion niya ang mga butang nga iyang gisulti, ug moangkon sa iyang katungod sa gingharian, nga mao unya ang hinungdan nga siya ug usab kini nga katawhan makabuhat og daghang sala.

10 Ug karon magmaalamon kita ug mangandam alang niining mga butanga, ug mobuhat nianang makapasiugda og kalinaw niini nga katawhan.

11 Busa ako ang mahimo ninyo nga hari sa nahibilin ko nga mga adlaw; bisan pa niana, magbutang kita og mga maghuhukom, aron mohukom niini nga katawhan sumala sa atong balaod; ug bag-ohon nato ang paghan-ay sa mga kalihokan niini nga katawhan, kay magbutang kita og maalamon nga mga tawo nga mahimong mga maghuhukom, nga mohukom niini nga katawhan sumala sa mga sugo sa Dios.

12 Karon mas maayo pa nga ang usa ka tawo pagahukman sa Dios kay sa tawo, kay ang mga paghukom sa Dios kanunay nga makiangayon, apan ang mga paghukom sa tawo dili sa kanunay makiangayon.

13 Busa, kon posible nga makabaton kamo og makiangayon nga mga tawo nga mahimo ninyong hari, kinsa motukod sa mga balaod sa Dios, ug mohukom niini nga katawhan sumala sa iyang mga sugo, oo, kon kamo makabaton og mga tawo aron mahimo ninyong mga hari kinsa mobuhat sama sa gibuhat sa akong amahan nga si Benjamin alang niini nga katawhan—ako moingon nganha kaninyo, kon kini mao man kanunay ang mahitabo nan angay nga kamo adunay mga hari kanunay nga magmando kaninyo.

14 Ug gani ako sa akong kaugalingon naghago pinaagi sa tanan nga gahom ug galamhan nga anaa kanako, sa pagtudlo kaninyo sa mga sugo sa Dios, ug sa pagpatunhay og kalinaw sa tibuok yuta, aron walay mga gubat ni panagbingkil, walay pagpangawat, ni pagpanglungkab, ni pagbuno, ni bisan unsa nga matang sa pagkadaotan;

15 Ug si kinsa ang nakabuhat og pagkadaotan, siya akong gisilotan sumala sa kalapasan nga iyang nahimo, sumala sa balaod nga gihatag ngari kanato pinaagi sa atong mga amahan.

16 Karon sultihan ko kamo, nga tungod ang tanan nga tawo dili makiangayon wala kinahanglana nga kamo adunay hari o mga hari nga magmando kaninyo.

17 Kay tan-awa, unsa ka dakong pagkadaotan ang mapahitabo sa usa ka daotan nga hari, oo, ug pagkadako nga kalaglagan!

18 Oo, hinumdomi si hari Noah, ang iyang pagkadaotan ug ang iyang mga pagkasalawayon, ug usab ang mga pagkadaotan ug mga pagkasalawayon sa iyang katawhan. Tan-awa unsa ka dako nga kalaglagan ang midangat kanila; ug usab tungod sa ilang mga pagkadaotan nadala sila sa pagkaulipon.

19 Ug kon dili pa tungod sa pagpataliwala sa ilang hingpit nga maalamon nga Tiglalang, ug tungod kini sa ilang kinasingkasing nga paghinulsol, dili gayod sila makalikay nga magpabilin sa pagkaulipon hangtod karon.

20 Apan tan-awa, siya miluwas kanila tungod kay nagpaubos sila sa ilang mga kaugalingon sa iyang atubangan; ug kay nangamuyo sila sa hilabihan ngadto kaniya siya miluwas kanila gikan sa pagkaulipon; ug sa ingon ang Ginoo mobuhat pinaagi sa iyang gahom sa tanang mga sitwasyon taliwala sa mga anak sa katawhan, mopaabot sa bukton sa kaluoy ngadto kanila nga mobutang sa ilang pagsalig ngadto kaniya.

21 Ug tan-awa, karon sultihan ko kamo, dili ninyo mapapahawa sa trono ang usa ka hari nga hiwi og binuhatan gawas kon pinaagi sa dako nga panagbingkil, ug sa pagpaagas sa daghang dugo.

22 Kay tan-awa, aduna siyay mga higala nga hiwi og binuhatan, ug siya mopahimutang sa iyang mga magbalantay libot kaniya; ug gub-on niya ang mga balaod niadtong kinsa naghari sa pagkamatarong sa nag-una kaniya; ug yatakan niya ang mga sugo sa Dios;

23 Ug mohimo siya og mga balaod, ug ipadala kini ngadto sa iyang katawhan, oo, mga balaod nga subay sa iyang kaugalingong pagkadaotan; ug si kinsa ang dili motuman sa iyang mga balaod iyang ipapatay; ug si kinsa ang mosukol batok kaniya ipadala niya ang iyang kasundalohan batok kanila aron sa pakiggubat, ug kon siya makahimo, siya mopatay kanila; ug sa ingon niana ang dili matarong nga hari motuis sa mga pamaagi sa tanan nga pagkamatarong.

24 Ug karon sultihan ko kamo, dili kinahanglan nga ang ingon niini nga mga pagkasalawayon modangat nganha kaninyo.

25 Busa, pagpili kamo og mga maghuhukom pinaagi sa tingog niini nga katawhan, nga kamo mahimo nga hukman sumala sa mga balaod nga gihatag nganha kaninyo pinaagi sa atong mga amahan, nga mga matarong, ug gihatag kanila pinaagi sa kamot sa Ginoo.

26 Karon dili maoy naandan nga ang tingog sa katawhan magtinguha sa bisan unsa nga mga butang nga supak sa matarong; apan maoy naandan sa gamay nga bahin sa katawhan ang pagtinguha niana nga dili matarong; busa sunda ninyo kini ug himoon ninyong balaod—ang paghimo sa inyong mga kalihokan pinaagi sa tingog sa katawhan.

27 Ug kon moabot ang panahon nga ang tingog sa katawhan mopili sa pagkadaotan, niana nga higayon ang mga paghukom sa Dios modangat diha kaninyo; oo, niana nga higayon moduaw siya kaninyo uban sa dako nga kalaglagan gani sama sa kanhi niyang pagduaw niini nga yuta.

28 Ug karon kon kamo adunay mga maghuhukom, ug sila dili maghukom kaninyo sumala sa balaod nga gikahatag, makabuot kamo nga hukman sila sa usa ka labaw nga maghuhukom.

29 Kon ang inyong mga labaw nga maghuhukom dili mohukom og mga matarong nga mga paghukom, makapundok kamo og diyotay sa inyong ubos nga mga maghuhukom, ug hukman nila ang inyong labaw nga mga maghuhukom, sumala sa tingog sa katawhan.

30 Ug sugoon ko kamo sa pagbuhat niini nga mga butang diha sa kahadlok sa Ginoo; ug ako mosugo kaninyo sa pagbuhat niini nga mga butang, ug nga kamo dili magbaton og hari; nga kon kini nga katawhan makabuhat og mga sala ug mga pagkadaotan sila manubag niini diha sa ilang kaugalingong mga ulo.

31 Kay tan-awa sultihan ko kamo, ang mga sala sa daghan nga katawhan nabuhat pinaagi sa mga pagkadaotan sa ilang mga hari; busa ang ilang hiwi nga mga binuhatan pagatubagon diha sa mga ulo sa ilang mga hari.

32 Ug karon ako nagtinguha nga kining pagkadili patas kinahanglan mawala na niini nga yuta, ilabi na taliwala niining akong katawhan; apan ako nagtinguha nga kini nga yuta mahimong usa ka yuta sa kalingkawasan, ug ang matag tawo makapahimulos sa iyang mga katungod ug mga kahigayonan, hangtod kanus-a nga makita sa Ginoo nga angayan kitang mopuyo ug makapanunod sa yuta, oo, gani hangtod kanus-a nga magpabilin ang atong mga kaliwat sa ibabaw sa yuta.

33 Ug daghan pang butang ang gisulat ni hari Mosiah ngadto kanila, nagpahayag ngadto kanila sa tanang pagsulay ug kasamok sa usa ka matarong nga hari, oo, ang tanang pag-antos sa kalag alang sa ilang katawhan, ug usab ang tanang pagbagulbol sa katawhan ngadto sa ilang hari; ug gipasabot niya kining tanan ngadto kanila.

34 Ug siya misulti kanila nga kining mga butanga dili unta angay mahitabo; apan nga ang alantoson kinahanglan magagikan sa tanan nga katawhan, nga ang matag tawo unta mopas-an sa iyang bahin.

35 Ug siya usab mipadayag ngadto kanila sa tanang walay kapuslanan nilang mga paghago, pinaagi sa pagbaton og usa ka dili matarong nga hari nga magmando kanila;

36 Oo, ang tanan niyang mga pagkadaotan ug mga pagkasalawayon, ug ang tanan nga gubat, ug panagbingkil, ug pagpaagas sa dugo, ug ang pagpangawat, ug ang pagpanglungkab, ug ang pagbuhat og malaw-ay nga mga buhat, ug ang tanang matang sa mga pagkadaotan nga dili maihap—nagsulti kanila nga kining mga butanga dili angay mahitabo, nga kini dayag nga supak sa mga sugo sa Dios.

37 Ug karon nahitabo, nga human mapahibalo ni hari Mosiah kining mga butanga ngadto sa katawhan nadani sila sa kamatuoran sa iyang mga pulong.

38 Busa ilang gikalimtan ang ilang mga tinguha sa pagbaton og usa ka hari, ug nahimong hilabihan ka mahunahunaon nga ang matag tawo makabaton og patas nga kahigayonan sa tibuok yuta; oo, ug matag tawo mipakita og pag-uyon sa pagtubag sa kaugalingon niyang mga sala.

39 Busa, nahitabo nga nagpundok sila sa tibuok yuta, aron sa pagpadayag sa ilang mga tingog kon kinsa ang mahimo nilang mga maghuhukom, aron mohukom kanila sumala sa balaod nga gihatag ngadto kanila; ug sila nagmaya sa hilabihan tungod sa kalingkawasan nga gitugyan ngadto kanila.

40 Ug misamot sila og kalig-on sa paghigugma kang Mosiah; oo, sila nagtamod kaniya labaw kang bisan kinsa nga tawo; kay wala sila magtan-aw kaniya nga usa ka malupigon kinsa nagtinguha nga makabintaha, oo, alang nianang mga katigayonan nga makadunot sa kalag; kay wala siya mangayo og mga katigayonan gikan kanila, wala usab niya ikahimuot ang pagpaagas og dugo; apan gipatunhay niya ang kalinaw diha sa yuta, ug gitugotan niya ang iyang katawhan nga sila makalingkawas gikan sa tanang matang sa pagkaulipon; busa mitamod sila kaniya, oo, sa hilabihan gayod, nga dili masukod.

41 Ug nahitabo nga nagtudlo sila og mga maghuhukom aron momando kanila, o mohukom kanila sumala sa balaod; ug gibuhat kini nila sa tibuok yuta.

42 Ug nahitabo nga si Alma gitudlo nga mahimong unang labaw nga maghuhukom, siya mao usab ang labaw nga pari, ang iyang amahan maoy mitugyan sa katungdanan ngadto kaniya, ug mihatag kaniya og katungod kabahin sa tanang kalihokan sa simbahan.

43 Ug karon nahitabo nga si Alma naglakaw subay sa mga pamaagi sa Ginoo, ug nagsunod siya sa iyang mga sugo, ug siya naghukom sa matarong nga mga paghukom; ug dihay makanunayon nga kalinaw sa tibuok yuta.

44 Ug sa ingon niana nagsugod ang pagmando sa mga maghuhukom sa tibuok yuta sa Zarahemla, taliwala sa tanan nga katawhan kinsa gitawag nga mga Nephita; ug si Alma mao ang una ug labaw nga maghuhukom.

45 Ug karon nahitabo nga ang iyang amahan namatay, nag-edad og kawaloan ug duha ka tuig ang panuigon, nagpakabuhi nga matinumanon sa mga sugo sa Dios.

46 Ug nahitabo nga si Mosiah namatay usab, sa ikakatloan ug tulo nga tuig sa iyang paghari, nag-edad og kan-oman ug tulo ka tuig ang panuigon; mikabat ang tanan og lima ka gatos ug siyam ka tuig gikan sa panahon nga si Lehi mibiya sa Jerusalem.

47 Ug sa ingon natapos ang paghari sa mga hari ibabaw sa katawhan ni Nephi; ug sa ingon natapos ang mga adlaw ni Alma, kinsa mao ang magtutukod sa ilang simbahan.