1 Oo, wala ba mag-ingon si Isaias: Kinsa ang mituo sa atong gibalita, ug kang kinsa gipadayag ang gahom sa Ginoo?

2 Kay siya magdako sa iyang presensya sama sa usa ka linghod nga tanom, ug sama sa usa ka gamot gikan sa uga nga yuta; siya walay madanihong panagway o kaambongan; ug kon makita nato siya walay katahom nga siya angay natong tinguhaon.

3 Gitamay siya ug gisalikway sa mga tawo; tawo nga adunay mga kasub-anan, ug sinati sa kagul-anan; ug kita milingiw sa atong mga nawong gikan kaniya; gitamay siya, ug kita wala motahod kaniya.

4 Tinuod gayod nga gipas-an niya ang atong mga kagul-anan, ug gidala ang atong mga kasub-anan; bisan pa man, ato siyang giisip nga dinaog-daog, sinilotan sa Dios, ug sinakit.

5 Apan gisamaran siya alang sa atong mga kalapasan, gibun-og siya alang sa atong mga pagkadaotan; ang kastigo alang sa atong kalinaw iyang giantos; ug pinaagi sa iyang mga labod kita naayo.

6 Tanan kita, sama sa karnero, nahisalaag; ang matag usa kanato nag-iyahay sa kaugalingong agianan; ug ang Ginoo mitugot nga siya ang mopas-an sa mga sayop nga binuhatan natong tanan.

7 Gilisodlisod siya, ug gisakit siya, bisan pa niana wala siya mobuka sa iyang ba-ba; gidala siya sama sa usa ka nati nga karnero ngadto sa ihawan, ug sama sa karnero nga dili makatingog atubangan sa iyang magtutupi sa maong paagi wala siya mobuka sa iyang ba-ba.

8 Gipagawas Siya gikan sa bilanggoan ug gikan sa hukmanan; ug kinsa ang moangkon nga iyang kaliwat? Kay giwagtang siya gikan sa yuta sa mga buhi; tungod sa mga kalapasan sa akong katawhan gidaogdaog siya.

9 Ug namatay siya kauban sa mga daotan, ug nakig-ambit sa lubnganan sa adunahan sa iyang pagkamatay; kay siya wala makahimo og daotan, gani walay bisan unsa nga panglimbong sa iyang ba-ba.

10 Bisan pa niana gikahimuot sa Ginoo ang pagbun-og kaniya; mitugot siya kaniya nga magsubo; sa panahon nga kamo mohimo sa iyang kalag nga usa ka halad alang sa sala iyang makita ang iyang binhi, lugwayan niya ang iyang mga adlaw, ug ang kabubut-on sa Ginoo mouswag sa iyang kamot.

11 Makita niya ang pag-antos sa iyang kalag, ug malipay; pinaagi sa iyang kahibalo ang akong matarong nga sulugoon mohatag og kaangayan sa daghan; kay siya ang mopas-an sa ilang mga sayop nga binuhatan.

12 Busa siya akong gahinan og bahin sa mga bantogan, ug bahinon niya ang mga nailog ngadto sa mga kusgan; tungod kay gibu-bo niya ang iyang kalag ngadto sa kamatayon; ug gilakip siya sa mga malapason; ug gipas-an niya ang mga sala sa daghan, ug nangamuyo alang sa mga malapason.