“Marso 2–8. 2 Nephi 31–33: ‘Kini Mao ang Agianan,’” Dali, Sunod Kanako—Alang sa Primary: Basahon ni Mormon 2020 (2020)
“Marso 2–8. 2 Nephi 31–33,” Dali, Sunod Kanako—Alang sa Primary: 2020
Si Kristo Nagtudlo sa Iyang mga Disipulo, ni Justin Kunz
Marso 2–8
2 Nephi 31–33
“Kini Mao ang Agianan”
Sugdi ang imong pagpangandam pinaagi sa pagbasa sa 2 Nephi 31–33. Tinguhaa ang giya sa Espiritu kon unsay itudlo ngadto sa mga bata. Kini nga outline makahatag kanimo og mga ideya.
Irekord ang Imong mga Impresyon
Dapita ang Pagpaambit
Tungod kay si Nephi mitudlo mahitungod sa bunyag ni Kristo, hangyoa ang mga bata sa pagpaambit og usa ka butang nga ilang nakat-unan mahitungod sa bunyag. Mahimo usab silang mopaambit og mga hunahuna og mga pagbati mahitungod sa ilang kaugalingong bunyag o sa mga bunyag sa mga higala o mga sakop sa pamilya.
Itudlo ang Doktrina: Mas Gagmay nga mga Bata
Si Jesukristo mitudlo kanako unsaon sa pagbalik ngadto sa Langitnong Amahan.
Si Nephi mitudlo nga ang pagsunod sa ehemplo ug mga pagtulun-an sa Manluluwas mao lamang ang paagi aron “maluwas diha sa gingharian sa Dios” (2 Nephi 31:21).
Posible nga mga Kalihokan
-
Ipakita ang litrato diha sa outline niini nga semana sa Dali, Sunod Kanako—Alang sa mga Indibidwal ug mga Pamilya samtang imong i-summarize ang istorya sa bunyag ni Jesus (tan-awa sa 2 Nephi 31:4–13). Ipasabut nga ang bunyag maoy usa ka lakang diha sa dalan balik ngadto sa pagpuyo uban sa Langitnong Amahan. Dapita ang usa ka tawo kinsa bag-o lang nabunyagan sa pagsulti sa mga bata kon unsa ang iyang gibati mahitungod sa bunyag.
-
Ipasabut nga si Jesukristo mitudlo kanato kon unsay gikinahanglan natong buhaton aron makabalik ngadto Kaniya human kita mamatay. Pagdrowing og dalan diha sa pisara, ug butangi og hulagway ni Kristo sa tumoy niini. Hatagi ang mga bata og mga hulagway nga nagrepresentar sa mga elemento sa doktrina ni Kristo (hugot nga pagtuo kang Kristo, paghinulsol, bunyag, gasa sa Espiritu Santo, ug paglahutay hangtud sa katapusan). Tabangi sila sa pagbutang sa mga hulagway diha sa dalan.
-
Tabangi ang mga bata nga makat-on sa ikaupat nga artikulo sa hugot nga pagtuo. Kantaha og dungan ang usa ka kanta mahitungod sa usa sa unang mga baruganan sa ebanghelyo, sama sa “Hugot nga Pagtuo,” “Kon Ako Bunyagan,” o “Pilia ang Matarung nga Paagi” (Songbook sa mga Bata, 50–51, 53, 82–83).
Mahimo akong magbusog sa mga pulong ni Kristo.
Sa unsang paagi ang imong mga kasinatian kalabut sa “pagbusog sa mga pulong ni Kristo” (2 Nephi 32:3) makatabang sa mga bata nga makasabut niini nga mga pulong?
Posible nga mga Kalihokan
-
Hangyoa ang mga bata sa pagngalan og pipila sa ilang paborito nga mga pagkaon, ug dapita sila nga i-aksyon kon unsaon nila aron mabusog niini. Basaha ang 2 Nephi 32:3, ug hangyoa ang mga bata sa pagpaminaw sa unsay giingon ni Nephi nga kinahanglang magbusog kita niini. Unsay ipasabut sa pagbusog diha sa mga kasulatan? Ipasabut nga ang mga kasulatan maoy usa ka dapit diin atong makit-an ang mga pulong ni Kristo.
-
Isulat ang mga pulong nga Dios ug Ginoo diha sa pisara. Dapita ang mga bata sa pagpakli ngadto sa usa ka pahina sa kasulatan ug sa pagpangita niini nga mga pulong. Hatagi sila og tabang kon gikinahanglan. Ipamatuod nga samtang mobasa kita sa mga kasulatan, makakat-on kita mahitungod sa Dios.
Gusto sa Langitnong Amahan nga mag-ampo ako kanunay.
Kini nga mga bersikulo makadasig sa mga bata sa paghimo sa pag-ampo nga parte sa ilang inadlaw-adlaw nga kinabuhi.
Posible nga mga Kalihokan
-
Pangutan-a ang mga bata kon kanus-a sila mag-ampo. Mag-ampo ba sila sa buntag? sa gabii? sa dili pa mokaon? Tabangi ang mga bata sa paghunahuna og mga aksyon aron mapakita kon kanus-a kita mahimong mag-ampo, sama kon momata na kita, matulog, ug mokaon—o sa bisan unsang panahon. Basaha ngadto kanila ang una o duha ka linya gikan sa 2 Nephi 32:9, ug hatagig gibug-aton ang mga pulong nga “mag-ampo sa kanunay.”
-
Pangutan-a ang mga bata kon unsaon nila sa pag-ampo. Unsa ang ilang buhaton sa ilang mga ulo, mga kamot, ug uban pa? Unsa nga mga matang sa mga butang ang ilang isulti? Hangyoa sila sa paghunahuna nga dili ka kamao mag-ampo, ug patudloa sila nimo. Nganong gusto man sa Langitnong Amahan nga mag-ampo kita?
Mahimo kitang makigsulti sa Dios pinaagi sa pag-ampo.
Itudlo ang Doktrina: Mas Dagko nga mga Bata
Si Jesukristo mitudlo kanako unsaon sa pagbalik ngadto sa Langitnong Amahan.
Makabalik kita sa Dios human niini nga kinabuhi pinaagi sa pagsunod sa doktrina nga gitudlo ni Jesukristo: hugot nga pagtuo diha kang Kristo, paghinulsol, bunyag, ang gasa sa Espiritu Santo, ug paglahutay hangtud sa katapusan.
Posible nga mga Kalihokan
-
Ipakita ang hulagway diha sa outline niini nga semana sa Dali, Sunod Kanako—Alang sa mga Indibidwal ug mga Pamilya, ug hangyoa ang mga bata sa pagpaambit sa unsay ilang nahibaloan mahitungod sa bunyag ni Jesus (tan-awa sa Mateo 3:13–17). Ibutang ang mosunod nga mga pulong diha sa pisara nga dili magsunod: Si Jesus misaksi sa Amahan nga Siya magmasulundon ngadto Kaniya. Dapita ang mga bata sa pagbasa sa 2 Nephi 31:7 isip tibuok klase ug ibutang ang mga pulong sa hustong pagkahan-ay.
-
Pangutan-a ang mga bata kon unsay ilang isulti sa tawo nga nangandam nga magpabunyag, ug tabangi sila sa pagtigum sa ilang tambag ngadto sa yano nga mga kard nga mahatag nila sa usa ka tawo. Unsaon nato sa pagpadayon sa pagsunod sa ehemplo ni Jesus human kita mabunyagan?
-
Ipasabut nga ang doktrina ni Kristo naglakip sa mga butang nga gitudlo ni Jesukristo nga kinahanglan natong buhaton aron makabalik ngadto sa Langitnong Amahan. Isulat sa managlahi nga mga panid sa papel ang hugot nga pagtuo kang Kristo, paghinulsol, bunyag, ang gasa sa Espiritu Santo, ug paglahutay hangtud sa katapusan, ug ikatag kini libut sa kwarto. Basaha sa mga bata ang 2 Nephi 31:11–19, ug dapita ang mga bata nga magpuli-puli sa pag-ambak gikan sa usa ka papel ngadto sa laing papel samtang madunggan nila nga masulti kini nga mga baruganan. Tabangi sila sa paghunahuna og usa ka kasinatian sa matag baruganan nga aduna sila.
Mahimo akong magbusog sa mga pulong ni Kristo.
Nganong kinahanglan mang masabtan sa mga bata ang kaimportante sa pagbusog diha sa mga pulong ni Kristo?
Posible nga mga Kalihokan
-
Hangyoa ang mga bata sa paghunahuna og usa ka kumbira. Unsa nga pagkaon ang gusto nila nga maanaa didto? Unsa ang una nilang kaonon? Dayon dapita sila sa paghunahuna kon unsa ang gipasabut sa pagbusog diha sa mga kasulatan samtang imong basahon ang 2 Nephi 32:3. Nganong migamit man si Nephi sa pulong nga pagbusog aron sa pagtudlo kanato unsaon nato sa pagtuon sa pulong sa Dios? Nganong wala man lang siya moingon nga pagbasa? Unsay ipasabut sa pagbusog diha sa mga kasulatan? Ipaambit sa mga bata ang mga panalangin nga imong nadawat samtang nagbusog ka diha sa mga kasulatan.
-
Kompletuha ang pahina sa kalihokan uban sa mga bata, ug dapita sila sa paghimo og tumong sa pagbuhat og bisan usa lang ka butang aron magpakabusog diha sa mga kasulatan niining semanaha.
Gusto sa Langitnong Amahan nga mag-ampo ako kanunay.
Ang kaaway nagtintal kanato nga dili mag-ampo. Ikonsiderar kon unsaon nimo sa pagtabang ang mga bata sa pagbatok niini nga tintasyon ug nga “mag-ampo sa kanunay” (2 Nephi 32:9).
Posible nga mga Kalihokan
-
Pagpili og hugpong sa mga pulong mahitungod sa pag-ampo gikan sa 2 Nephi 32:8–9, isulat kini diha sa pisara, ug tabuni ang matag pulong og piraso sa papel. Dapita ang mga bata nga magpuli-puli sa pagtangtang og usa ka papel matag higayon hangtud nga makatag-an na sila kon unsa ang hugpong sa mga pulong.
-
Basaha og dungan ang 2 Nephi 32:8–9, ug hangyoa ang mga bata sa pagpaambit sa unsay ilang nakat-unan mahitungod sa pag-ampo gikan niini nga mga bersikulo. Unsa ang gipasabut sa “mag-ampo sa kanunay”? (bersikulo 9). Unsaon nato ni sa paghimo?
-
Unsa ang makahimo sa usa ka tawo nga dili ganahang mag-ampo? Pagpaambit og kasinatian sa dihang nag-ampo ka bisan og dili ka ganahan nga mobuhat niini. Unsay imong gibati pagkahuman? Dapita ang usa ka bata sa pagbasa sa ikaduhang katunga sa 2 Nephi 32:8, ug hatagi ang mga bata og panahon sa pagpamalandong niini. Nganong dili man gusto ni Satanas nga mag-ampo kita? Unsaon nato sa pagpahinumdom sa atong kaugalingon nga mag-ampo bisan kon dili kita ganahan nga mobuhat niini?
Awhaga ang Pagkat-on diha sa Panimalay
Awhaga ang mga bata sa pagpangita og usa ka tawo—usa ka higala, usa ka igsoon, o laing sakop sa pamilya—nga matudloan nila unsaon sa pag-ampo.
Pagpalambo sa Atong Pagtudlo
Ang mga bata aktibo. Dapita ang mga bata sa pag-aksyon og mga istorya sa kasulatan ug mga kanta. Gamita ang ilang aktibo nga mga kinaiya aron sa pagpalambo sa pagkat-on. (Tan-awa sa Pagtudlo sumala sa Pamaagi sa Manluluwas, 25–26.)