“Marso 2–8. 2 Nephi 31–33: ‘Kini Mao ang Agianan,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Marso 2–8. 2 Nephi 31–33,” Dali, Sunod Kanako—Alang sa mga Indibidwal ug mga Pamilya: 2020
Si Kristo Nagtudlo sa Iyang mga Disipulo, ni Justin Kunz
Marso 2–8
2 Nephi 31–33
“Kini Mao ang Agianan”
Kini nga outline nagsugyot og mga baruganan nga imong makita nga makahuluganon sa 2 Nephi 31–33. Apan ang labing importanting mga butang nga imong makat-unan sa imong pagtuon moabut gikan sa mga paghung-hung sa Espiritu. Tinguhaa kini nga giya, ug irekord ang mga pag-aghat nga moabut.
Irekord ang Imong mga Impresyon
Lakip sa katapusang narekord nga mga pulong ni Nephi, makita nato kini nga pamahayag: “Ang Ginoo misugo kanako, ako kinahanglan gayud nga motuman” (2 Nephi 33:15). Ingon og kini haum nga summary sa kinabuhi ni Nephi. Gitinguha niya ang kabubut-on sa Ginoo ug maisugong naningkamot sa pagsunod niini—bisan og kana nagpasabut sa pagrisgo sa iyang kinabuhi aron makuha ang tumbaga nga mga palid gikan ni Laban, paghimo og barko ug pagtabok sa dagat, o matinud-anong nagtudlo sa doktrina ni Kristo uban sa ka yano ug gahum. Si Nephi makasulti nga madanihon sa panginahanglan nga “mopadayon sa unahan uban ang pagkamakanunayon kang Kristo,” sa pagsubay sa “higpit ug pig-ot nga dalan nga mopadulong sa kinabuhi nga dayon” (2 Nephi 31:20, 18), tungod kay mao kana ang dalan nga iyang gisubay. Nasayud siya pinaagi sa kasinatian nga kini nga dalan, bisan og malisud usahay, makapalipay usab, ug nga “walay lain nga agianan ni ngalan nga gihatag ubos sa langit diin ang tawo maluwas diha sa gingharian sa Dios” (2 Nephi 31:21).
Mga Ideya alang sa Personal nga Pagtuon sa Kasulatan
Si Jesukristo ug ang Iyang doktrina mao lamang ang agianan ngadto sa kinabuhing dayon.
Kon kinahanglan nimong i-summarize ang dalan ngadto sa kinabuhing dayon sa pipila lang ka pulong, unsay imong ikasulti? Si Nephi, sa iyang kinaiya nga direkta ug yano, mihimo niining paagiha: hugot nga pagtuo diha kang Kristo, paghinulsol, bunyag, pagdawat sa gasa sa Espiritu Santo, ug paglahutay hangtud sa katapusan. Human sa imong pagtuon sa mga pagtulun-an ni Nephi sa 2 Nephi 31–32, ikonsiderar unsaon nimo sa pagpasabut niini ngadto sa usa ka tawo sa imong kaugalingong mga pulong. Hunahunaa sa unsa nga paagi nga ang pagsunod niini nga mga pagtulun-an nakapanalangin kanimo. Mahimo nimong ikonsiderar ang mga pagtulun-an ni Nephi sa 2 Nephi 31:18–20 ug timbang-timbangon ang imong kaugalingong mga paningkamot sa “pagpadayon sa unahan” subay sa dalan sa ebanghelyo.
Tan-awa usab sa 3 Nephi 11:32–39; 27:13–22; D. Todd Christofferson, “Ang Doktrina ni Kristo,” Liahona, Mayo 2012, 86–90; Brian K. Ashton, “Ang Doktrina ni Kristo,” Liahona, Nob. 2016, 106–9.
Ang pagsunod sa mga pagtulun-an ni Jesukristo mogiya nato ngadto sa kinabuhing dayon.
Gipakita ni Jesukristo ang hingpit nga ehemplo sa pagkamasulundon sa dihang gibunyagan Siya.
Bisan kon ang imong bunyag nahitabo kagahapon o 80 na ka tuig ang milabay, importante kaayo kini nga higayon—ikaw misulod sa tibuok kinabuhi nga pakigsaad sa pagsunod ni Jesukristo. Hunahunaa ang imong bunyag samtang imong basahon ang mahitungod sa bunyag sa Manluluwas sa 2 Nephi 31:4–13. Ngano nga ang Manluluwas gibunyagan? Sa unsa nga paagi nga ang mga rason nga Siya gibunyagan susama sa mga rason nga ikaw gibunyagan? Unsay imong gibuhat karon sa pagpadayon sa pagsunod sa ehemplo sa Manluluwas sa pagkamasulundon?
Ang ordinansa sa sakrament usa ka sinemana nga oportunidad alang kanimo sa pagpasalig pag-usab sa pagsunod ni Jesukristo. Sa sunod higayon nga ikaw moambit sa sakrament, ikonsiderar ang 2 Nephi 31:13 ug mamalandong sa imong determinasyon sa “pagsunod sa Anak, uban sa hingpit nga katuyoan sa kasingkasing” ug sa imong pagkaandam “sa pagdala diha kaninyo sa ngalan ni Kristo.”
Ang Espiritu Santo mopakita kanako unsay akong buhaton.
Kon ang bunyag ug kumpirmasyon mao “ang ganghaan pinaagi diin kinahanglan [kita] mosulod” sa higpit ug pig-ot nga dalan (2 Nephi 31:17), unsay atong buhaton ko naa na kita diha sa dalan? Mao kana ang gikahibudngan sa mga katawhan ni Nephi (tan-awa sa 2 Nephi 32:1). Unsa nga mga tubag ang gihatag ni Nephi sa 2 Nephi 31:19–20 ug kapitulo 32? Unsa nga mga tubag ang imong nakita alang sa imong kaugalingon?
Tan-awa usab sa David A. Bednar, “Dawata ang Espiritu Santo,” Liahona, Nob. 2010, 94–97; “Holy Ghost,” Gospel Topics, topics.ChurchofJesusChrist.org.
Ang Basahon ni Mormon nag-awhag sa tanan nga motuo ni Kristo.
Sa 2 Nephi 33, sa pagtapos ni Nephi sa iyang mga sinulat, iyang gipasabut ang mga rason ngano nga siya nagsulat. Unsa nga mga rason ang imong nakita niini nga kapitulo? Pamalandungi unsa ang imong nabasahan sa 1 Nephi ug 2 Nephi ug sa mubo nga mga sulat nga imong gihimo. Sa unsa nga paagi nga ang mga istorya ug mga pagtulun-an nakatuman sa mga katuyoan ni Nephi alang kanimo? Pananglitan, sa unsa nga paagi nga kini nakaawhag kanimo sa “pagtuo diha ni [Kristo], ug sa paglahutay hangtud sa katapusan”? (bersikulo 4). Ikonsiderar ang pagrekord niini nga mga kasinatian o pagpakigbahin niini uban sa usa ka sakop sa pamilya o higala.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka ideya.
2 Nephi 31:5–13
Aduna bay mga sakop sa pamilya ang nag-andam alang sa bunyag, o aduna bay bag-o lang nabunyagan? Tingali mahimo silang mopakigbahin ngano nga sila nakahukom nga magpabunyag. Sumala sa mga pagtulun-an ni Nephi, unsa ang pipila ka mga rason nga kita kinahanglan nga magpabunyag? Unsa ang pipila ka mga panalangin ang atong madawat kon kita mabunyagan?
2 Nephi 31:17–21
Unsaon nimo sa pagtabang ang imong pamilya nga makasabut sa sambingay ni Nephi mahitungod sa “higpit ug pig-ot nga dalan”? (2 Nephi 31:18). Pananglitan, mahimo kamong magtinabangay aron magdrowing og litrato sa dalan nga gihulagway ni Nephi sa 2 Nephi 31:17–21, magbutang niini sa mga butang nga kinahanglan natong buhaton aron makasulod sa dalan ug magpadayon diha niini. Giunsa kita pagtabang sa Manluluwas nga mouswag diha sa dalan?
2 Nephi 31:20
Kon gusto ka nga motabang sa imong pamilya nga mas makasabut unsaon nga makalahutay hangtud sa katapusan, ang pahina 6 sa Isangyaw ang Akong Ebanghelyo adunay makatabang nga kahulugan; mao usab ang mensahe ni Elder Dale G. Renlund “Ang mga Santos sa Ulahing mga Adlaw Magpadayon sa Pagpaningkamot” (Liahona, Mayo 2015, 56–58).
2 Nephi 32:8–9
Aron matabangan ang mga sakop sa pamilya nga makasabut nga kita “makaampo kanunay,” ikaw mahimong maglista og mga sirkumstansya diin kita mahimong mag-ampo (o magdrowing og mga litrato nga magrepresentar niini). Dayon ang imong pamilya mahimong mokanta og awit nga nagtudlo mahitungod sa pag-ampo, sama sa “Did You Think to Pray?” (Hymns, nu. 140), nga mopuli sa pipila sa mga pulong sa kanta sa mga pulong gikan sa ilang mga lista. Sa unsa nga paagi kita mapanalanginan sa Ginoo kon kita mag-ampo kanunay?
2 Nephi 33:1–2
Unsa kahay makaingon sa mga tawo nga “mopatig-a sa ilang mga kasingkasing batok sa Espiritu Santo”? Unsaon nato sa pagsiguro nga ang Espiritu Santo adunay “dapit diha [kanato]”?
Alang sa dugang nga mga ideya sa pagtudlo sa mga bata, tan-awa kini nga latid [outline] karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Sunda ang Manluluwas. Makatabang ang pagtuon kon giunsa pagtudlo sa Manluluwas—ang mga pamaagi nga Iyang gigamit ug ang mga butang nga Iyang gisulti. Apan ang gahum ni Jesus sa pagtudlo ug pagbayaw sa uban sa katapusan naggikan kon si kinsa Siya ug sa unsa nga paagi Siya nagpakabuhi. Kon mas makugihon ka nga maningkamot nga magpakabuhi sama ni Jesukristo ug mosalig sa Iyang maulaong gahum, mas natural ka nga motudlo subay sa Iyang pamaagi.
Aron Matuman ang Tanang Pagkamatarung, ni Liz Lemon Swindle