Si Lehi nagtan-aw sa Liahona

Si Lehi ug ang Liahona, ni Joseph Brickey

Enero 27–Pebrero 2

1 Nephi 16–22

“Ako Moandam og Agianan alang Kaninyo”

Samtang ikaw magtuon sa 1 Nephi 16–22, pangitaa ang mga tudling nga nakapadani nimo. Ang pipila ka tawo ganahan nga mo-highlight sa maong mga bersikulo sa ilang mga kasulatan; ang uban mosulat og mga pahinumdom diha sa kilid. Ikonsiderar unsaon nimo sa pagrekord sa mga impresyon nga imong madawat.

Irekord ang Imong mga Impresyon

Samtang ang pamilya ni Lehi mipanaw padulong sa gisaad nga yuta, ang Ginoo mihatag niini nga saad: “Ako moandam og agianan alang kaninyo, kon kini mao nga kamo mohupot sa akong mga sugo” (1 Nephi 17:13). Klaro, nga ang saad wala magpasabut nga ang panaw sayon—ang mga sakop sa pamilya misupak, mga pana nabali, ug ang mga tawo nakigbisog ug namatay, ug kinahanglan pa sila mobuhat og barko gikan sa mga materyal nga wala pa mahimo. Hinoon, sa dihang ang pamilya nag-atubang og kalisud o ingon og imposible nga mga buluhaton, si Nephi nakaamgo nga ang Ginoo dili halayo. Nasayud siya nga ang Dios “moamuma [sa matinud-anon], ug molig-on kanila, ug mohatag og mga paagi diin sila makatuman sa butang diin siya misugo kanila” (1 Nephi 17:3). Kon ikaw natingala ngano nga ang dili maayo nga mga butang mahitabo sa buotan nga mga tawo sama ni Nephi ug sa iyang pamilya, ikaw makakita og mga pagpasabut niini nga mga kapitulo. Apan tingali mas importante, ikaw makakita unsa ang gibuhat sa maayo nga mga tawo kon mahitabo ang dili maayo nga mga butang.

icon sa personal nga pagtuon

Mga Ideya alang sa Personal nga Pagtuon sa Kasulatan

1 Nephi 16–18

Kon ako motuman sa mga sugo, ang Dios motabang nako pag-atubang sa mga hagit.

Mga kapitulo 16–18 sa 1 Nephi naghulagway sa pipila ka hagit nga giatubang sa pamilya ni Nephi, lakip sa pag-atubang sa nabali nga pana (tan-awa sa 1 Nephi 16:17–32), sa kamatayon ni Ishmael (tan-awa sa 1 Nephi 16:34–39), pagbuhat og barko (tan-awa sa 1 Nephi 17:7–16; 18:1–4), ug panagbingkil sa pamilya (tan-awa sa 1 Nephi 18:9–22). Sa unsa nga paagi nga lahi ang reaksyon ni Nephi niini nga mga hagit gikan sa reaksyon sa pipila ka sakop sa iyang pamilya? Unsa ang mga sangputanan niini nga mga reaksyon?

Tingali makatabang ang pagrekord unsay imong makita sa lamesa nga dunay ulohan nga sama niini: “Hagit,” “Reaksyon ni Nephi,” “Mga Reaksyon sa Uban,” ug “Mga Resulta.” Ngano kaha nga si Nephi nagpabilin nga matinud-anon kaayo bisan kon dili ang uban? Palandunga kon sa unsa nga paagi nga ang ehemplo ni Nephi ug sa iyang pamilya makatabang nimo sa imong mga hagit.

Tan-awa usab sa video nga may kalabutan sa koleksyon sa Book of Mormon Videos sa ChurchofJesusChrist.org o sa Gospel Library app.

1 Nephi 16:10–16, 23–31; 18:11–22

Ang Ginoo naggiya nako pinaagi sa gagmay ug yano nga mga butang.

Sa dihang ang Dios migiya sa pamilya ni Lehi ngadto sa kamingawan, wala Siya mohatag nila og detalyado nga plano sa pagpanaw padulong sa gisaad nga yuta. Apan gihatagan Niya si Lehi sa Liahona sa paggiya sa iyang pamilya kada adlaw padulong sa ilang destinasyon. Unsa ang gihatag sa Langitnong Amahan kanimo sa paghatag og giya ug direksyon? Unsa kaha ang gipasabut sa “pinaagi sa gagmay nga mga paagi ang Ginoo makapahinabo sa mahinungdanon nga mga butang”? (1 Nephi 16:29).

Samtang magbasa ka sa 1 Nephi 16:10–16, 23–31 ug 18:11–22, ikonsiderar ang paghimo og lista sa mga baruganan nga naghulagway kon giunsa sa Dios paggiya ang Iyang mga anak (pananglitan, ang 1 Nephi 16:10 makatudlo nga ang Dios usahay mogiya nato sa wala damha nga mga paagi). Unsa ang imong mga kasinatian niini nga mga baruganan?

Tan-awa usab sa Alma 37:7, 38–47; Doktrina ug mga Pakigsaad 64:33–34.

Si Lehi naggamit sa Liahona

Apan Kon Kamo Andam Dili Kamo Mahadlok, ni Clark Kelley Price

1 Nephi 19:23–24; 20–22

Ako “mipahisama sa tanan nga mga kasulatan” sa akong kaugalingon.

Si Isaias misulat ngadto sa tanang anak sa Israel, ug nakita ni Nephi nga kini naglakip ilabi na sa iyang kaugalingong pamilya—ug kini naglakip kanimo (tan-awa sa 1 Nephi 19:23–24). Kabahin sa mga kinutlo ni Nephi sa Isaias, si Presidente Henry B. Eyring miingon , “Gibasa nako ang mga pulong ni Isaias … nagtuo nga gikuha ni Nephi ang mga bahin ni Isaias nga ako, wala mabalaka sa imahe, makadala direkta ngadto sa akong mga kasingkasing ingon og ang Ginoo ang nagsulti kanako” (“The Book of Mormon Will Change Your Life ,” Liahona, Peb. 2004, 10).

Sa mga pulong ni Presidente Eyring nga anaa sa hunahuna, ikonsiderar ang mga pangutana sama sa mosunod samtang ikaw magbasa sa mga kapitulo 20–22:

1 Nephi 20:1–9.Unsa nga mga pulong niini nga mga bersikulo ang naghulagway sa mga anak sa Israel? Sa unsa nga paagi kini naghulagway nila ni Laman ug Lemuel? Unsa nga mga pasidaan ug kagamitan ang imong makita alang sa imong kaugalingon?

1 Nephi 20:17–22.Sa unsa nga paagi ang Ginoo migiya sa mga anak sa Israel? Giunsa Niya paggiya ang pamilya ni Lehi? Giunsa Niya paggiya kanimo?

Unsa pa ang imong nakita sa 1 Nephi 20–22 nga mipabati nimo nga ingon og ang Ginoo nakigsulti kanimo? Sa unsa nga paagi nga ang komentaryo ni Nephi sa kapitulo 22 makatabang nimo nga makasabut sa mga panagna ni Isaias?

1 Nephi 21

Kinsa ang balay ni Israel ug ang mga Hentil?

Ang balay ni Israel mao ang mga kaliwat sa propeta sa Daang Tugon nga si Jacob, kinsa gihatagan sa Ginoo sa ngalan nga Israel (tan-awa sa Genesis 32:28; 35:10; tan-awa usab sa Giya ngadto sa mga Kasulatan, “Israel”). Ang Ginoo mihimo og piho nga mga pakigsaad uban ni Israel, ug ang iyang mga kaliwatan giisip nga katawhan sa pakigsaad. Hinoon, paglabay sa mga henerasyon, daghan kanila ang mitalikod gikan sa Ginoo ug sa katapusan nagkatag sa tibuok yuta.

Ang termino nga mga Hentil niini nga mga tudling nagpasabut sa mga tawo nga wala pay ebanghelyo (tan-awa sa Giya ngadto sa mga Kasulatan, “Hentil”). Gitudlo ni Isaias nga sa ulahing mga adlaw ang mga Hentil hatagan sa ebanghelyo ug mahimong instrumento sa pagtudlo ug pagpundok sa balay ni Israel (tan-awa sa 1 Nephi 21:22; 22:8–12; tan-awa usab sa Isaias 60; 66:18–20).

icon sa pagtuon sa pamilya

Mga Ideya alang sa Pamilya nga Pagtuon sa Kasulatan ug Family Home Evening

Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka ideya.

1 Nephi 17:1–6, 17–22

Tingali ang imong pamilya makatandi sa istorya ni Nephi sa panaw sa kamingawan (tan-awa sa 1 Nephi 17:1–6) sa istorya sa iyang mga igsoong lalaki (tan-awa sa 1 Nephi 17:17–22). Ngano kaha nga managlahi ang ilang nakita sa sama nga mga panghitabo? Unsa ang atong makat-unan gikan ni Nephi mahitungod sa pagbaton og matinud-anong panglantaw?

1 Nephi 17:17–22; 18:9–16

Unsa ang mga sangputanan sa kasina, panagbingkil, ug pagbagulbol diha sa pamilya? Unsaon nato sa pagbuntog niini nga mga problema?

1 Nephi 19:22–24

Gipahisama ni Nephi ang mga kasulatan ngadto sa iyang pamilya “nga kini unta mahimo alang sa [ilang] kaayohan ug sa atong pagkat-on” (1 Nephi 19:23). Adunay daghang mga istorya sa 1 Nephi 16–18 nga ikapahisama sa imong pamilya. Tingali mahimo ninyong i-drama ang usa niini nga mga istorya ug hisgutan kon sa unsa nga paagi kini magamit sa imong pamilya.

1 Nephi 21:14–16

Sa unsa nga paagi nga ang mensahe niini nga mga bersikulo makatabang og usa ka tawo kinsa mibati nga nakalimtan?

Alang sa dugang nga mga ideya sa pagtudlo sa mga bata, tan-awa kini nga latid [outline] karong semanaha diha sa Dali, Sunod Kanako—Alang sa Primary.

Pagpalambo sa Personal nga Pagtuon

Pangayo og tabang sa Ginoo. Ang mga kasulatan gihatag pinaagi sa pagpadayag, ug nagkinahanglan kita og pagpadayag aron tinud-anay nga makasabut niini. Ang Ginoo misaad, “Kon kamo, … mangayo kanako pinaagi sa hugot nga pagtuo, … sa pagkatinuod kini nga mga butang ipahibalo nganha kaninyo” (1 Nephi 15:11).

Si Nephi ug ang iyang pamilya sakay sa barko

Sila Mitratar Kanako uban sa Hilabihan nga Kabangis, ni Walter Rane