“Enero 20–26. 1 Nephi 11–15: ‘Gisangkapan sa Katarung ug uban sa Gahum sa Dios,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Enero 20–26. 1 Nephi 11–15,” Dali, Sunod Kanako—Alang sa mga Indibidwal ug mga Pamilya: 2020
Mas Tam-is sa Tanang Matam-is, ni Miguel Angel González Romero
Enero 20–26
1 Nephi 11–15
“Gisangkapan sa Katarung ug uban sa Gahum sa Dios”
Makita ba nimo ang imong kaugalingon sa 1 Nephi 11–15? Unsa nga mga tudling ang labing bililhon kanimo ug sa imong pamilya?
Irekord ang Imong mga Impresyon
Kon ang Dios adunay dakong trabaho nga Iyang ipatrabaho sa Iyang propeta, sa kasagaran mohatag Siya niana nga propeta og usa ka dako nga panan-awon nga motabang kaniya nga makasabut sa mga katuyoan sa Dios alang sa Iyang mga anak. Si Moises nakakita og panan-awon “niini nga yuta, ug sa mga lumulupyo niini, ug usab sa mga langit” (Moises 1:36). Si Apostol Juan nakakita sa kasaysayan sa kalibutan ug sa Ikaduhang Pag-anhi sa Manluluwas (tan-awa sa basahon sa Pinadayag). Si Joseph Smith nakakita sa Amahan ug sa Anak (tan-awa sa Joseph Smith—Kasaysayan 1:17–18). Nakita ni Lehi ang usa ka panan-awon nga nagpakita sa panaw nga kinahanglan nga atong himoon ngadto sa Manluluwas ug sa Iyang gugma.
Sumala sa narekord sa 1 Nephi 11–14, nakita ni Nephi ang pangalagad sa Manluluwas, ang umaabut sa kaliwat ni Lehi didto sa gisaad nga yuta, ug ang kapalaran sa buhat sa Dios sa ulahing adlaw. Kini nga panan-awon nakatabang sa pag-andam ni Nephi alang sa buhat nga naghulat kaniya, ug kini makatabang usab nga ikaw maandam—kay ang Dios adunay buhat alang kanimo sa Iyang gingharian. Ikaw kauban “sa mga santos sa simbahan sa Kordero” nga nakita ni Nephi, “kinsa nagkatibulaag diha sa ibabaw sa tibuok yuta; ug sila gisangkapan sa katarung ug uban sa gahum sa Dios sa dako nga himaya” (1 Nephi 14:14).
Mga Ideya alang sa Personal nga Pagtuon sa Kasulatan
Gipadala sa Dios si Jesukristo isip usa ka pagpahayag sa Iyang gugma.
Aron sa pagtabang ni Nephi nga makasabut sa kahulugan sa kahoy nga nakita sa iyang amahan, ang usa ka anghel mipakita kaniya “sa Anak sa Mahangturong Amahan” (1 Nephi 11:21). Mao nga si Nephi makaingon nga ang kahoy nagrepresentar sa gugma sa Dios. Apan ang panan-awon wala pa mahuman. Samtang ikaw magbasa ug mamalandong sa 1 Nephi 11, unsay imong nakita nga nakatabang kanimo nga makasabut ngano nga si Jesukristo mao ang katapusan nga pagpahayag sa gugma sa Dios?
Aron makat-unan ang ubang mga simbolo sa damgo ni Lehi, tan-awa sa 1 Nephi 11:35–36; 12:16–18; ug 15:21–30.
Tan-awa usab sa Juan 3:16.
Ang Ginoo miandam sa agianan alang sa Pagpahiuli.
Si Nephi dili na makaabut aron makasaksi sa kadaghanan sa unsay iyang nakita sa iyang panan-awon. Ngano kaha nga bililhon alang ni Nephi nga makahibalo niining mga butanga? Ngano nga bililhon alang nimo nga makahibalo niining mga butanga? Tingali mahimo nimo kining ipangutana matag higayon nga ikaw mobasa bahin sa nakita nga panan-awon ni Nephi.
Ania ang pipila ka mga panghitabo nga nakita ni Nephi: ang umaabut sa iyang katawhan (tan-awa sa kapitulo 12), ang pagkolonya sa Amerika ug ang Rebolusyon sa Amerika (tan-awa sa kapitulo 13:12–19), ang Dakong Apostasiya (tan-awa sa kapitulo 13:20–29), ug ang Pagpahiuli sa ebanghelyo (tan-awa sa kapitulo 13:32–42).
Unsa ang “gamhanan ug salawayon nga simbahan” nga nakita ni Nephi?
Si Elder Dallin H. Oaks mipasabut nga ang “gamhanan ug salawayon nga simbahan” nga gihulagway ni Nephi nagrepesentar sa “bisan unsa nga pilosopiya o organisasyon nga supak sa pagtuo sa Dios. Ug ang ‘pagkabihag’ diin maoy gitinguha niini nga ‘simbahan’ nga dad-on ang mga santos dili kaayo pisikal nga pagkapriso kon dili pagkabihag sa sayop nga mga ideya” (“Mobarug isip mga Saksi sa Dios,” Liahona, Mar. 2015, 20).
Kinsa ang tawo nga nakita ni Nephi diin ang Espiritu “migiya sa tawo” nga motabok sa “daghan nga mga katubigan”?
Nakita ni Nephi ang Espiritu Santo nga modasig ni Christopher Columbus sa paghimo sa iyang naila nga biyahe ngadto sa Amerika. Niadtong Marso 14, 1493, si Columbus misulat bahin niini nga biyahe: “Kining mahinungdanon ug kahibulongan nga mga resulta dili nako ikapanghambog … ; kay kanang walay tabang nga hunahuna sa tawo dili makasabut, ang Espiritu sa Dios, gihatag ngadto sa mortal nga tawo, kay ang Dios naanad sa pagpaminaw sa mga pag-ampo sa Iyang mga sulugoon kinsa nahigugma sa Iyang mga lagda bisan sa paghimo sa walay kasiguroan” (The Annals of America [Encyclopedia Britannica, Inc., 1976], 1:5).
Ang mga kasulatan sa ulahing adlaw mipahiuli sa “yano ug bililhon nga mga butang.”
Nakita ni Nephi sa panan-awon nga ang Biblia—nga iyang gihulagway nga “usa ka talaan sa mga Judeo”—adunay “daghan nga yano ug mga bililhon nga mga butang nga gikuha gikan [niini]” (1 Nephi 13:23, 28). Hinoon, nakita usab niya nga ang Dios mopahiuli niining mga butanga pinaagi sa “lain nga mga basahon”—ang Basahon ni Mormon ug ubang kasulatan sa ulahing adlaw (tan-awa sa 1 Nephi 13:39–40). Unsa ang pipila ka bililhon nga mga kamatuoran sa Basahon ni Mormon nga nakatabang nato nga mas makasabut? Sa unsang paagi ang imong kinabuhi lahi tungod kay kini nga yano ug bililhon nga mga butang napahiuli?
Ang Basahon ni Mormon mipahiuli sa mga kamatuoran sa ebanghelyo nga nawala panahon sa Apostasiya.
Tan-awa usab sa “Yano ug Bililhon nga mga Kamatuoran,” Liahona, Mar. 2008, 68–73; Russell M. Nelson, “Ang Basahon ni Mormon: Unsa kaha ang Imong Kinabuhi Kon wala Kini?” Liahona, Nob. 2017, 60–63.
Ang Ginoo motubag kanako kon ako mangutana pinaagi sa hugot nga pagtuo uban sa malumo nga kasingkasing.
Mibati ba ikaw nga wala makadawat og personal nga pagpadayag—nga ang Dios wala makigsulti kanimo? Unsa nga tambag ang gihatag ni Nephi sa iyang mga igsoon nga lalaki sa dihang sila mibati niini? Sa unsa nga paagi nimo magamit ang tambag ni Nephi sa imong kinabuhi, ug unsaon nimo sa paggamit ang iyang tambag sa pagtabang sa uban?
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka ideya.
1 Nephi 11–14
Samtang ang imong pamilya mobasa niini nga mga kapitulo, hunong panagsa ug pangutana og sama niini: Unsa ang nakita ni Nephi sa iyang panan-awon nga tingali nakapalipay kaniya? Unsa kaha ang nakapaguol kaniya? Ngano kaha?
1 Nephi 13:20–42
Aron matabangan ang mga sakop sa pamilya nga makasabut sa bili sa “yano ug bililhon” nga mga kamatuoran sa Basahon ni Mormon, itandi ang klaro nga sinulat nga mensahe sa natuis nga mensahe. Ngano kaha nga ang Langitnong Amahan gusto nga ang Iyang mga kamatuoran matudlo sa klaro nga paagi? Ang mga sakop sa pamilya mahimong magpamatuod sa pipila ka “yano ug bililhon” nga mga kamatuoran nga ilang nakat-unan gikan sa Basahon ni Mormon.
1 Nephi 14:12–15
Ngano nga kita “gisangkapan sa katarung ug uban sa gahum sa Dios” kon kita magpuyo nga matinud-anon sa atong mga pakigsaad uban sa Dios?
1 Nephi 15:8–11
Unsa nga mga kasinatian ang mahimong ipakigbahin sa imong pamilya sa dihang sila “nangutana sa Ginoo”? Unsa man ang atong makat-unan gikan sa ehemplo ni Nephi?
Alang sa dugang nga mga ideya sa pagtudlo sa mga bata, tan-awa kini nga latid [outline] karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Gamita ang mga tabang sa pagtuon. Ang mga footnote, ang Topical Guide, ug ubang mga tabang sa pagtuon naghatag og panabut ngadto sa kasulatan. Pananglitan, unsa ang ikatabang sa footnotes kanimo aron makasabut mahitungod sa 1 Nephi 14:20–21?
Ang Panan-awon ni Nephi kang Maria, ni James Johnson