“Disyembre 30–Enero 5. Pasiuna nga mga pahina sa Basahon ni Mormon: ‘Lain nga tugon ni Jesukristo,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Disyembre 30–Enero 5. Pasiuna nga mga pahina sa Basahon ni Mormon,” Dali, Sunod Kanako—Alang sa mga Indibidwal ug mga Pamilya: 2020
Disyembre 30–Enero 5
Pasiuna nga mga pahina sa Basahon ni Mormon
“Lain nga Tugon ni Jesukristo”
Ang imong pagtuon sa Basahon ni Mormon mapalambo kon ikaw magsugod pinaagi sa pagbasa sa mga pahina nga nag-una sa 1 Nephi. Unsa ang imong nakaplagan nga nakapalig-on sa imong pagpamatuod?
Irekord ang Imong mga Impresyon
Sa dili pa ikaw moabut sa 1 Nephi kapitulo 1, klaro nga ang Basahon ni Mormon dili ordinaryo nga basahon. Ang pasiuna nga mga pahina niini naghulagway sa milabay nga istorya dili sama sa uban—lakip sa mga pagbisita sa mga anghel, sa usa ka karaan nga rekord nga nalubong sa gatusan na ka tuig sa daplin sa bungtod, ug sa usa ka wala mailhi nga mag-uuma nga naghubad sa rekord pinaagi sa gahum sa Dios. Ang Basahon ni Mormon dili lang usa ka kasaysayan sa karaang sibilisasyon sa Amerika. Naglakip kini “sa kahingpitan sa walay katapusan nga ebanghelyo” (pasiuna sa Basahon ni Mormon), ug ang Dios Mismo ang migiya sa pagtungha niini—giunsa kini pagsulat, giunsa kini sa pagpreserbar, ug sa unsa nga paagi kini ania na karon sa atong panahon. Karong tuiga, samtang basahon nimo ang Basahon ni Mormon, pag-ampo mahitungod niini, ug gamita ang mga pagtulun-an niini, imong madapit ang gahum nganha sa imong kinabuhi, ug ikaw mobati sa pag-ingon, sama sa gisulti sa Tulo ka mga Saksi sa ilang pagpamatuod, “Kahibulungan kini sa [akong] mga mata.”
Mga Ideya alang sa Personal nga Pagtuon sa Kasulatan
Ulohang pahina sa Basahon ni Mormon
Ang Basahon ni Mormon makalig-on sa akong pagtuo kang Jesukristo.
Ang ulohan nga pahina sa Basahon ni Mormon naghatag og mas labaw pa kay sa ulohan. Apil sa ubang mga butang, naglista kini sa pipila ka katuyoan niining sagrado nga rekord. Pangitaa kini nga mga katuyoan, ug dayon samtang magtuon ka sa Basahon ni Mormon niining tuiga, pangitaa ang mga tudling nga sa imong pagtuo nakatuman niini nga mga katuyoan. Pananglitan, unsa nga mga tudling ang nakatabang sa pagkombinser nimo “nga si Jesus mao ang Kristo, ang Mahangturon nga Dios”?
Ang Basahon ni Mormon “naglatid sa plano sa kaluwasan.”
Ang plano sa Kaluwasan mao ang plano sa Langitnong Amahan aron matabangan ang Iyang mga anak nga mahimaya, sama Kaniya, ug makasinati og hingpit nga kalipay nga Iyang gibati (tan-awa sa 2 Nephi 2:25–26). Ang Pag-ula ni Jesukristo nakapahimo nga posible niini nga plano, ug ang matag doktrina, ordinansa, pakigsaad, ug sugo nga gihatag sa Dios gitumong sa pagtabang nga matuman ang plano.
Kon kamo gusto nga makasabut sa plano sa kaluwasan, walay laing mas maayo nga basahon kay sa Basahon ni Mormon. Nagpasabut kini sa plano sa Dios—naggamit og lain-laing mga ngalan—labaw sa 20 ka higayon. Atol sa inyong pagtuon niining tuiga, bantayi kanus-a mahisguti ang plano sa Dios o gipasabut ug unsay gisulti sa Basahon ni Mormon mahitungod niini.
Aniay usa ka kalihokan aron makasugod ka. Basaha ang mosunod nga mga tudling, ug ilista ang lain-laing ngalan nga gihatag sa plano sa Dios: 2 Nephi 9:13; 11:5; and Alma 12:32–34; 24:14; 41:2; 42:15–16. Unsa ang gisugyot sa matag usa niini nga mga ngalan nganha kaninyo mahitungod sa plano sa Amahan?
“Ang Pagpamatuod sa Tulo ka mga Saksi”; “Ang Pagpamatuod sa Walo ka mga Saksi”
Ako mahimo nga usa ka saksi sa Basahon ni Mormon.
Ang Espiritu Santo makapamatuod nganha kanimo nga ang Basahon ni Mormon tinuod, bisan og ikaw wala makakita sa bulawan nga mga palid sama sa Tulo ka mga Saksi ug sa Walo ka mga saksi. Sa unsang paagi ang ilang mga pagpamatuod nakapalig-on kanimo? Sa unsa nga paagi ikaw mohatag sa [imong mga ngalan] ngadto sa kalibutan, sa pagsaksi ngadto sa kalibutan” unsay imong nahibaloan sa Basahon ni Mormon? (“Ang Pagpamatuod sa Walo ka mga Saksi”).
“Ang Pagpamatuod ni Propeta Joseph Smith”
Ang pagtungha sa Basahon ni Mormon usa ka milagro.
Kon adunay mangutana kanimo kon diin gikan ang Basahon ni Mormon, unsay imong isulti? Unsaon nimo sa paghulagway sa gahum sa Ginoo sa pagpatungha sa Basahon ni Mormon? Giunsa paghulagway ni Joseph Smith ang pag-abut sa Basahon ni Mormon?
“Ang Pagpamatuod ni Propeta Joseph Smith”
Giunsa paghubad ang Basahon ni Mormon?
Ang Basahon ni Mormon gihubad “pinaagi sa gasa ug gahum sa Dios.” Wala kitay nahibaloan nga daghang detalye mahitungod sa milagroso nga proseso sa paghubad, apan nasayud kita nga si Joseph Smith usa ka manalagna, gitabangan sa mga instrumento nga giandam sa Dios: duha ka sihag nga bato nga gitawag og Urim ug Thummim ug laing bato nga gitawag og bato sa manalagna. Nakita ni Joseph niini nga mga bato ang interpretasyon sa Iningles sa mga karakter diha sa mga palid, ug iyang gibasa og kusog ang hubad samtang ang tigsulat mirekord niini. Ang matag tigsulat ni Joseph mipamatuod nga ang gahum sa Dios makita diha sa paghubad niining sagrado nga buhat.
Tan-awa sa “Book of Mormon Translation” (Gospel Topics, topics.ChurchofJesusChrist.org).
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka ideya.
Ulohang pahina sa Basahon ni Mormon
Tingali ang imong pamilya makasugod og listahan sa mga bersikulo gikan sa Basahon ni Mormon nga nakapalig-on sa imong pagtuo “nga si Jesus mao ang Kristo” ug sa pagdugang niini sa tibuok tuig. Tingali usa usab kini ka maayong panahon sa paghimo og plano sa pamilya sa pagbasa sa Basahon ni Mormon: Kanus-a ug asa kamo magpundok aron magbasa? Unsaon nga makaapil ang matag sakop sa pamilya? Alang sa dugang nga ideya, tan-awa ang “Mga Ideya sa Pagpalambo sa Imong Pamilya nga Pagtuon sa Kasulatan” sa sinugdanan niini nga kapanguhaan.
Pasiuna sa Basahon ni Mormon
Ang tukurang bato mao ang usa ka bangil nga bato sa ibabaw sa arko nga naglig-on sa ubang mga bato. Aron matabangan ang imong pamilya nga makasabut kon sa unsa nga paagi nga ang Basahon ni Mormon mao “ang tukurang bato [sukaranan] sa atong tinuohan,” mahimo kang mohimo o modrowing og arko nga dunay tukurang bato sa ibabaw. Unsay mahitabo sa arko kon tangtangon ang tukurang bato? Unsay mahitabo kon wala nato ang Basahon ni Mormon? Sa unsa nga paagi nga mahimo nato ang Basahon ni Mormon nga tukurang [sukaranang] bato sa atong pagtuo kang Jesukristo?
Ang Basahon ni Mormon mao ang tukurang bato [sukaranan] sa atong tinuohan.
“Ang Pagpamatuod sa Tulo ka mga Saksi”; “Ang Pagpamatuod sa Walo ka mga Saksi”
Ang mga sakop sa imong pamilya makasulat sa ilang kaugalingon pagpamatuod mahitungod sa Basahon ni Mormon, mopirma sa ilang mga ngalan diha niini, ug maghunahuna og mga paagi sa pagpakigbahin sa ilang mga pagpamatuod sa uban.
“Ang Pagpamatuod ni Propeta Joseph Smith”
Sa istorya ni Joseph Smith, unsa nga ebidensya ang atong makita nga ang Dios nalakip sa pagpatungha sa Basahon ni Mormon?
Alang sa dugang nga mga ideya sa pagtudlo sa mga bata, tan-awa kini nga latid [outline] karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Usa ka propetikanhong saad. Si Presidente Russell M. Nelson miingon, “Mosaad ko kaninyo nga kon mamalandong kamo unsay inyong gitun-an [sa Basahon ni Mormon], ang mga bintana sa langit mobukas, ug makadawat kamo sa mga tubag sa inyong mga pangutana ug direksyon sa inyong kinabuhi” (“Ang Basahon ni Mormon: Unsa Kaha ang Imong Kinabuhi Kon Wala Kini?” Liahona, Nob. 2017, 62–63).
Si Moroni Mihatag sa Bulawan nga mga Palid, ni Gary L. Kapp