Propetikanhong mga Saad

Ang pagtuon sa Basahon ni Mormon makausab kanimo. Makausab kini sa imong pamilya. Ang mga propeta sa ulahing mga adlaw mihimo og mga saad mahitungod sa gahum sa Basahon ni Mormon sukad nga napahiuli Ang Simbahan ni Jesukristo sa mga Santos sa Ulahing mga Adlaw. Pamalandungi ang mosunod nga mga pamahayag, ug ribyuha kini sa regular nga paagi. Asa niini nga mga panalangin ang gusto nimong madawat? Samtang magbasa ka sa Basahon ni Mormon, ikonsiderar ang pagrekord ug pagpaambit sa uban kon sa unsang paagi natuman kini nga mga saad sa imong kinabuhi.

Propeta Joseph Smith: “Ako misulti sa mga kaigsoonan nga ang Basahon ni Mormon mao ang labing tukma sa bisan hain nga basahon dinhi sa yuta, ug ang sukaranan sa atong tinuohan, ug ang tawo labi nga maduol sa Dios pinaagi sa pagsunod sa iyang mga lagda, kay sa bisan hain nga basahon” (Mga Pagtulun-an sa mga Presidente sa Simbahan: Joseph Smith [2007], 75).

Presidente Ezra Taft Benson: “Ang Basahon ni Mormon wala lamang magtudlo kanato sa kamatuoran, bisan kon sa tinuod naghimo kini niana. Dili lamang nga ang Basahon ni Mormon nagpamatuod ni Kristo, bisan kon sa tinuod naghimo kini usab niana. Apan adunay mga butang nga mas labaw pa. Adunay gahum niana nga basahon nga mosugod sa pagdagayday diha sa inyong mga kinabuhi sa higayon nga sugdan ninyo ang tinuoray nga pagtuon sa basahon. Makaplagan ninyo ang mas dakong gahum sa pagsagubang sa tintasyon. Makaplagan ninyo ang gahum sa paglikay sa panglingla. Makaplagan ninyo ang gahum nga magpabilin sa higpit og pig-ot nga dalan. Ang mga kasulatan mao ang gitawag og ‘ang mga pulong sa kinabuhi’ (D&P 84:85), ug walay dapit nga mas tinuod pa niana kay sa Basahon ni Mormon. Kon kamo magsugod sa pagkagutom ug pagkauhaw niadto nga mga pulong, kamo makakaplag sa kinabuhi nga mas buhong” (Mga Pagtulun-an sa mga Presidente sa Simbahan: Ezra Taft Benson [2014], 169).

Presidente Gordon B. Hinckley: “Mga kaigsoonan, sa walay pagpanagana mosaad ko ninyo nga kon mainampoon kamong mobasa sa Basahon ni Mormon, sa walay pagtagad kon kapila na ninyo kini nabasa, moabut diha sa inyong kasingkasing ang dugang nga pagbati sa Espiritu sa Ginoo. Dunay moabut nga lig-ong paghukom nga maglakaw nga magmasulundon sa iyang mga sugo, ug moabut ang mas lig-on nga pagpamatuod sa buhi nga reyalidad sa Anak sa Dios” (Mga Pagtulun-an sa mga Presidente sa Simbahan: Gordon B. Hinckley [2016], 272).

Presidente Russell M. Nelson: “Minahal kong mga igsoon, mosaad ko kaninyo nga kon mainampoon kamo nga magtuon sa Basahon ni Mormon kada adlaw, makahimo kamo og mas maayong mga desisyon—kada adlaw. Mosaad ako nga kon mamalandong kamo sa unsay inyong gitun-an, ang mga bintana sa langit mobukas, ug makadawat kamo sa mga tubag sa inyong mga pangutana ug direksyon sa inyong kinabuhi. Mosaad ko nga kon inyong isub-sob ang inyong kaugalingon sa Basahon ni Mormon, mapanalipdan kamo batok sa mga dautan niining panahona, bisan ang grabing pagtakboy sa pornograpiya ug sa ubang matang sa adiksyon” (“Ang Basahon ni Mormon: Unsa Kaha ang Imong Kinabuhi Kon wala Kini?” Liahona, Nob. 2017, 62–63).