“Mga Ideya sa Pagpalambo sa Imong Personal nga Pagtuon sa Kasulatan,” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Mga Ideya sa Pagpalambo sa Imong Personal nga Pagtuon sa Kasulatan,” Dali, Sunod Kanako—Alang sa mga Indibidwal ug mga Pamilya: 2020
Mga Ideya sa Pagpalambo sa Imong Personal nga Pagtuon sa Kasulatan
Aniay pipila ka yanong mga paagi sa pagpalambo sa imong pagtuon sa pulong sa Dios diha sa mga kasulatan.
Pangitaa ang mga Kamatuoran mahitungod ni Jesukristo
Ang mga kasulatan nagtudlo kanato nga ang tanang mga butang nagpamatuod ni Kristo (tan-awa sa 2 Nephi 11:4; Moises 6:63), mao nga pangitaa Siya diha sa mga panghitabo, mga istorya, ug mga pagtulun-an sa Basahon ni Mormon. Ikonsiderar ang pagbutang og timaan o pagmarka sa mga bersikulo nga nagtudlo mahitungod sa Manluluwas ug unsaon sa pagsunod Kaniya.
Pangitaa ang Makapadasig nga mga Pulong
Makita nimo nga ang pihong mga pulong ug hugpong sa mga pulong diha sa mga kasulatan makadani kanimo, sama nga kini gisulat alang kanimo. Posibling bation nimo sa personal nga haum kini ug magdasig ug mag-awhag kanimo. Ikonsiderar ang pagmarka niini diha sa imong mga kasulatan o pagsulat niini sa study journal.
Pangitaa ang mga Kamatuoran sa Ebanghelyo
Usahay ang mga kamatuoran sa ebanghelyo (sa kasagaran gitawag nga doktrina o mga baruganan) direkta nga gipahayag, ug usahay gipasabut pinaagi sa ehemplo o istorya. Pangutan-a ang imong kaugalingon, “Unsa nga mahangturong mga kamatuoran ang gitudlo niini nga mga bersikulo?”
Paminaw sa Espiritu
Bantayi ang imong mga hunahuna ug mga pagbati, bisan og kini walay kalabutan sa unsay imong gibasa. Kadto nga mga impresyon tingali mao gayud ang mga butang nga gusto sa Langitnong Amahan nga imong makat-unan.
Ipahisama ang mga Kasulatan sa Imong Kinabuhi
Ikonsiderar sa unsa nga paagi nga ang mga istorya ug mga pagtulun-an nga imong gibasa magamit sa imong kinabuhi. Sama pananglit, mahimo nimong pangutan-on ang imong kaugalingon, “Unsa nga mga kasinatian ang akong nasinati nga susama sa unsay akong nabasa?” o “Unsaon nako sa pagsunod ang ehemplo niini nga tawo diha sa mga kasulatan?”
Pangutana samtang Ikaw Magtuon
Samtang magtuon ka sa mga kasulatan, tingali dunay mosulod nga mga pangutana sa hunahuna. Tingali kini nga mga pangutana may kalabutan sa unsay imong gibasa o sa imong kinabuhi sa kinatibuk-an. Pamalandungi kini nga mga pangutana ug pangita og mga tubag samtang magpadayon ka sa pagtuon sa mga kasulatan.
Gamita ang Mga Tabang sa Pagtuon sa Kasulatan
Aron makakuha pa og dugang nga panabut sa mga bersikulo nga imong gibasa, gamita ang mga footnote, ang Giya ngadto sa mga Kasulatan ug ubang mga tabang sa pagtuon.
Hunahunaa ang Konteksto sa mga Kasulatan
Makakita ikaw og makahuluganong mga panabut [pagtulun-an] mahitungod sa usa ka kasulatan kon hunahunaon nimo ang konteksto niini—ang mga kahimtang o ang palibut [panghitabo] sa kasulatan. Sama pananglit, ang pagkahibalo sa kaagi ug mga gituohan sa katawhan nga gisulti sa usa ka propeta makatabang kanimo sa pagsabut sa tuyo sa iyang mga pulong.
I-rekord ang Imong mga Hunahuna ug mga Pagbati
Adunay daghang mga paagi nga marekord ang mga impresyon nga moabut samtang ikaw magtuon. Pananglit, mahimo nimong markahan ang makahuluganong pulong o hugpong sa mga pulong ug irekord ang imong mga hunahuna isip usa ka pahinumdom sa imong mga kasulatan. Mahimo usab nga maghimo ka og journal sa mga panabut [pagtulun-an], mga pagbati, ug mga impresyon nga imong nadawat.
Tun-i ang mga Pulong sa mga Propeta ug Apostoles sa Ulahing mga Adlaw
Basaha unsay gitudlo sa mga propeta ug mga apostoles sa ulahing mga adlaw mahitungod sa mga baruganan nga imong makit-an diha sa mga kasulatan (sama pananglit, tan-awa sa conference.ChurchofJesusChrist.org ug sa mga magasin sa Simbahan).
Ipakigbahin ang mga Panabut [Pagtulun-an]
Ang paghisgot sa mga panabut gikan sa imong personal nga pagtuon dili lamang usa ka maayong paagi sa pagtudlo sa uban, apan makatabang usab kini nga malig-on ang imong pagsabut sa unsay imong nabasa.
Buhata Unsay Imong Makat-unan
Ang pagtuon sa kasulatan dili angay nga modasig lang kanato apan mogiya usab kanato sa pamaagi sa atong pagpakabuhi. Paminaw sa unsay giaghat sa Espiritu kanimo sa pagbuhat unsay imong nabasahan, ug dayon ipasalig ang pagbuhat niadtong mga pag-aghat.
Si Presidente Russell M. Nelson miingon: “Kon kita ‘mopadayon sa unahan, magbusog sa pulong ni Kristo, ug molahutay hangtud sa katapusan, … [kita] makabaton og kinabuhi nga dayon’ [2 Nephi 31:20].
“Ang pagbusog nagpasabut og labaw pa sa pagtilaw. Ang pagbusog nagpasabut og pagtagamtam. Atong tagamtamon ang mga kasulatan pinaagi sa pagtuon niini diha sa diwa sa maanindot nga pagdiskubre ug sa matinud-anon nga pagsunod. Kon kita magbusog sa mga pulong ni Kristo, matisok kini ‘diha sa [undanong] mga papan nga mga kasingkasing sa tawo’ [2 Mga Taga-Corinto 3:3]. Mahimo na kining mahinungdanong bahin sa atong kinaiyahan” (“Living by Scriptural Guidance,” Ensign, Nob. 2000, 17).