“Ang Paggamit sa Dali, Sunod Kanako—Alang sa mga Indibidwal ug mga Pamilya,” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Ang Paggamit sa Dali, Sunod Kanako—Alang sa mga Indibidwal ug mga Pamilya,” Dali, Sunod Kanako—Alang sa mga Indibidwal ug mga Pamilya: 2020
Ang Paggamit sa Dali, Sunod Kanako—Alang sa mga Indibidwal ug mga Pamilya
Para Kang Kinsa Kini nga Kapanguhaan?
Kini nga kapanguhaan gihimo alang sa matag indibidwal ug pamilya diha sa Simbahan. Gihimo kini aron matabangan kamo nga makat-on sa ebanghelyo—sa imo man nga kaugalingon o kauban sa imong pamilya. Kon dili regular ang imong pagtuon sa ebanghelyo kaniadto, kini nga kapanguhaan makatabang nimo nga makasugod. Kon ikaw aduna nay maayong kinaiya sa pagtuon sa ebanghelyo, kini nga kapanguhaan makatabang nimo nga makabaton og mas makahuluganong mga kasinatian.
Unsaon Nako sa Paggamit Niini nga Kapanguhaan?
Gamita kini nga kapanguhaan sa bisan unsang paagi nga makatabang kanimo. Makita nimo kini nga makatabang isip giya o tabang alang sa personal ug pamilya nga pagtuon sa kasulatan. Magamit usab nimo kini alang sa family home evening. Ang mga gilatid [outline] naghatag og dugang nga importansya sa mga baruganan nga makita sa Basahon ni Mormon, nagsugyot og mga ideya ug mga kalihokan alang sa mga indibidwal ug mga pamilya, ug mohatag og mga luna sa pagrekord sa imong mga impresyon.
Ikaw ug ang imong pamilya nagtuon na tingali sa ebanghelyo kanunay. Sama pananglit, tingali nagtuon ka og mga kasulatan gawas sa Basahon ni Mormon alang sa klase sa seminary o institute. Ang Dali, Sunod Kanako—Alang sa mga Indibidwal ug mga Pamilya wala itumong nga ipuli o pagkompetensya sa maayong mga butang nga imong gibuhat. Tingali adunay mga paagi sa pagkat-on gikan sa Basahon ni Mormon sa regular nga paagi ug sa gihapon matuman pa gyud ang uban nimong tumong sa pagtuon sa kasulatan. Sama pananglit, pwede nimong ipadayon ang pagbasa sa basahon sa kasulatan alang sa imong personal nga pagtuon sa kasulatan ug pagbasa sa Basahon ni Mormon kauban sa imong pamilya (o vice versa). Sunda ang giya sa Espiritu sa pagtino unsaon sa paghimo ang imong kaugalingong pagtuon sa pulong sa Dios.
Sa Unsa nga Paagi Kini nga Kapanguhaan may Kalabutan sa Unsay Mahitabo didto sa Simbahan?
Ang gilatid [outline] niini nga kapanguhaan giorganisar sumala sa sinemana nga iskedyul sa pagbasa. Ang Dali, Sunod Kanako—Alang sa Primary ug ang Dali, Sunod Kanako—Alang sa Sunday School magsubay sa parehas nga iskedyul. Aron masuportahan ang imong mga paningkamot sa pagkat-on ug pagsunod sa ebanghelyo diha sa panimalay, ang imong mga magtutudlo sa simbahan mohatag kanimo og mga oportunidad sa pagpaambit sa imong mga kasinatian, mga hunahuna, ug mga pangutana mahitungod sa mga tudling sa kasulatan nga imo nang gitun-an sa balay.
Tungod kay ang Sunday School kaduha ra man itudlo sa usa ka bulan, ang magtutudlo sa Sunday School makapili ra kon iyang laktawan o itipon ang mga latid [outline] aron makasunod sa sinemana nga iskedyul. Kini gikinahanglan usab sa mga semana diin ang regular nga mga miting sa Simbahan dili mapahigayon tungod sa komperensya sa stake o ubang mga hinungdan. Atol niining mga semanaha gidapit ka sa padayong pagtuon sa Basahon ni Mormon diha sa panimalay.
Kinahanglan ba Akong Mosunod sa Iskedyul?
Ang iskedyul makatabang nimo aron mahuman ang pagbasa sa Basahon ni Mormon sa tibuok nga tuig. Agig dugang, ang pagsunod sa sama nga iskedyul sama sa uban diha sa imong ward mosangput sa makahuluganong kasinatian sa simbahan. Apan ayaw batia nga nahigtan ka sa iskedyul; giya lamang kini aron matabangan ka sa pagpahaum [sa gipaspason] sa imong kaugalingon. Ang importante nga butang mao nga ikaw nakat-on sa ebanghelyo sa indibidwal ug isip pamilya.