pamilya nga nagtuon sa mga kasulatan

Mga Ideya sa Pagpalambo sa Inyong Pamilya nga Pagtuon sa Kasulatan

Ang kanunay nga pagtuon sa kasulatan diha sa pamilya usa ka gamhanan nga paagi sa pagtabang sa inyong pamilya nga makat-on sa ebanghelyo. Ang kadaghan ug ang kadugayon sa inyong pagbasa isip pamilya dili sama kaimportante kay sa pagkakanunay sa inyong mga paningkamot. Kon himoon ninyo ang pagtuon sa kasulatan nga importante nga bahin sa kinabuhi sa inyong pamilya, matabangan ninyo ang mga sakop sa inyong pamilya nga mas mahiduol kang Jesukristo ug motukod sa ilang mga pagpamatuod sa pundasyon sa Iyang pulong.

Ikonsiderar ang mosunod nga mga pangutana:

• Unsaon nimo sa pag-awhag ang mga sakop sa pamilya sa pagtuon sa mga kasulatan sa ilang kaugalingon?

• Unsay imong mabuhat sa pag-awhag sa mga sakop sa pamilya nga mopakigbahin unsay ilang nakat-unan?

• Unsaon nimo sa paghatag og gibug-aton sa mga baruganan nga imong nakat-unan sa Basahon ni Mormon sa matag adlaw nga kahigayunan sa pagtudlo?

Hinumdumi nga ang panimalay mao ang maayong dapit sa pagkat-on sa ebanghelyo. Makat-on ka ug makatudlo sa ebanghelyo sa panimalay sa mga paagi nga dili posible sa klase sa Simbahan. Paghunahuna og mga maayong paagi nga matabangan ang imong pamilya sa pagkat-on gikan sa mga kasulatan. Gamita ang mosunod nga mga ideya sa pagpalambo sa inyong pamilya nga pagtuon sa kasulatan.

Paggamit og Musika

Manganta og mga kanta nga mosuporta sa mga baruganan nga gitudlo diha sa mga kasulatan. Ang Apendiks D niini nga kapanguhaan naglakip og musika nga may kalabutan sa mga doktrina diha sa sinemana nga latid [outline].

lalaki ug batang babaye nga nagtuon sa mga kasulatan

Magpaambit og Makahuluganong mga Kasulatan

Hatagi og panahon ang mga sakop sa pamilya sa pagpaambit og mga tudling sa kasulatan nga ilang nakit-an nga makahuluganon panahon sa ilang personal nga pagtuon.

Gamita ang Imong Kaugalingon nga mga Pulong

Dapita ang mga sakop sa pamilya sa pag-summarize sa ilang kaugalingong mga pulong unsay ilang nakat-unan gikan sa mga kasulatan nga imong gitun-an.

Gamita ang mga Kasulatan sa Imong Kinabuhi

Human makabasa og tudling sa kasulatan, hangyoa ang mga sakop sa pamilya sa pagpaambit og mga paagi nga magamit ang mga tudling diha sa ilang kinabuhi.

Pangutan-a

Dapita ang mga sakop sa pamilya sa pagpangutana og usa ka pangutana mahitungod sa ebanghelyo, ug dayon gahini og panahon nga mangita og mga bersikulo nga makatabang og tubag sa pangutana.

Ipakita ang usa ka Kasulatan

Pagpili og usa ka bersikulo nga makahuluganon kanimo, ug i-display kini sa dapit nga makita kanunay sa mga sakop sa pamilya. Dapita ang ubang mga sakop sa pamilya nga magpuli-puli sa pagpili og kasulatan nga ipakita.

Paghimo og Listahan sa Kasulatan

Isip pamilya, pagpili og pipila ka mga bersikulo nga gusto nimong hisgutan sa umaabut nga semana.

Sag-uloha [memoryaha] ang mga Kasulatan

Pilia ang usa ka tudling sa kasulatan nga makahuluganon sa imong pamilya, ug dapita ang mga sakop sa pamilya nga sag-ulohon kini pinaagi sa pagbalik-balik og basa niini kada adlaw o paghimo og dula sa pagsag-ulo.

Pakigbahin og mga Leksyon nga Maggamit og Butang

Pangita og mga butang nga may kalabutan sa mga kapitulo ug mga bersikulo nga inyong gibasa isip pamilya. Dapita ang mga sakop sa pamilya sa paghisgot kon sa unsa nga paagi nga ang butang may kalabutan sa mga pagtulun-an diha sa mga kasulatan.

Pagpili og usa ka Hilisgutan

Papuli-puliha ang mga sakop sa pamilya sa pagpili og hilisgutan nga tun-an sa tibuok pamilya. Gamita ang Giya ngadto sa mga Kasulatan (scriptures.ChurchofJesusChrist.org) sa pagpangita og mga tudling sa kasulatan mahitungod sa hilisgutan.

Pagdrowing og Litrato

Basaha ang pipila ka bersikulo isip pamilya, ug dayon hatagi og panahon ang mga sakop sa pamilya sa pagdrowing og butang nga may kalabutan sa unsay inyong gibasa. Paggahin og panahon sa paghisgot sa gidrowing sa usag usa.

I-drama Kini nga Istorya

Human mabasa ang istorya, dapita ang mga sakop sa pamilya sa pag-drama niini. Pagkahuman, hisguti kon sa unsa nga paagi may kalabutan ang istorya sa mga butang nga nasinati sa indibidwal ug isip pamilya.

Si Elder David A. Bednar mitudlo: “Ang matag pamilya nga pag-ampo, ang matag hitabo sa pamilya nga pagtuon sa kasulatan, ug ang matag family home evening usa ka badlis diha sa hulagway sa atong mga kalag. Walay usa ka panghitabo nga makita nga madanihon kaayo o halandumon. Apan sama sa yellow ug sa gold ug brown nga mga linya sa pintal nagtinabangay sa usag usa ug nimugna og usa ka makadani kaayo nga buhat sa kahanas, mao nga ang atong pagkamakanunayon sa paghimo og daw gagmay nga mga butang modala ngadto sa mahinungdanong mga sangputanan nga espiritwal” (“Labaw nga Makugihon ug Mabuhaton diha sa Panimalay,” Liahona, Nob. 2009, 20).