Pagtudlo sa Gagmayng mga Bata

Kon ikaw dunay gagmayng mga bata sa imong pamilya, aniay pipila ka mga kalihokan nga makatabang nila sa pagkat-on:

• Manganta. Ang Mga Himno ug mga awit gikan sa Songbook sa mga Bata magtudlo og doktrina sa impluwensyal kaayo nga paagi. Gamita ang indeks sa hilisgutan diha sa luyo sa Songbook sa mga Bata aron mangita og mga kanta nga makasaysay sa mga baruganan sa ebanghelyo nga imong gitudlo. Tabangi ang imong mga anak nga makasaysay sa mga mensahe sa mga kanta diha sa ilang kinabuhi. Sama pananglit, mahimo kang mangutana mahitungod sa mga pulong o hugpong sa mga pulong diha sa lyrics. Agig dugang sa pagkanta, ang imong mga anak makahimo og mga aksyon nga moduyog sa mga kanta o maminaw sa mga kanta isip background nga musika samtang nagbuhat sila sa ubang mga kalihokan.

• Paminawon o i-aksyon ang usa ka istorya. Ang gagmayng mga bata ganahan og mga istorya—gikan sa mga kasulatan, gikan sa imong kinabuhi, gikan sa kasaysayan sa Simbahan, o gikan sa mga magasin sa Simbahan. Pangita og mga paagi sa pag-apil nila sa pagsugilon og usa ka sugilanon. Mahimo silang mogunit sa mga litrato o sa mga butang, modrowing og mga litrato sa unsay ilang nadungog, i-aksyon ang sugilanon, o gani motabang sa pag-istorya sa sugilanon. Tabangi ang imong mga anak nga makaila sa mga kamatuoran sa ebanghelyo sa mga istorya nga imong ipaambit.

• Pagbasa og kasulatan. Ang gagmayng mga bata tingali dili pa kaayo makamaong mobasa, apan mahimo gihapon nimo silang paapilon sa pagkat-on gikan sa mga kasulatan. Posibling gikinahanglan nimo ang pagtutok sa usa ka bersikulo, o importante nga mga pulong, o pulong. Tingali masag-ulo nila ang mubo nga mga pulong gikan sa mga kasulatan kon balik-balikon nila sa pipila ka higayon. Kon makadungog sila sa pulong sa Dios, mabati nila ang Espiritu.

• Tan-awa ang usa ka litrato o tan-awa ang usa ka video. Kon pakit-on nimo ang imong mga anak og litrato o video kalabut sa baruganan sa ebanghelyo o istorya sa kasulatan, pangutan-a sila og mga pangutana nga makatabang nila sa pagkat-on unsay ilang nakita. Sama pananglit, makapangutana ka, “Unsay nahitabo dinhi sa litrato o video? Unsay imong gibati niini?” Ang Gospel Library nga app, medialibrary.ChurchofJesusChrist.org, ug ang children.ChurchofJesusChrist.org maoy maayong mga dapit nga kapangitaan og mga litrato ug mga video.

• Maghimo. Ang mga bata makahimo, makadrowing, o makakolor og butang nga may kalabutan sa istorya o baruganan nga ilang gikat-unan.

• Moapil sa leksyon nga maggamit og butang [object lesson]. Ang usa ka yanong leksyon nga mogamit og butang makatabang sa imong mga anak nga makasabut og baruganan sa ebanghelyo nga lisud sabton. Kon mogamit og mga leksyon nga maggamit og butang, pangita og mga paagi nga makaapil ang mga bata. Mas makat-on sila gikan sa hiniusa nga kasinatian kay sa pagtan-aw lamang sa usa ka demonstrasyon.

• Magdrama-drama [role-play]. Kon idrama-drama sa mga bata ang usa ka sitwasyon nga lagmit nilang masugatan sa tinuod nilang kinabuhi, mas masabtan nila kon sa unsang paagi ang usa ka baruganan sa ebanghelyo magamit sa ilang kinabuhi.

• Ibalik-balik ang mga kalihokan. Ang gagmayng mga bata kinahanglang makadungog og mga konsepto sa makadaghang higayon aron masabtan kini. Ayaw kahadlok sa pagbalik-balik kanunay sa mga istorya o mga kalihokan. Sama pananglit, mahimo kang mopaambit og istorya sa kasulatan sa makadaghang higayon sa lain-laing paagi—pagbasa gikan sa mga kasulatan, pag-summarize sa imong kaugalingong mga pulong, pagpasalida og video, pagtugot sa imong mga anak pagtabang nimo sa pagsaysay sa istorya, pagdapit kanila nga i-aksyon ang istorya, ug uban pa.