Ang Pagkakabig Mao ang Atong Tumong

Ang katuyoan sa tanang pagkat-on ug pagtudlo sa ebanghelyo mao ang pagpalig-on sa atong pagkakabig ug pagtabang nato nga mas mahisama ni Jesukristo. Tungod niini nga rason, kon magtuon kita sa ebanghelyo, wala lang kita mangita og bag-ong impormasyon; gusto kitang mahimong “bag-o [nga] binuhat” (2 Mga Taga-Corinto 5:17). Nagpasabut kini sa pagsalig sa Langitnong Amahan ug ni Jesukristo aron matabangan kita sa pag-usab sa atong mga kasingkasing, sa atong mga panglantaw, sa atong mga buhat, ug sa ato gayud nga mga kinaiya.

Apan ang matang sa pagkat-on sa ebanghelyo nga makapalig-on sa atong pagtuo ug mosangpot ngadto sa milagro nga pagkakabig dili mahitabo diha-diha. Molapas pa kini sa lawak klasehanan ngadto sa kasingkasing sa indibidwal ug sa panimalay. Nagkinahanglan kini og kanunay, inadlaw nga paningkamot sa pagsabut ug pagsunod sa ebanghelyo. Ang tinuod nga pagkakabig nagkinahanglan sa impluwensya sa Espiritu Santo.

Ang Espiritu Santo naggiya nato ngadto sa kamatuoran ug nagsaksi niana nga kamatuoran (tan-awa sa Juan 16:13). Molamdag Siya sa atong mga hunahuna, mopalagsik sa atong mga panabut, ug motandog sa atong mga kasingkasing uban sa pagpadayag gikan sa Dios, ang tinubdan sa tanang kamatuoran. Ang Espiritu Santo molimpyo sa atong mga kasingkasing. Modasig Siya kanato og usa ka tinguha sa pagsunod sa kamatuoran, ug mohunghong Siya kanato sa mga paagi sa pagbuhat niini. Sa tinuod, “ang Espiritu Santo … magatudlo [kanato] sa tanang butang” (Juan 14:26).

Tungod niini nga mga rason, ang atong mga paningkamot sa pagsunod, pagkat-on, ug pagtudlo sa ebanghelyo, kinahanglan nga kita, una ug labaw sa tanan magtinguha nga ubanan sa Espiritu. Kini nga tumong kinahanglang modumala sa atong mga pagpili ug mogiya sa atong mga hunahuna ug mga aksyon. Kinahanglang tinguhaon nato ang bisan unsa nga magdapit sa impluwensya sa Espiritu ug pagsalikway sa bisan unsa nga moabug niana nga impluwensya—kay nasayud kita nga kon takus kita sa presensya sa Espiritu Santo, takus usab kita nga mopuyo sa presensya sa Langitnong Amahan ug sa Iyang Anak, si Jesukristo.